17. Gabriel Garcia Marquez tərəfindən yazılan, ölkəmizdə "yüz ilin tənhalığı" adı ilə nəşr olunan, XX əsrin ən çox səs gətirən əsərlərindən biri. Müəllifinə nobel mükafatı gətirən adıçəkilən əsər hadisələrin qarmaqarışıqlığı, obrazların ad oxşarlığı və dialoqun az təhkiyənin çox olduğuna görə oxuyucunu yormağı bacarsa da, bir çoxları tərəfindən şahəsər adlandırılmağa müvəffəq olmuşdur.

Romanda hadisələr Buendia nəslinin ətrafında cərəyan edir. Yazıçı əsər boyu Buendia nəslinin yaranması, yüksəlişi, qürubu və məhvini təsvir etmişdir. Nəslin nümayəndələri müəyyən əlamətlərinə görə biri-birindən fərqlənsələr də, onları birləşdirən ümumi bir cəhət var: tənhalıq. Yüz il boyunca tənhalıq xisləti nəslin hər nümayəndəsini ovucuna alır. Əsərdə olan Pilar Terneranın dediyi kimi "Tənhalıq Buendiaların qanına işləyib."

Bu yaxınlarda eşitdiyimə görə, Neftlix sözügedən əsəri ekranizasiya etmək istəyir. Fikrimcə, bu əsər film üçün ən mürəkkəb süjet xəttinə malik olan əsərlərdən biridir. 2 saat ərzində bu hadisələri izləyiciyə ötürmək qeyri-mümkündür. Çox güman ki, əsərdə təsvir edilən hadisələrin əksəriyyətini ixtisar edib daha sadə ssenari ilə izləyici qarşısına çıxacaqlar. Maraqla gözləyirəm.