20. Artıq öyrəşmişəm. Doğum günüm yeni ildən sonraya düşdüyü üçün, elə ad günüm əslində mənim üçün yeni il/yeni səhifə demək kimi bir şey olur. Çox az adam təbrik edir. Onlar da fb-də filan. Onu da silmişəm təzəlikcə, inanmıram kimsə dəhşət təbrik eləsin. Həm, yaş artıqca, romantizmdən uzaq olursan, həyat sənə bütün reallığı ilə nəyin nə olduğunu öyrədir. Hər dəfə geriyə dönüb baxanda sadəcə nələri etmisən, nələr qalıb, nələr edilə bilər deyə götür-qoy edirsən. Çünki, bizdən asılı olmayan və tükənən şeylər var: zaman və enerji. 18-20 arası, və ya 20-li yaşların başlarında dost, ailə çevrəndə etdiyin ad günündə, "gözlərini yum, arzu tut" dedikləri şeyləri 20-lərin sonlarına doğru artıq reallaşdırmalısan. Daha 30 yaşında birinə " görüm boyük oğlan/qız olasan" deməzlər. O, artıq böyük biridir. Ən yaxşı halda uzun ömür can sağlığı, evlidirsə, ailə səadəti arzulayarsan və nə arzuların varsa hamısını həyata keçirməyi diləyərsən.
Bir sözlə, ömür qısadır və ölüm adlı bir həqiqət var. Və doğum günlərimiz bizə əslində hər il ölümə bir addım daha yaxınlaşdığımızı göstərir.
Biraz qəmli entry oldu, amma indiki halımla bundan yaxşısı əlimdən gəlmir. Entry-ni oxuduqdan sonra, şamı söndürüb, arzu tutmağı unutmayın.