sovetlər deyəndə ağla gələnlər

mənim yadıma köçdüyümüz ev düşür. belə şirin bağçalı ev idi. həyəti rus səliqəsi ilə əkilmiş çiçəklər var idi, sonra həyətimizdə səki ilə bağı ayırmaq üçün rənglənmiş dəmirlərdən hazırlanmış kiçik hasarlar idi. hasar deyəndə qorxmayın, yeriyəndə topuqdan bir az yuxarı idi, amma bağı səkidən ayırırdı.
rus qonşularımız var idi. çox gec köçdülər onlar. hər pasxa və yeni il bayramında qəşəng hədiyyələr gətirirdi. gitara, val, rəngli palto, çəkmələr hədiyyə edirdi.
məktəbli formam var idi. ağ fartuxumu sevmirdim. tez çirklənirdi, qara geyinirdim. müəllimə də məni danlayırdı.
yeni il bayramlarında qar qız və şaxta babalar mənə nağıllardakı kimi görünürdü.
tramvaylar, trolleybuslar olurdu. gəzirdik şəhəri. buynuzlu avtobus şirin idi.
hələ ki, bunlar üçün çox darıxıram. qonşumuz zoya nənə üçün çox darıxıram. hər səhər idman edərdik onunla.
hə, bir də ən əsası o dövrün geyimləri üçün çox darıxıram. retrodur.

darıxmaq

boğazında düyünlənməkdir darıxmaq. udqunursan getmir, orda kök salıb sanki. ağlayırsan getmir. nabədə həzin bir musiqi çalsın lap dəli kimi olmaqdır darıxmaq. gözünün önündə kino kimi keçir hər şey. yadına düşməyən məqamları mahnı gətirir dilə. sanki səni oxuyur bu mahnı. xatirələrdir darıxmaq.

sonra başqa cür darıxmaq da var: lomkaçılıq deyirlər buna el arasında. təsirli deyil birinci tək, amma depressiv olursan, heç nə etmək istəmirsən. bu darıxmaqdan bir kino, bir dost söhbəti, maraqlı bir gəzinti səni qurtara bilir. mahnılar da o qədər acı vermir. bu darıxmağın içindən bir kimsə səni dartıb tez çıxarda bilir, amma birinci darıxmaqda dartılaraq çıxarılsan da o bataqlıqda olursan ruhən.

payız

puşkin mövsümü, sözün əsl mənasında, daha geniş mənada romantizmin baş qaldırdığı mövsüm. yaradıcılıq mövsümü. şeiriyyətə istək yaradan mövsümdür. kitablarını alıb, səssiz-səmirsiz bir dağa və ya sarı-qırmızı yarpaqlı ağaclarla bürünən bir daxmaya çəkilib, uzunca kitab oxumaq mövsümü. isti çayın tavana qalxan buxarından həvəslənərək kitabları səhifələmə istəyi verən mövsümdür bu mövsüm. çiskin bol yağışlı mövsümdür bu mövsüm.
ən nəhayət mənim sevimlimdir bu mövsüm və şirin oktyabrı özündə saxlayandır bu mövsüm-*

inflyasiya

inflyasiyanı loru dildə anam belə deyir: pulun bərəkəti yoxdur. bəli, pul bərəkətini itirirsə, buna iqtisadi dildə inflyasiya deyilir.
iqtisadi dildə inflyasiya isə: qiymətlərin bütün malların və xidmətlərin üzərində tədricən, yəni bala-bala qalxması və pulun öz alıcılıq qabiliyyətini itirməsidir. 20 il bundan qabaq fplanet 2 manata bütün ərzaq bazarını evə tökə bilirdisə, indi isə o, 2 manata 2 kilo alma ilə gəlir. heç alma şirəsini belə ala bilmir.

inflyasiya bazarda pulun çox olmasıdır. yəni, əhalinin əlində pulun çox olmasıdır. mərkəzi bank inflyasiyanı tənzimləyir deyəndə pul kütləsini bazardan yığır, yəni az pul çap edir. az pul, bazarda az tələbdir. və s., və i.

əksi deflyasiyadır. qiymətlər aşağı düşür, pul öz alıcılıq qabiliyyətini qazanır. yaponiya deflyasiya ilə məşhurdur dünyada.

müasir insanın ən böyük problemi

(baxma: ədalət.) yox, ədalət dayı və ya əmini demirəm. ədalət hissini deyirəm. mücərrəd hissi deyirəm. yoxdur o. görünmür o. hə, bilirəm, mücərrədlər görünmür fiziki olaraq, toxunmaq olmur onlara. amma elə mücərrədlər var ki, hiss edirsən, bəzən istəsən toxuna da bilirsən. amma müasir insanda bu hiss mücərrədlikdən də çıxıb. yuxularda da yoxdur. xəyal qurursan ədalət haqda və sonra güclü soyuq: bu dünyada ədalət axtarma" deyərək adamı kəsir. ən böyük qarabasmadır bu ədalətin olmaması. ancaq əmi və dayımız var: ədalət əmi/dayı.