95. Əsgər gedəcək şəxslərə tövsiyələr:

Gedərkən köhnə paltar geyinin. Özünüzlə maksimum 50 AZN-ə qədər nağd pul və çəkirsinizsə, 1 qutu siqaret aparın. Geyiminizi və hər şeyinizi dövlət təmin edəcək. Sizə verilən çantada (və ya qabda) diş fırçası, məcun, sabun, üz qırxan, köpük və s. hər şey var. Sizə verilən əşyalar sizi andiçmənizə qədər təmin edəcək. Andiçmədən sonra da ürəyiniz istəyən şeyləri gətizdirərsiniz.

ilk 3 ay gənc əsgərlik dövrünü keçəcəksiniz və ətrafınızda yalnız özünüz kimi gənc əsgərlər olacaq. Düşdüyünüz yerin komandirləri ilə əlaqədə olun, onlar sizə köməklik göstərəcəklər. Əsgərliyin, mənə görə, ən çətin tərəfi gənc əsgərlikdir. Andiçməyə qədər sıra meydanında təlim keçəcəksiniz (addım döyəcəksiniz). Çalışın, çəkməniz ayağınıza bir az boş olsun və dabanı yerə çırpmayın. Gənc əsgərlikdə maksimum tualet təmizləyib yer siləcəksiniz. Heç kimlə dalaşmayın, ilk gündən heç kimlə də həddindən artıq səmimiyyət qurmayın. Nə verilirsə yeyin və fikirləşməyin, yoxsa zəifləyərsiniz.

Gənc əsgərlikdə danışmaq və marketə getmək bir az çətindir. Siz çoxsunuz, komandirlər isə azdır. Həftədə 1 dəfə danışsanız, bəsdir. 3 aylıq gənc əsgərlikdən sonra bölünüb digər hərbi hissələrə gedəcəksiniz. Posta və ya briqadaya düşə bilərsiniz. Bölündükdən sonra gənc əsgərliyə nisbətən daha az əsgər olacaqsınız, bu səbəbdən telefonla danışmaq daha asan olacaq. Sizə maaş kartı veriləcək və bu kartla marketdən istədiyiniz şeyləri ala bilərsiniz. Mülki marketlər kimi, içində əsgərə lazım olan hər şey var.

Bölündükdən sonra tərxis olunana qədər günləriniz, əsasən, növbə və təlimlərlə keçəcək. Bacardığınız qədər növbəyə çıxmağa çalışın. Hər növbəyə çıxdığınız zaman 2 gününüz uçub gedir. Xüsusən qarovula çıxmağınızı tövsiyə edirəm; həm istirahət saatları çoxdur, həm də qarovula çıxan əsgərə hörmət qoyulur. Komandirlərlə bacardığınız qədər yaxşı münasibət qurmağa çalışın, amma pərdəni ortadan götürməyin. Əsgər yoldaşlarınıza kobudluq etməyin və sizə karşı olan kobudluq haqqında çəkinmədən şəxsi heyət üzrə komandir köməkçisinə bildirin. Əvvəlki vaxtlara baxmayın, indiki zamanda əsgəri sıxışdırmaq çox çətindir. Hər gün axşam yoxlamasında bədəninizə baxılır və temperaturunuz ölçülür. Sıxışdırmağın cəzası ağırdır və ən azı 2–3 ay həbsdən başlayır. Orduda bu dəqiqə sıxışdırılma halları, demək olar ki, yoxdur.

Hər ay təlimlər və atışlar olacaq, çalışın, buralarda vaxtınızı səmərəli keçirməyi bacarın. Əsgərliyin ağır tərəfi fiziki yox, psixolojidir. Əsgərlikdə vaxtınızın tez keçməsini istəyirsinizsə, işləməkdən qaçmayın. işləmək və növbəyə çıxmaq vaxtı tez bitirir. Nə qədər yayınmağa çalışsanız, bir o qədər ürəyiniz sıxılacaq. Çalışın, əziyyətdən həzz alın. Yeri gələcək, 1 əsgər yoldaşınıza görə saatlarla ayaq üstə gözləyəcəksiniz, "yat-qalx" oynayacaqsınız. Hər şeyi beyninizdə problem etsəniz, sizin üçün əsgərlik ağır olacaq. Sadəcə, nə deyirlərsə, onu edin və dərd çəkməyin. Bu günlər də gəlib keçəcək və inanın, nə ilk əsgər, nə də son əsgər sizsiniz, hamı bir gün tərxis olunub gedir.