mübariz ibrahimov

öz inandığı yolla getmişdir. insanları şəxsi seçimlərinə görə yarğılamaq bizə düşməz, ancaq ki etdiyi hərəkət cəmiyyətə də təsir edirsə, bu barədə ümumi olaraq danışmaq olar. mübariz doğruluğuna inandığı şey uğruna ölmüşdür, amma onun üçün doğru olan başqalarına görə yanlış ola bilər. mənə görə də yanlışdır. islamda şəhidliyin bir çox növləri var. quranı oxumamışam düzü, şəhidliyin hansı məqamlarda verildiyini də tam olaraq bilmirəm. ancaq günahsız yerə öldürülən insanların şəhid olduğunu dəqiq bilirəm. qaldı ki şəhidliyə, bu sadəcə müsəlman aləmində var olan bir inancdır. o biri dinləri də göndərən tanrı niyəsə bu özəlliyi sadəcə müsəlmanlara bəxş etmişdir. hər nəysə.

müharibə şəraitində yaşayırıq, əsgərlərin orada nələr çəkdiyini, ən azından, mən bilə bilmərəm. bunu orada xidmət etmiş olan insanlar bilir. ona görə də fikrimin əksikliyini indidən dilə gətirib oxuyacağınız entryni buna görə oxumanızı istəyirəm.

mübarizin etdiyi hərəkət mənə görə yanlışdır, çünki günahsız o qədər insanın ölümünə səbəbiyyət verib və buna görə ona şəhidlik düşmür məncə. öldürülən düşmən ola bilər, ancaq 30 il əvvəl ən yaxın millət sayılırdı ermənilər, bəlkə 30 il sonra da yenə aralar düzələcək. onda nə olacaq? indi qəhrəman saydıqlarımızın çoxu o zaman birliyə xələl gəlməsin deyə pislənəcək və mən buna ikiüzlülük deyirəm.

düşünün ki evinizdə oturmusunuz və qonşunuz sizi öldürməyə gəlir. bu sırada siz onu öldürsəniz, haqlısınız, çünki məhrəm bölgənizə girib və sizə qarşı bəslədiyi hisslər heç də xoş deyil. bir də qonşuya nifrət etdiyiniz üçün onun evinə girib ailəsini gülləbaran etdiyinizi düşünün. məntiqə sığırmı? mənim məntiqimə sığmır. məncə, normal düşünə bilən insanın da məntiqinə sığmaz.

feysbuka baxıram, azərbaycanı oradakı insanlardan ibarət sananlar hamımızın ifrat dərəcədə milliyyətçi olduğumuzu düşünər. sözlüyə baxıram, fərqli düşünən beyinlər çoxdur. eləcə də əsgərlikdə də belədir. bizimki kimi ölkələrdə hərbi xidmət məcburi olduğu üçün orada öldürülən əsgərlərin içində bəlkə də məcburi "vətən borcunu" yerinə yetirməyə gələnlər, azərbaycana nifrət etməyənlər, ağıllı başla düşünən ermənilər də var idi. mübarizin bu hərəkəti aradakı nifrəti böyütməkdən başqa bir işə yaramadı. əlbəttə ki, gözünü qan bürümüş yeniyetmələrin də əlinə bayraq verdi. burada əslində günahkar təkcə mübariz deyil, onun nifrətlə böyüməsində rolu olan cəmiyyətimizdir, bəlkə də mübarizin burada heç bir günahı yoxdur. ona görə də irəlidə valideyn olacaqsınızsa, uşaqlarınıza nifrət aşılamayın lütfən. normal düşünə bilən övladlar böyütməliyik dünyanın yaxşılığını istəyiriksə. nifrət duyğusu insanın ali hisslərini duymasına əngəl olur.

t. s. eliot

modernist amerikan şairi. ezra pound kimi o da qürbətçi şairdir, çünki avropanın intellekt baxımından amerikadan öndə olduğunu düşünərək böyük britaniyaya köçmüş və oranın vətəndaşlığını qəbul etmişdir. müharibə sonrası dünyanın halına duyduğu kədəri əsərlərinə yansımışdır. ən çox bilinən və başqa şairlərə də ən çox təsir göstərən şeiri the waste landdir.
the love song of j. alfred prufrock adlı əsəri modernizm cərəyanının şedevri olaraq tanınır. son olaraq, şairin şeir yazarkən istədiyi mövzunu seçməyə haqqı var demişdir.

azəri yox azərbaycan türkü

azəri sözünün kökünü bizə iranlı müəlliməmiz belə başa salmışdı:
mevlana rumi deyəndə nə başa düşürük? mevlananın rumlu olduğunu. sondakı "i" hərfi onun hara mənsub olduğunu göstərir. yəni bir növ lı, li, lu, lü şəkilçisidir və bu "i" hərfi ərazi adlarına artırıla bilir. azər deyə bir ərazi olmadığına görə, mənsub olduğumuz regionun adı "azərbaycan" olduğuna görə, bəli, əslində bu səhvdir. ancaq bunun hansısa siyasi məsələyə aid olub-olmadığını bilmirəm.
azəri yox, azərbaycan türkü!!! - deyə biri məni niprav çıxardırsa, mən ona qayıdıb deyərəm ki, birinci öz ölkənə bax. öz ölkəndə harada görmüsən ki, "azərbaycan türkü" yazılsın? 20 yanvar metrosunun çıxışına gedin, hər yerdə "azəri mətbəxi" kimi yazılar görərsiniz. eynilə, fərqli bir ölkəyə gedin, orada yerlinizi tapsanız, sizə ilk olaraq verəcəyi sual: - azərisən? olacaq. heç kim azərbaycan türküsən? - deyə soruşmaz. bunu etsə-etsə ancaq turançılar, bozqurdçular edər. onların da bu məsələnin kökünü bilib-bilmədiyindən əmin deyiləm. sadəcə saxta milliyyətçilikləri ilə fəxr edib başqasını vətən xaini çıxartmağı bacarırlar.
bu söhbət bir az da qaradərililərin söhbətinə oxşayır. öz içlərində bir-birilərinə "nigga" deyə müraciət edirlər, ancaq ağdərili bunu deyəndə söyüş kimi qəbul olunur. əgər azəri yox, azərbaycan türkü olaraq tanınmaq istəyirsinizsə, əvvəlcə içinizdəki "azəriləri" təmizləyin, sonra türk olarsınız. yoxsa səhvini tutduğunuz insanlar sizə o 20 yanvardakı yazıları göstərəndə haqlı çıxma ehtimalınız sıfıra yaxındır.