7. Sən demə 1923-cü ildə sovet hakimiyyəti azərbaycanda çoxarvadlılığı qadağan edəndə bəzi qadınlar etiraz etmişdi. Ola bilsin maddi səbəblərdən irəli gəlirdi. Çoxarvadlılığı mənimsəmiş bir kişinin (bu cür kişilər gəlir bölgüsünün yuxarı təbəqəsində olurdu) köləliyində (yaxud təhkimində) yaşayan qadın sosial-mədəni baxımdan ağır təzyiq altında olsa da, yaşayışı lazımınca təmin olunurdu; özlüyündə quldarlığa çox bənzər olan bu qurumun iqtisadi cəhətdən də oxşar cəhətləri var idi, hər ikisində də təhkim altında olan insanların ehtiyacları ödənilməlidir. Qul sağlamaq kimi arvad saxlamaq da xərcli işdir.

Hər nəysə, sözümün canı budur ki, azərbaycanda, müşahidələrimə görə, gender bərabərliyinə şüurlu formada qarşı çıxacaq qadınlar var. Bəzi qadınlar könüllü şəkildə bərabərlikdən imtina edəcək növdəndir. Aktivizmlə məşğul olan, mürtəceliyə etiraz edən qadınlara verilən reaksiya ən şiddətli və geniş formada qadınlardan gəlir. Tanıdığım gender bərabərliyinə tərəf duran insanların əksəriyyəti kişilərdir. Qadınlar qadın azadlığı məsələsində də geridə qalır. Proqressiv, sol ideyaları mənimsəməyə kişilər daha meyillidir. Bütün bu təhlillərimdən çıxardığım nəticələrim azərbaycan kontekstinə aiddir.