29. Getmək vaxtıdı, dostum,
bəsdir, dur dedin, getməyin, dedin hamıya
7 milyard "məlhəmin" arasında yaşaya-yaşaya
hələ də tənhalıq adlı xəstəlikdən sağalmırsansa
bu gözəllikdə Həyatdan
adicə rus alkaşının butulkadan aldığı həzzi almırsansa
neçə vaxtı sönüksənsə,
donuqsansa,
eynisənsə -
çoxalıb, azalmırsansa
getmək vaxtıdı, dostum, get!

Elə səssiz get ki,
varlığının qədrini bilməyənlər
yoxluğunda saç yolub, şivən salmasın;
elə qəfil get ki,
saxlamağa macal olmasın.
Eşq, bütün kainatın bir nəfərdə toplanmasıdır,
götür o bir nəfəri də çıx get buralardan,
gözün arxada qalmasın.

Getmək vaxtıdı, dostum,
dözmək zamanı keçdi
məsələni kökündən həll etmək vaxtıdı
iynə ilə gor eşmək,
bütün düyünləri bircə-bircə çözmək zamanı keçdi.

Düşünmə ki, sən getsən
bu torpaqlar bir də səndən bitirməyəcək
onsuz da görünmürdün,
qorxma,
sənin getməyinlə gözlər bir şey itirməyəcək.

Getmək vaxtıdı, dostum
otur bu gecəni sabahacan
bütün dərdlərini bir gecəyə çək, get
tənhalıq sənin alın yazındı onsuz da
ən yaxşısı, götürmə heç kimi özünlə,
tək yaşadığın kimi, elə tək get.

Getmək vaxtıdı, dostum,
get!