1 may

Yoldaşlar,

Çox pis şeylərin çox ümidverici şeylərlə birlikdə baş verdiyi bu dünyada....

istismarın, qaragüruhun, faşizmin üstümüzü qara bulud kimi örtdüyü lakin bütün olanlara rəğmən milyonlarla işçinin, əməkçinin dünyanın dörd bir tərəfində təslim olmadığı, çıxış yolu axtardığı bir dünyada....

işçilərin yalnız əməklərini deyil gələcəyini əlindən alan istismarçılarla bu istismara qarşı çıxan, sosializm mübarizəsi aparanlar arasında mübarizənin səngimədiyi bir dünyada...

Hər bir işçini, zəhmətkəşi, gələcəyini alın təri ilə qazanmağa çalışan xalqı bizi istismar edən sistemə qarşı mübarizə aparmağa, işçinin səsi olmağa çağırırıq.

Bu səslənişimiz bayram təbriki deyil. Bayram təbriki olsa belə istər ölkəmizdə, istər dünyada işçilərin 1 Mayı bayram kimi qeyd etməsi üçün heç bir səbəb yoxdur. işçi sinfinin birlik, mübarizə və həmrəylik gününü bayram gününə çevirmək üçün, bu gözəl günə bayram abu-havası qatmaq üçün işçi sinifi bu gəminin sükanını ələ almalıdır. 1 May günü hər bir işçini, zəhmətkəşi, zəhmətkeşlərin yanında durmağı seçmiş tələbələri Azərbaycanın və dünyanın sinifsiz gələcəyinə olan inancımızı böyütməyə çağırırıq. Artıq susmaq vaxtı deyil, gələcəyimizi əlimizdən almağa çalışan kapitalist sistemə qarşı mübarizə aparmaq vaxtıdır.

işçinin səsi

Evlərimizdə, cəmiyyətdə, həyatımızda bizi əhatə edən bütün maddi nemətlərin yaradıcıları işçi sinfidir. Bütün kapitalist ölkələrində olduğu kimi Azərbaycanda da işçilər əzilir, ən təməl hüquqlarından məhrum edilirlər. Buna baxmayaraq hakim sinif tərəfindən həyata keçirilən təbliğat və manipulyasiyalar nəticəsində bir çox işçi, muzdlu əmək qarşılığında kapitalistə, sahibkara məxsus istehsal vasitələri və istehsal sahələrində işləyən şəxslər özlərini işçi olaraq dərk etmirlər, istismar olunduqlarını anlamırlar.

Təəssüf ki, bu gün Azərbaycanda işçilərin haqq səsini cəmiyyətə çatdıra biləcək heç bir azad media orqanı möcud deyil. “işçinin səsi” bu boşluğu doldurmaq, işçilərin səsi olmaq niyyətindədir!

Biz fəaliyyətimizlə işçi sinifinin problemlərini nümayiş etdirəcək, cəmiyyətimizdə və dünyada baş verən işçi etirazlarını işıqlandıracaq, işçi hüquqları sahəsində maarifləndirici faəliyyət göstərəcək, işçilərin problemlərini ictimailəşdirməyə çalışacaq, işçi sinfinin mübarizəsinin tarixini unutdurmamaq və mübarizəmizin nəzəri əsaslarını möhkəmləndirmək yönündə nəzəri işlər görəcək, işçi sinfinin səsi və proletar dünyagörüşünün təmsilçisi olacağıq.

işçi sinfinin xilası yalnız onun öz əllərindədir. Biz - işçi sinfinin sıravi nümayəndələri olaraq siyasi məsuliyyətimizi dərk edərək öz fəaliyyətimizlə gələcək birliyimizin qurulması yolunda addımlar atmağa cəhd göstəririk. Bu vacib, məşəqqətli və iftixarlı yolda hər bir işçidən, hər bir fəhlədən, hər bir kəndlidən yoldaşlıq dəstəyi gözləyirik.

Heç bir hökmdar, heç bir qəhrəman bizə öz haqqlarımızı əldə etməyə kömək etməyəcək, bizim bizdən başqa kimsəmiz yoxdur!