667. Üstündən artıq il(lər) keçib, amma hələ də bitmir bu lənətim.
Əllərimi kəsib doğradım, olmadı, sənin ola biləcəyin tozlu rəfləri eşələdi. Ayaqlarımı doğradım, olmadı, sənli səhralara doğru qaçdı. Ürəyimi dağladım, yenə olmadı, hər yerdə səni axtardı. Beynimi də söndürdüm, amma o yenə də səni seçdi.

illərin lənəti oldu, yapışdı qaldı üstümdə. Sənlə eyni yolda yeriyərkən, sənə çata bilmədim. Sən o yolda yoxsan, mən də artıq yeriyə bilmirəm.

Sənin dərin xaric hamısı soyuqdur mənə. Sənin saçlarından başqa o iy heç birindən gəlmir. Sənin gözlərin kimi qırpılıb, sənin dodaqların kimi gülmür.

O dırnaqlar kimi heç biri cırmaq atmır, ya da o əllər kimi heç biri sıxmır. Nə qədər temperaturu qaldır, yenə də sən qədər isitmir. Saatlarla uzat, sənli beş dəqiqə eləmir.

Hakim ola bilmirəm özüm-özümə. Sənlə bağlı söhbət açılan kimi, idarəetməni itirib, bir anda qəzaya uğrayıram mən. Heç bir ambulans gələ bilmir.

Heç kimi sən kimi görə bilmirəm, heç kimlə sən kimi danışa bilmirəm.

Bir günüm gecə oldu, düz səhərə qədər. Mən o stolun başında, sənə olan bütün hisslərimi onlarla butulkanın dibində basdırdığımı düşündüm. Amma yanılırammış.

Nə edirəmsə fərqi yoxdur, bu baş, bu boğaza bitişik olduğu müddətcə, ya səndən yazacaq bu əllər, ya da sənsizlikdən. Çünki sənə yaza bilmədi heç vaxt.

Səbəbi nə idi o gün etdiklərinin anlaya bilmirəm. Mən öz günahlarımın pəncəsində əzilərkən, sən öz günahını gərəklilik olaraq gördün. Ya da mənə elə gəlir.

Qırmızı şərabın dibindəki üzüm qırıntılarını çalxaladım. Mənə içəridən sənin adını yazdılar. Buz atdığım viskim sən olub buxarlandı. Üç günə bitməyən vodka butulkası, bir gecədə qurtardı.

Ən pisi bilirsən nə idi? Mən sənin hazırda necə olduğunu belə bilmirəm. Amma mənim nə olduğumu hər kəs bilir. Sən də bilirsən. Yalan danışma, bilirsən.

Hər kəsə, hər cür itliyi edərkən, sənə onu edə bilmədim. Hər şeydən yazdıran sən, özünə yazdırmadın. Hər zaman gülən sən, bir mənə gülmədin.

Həmişə yazdıran eşq, indi öldürməyə hazırlaşır. ikimiz bir qazana sığardıq da, bir mesaja sığmadıq.

Yuxularda görürəm, görüşürəm, amma oyananda heç nə olmur. Nə biləsən əşi.

Hündür dabanların altındakı kafeldən xəbərləri olmadı. Çexov heç bir yoldaşından yarımadı. 26 dəfə vurdular, üçü yalan imiş.

Bütün alçaltmalara avazım qədər bağırıb, bu nöqtədə susdum. Amma onu da son ana kimi bacarmadım.
Beynimdə basdırdığım onlarlasının yanına səni basdıra bilmədim. Sən hələ də ölməmisən. Mən isə, 2 dəfə öldüm.