28 oktyabr 2020 ermənistanın bərdəyə raket hücumu

"Varmı bundan da o yanası" deyəndə bizi təəccübləndirməyən mötəbər qonşularımızın törətdiyi müharibə cinayəti. Amma təəssüf ki, camaat (başqa millətlərin əksər nümayəndələri) Polşada abort haqlarının limitlənməsinə ağlaşsa da, buna qoz qoymur. Əşi, kimin vecinə 21 adam ölüb, 70 adam yaralanıb. Kimin vecinə ata uşağının orqanlarını yerdən yığıb, uşağını xəstəxanaya aparmaq istəsə də, 7 yaşlı qızı qucağında keçinib. Ha bir də ermənilərin hər şeyə "fake news" peçatı yapışdırmaq istədiyi kimi buna da bu peçatı vurmaq istəmələri də var. Çönüb deyən yoxdur ki, "meymun baxar güzgüyə, adını qoyar özgəyə". A heç olmasa Şuşan Stepanyanın hərbi texnika partlayışı deyə vulkan püskürmə videosunu qoymağına baxın, utanın. Özüm canı dirəniblər ki, gəlin, bizi biçin. Birgə yaşamağa neytral yanaşan insanların belə beynini çöndərib "qanınıza bələnin" dedirdirlər. Sanki yaranı qaşıyıb, daha da bərk qanatmaq istəyirlər.

introvertlik

introvertlik anlayana nemətdir, anlamayana cəhənnəm. Daha doğrusu bir introvert cəmiyyətdə anlaşılmadığından ona cəhənnnəmi yaşadırlar. introvert özü özüylə vaxt keçirə bilən, özünü əyləndirə bilən xoşbəxt adamdır. Ba "aaa, tək kafedə necə oturursan?", "oy, nə qəribə? Mən sıxılardım" dediyiniz adamlar var e , bax, onlardır introvert. Bir bilsəniz bir küncdə sakitliyi dinləməyin, insanları müşahidə edib, izləməyin verdiyi zövqü.
introvertin mütləq şəxsi sahəsi olmalıdır. Baxın, vurğulayaraq deyirəm. MÜTLƏQ! Suyunu, yeməyini kəsin, amma şəxsi sahəsini onun əlindən almayın. Onun üçün heç kimin toxunmadığı, özü ilə vaxt keçirib enerjisini yenidən qazandığı şəxsi sahəyə sahib olmaq o qədər önəmlidir ki... introvert çox danışmaz, müşahidəçidir. Daha doğrusu yaxınlarının yanında özünü buraxan varlıqdır. Xəbərdarlıq: onu ilk dəfə yaxın kruqunun içində görsəniz, böyük ehtimal Çindən Amerikaya gəlmiş çinlinin yaşadığı kultura şoku effektində şok yaşayacaqsınız. Çünki o, orada artıq siz tanıdığınız adam halından çıxmış halda olacaq. Yəni ki, hər adamla da söhbəti tutmayan adam da deyə bilərik bu canlı növünə. Zatən bu xarabada hər adamla söhbət etmək məcburiyyəti nədir ki? Bəzən çoxlu adam olan yerlərdə həmin adamları belində daşıdığı yük kimi hiss edər, an etibarı ilə evə qaçmaq istəyər.
Bəziləri də sosial fobiyalı, təşviş pozuntulu, utancaq ola bilirlər. Bu da əksərən cəmiyyətdə sıxışdırılmaqdan yaranan bir şeydir. Başa düşün, yola verin. Uğurlar!

ana olmaq istəməyən qadın

Çox adamın eqoist adlandırdığı insan. Bu eqoist qrupa mən də daxiləm. Ətrafınızda uşaq sahibi olanların niyə uşaq sahibi olduğunu soruşun. Cavablar böyük ehtimal belə olacaq:
●Həyatımıza maraq qatmaq, həyata bizi tutundurmaq üçün
● Qocalanda tək qalmamaq, maddi baxımdan dəstəyi olmaq üçün
●"Nəsli davam etdirmək lazımdır" devizinə görə
Bir də bir qrup var. Özləri də bilmir ki, niyə uşaq peydahlayıblar. Baxsan, həyatı xaos içindədir. Amma "uşaq sahibi olmaq çox möhtəşəmdir, hamıya arzu edirəm, ehehe" edir. Balamsan, qarğışmı etdin, alqışmı?
indi oturun və bir düşünün. Depressiyanın ən çox yayılmış xəstəlik halına gəldiyi və doğulduğumuz gündən ölüm gerçəyiylə yaşadığımız dünyaya yuxarıda yazdığım səbəblərdən uşaq gətirməkmi eqoistlikdir ya gətirməməkmi? Yox yəni, o uşaq illah da özümüzün müqəddəs genlərimizdən olmalıdır? Məncə, doğmasanız, insan irqini xilas etmiş olacaqsınız, nəinki doğsanız.

sindirella kompleksi

Uşaq doğulan kimi ana,atasına "toyunu görəsən" deyilən ölkədə orta statistik Rasimin və yoldaşının qızını böyütmə stilinin nəticəsinə deyilir. Qızın ağlı kəsməyə başlayandan "sənə cehiz almışam" deyib xrustal stəkan, dəsmal, yorğan yığan ananın qızının əziyyət çəkdiyi sindromdur. Bir qızı fərd kimi görməyən insanlardır qızlarımızda bu halı yaradan. Qızlar da bacarıqlıdır, qızlar da yaradıcıdır. Qızlar da pul qazana bilir. Əmin olun ki, o evin kişisi dediyiniz adamdan belə daha güclü ola bilir. Qızlarınızı sadəcə bir az sərbəst buraxın. Buraxın ki, özlərini kəşf etsinlər. Bir insanın bacarıq səviyyəsini niyə ər qapazlayıb, uşaq doğmağa qədər endirirsiniz? Baxın, mən "ailə pisdir. Qadın ailəcanlı olmasın" demirəm. Amma ailə quracaqsa, şüurlu qursun, özü üçün bankomat və eşq seriallarında gördüyü romantik Arizona kərtənkələsinin axtarışında olmasın. Həyat, türk demiş "toz pembe" deyil. Sindirella sindromlu qızlarımızınsa bu həyata dözümü Sindrellanın xrustal ayaqqabısının zərbəyə dözümü qədərdir.Uşağınızı "ər çörəyi yeyəsən" deyə-deyə əzik böyütməyin. Qoy, özünün əri ola bilsin. Gözəl kişilərimiz, yaxşı adamsınız, amma bu güclü qadından qorxmağınız olmaya da. Yadda saxlayın, güclü qadını güclü kişi daşıya bilir. Möhtərəm Azərbaycan xalqına üzümü tutub demək istəyirəm ki, "ata canı, yaxşı adamlarsınız. Gic-gic adətləriniz də olmasa, olacaqsınız çiçək".

eşq

Sevgiylə niyə eyni bir şey olmadığını anlamadığım anlayış. Nəticədə biri ərəb, biri türkmənşəli sözdür. Nə qədər var olmadığını iddia etsələr də, nə qədər beynin, hormonların məhsulu olduğunu desələr də, #eşq mövcuddur. Onsuz bizim tək hormonlarla, beyinlə idarə edilən hissimiz eşq deyil ki. Bir şeyin hormonun təsirinin nəticəsi olmağı onun mövcud olmadığı demək deyil ki. Eşq tək cinsəllik deyil. Heç kimdə hiss etmədiyin doğmalıq hissini birinə qarşı hiss etməkdir. Nə olsa da, qıra bilmədiyin duyğusal bağdır. Ha, desəniz ki, eşq eqoist hisdir. Sevməyimizin də səbəbi var. Buna cavabım insanın zatən hər zərrəsinə qədər eqoist varlıq olduğu, fərd olaraq təbiətdə qalıb, genlərini ötürməyə çalışdığı olar. Varsın, eşq də eqoistlik olsun. Əsas hissi gözəldir.

lgbt təbliğatı

Bunu təbliğ adlandırmağı düz saymıram. Nəticədə "LGBTQA "-a aid olmayan şəxslər cəmiyyətdə norma sayıldığından bunun xüsusi təbliği aparılmır. Amma digər qismə qarşı qəbul edək ki, sıxışdırılma var. Cəmiyyət onları günah keçisi elan edir, ailələrini narahat edir, hətta işdən uzaqlaşdırır. indi çönün baxən, biz onlara sataşmasaq, bu təbliğat kimi gördüyümüz şeyi görərdik? Yox. Çünki bağıraraq "mən də varam" demək ehtiyacı duymayacaqdılar. Demirəm, hər bir fərdi mənə xoş gəlir. Xeyr. Amma ümumi götürsəm, "LGBTQA "-a aid olmayan şəxslərin hamısını sevmirəmsə, onların da hamısı sevməli deyiləm. Amma bu sevməmək şəxsiyyətlərinə görədir. Cinso seçimlərinə görə yox.