Futuristik Bakı, Qafqazın vəhşi təbiəti, qədim kəndlər və yerli sakinlərin digər ölkələrdən gələn qonaqlara isti münasibəti Azərbaycanı səyahət üçün müstəsna və unudulmaz yerə çevirir. "Report" xəbər verir ki, bu barədə israilli jurnalist Tali Şteyn "Ynetnews" nəşri üçün yazdığı və Azərbaycana səfərindən təəssüratlarını bölüşdüyü məqaləsində qeyd edib. "Elə yerlər var ki, gözəlliyi ilə insanı valeh edir.
Azərbaycan və onun paytaxtı Bakı birmənalı olaraq onlardan biridir", - Şteyn yazıb. Jurnalistin sözlərinə görə, qədim memarlıqla müasir binaların harmonik uyğunlaşması Bakıya xüsusi gözəllik bəxş edir. O, Heydər və "Təzəpir" məscidlərini, Heydər Əliyev Mərkəzini, Xalça Muzeyini, Dənizkənarı Bulvarı və Alov Qüllələrini qeyd edərək, paytaxtın xüsusilə axşam saatlarında möhtəşəm göründüyünü vurğulayıb.
Müəllif Azərbaycan paytaxtının kosmopolit atmosferinə, müasir otellərinə, rəngarəng yerli və beynəlxalq mətbəxinə də diqqət yetirib. Onun sözlərinə görə, armudu stəkanlarda verilən ənənəvi çay, zəngin açılmış süfrələr və qonaqları səmimiyyətlə qarşılayan sakinlərin təbəssümü şəhər haqqındakı təəssüratları tamamlayır. Paytaxtdan kənara edilən səyahət də müəllifdə heç də az təəssürat yaratmayıb.
"Azərbaycanın təbiətini yaxından kəşf etməyin ən yaxşı yolu keçilməz ərazilərdə macəralı səyahətə çıxmaqdır", - müəllif yazıb. Jurnalist zolaqları qırmızı, çəhrayı, bənövşəyi, ağ və sarı çalarlara boyanmış rəngarəng Xızı dağlarını xüsusilə vurğulayıb. O, palçıq vulkanları zonasındakı qeyri-adi landşaftı fantastik filmin dekorasiyaları və Marsın səthi ilə müqayisə edib.
"Məndə güclü təəssürat yaradan daha bir yer təqribən 2,3 min metr yüksəklikdə yerləşən Xınalıq kəndi oldu. Bu, dünyada ən qədim yaşayış məskənlərindən biridir və onun sakinləri unikal mədəniyyəti, dili və ənənələrini böyük qayğı ilə qoruyub saxlayırlar", - məqalədə bildirilib. Şteyn həmçinin xatırladıb ki, Xınalıq və onun sakinlərinin mövsümi köç marşrutu 2023-cü ildə UNESCO-nun Ümumdünya İrs Siyahısına daxil edilib.
Şteyn Quba rayonunda dağ yəhudilərinin kompakt şəkildə yaşadığı Qırmızı Qəsəbəyə xüsusi diqqət çəkib. Jurnalist qeyd edib ki, yerli yəhudi icması müsəlmanlarla harmoniya içində yaşayır və onun bir çox nümayəndələrinin İsraildə qohumları var. Müəllif həmçinin Azərbaycan və İsrail arasındakı uzunmüddətli və sıx münasibətləri də xatırladıb.
Extract — continue reading at the source.
