894. son vaxtlar həmişəkindən daha artıq özüm haqqında mənfi fikirləşirəm. istər-istəməz depressiv düşüncələr, ifrat emosionallıq məndən əl çəkmir. ortada xəttimi itirməyə səbəb olan, hərəkətə keçməyə maneə yaradan və bu narahatlığımı əsaslandıran, aradan qaldırmalı olduğum bəzi məsələlər var.

fiziki olaraq zəifləmişəm, diqqətimi itirmişəm və maliyyə baxımından xeyli arxaya düşmüşəm. səhərlər yataqdan qalxmağa, yemək hazırlamağa, işə və ya dərsə getməyə ərinməyə başlamışam. söhbət zamanı insanları çox yola verməyə, hər hansı interaksiyadan qaçmağa və ya ümumiyyətlə orda olmamağa çalışıram. vacib işlərdən boyun qaçırmaq üçün israrla diqqət çəkən bir video, kino və ya oyunla beynimi məşğul tuturam. nə etməli olduğumu çox yaxşı bilirəm, amma yenə də yayınmağı seçirəm. nəticədə gələcək olanı gecikdirirəm və bu, işlərimi çox dala salır.

və hamısından savayı məndən asılı olmayan səbəbləri artıq hər səhvim üçün bəhanə etmək istəmirəm.

bu bir ay ərzində əksər sosial media platformalarından, xüsusilə telefon və kompyuterdən bacardığım qədər uzaq duracağam. yaddaşım zəif olduğundan, əksərən özümə söz verdiyim o anlardakı hisslərimi unuduram. həmin motivasiya heç olmamış kimi, tənbəllik və məsuliyyətsizlik adlandırdığım şeylərlə baş-başa qalıram. ona görə bura yazıram ki, bəlkə bu yazı, mənə bunları yazdıran hissi hər unudanda yenidən xatırladar.

bir ay içində düzəltmək, dəyişmək istədiyim bəzi hədəflərim var. planıma fiziki formamı və işimi dəyişmək, vitamin qəbulunu və çəkimi artırmaq, şəxsi inkişafıma təsir edəcək ən az bir kitab bitirmək, video oyunlarından uzaqlaşmaq və kinolara bağlanmamaq daxildir. fiziki vərdişlərimi artırmağı, rejimlə gəzməyi düşünürəm. bunu sonrasında qaçışa da çevirə bilərəm, ya da yenidən fitnessə gedə bilərəm.

bilirəm ki, bunların hamısı bir anda düzəlməyəcək və yenə büdrəyəcəyəm. amma vacib olan cəhd etməkdir.

özümü izolyasiya eləmirəm, sadəcə obsessiv olduğum məfhumlardan uzaq durmağa çalışıram. nəyə görə bu yola çıxdığımı, hansı sözləri verdiyimi, əsas planımın nə olduğunu bir daha özümə xatırlatmaq istəyirəm. özümü doğrultmaq istəyirəm.

mənə uğurlar arzulayın