2. ciddi-ciddi oturub yuxarıdakı sahibsiz entryni oxudum. sonra dedim ki, axı niyə? müəllimlərə belə nifrətin səbəbi nə ola bilər? pis müəllim? sən pis bir müəllimə rast gəlmisənsə bu bütün müəllimlərin pis olması demək deyil. 3ildir 3fərqli kollektivlə çalışıram. hər il 150müəllim ilə tanış oluram. və onların ən azı 145-nin ən ali məqsədi cəmiyyətimizə dürüst,savadlı və sağlam insanlar verməkdir. bilmirəm hansı puldan,rüşvətdən gedir söhbət. biz sinif otağını belə öz əmək haqqımız ilə təmir edirik. sinifin çatmayan əşyalarını özümüz alırıq. elə bilirsiz özümüzə alırıq? əgər müəllim deyilsizsə, bir müəllimi heç vaxt anlaya bilməzsiz. sinif otağının əşyaları və qurluşu belə uşaqlara psixoloji təsir edir. biz onlara hər şeyin ən yaxşısını verməyə çalışırıq. 2-3 əlaçım var demək qaldı eradan əvvəldə. rəhbərlik hər həftə siniflərdə testlər keçirir. nəticəsi zəyif olan uşaqlara fakultativ dərslər təyin edilir. hər gün hər dərsin icmalını qurub,əlavə materiallar toplayıb,hər dərsə şəxsi iş kimi yanaşırıq. bütün problemləri kənara qoyub hər bir şagirdə şəxsiyyət kimi yanaşır, onların problemlərini özümüzünkündən daha böyük hesab edirik. və hər şeylə yanaşı bütün pedaqoji təlimlərdə iştirak etməli, özümüzü inkişaf etdirməli,hər gün daha çox biliyimizi artırmalıyıq. indi əvvəllər olduğu kimi öz ixtisasını mükəmməl bildin bəsdir-dövrü deyil. uşaq psixologiyasını,əqlixəstəlikləri, verbalizmdən tutmuş autizmdən əziyyət çəkən uşaqlaradək hər tip uşaqla çalışmağı öyrənməliyik. mənim bir sinifimdə autizmdən əziyyət çəkən uşaq var. mənim üçün ən çətin olan bilirsiz nədir? dərs müddətində onu digər uşaqlardan ayırmamaq. çünki belə etsəm, digər uşaqlarda ona qarşı paxıllıq yarana bilər,onu incidə bilərlər. mən isə ona daha çox diqqət ,qayğı vermək istəyirəm. müəllim təkcə elm öyrədən deyil. gərək 10gözün,10qulağın olsun. həm dərsi izzah edəsən,həm fasilitator,həm pedaqoq,həm psixoloq olasan. hələ yeri gəlir həkim də,valideyn də oluruq. uşağın ayaqqabısının ipinədək bağladığım olub. bu ən adisidir. hələ siz depressiv və əsəbi yeniyetmələrlə dil tapmaq üçün nələr etdiyimizi də bilmirsiz. nə əsəbləşə bilmirsən, nə də çox üz verə bilmirsən. o orta cizgini tutmalısan. onu tutanadək də bütün əsəblərin korlanır.
heç bir rüşvətlə də işə qəbul yoxdur. şəxsim adına deyirəm. imtahanla tam pulsuz işə qəbul olmuşam. 5min verənləri də çox görmüşəm. çoxu elə ortada pul davası edərək işsiz qalıb.
mən müəllim işlədiyim illərdə sadəcə bir şeyə şahid olmuşam. bu ölkədə təhsil sahəsində öz işini görən yalnız müəllimlərdir. qalanları palavra! bu qədər alçaldılmağa da layiq deyil müəllimlər. mən bilirəm. pis müəllimlər də var. çünki mənim də pis müəllimim olub. lakin mən təkcə onu görməmişəm. mən təmənnasız şagirdlərini sevən və onların həyatını xilas etməyə çalışan müəllimlərimi görərək böyümüşəm. mənim bir müəllimim olub. o insan qədər vicdanlı və xeyirxah insan mən heç zaman görmədim. o vicdanlı insan müəllim idi. dərs keçmədiyi uşaqları belə pulsuz universitetə hazırlayırdı. mən o insandan elmdən öncə müəllim olmağı öyrəndim.
ölkədə heç nə edə bilməyən insanlar müəllimləri təhqir edirlər. bu insanlar hələ öncə özlərini tərbiyə etməlidirlər. sonra müəllimlərə xitab edə bilərlər.
edit: bu dərs ilinin sonunda bu başlığa geri dönüb həyatımdakı ən böyük uğuru yazacam. azərbaycanda müəllim olmağın nə olduğunu yalnız onda anlayarsız deyə düşünürəm.