bugün məsləhət təsadüfi
sözaltı sözlük
postlar Yoxlama mesaj

4cü böyük


92   0   0   0


blok başlıqlarını gizlət

Notice: Undefined variable: thisuser in /var/www/soz6/profilson.php on line 166
sözaltı günlük

Yaş da 29 oldu sözlük. Bugün 1 gün də gecikməli olsa, dostlarla tipik ad günü məclisində oturduq. Deyəcəksən ki, bundan mənə nə amk. Nə bilim, günlüksən də yazıb rahatlaşırıq. Evə mikrorayondakı köhnə sovet binalarının olduğu ara məhlələrlə qayıtdım. Binaları da rəngləyibləre ala. Köhnə melanxolik, boz, tutqun, sevdiyim mikrorayon da əldən çıxır uje. Rəng hara mən hara? Heyf deyil ağ-qara-boz üçbucağı? Nəysə. Qulağımda da Молчат Дома-nın Дома Молчат-ı.
Öz-özümə fikirləşdim ki, bu düşüncədən qurtulmağın yolu yoxdu. Şüküre həyat normal qaydasındadı. Amma düşüncələr adamı bezar edir. Deyəcəksən ki, normal mahnıları dinlə, düşüncələr də normal olsun. Elə bilirsən yoxlamamışam? Anlıq dağılışıb boz fikirlər. Sonra yenə qarabaqara gəlirlər. Bu işin axırı olmayacağına və birdəfəlik həll olunmağına dair nişanə gözləyirəm sanki. Bəlkə də həll olunub, amma mənim gic-gic və mənasız bir ouroboros ilanı kimi ümidim var. Ancaq məndə ilan özü-özünü yeyib bitirə bilmir. Axıra çatanda ümid yenidən əmələ gəlir. Bəlkə də nişanə budur ki, bu çəkdiklərin müvəqqətidi və ümidin axıra kimi olsun. Onu bilmirəm də brat. Daimidi yoxsa müvəqqətidi? Onu bilmirəm. Bilsəydim burda nə itim azırdı?

9 əjdaha! 4cü böyük

11.01.2025 - 23:22 #389544 mesaj facebook twitter

sevmək

Yaxşı hissdi. Hələ qarşılıqlı olanda dünyanın ən gözəl hissidiye, amma axırını yaxşı bitirə biləsən gərək. 2 gündən sonra 29 yaşım olacaq, qarşılıqlı sevginin həyatıma gətirdiyi kimi gözəl təəssüratları başqa heç yerdə yaşamamışam. Bəlkə də yaşamışam bilmirəm. Bəlkə də bu hiss məni o vaxtlar kor etdiyi üçün belə düşünürəm. 2021-dən əvvəl heç nəyə fikir verməyən, öz axarında işləyib, dostları ilə axşam görüşüb çay içən, boş vaxtlarında tarix oxuyan, filmlərə və seriallara baxan, video oyunlar oynayan, bir sözlə öz həyatını yaşayan biri idim. Sevgi söhbətləri bura qədər başıma gəlmişdi, ancaq o vaxtlar məktəbdə oxuyurdum, yeniyetmə idim, qarşılıq görməmişdim, ərgən ağlımla kədərlənib əsəbimi boşaltmışdım və bunlar bir müddətdən sonra adama bekara şeylərmiş kimi gəlirdi. Mən saydığımı sayırdım. Sonra elə biri çıxır ki insanın qabağına. Adamın həyatı və hissiyatı 180 dərəcə dəyişir. Özüdə bu proses tədricən və aramla baş verir. Müəyyən müddətdən sonra hiss edirsən ki, yo bu qarşılıqlı bir şeydi və həmin andan etibarən qarşıdakı insanla gələcəyini planlayırsan. Bu yolda müəyyən maneələr və əngəllər olur söz yox. Lakin 2 nəfər bunların öhdəsindən gələ bilər. Bizdə də belə olmuşdu. Həll edə-edə gedirdik problemləri. Amma bizə elə gəlirdi. Mən saydığımı sayırdım part 2. iki illik münasibətdə çox gözəl şeylər yaşatdım və yaşadım. Münasibət bitəndə təbii olaraq adama əsəb gəlir. Heç nədən hirslənməyə başlayırsan. Həyatında artıq onun olmadığını düşünüb qəmlərdən qəm, kədərlərdən kədər bəyənirsən. Şəhərə çıxa bilmirsən, çünki onunla bütün şəhəri gəzmisiz, gözəl kafelərdə oturmusuz, Bakının bütün pizzaçılarına birlikdə gedib ən yaxşı pizzanı hansı hazırlayır sualının cavabını tapmağı qərarlaşdırmısız və digər əyləncəli, maraqlı anlar yaşamısız. Şəhərə çıxa bilmirsən, çünki xatirələr hər yerdə üzünə çırpılır. 2023-dən sonra isə 2021-dən əvvəlki vəziyyətə qayıtdım. Ayrılıq sonrası müddəti o bilmirəm necə yaşayıb. Mən isə avtomatik olaraq çox əziyyət çəkdim. Yalan yox, arada stalkladım. Hamının etdiyi işləri gördüm qısaca. Əsəb və kədər arasında cycle yaşadım. Əsəbim ona yox, özümə idi ki, özünü bu vəziyyətə niyə salmısan. Amma edəcək bir şey yox idi, hissiyat gözəl, qarşıdakı şəxs isə ondan da gözəl idi. indiyə qədər heç kimə bəddua etməmişəm, ona da etmədim əlbəttə. Əksinə 2 il ərzində mənə yaşatdıqları üçün təşəkkür etdim. indi həmin insan ölkəmizdə deyil. Xəyallarının ardınca gedib və əladı bu. Təki hər şey istədiyi kimi olsun. Mənim də həyatım şükür olsun ki, yaxşı gedir. Sadəcə sevmək məsələsində bir qədər pessimist oldum. Onun kimi birinin qarşıma çıxıb-çıxmayacağını bilmirəm. Xülasə olaraq, sizə uyğun birini sevirsinizsə və sevilirsinizsə nə xoş sizə. Amma həmin şəxsi itirəndən sonra nə olur, nə baş verir, o sualın cavabını mən də bilmirəm. Yaşayarıq görərik.

13 əjdaha! 4cü böyük

08.01.2025 - 16:04 #389488 mesaj facebook twitter

in the air tonight

Phil Collins abimizin yazdığı və tarixin ən yaxşı intiqam mahnısı. Philin prog rock əfsanəsi Genesis qrupu ilə müvəqqəti ayrılığından sonra 1981-ci ildəki 'Face value' adlı ilk solo albomunun ilk mahnısıdır həm də. Mahnı 3:41-ci dəqiqəyə kimi sakit-sakit gedir. Bu dəqiqədə isə Phil collins drum-a bildiyin abanır və ən ikonik hissə başlayır. Sözlərin mənası haqqında da bir sıra uydurma var. Ən məşhuru Philin bir gecə vaxtı bir nəfərin boğulmasına, digərinin isə boğulana çox yaxında olmasına baxmayaraq, ona kömək etməməsinə şahid olmasıdır. Bu hadisədən sonra Phil bu mahnını yaradır. Və ilk konsertində təsadüfən həmin adamı orada görür. Konsert boyu ona baxaraq mahnını oxuyan Phil sonda işıqları onun üzərinə çəkir və həmin adam tutulur. Collinsin özü bu hekayəyə dəfələrlə bullshit deməyinə baxmayaraq, hər dəfə Amerikaya tura gələndə bunu ondan soruşurlar. Phil isə əslində həmin zamanda boşanma ərəfəsində olduğu üçün sırf qəzəbdən, hirsdən və xəyallarının məhv olması səbəbindən bunu yazdığını açıqlayır. sadəcə saf qəzəb ən yaxşı intiqam mahnısını yazdırır. Mahnı bir çox yerlərdə istifadə olunub amma ən ikoniki 1984-də Miami Vice serialının pilot bölümünün sonunda Tubbs və Crockettin qara Testarossada qulaq asdıqları səhnədir. Orda da Tubbs qardaşının intiqamını almaq istəyir. ardı spoilerdi. marağı olan baxsın. məsləhətli serialdı. Xülasə olaraq, kiməsə nəsə eləmək istəsəz bunu dinləyib sonra edin* glş

2 əjdaha! 4cü böyük

25.12.2024 - 23:09 #389270 mesaj facebook twitter

analog horror

Qorxu janrının son 3-4 ildə populyarlaşan sub-janrı. Əsas xüsusiyyətləri vhs kaset, crt tv görüntü və found footage formatında olmasıdır. Hekayə qurğusu isə 1960-ların ortalarından 2000-lərin sonuna qədər olan illərdə keçir. 1 dəqiqə ilə maksimum 1 saat arasında olan bu görüntülər creepypastalardan, vhs kasetlərin glitchlərindən və 70-80-cı illərin çox da bilinməyən reklam və verilişlərinin montajından ibarətdir. Əsas məsələ çox da jumpscare olmadan insanı qorxutmasıdır. Nostalgiya faktorundan çox istifadə edilir. Sanki uşaqlığa geri dönüb, bir anda reallığa dəhşət içində qayıdırsan. Çox nümunəsi və hər birinin ayrı-ayrı dərinlikdə hekayələri var. Janra adını verən serial isə Local 58 tv olub.

(youtube: )

Bunun ilk nümunəsi 2009-da 4 seriyalı no through road web serialıdır. Daha sonra eyni ildə çıxan 133 bölümlük Marble Hornets serialı 2014-ə qədər davam etsə də bu növ qısa qorxu filmləri tam mainstream ola bilmədi. Janr 2021-də Alex Kisterin the mandela catalogue adlı youtube serialı sayəsində pop-kultura tərəfindən mənimsənildi. The mandela catalogue-un məşhurlaşması səbəbi ilə ondan 6-7 il əvvəl çıxan lakin o qədər də baxış sayı olmayan youtube serialları da bilinməyə başladı. Hətta 2022-də bu janrda Skinamarink adlı film də çıxdı və cult film oldu. Ən yaxşı hekayəyə malik olanlar mənim fikrimcə Gemini Home Entertainment, Local 58 tv, The Monument Mythos, the Walten files, Mandelanın özü və Kane Pixels kanalının (sahibi 17 yaşlı Kane Parsonsdu) məşhur Backrooms serialıdır. Marağı olanlar youtube-da bunlara bir göz atsın. Dərin mövzusu olanı da var, mən nəyə baxdım ala? sualını verdirib beyin yandıranı da var. Və təbii ki, video oyunlar da bu janrdan nəsibini alıb. Ən yaxşılarını paylaşıram:
https://thornebaker.itch.io/maplecounty
https://broken-arrow-games.itch.io/mandela-invasion
https://rainslices.itch.io/the-prototype
https://darkos23.itch.io/home-invasion
https://wenderlygames.itch.io/assessment-examination
https://jflyer45.itch.io/the-lancaster-leak-obrien-state-park
https://alexander-wiseman.itch.io/fear-assessment
https://oxblud.itch.io/silkbulb-test
https://mikeklubnika.itch.io/unsorted-vhs

17 əjdaha! 4cü böyük

26.11.2024 - 20:10 #388844 mesaj facebook twitter

euro 2024

14 iyun - 14 iyul tarixlərində Almaniyada keçiriləcək futbol bayramı. Bir çoxları Fransa və ingiltərəni favorit hesab edir. Məncə həmişəki kimi ingilislər bacara bilməyəcək. Bəlkə də beynimə loser kimi kodlanıblar bilmirəm. Şəxsən mən turnirin qalibi kimi fransanı görürəm. Çox əjdaha şəkildə gəlirlər. Keçim qrup təxminlərimə:

Burda Macarıstan qrupun sürprizi olacaq. Almaniya maks 2 olacaq. isveçrə və Şotlandiya isə ən yaxşı 3-cü yer uğrunda mübarizə aparacaq. Qrupun həlledici oyunu elə 1-ci turdakı Macarıstan - isveçrə matçı olacaq.

Azarkeşi olduğum və son çempion italiyanın taleyindən qorxuram. Spaletti bambılısı dünən hücumçu qıtlığında Bolognada əla mövsüm keçirən Orsolinini komandadan çıxartdı. italiyada hamı spalettini topa tutur. Zaccagni, çolaq el shaarawy və demək olar ki, bu sezon oynamayan faggiolini saxlayıb, Orsolini və lazionun qapıçısı provedeli kənarda tutub. ispaniya və Xorvatiya, hətta Albaniya da başağrısı olacaq italiyaya. Türkiyə ilə 0-0 bitən matçda da ümid vermədilər. Amma bu italiyadı. Qrupda 3 heç-heçədən sonra dünya çempionu olmuş komandadı. Bilmək olmaz. Bu qrupa təxmin vermək çox çətindi. Realist olsam hal-hazırki vəziyyətə uyğun olaraq: 1 ispaniya 2 Xorvatiya 3 italiya 4 Albaniya.

ingiltərə burdan təmiz çıxar. 2ci yer üçün Danimarka və Serbiya əlləşər və Danimarka yeri qapar.

Ən asan qrupdu bu məncə. Fransa 1, Hollandiya 2, Avstriya 3, bərbad oyun oynayan Polşa 4.

Ən maraqlı qrup. Hamı Belçikanın asanlıqla 1-ci olacağını desə də mənim fikrimcə onların generasiyasının limiti çoxdan bitib. Rumıniya sürpriz edəcək. Ukraniya da ondan geri qalmayacaq. Slovakiya 4-cülüyə məhkumdu.

Gəldik dananın Türkiyə üçün quyruğunun qopduğu yerə. Türkiyə burdan necə çıxırsa çıxsın 8/1-dən o yana getməyəcək. Çünki ya Fransa ya ingiltərə ya da b qrupunda hansısa əjdaha ilə qarşılaşacaq. Ümumiyyətlə Türkiyə elə komandadı ki, oyununu heç cür tuta bilmirsən. Heç vaxt stabil oynamırlar. 0 da çəkə bilərlər. 90+ -da vurulan qollar ilə 1-ci də çıxa bilərlər. Portuqaliya 1-ci olacaq sözsüz. Gürcüstan Mdb-nin hal-hazırda ən yaxşı oynayanıdı. (Russia excluded). Çexiya burda tale həll edən komanda olacaq.
Könlümdən keçən 2008 və 2012-dəki ispaniya kimi italiyanın da ardıcıl qalib gəlməsidir. Amma çətin. Real vəziyyət Fransanın çempionluğunu göstərir. Ümid edirəm ki, 2004 və 2016 kimi sıxıcı yox, 2000 və 2008 kimi yaddaqalan turnir olar.

18 əjdaha! 4cü böyük

07.06.2024 - 18:44 #385093 mesaj facebook twitter

gian piero gasperini

Dünən Atalanta ilə 66 yaşında ilk kubokunu qazanan baş məşqçi. Futbolçuluğunda da kuboku olmayıb. Yuventusun altyapısından çıxsa da əsas komandada heç vaxt oyuna çıxmayıb. Palermo və Pescara kimi 70-lərin və 80-ların ortabab komandalarında yarımmüdafiəçi mövqeyində çıxış edib. 1993-də futbolçu karyerasını bitirəndən 1 il sonra Yuventus onu altyapı komandasına məşqçi kimi dəvət edib. Məşqçiliyi də futbolçuluğu kimi elə bu altyapı diviziyasında başlayan Gasperini hocamızın böyük komandalarla işi heç vaxt düz gətirməyib. Bunu onun interdəki Məşqçiliyindən görmək olar. 2011-də 3 aylıq inter macərasında Çempionlar liqasının qrup mərhələsində, Giuseppe Meazza-da Trabzonspora 1-0 məğlub olandan sonra rəhbərliklə sözləri çəp gəlir. Gasperini böyük eqoları idarə edə bilməyib. Daha doğrusu böyük komandalarda o səbr olmadığına görə ona heç şans da verilmədi. Gasperiniyə əsas lazım olansa ona zaman verilməsi və səbrli olunması idi. Onun məqsədi gənc oyunçular yetişdirib zamanla komandanı yüksəltmək idi. Gasperiniyə Atalantadan başqa heç bir klub bunları vermədi. Atalanta serie a tarixində həmişə liqaya maraq qatan, 1 sezon serie b-yə düşüb, 1-2 il sonra yenidən serie a - ya çıxan komandalardan biridi. 2009-10 sezonunun bitimində b seriyasına düşən klub 1 il sonra a seriyasına geri dönür. 2016-da Gasperininin gəlməsinə qədər liqanı ilk onluqdan aşağıda bitirib, birtəhər kümədə qala bilirdilər. Gasperini gələndən sonra isə:
2017 - 4-cü
2018 - 7-ci
2019-20-21 - ardıcıl olaraq 3-cü
2022 - 8-ci
2023 - 5-ci
2024 - hələki 5-ci
Əla göstəricilərdi. Coppa italiyada isə Atalanta cəmi 6 dəfə finala çıxıb. yalnız 1963-cü ildə Torinonu məğlub edib. Axırıncı finalı da bu il oldu. Ancaq Yuventusun iyrənc amma nəticə qazandıran 1-0-la bitən Allegri oyunu ilə bacara bilmədilər. Gasperiniyə həmişə final uduzan məşqçi kimi baxılıb. Amma dünən bütün bir sezonu məğlubiyyətsiz bitirən 90+ dəqiqələrdə şou göstərən Leverkuzenə göz açmağa imkan vermədilər. Konkret olaraq 90-cı illərdə istifadə olunan, adam-adama markaj deyilən və daima rəqibə pressing edən bir oyun oynadılar. Və nəticə 3-0. Atalanta həm 61 ildən sonra kubok qazandı, həm də ilk Avrokuboklarıdı. Gasperini hocamız isə sözsüz ki, buna layiq idi. Ona vaxt verməyin 8 il ərzində necə nəticələrə gəlib çıxacağını göstərdi. indi adı Napoli ilə hallanır. Əgər Napoli də səbr edərsə (buna açığı inanmıram) və zaman verərsə bəlkə Napoli 4-cü çempionluğu da yaxınlarda qazana bilər. Şəxsən mən 1 sezon da Atalanta ilə qalmasını və Çempionlar liqasında o biri divlərə qarşı oynadacağı gözəl oyunları görmək istəyirəm.
sifarişi verən: bayerlik

3 əjdaha! 4cü böyük

23.05.2024 - 16:17 #384749 mesaj facebook twitter

28 may 1997 b.dortmund - yuventus matçı

1996-97 Uefa çempionlar liqasının finalı. Hazır dortmund da finala çıxmışkən yad ediləsi oyunlardan biridi. Bura qədər 1995 və 1996 bundesliqa çempionu olan Dortmund o sezon b qrupunda 6 oyuna 4 qələbə, Polşanın widzew lodz klubu ilə 2-2 heç-heçə və evdə atleticoya 1-2 hesabla məğlub olaraq 13 xal və averajla Atletico Madridin gerisində 2-ci olmuşdu. Juventus isə c qrupunda 5 qələbə və səfərdə Rapid wienlə 1-1 qalaraq 1-ci olmuşdu. Yeri gəlmişkən, fənərbağçanın Manchester unitedi elvir boliçin qoluyla 1-0 məğlub etdiyi həmin o məşhur oyun da bu qrupda baş vermişdi. Bununla da Unitedin Avrokubok oyunlarında Old Trafforddakı 40 illik məğlubiyyətsizlik seriyası başa çatmışdı.
4/1-də dortmund 1996-cı ilin Fransa çempionu və öz qrupunu 1-ci bitirən Auxerre-i rahatlıqla 3-1 və 0-1 hesabı ilə keçir. Yuventus da nisbətən rahat rəqib olan norveçin rosenborg klubunu 1-1 və 2-0 la keçir. ( deyirəm dönəmin çempionatlarına baxe. indi nəinki Rosenborgu və Auxerre-i hətta o dövrün güclü Hollandiya klublarını da 8/1-də görmək çətin məsələdi. Türklər demiş makas çox açılıb.) yarımfinalda borussiya Manchester unitedi hər iki oyunda da 1-0 məğlub edir. Maraqlıdı ki, bu matçlar 2024 sezonunun psg ilə olan oyunlarının kopyasıdı. Juventus 1996-cı ilin finalında qalib gəldiyi Ajaxı 1-2 və 4-1 hesabı ilə darmadağın edir. Bu arada Ajax da 1994-95 çempionlar liqası çempionu idi. izlədiyim ən yaxşı Ajax komandalarından biri idi. Milanı həm öz qruplarında 2 dəfə, həm də finalda keçmişdilər. Z kuşağı nə var bunda? Milan onsuzda zəifdi desə də, söhbət əfsanə milandan gedir.
Və 28 may 1997. Bavariyanın keçmiş evi Münhen olimpiya stadionu. Möllerin, kohlerin, riedlenin, chapuisatın və baş məşqçi ottmar hitzfeldin dortmundu deşamın, zidanın, vierinin, Del pieronun və əfsanəvi baş məşqçi, bundan 9 il sonra italiya milli komandasına dünya çempionluğu qazandıran marçello lippinin yuventusuna qarşı. Əlbəttə ki, keçən ilin çempionu Yuventus favorit idi. Amma 29-cu və 34-cü dəqiqədə euro 1996-da ingiltərənin xəyallarını puç edən Karl heinz riedle səhnəyə çıxdı. Yuventus şok olmuşdu. 1-ci dövrə belə bitdi. 2-ci dövrədə isə nələr oldu nələr. Zidanın dirəkdən dönən topu, vierinin əl ucbatından sayılmayan qolu və del pieronun əla daban qolu. Hesab 2-1 olmuşdu. Amma 70-ci dəqiqədə Chapuisatın əvəzinə meydana daxil olan və bütün karyerasını yalnız Borussiya dortmunda fəda edən Lars Ricken abimiz oyuna girdi. Və girəndən 16 saniyə sonra çempionlar liqası finallarının bəlkə də ən yaxşı qolunu vurdu. Yuventusun qapıçısı peruzzi çox öndə dayanırdı oyunlarda. Bunu görən möller pası Rickenə verir və Ricken xarüqə yaradır. 20 dəqiqə sonra isə oyun bitir. Və dortmund tarixinin ilk çl finalında qalib olur. Haşiyəyə çıxım: 2013-də bavariyaya uduzan dortmund da pis komanda deyildi. Sadəcə bəxtləri gətirmədi. Bu il isə Real madridlə işləri çox çətin olacaq. Çempionluq xəyaldır. 27 il öncə də xəyal idi amma bacardılar. Görək bu il necə olacaq.

Əfsanəvi fosforlu sarı forması ilə Dortmund komandası


Həmin o məşhur vuruş



Seremoniya





Bu da türkçə icmal

https://www.dailymotion.com/video/x60fuiv

25 əjdaha! 4cü böyük

09.05.2024 - 15:16 #384418 mesaj facebook twitter

1984-85 serie a sezonu

Serie a tarixinin ən gözlənilməz sonla başa çatan sezonu. Ümumiyyətlə bu sezon bir çoxlarına görə "serie a-nın serie a olduğu illər" ifadəsinin ilk ilidir. Amma real yanaşsaq 1982-83 sezonundan, yəni Michel Platininin Yuventusa transferindən sonra hər şey möhtəşəm olmağa başlayır. Zatən Yuventusda Gaetano Scirea, Antonio cabrini, Marco Tardelli, ən yaxşı çempion ola bilməyən komanda olan 1982 Braziliyasını ağlar qoyan Paolo Rossi və gəlmiş keçmiş ən yaxşı qapıçılar siyahısında mənə görə ilk 3-lükdə olan Dino Zoff da var idi. Platini gələndən sonra olur konfet.
Amma gələk bu sezona. Əsas Komandaların vəziyyətini ayrı-ayrı yazmağa çalışacam.
Yuventus keçən sezonu çempion olaraq bitirmiş və ümumilikdə 21 çempionluğa çatmışdı. Yayda lazionun super ulduzu Bruno giordano ilə razılığa gəlsələr də, bruno sonradan astronomik maaş tələb edir və iş pozulur. Zatən bu sezon lazio da serie b-yə düşür. Bruno da növbəti sezon Napoliyə keçir. Amma bu sezon yuventusun işləri yaxşı getmir və ilk 5-likdən kənarda qalırlar. Buna baxmayaraq komandanın ulduzu olan və 1984-də Fransa ilə Avropa çempionu olmuş Platini 18 qolla sezonun bombardiri olur. Serie a-dan əli üzülən Yuventus fikrini çempionlar liqasının keçmiş adı olan Çempion klublar kuboku turnirinə verir. Heysel faciəsinin baş verdiyi finalda məhz Platininin penaltisi nəticəsində Liverpool üzərində qələbə ilə Avropanın böyüyü olurlar.
Sezonun Daha bir önəmli hadisəsi isə tarixin ən yaxşı oyunçusunun Barcelonadan Napoliyə transfer olunması idi. Bəziləri Maradonanın Barcelonada istəniləni vermədiyini düşünərək onun kaprizli olduğunu bildirir. Amma Barcelona - Maradona məsələsi tamam başqa söhbət mövzusudur. Çoxları Napolinin çempion olmağını gözləsələr də bu 3 il sonra baş verir. Komandanın ən yaxşısı Maradona olsa da təkbaşına Napolini çempion etməsi imkansız idi. Ətrafında yaxşı oyunçular yığılandan sonra o, tarix boyu şimallılar tərəfindən lağ edilən və ələ salınan Neapolu 2 dəfə italiyanın böyüyü etməyi bacarır.
Fiorentina isə 82 Braziliyasının əfsanə kapitanı və karyerasında sadəcə 1 sezon Avropada oynayan Socratesi transfer edir. Amma matçlarda istəniləni verə bilmir, məşq üsullarını bəyənmir, həddindən artıq siqaret çəkir və içki içir, məşqçilərlə dalaşır və sezon sonunda Braziliyaya qayıdır.
Roma 1982-83 sezonunu çempion bitirəndən sonra 1984 Çkk turnirində liverpoola penaltilər seriyası nəticəsində məğlub olur. Romanın əsas ulduzlarından biri yenə 82 Braziliyasının oyunçusu olan Falcao idi. Onun çkk finalında penaltini vurmaqdan imtina etməsi, sol dizindən zədələnməsi, komandanın onun üçün həddən artıq pul xərcləməsi Falcaonun da sezon sonunda Braziliyaya qayıtması ilə nəticələnir.
Demək olar ki, sezonun ən yaxşı heyətlərindən birinə sahib olan inter isə o qədər yaxşı nəticələr əldə etmir və sonda 3-cü olur. Milan da eynilə qənaətbəxş çıxış etmir və sezonu 5-ci bitirir.
Gələk Çempion Hellas Veronaya. Bu hadisəni yalnız 2016-cı ildəki Leicester city çempionluğu ilə müqayisə eləmək olar. Belə nağıllar məncə bir də olmayacaq. Zatən Veronanın ilk və tək çempionluğudu. Bu "balaca" klubun çempionluğunda əsas rollar yayda transfer edilən alman Hans Peter briegel və danimarkalı preben elkjaer ilə birlikdə oyunun sistemini onların üzərinə quran baş məşqçi osvaldo Bagnoli olur. Qapıda da garella əfsanələr yaradır, amma sezon sonunda çempion olmaq üçün sağa sola pul xərcləyən (təbii ki, bunda siciliya mafiyasının da rolu böyükdür) Napoliyə keçir. Komandanın əsas qol maşını guiseppe Galderisi olur və ümumilikdə 11 qol vurur. Hellas verona ilk turda maradonalı Napolini 3-1 məğlub edir. Yuventusu ilk dövrədə 2-0, Romanı isə 1-0 la keçirlər. 2ci dövrədə isə hər ikisi ilə heç-heçə edirlər. inter və milanla isə hər iki dövrədə matçlar heç-heçə bitir. Verona sezon boyunca sadəcə 2 dəfə məğlub olur. 15-ci turda avellinoya 2-1, 25-ci turda Torinoya 1-2. Ki Torino da bu sezonu əla keçirib sonda 2-ci olur. Ümumilikdə verona 30 oyuna (15 qələbə, 13 heç-heçə və 2 məğlubiyyət) 43 xal toplayır. 29 tur lider olurlar. Sadəcə 16-cı turda inter 1 həftəlik lider olur. O dərəcədə əzmkar oynayırlar. Coppa Italiada isə 4/1-də interə uduzurlar. inter yarımfinalda Milana, milan isə finalda Sampdoriaya məğlub olur.
Bir haşiyəyə də çıxmasam olmaz. Serie a tarixində məhz bu sezon bir ilk gerçəkləşir və bu sezondan sonra bir daha bunu etmirlər. Bura kimi hansı hakimin hansı oyunu idarə edəcəyi 3-5 gün qabaqcadan müəyyən olunurdu. Amma bu mövsüm məhz oyun günü püşk ilə hakimlər təyin edilir. Və Hellas verona çempion olur. Və bir daha bu üsul təkrarlanmır. Və verona kimi "balaca" komandalar bir daha çempion ola bilmir. if you know, you know.
Son olaraq fantastik mövsümün ilk 5-liyi və bəzi səhnələr:

















13 əjdaha! 4cü böyük

29.04.2024 - 23:37 #384243 mesaj facebook twitter

nike

90-cı illərin sonu 2000-lərin əvvəllərində ən kreativ futbol reklamları və Billboardları hazırlayan şirkət.
1996-cı ildə çəkilmiş və dönəmin məşhur futbolçularının oynadığı kult "match in hell" reklam filmi.

(youtube: )


Və bunlar da ikonik billboardlar






Bu müasir dönəm


Bu isə kreativliyin nirvanasıdı

8 əjdaha! 4cü böyük

25.04.2024 - 20:01 #384181 mesaj facebook twitter

animals

1977-ci il tarixli cəmi 5 trackdən ibarət olan pink floyd şahəsəri. Albom demək olar ki, roger watersin məhsuludu. insanları 3 qismə bölən (donuzlar, itlər və qoyunlar) Roger abimiz albomu George Orwellin 'animal farm' əsəri ilə paralel aparıb. Amma burda Stalin yox, ümumi olaraq kapitalizm bir sistem kimi tənqid edilir və az qala alçaldılır. Bunun səbəbi də Rogerin anasının sosialist olması və ona bu fikirləri yeritməsi idi. Donuz bildiyimiz kapitalistlər, it sistemi müdafiə edənlər, qoyun isə adi xalq olaraq metaforlaşdırılıb. Bu alboma görə hətta Pink Floyda punk floyd da deyilir. Çox dark albomdu. Pigs on the wing (part one) ilə başlayıb və pigs On The Wing (Part Two) ilə bitməsi isə biraz ümid toxumu səpmək üçün edilib. Birləşdirsək görərik ki, hamı öz hayında olsa dövran belə gəlib belə də gedəcək. Amma hamı bir-birinə qarşı etinasızlıq etməsə nəsə dəyişə bilər. 17 dəqiqəlik Dogs isə albomdakı yeganə Gilmour bəstəsidir. Soloları həmişəki kimi əfsanədir. Burada sistemi qorumağa çalışanlar və bu çarxdan öz mənfəətlərini güdənlər itin (no pun intended) bir tərəfinə soxulur amma çıxarılmır. 11 dəqiqə yarımlıq Pigs (Three Different Ones)  cəmiyyətdəki əxlaq polislərini tənqid edir. Xüsusi olaraq isə Mary Whitehouse adlı qadına həsr edilib. 10 dəqiqəlik Sheep isə adi qara camaatdan, donuzdan və itdən mədət uman qoyunlardan bəhs edir. illər boyu onlara nə deyilibsə onu edən, amma bir gün görməyən, hər qurban bayramı gələndə bir-bir kəsilən qoyunlardan.
Have you heard the news?
The dogs are dead!
You better stay home
And do as you're told
Get out of the road if you want to grow old.
Dark side of the Moonu çıxsaq Pink floydun ən yaxşı albomudur məncə. Musiqi olaraq da gitara ağırlıqlıdı. Bunun kimisini Pink Floyd belə yenidən yarada bilmədi. Son olaraq albomun üz qabığı və həmin o məşhur uçan donuz:

7 əjdaha! 4cü böyük

26.02.2024 - 23:26 #382877 mesaj facebook twitter

qar

Əla yağıb. Mikrorayonun bütün camaatı zeytunluqda əməlli-başlı şellənirlər. Qarda üzənlər, qar adamı adı ilə mutant bigfoot düzəldənlər, başına kitab əvəzi qartopu qoyub gəzən gələcəyin modeli olmaq istəyənlər, bir-birinə qar yedizdirən cütlüklər, təkbaşına siqaret çəkib gəzən yalnızlar, bir sözlə hamı çöldədi. Hamı bu qarın həsrətini çəkirmiş içi mən qarışıq. Quru və küləksiz hava, narın yağan qar, ağızdan çıxan buxar, qarın üstündə oturub yatan ağ pişik. Əladı hər şey. Adamın içindən lap özünü öldürməsi gəlir. Əsl intiharlıq havadır. Amma mən isti bir çay içəcəm. Və müvəqqəti də olsa zövq alacam. Neçə belə qarlı günlərə.

9 əjdaha! 4cü böyük

14.01.2024 - 13:53 #381904 mesaj facebook twitter

1980-cı illər

ilk öncə

(youtube: )

Demək olar ki, tarixin ən əyləncəli, müharibələrin az olduğu, kapitalizmin pik nöqtəsinə çatdığı, kommunizmin yanlış əllərdə çökməyə başladığı, musiqinin bütün janrlarının ən gözəl nümunələrinin olduğu (xüsusilə synth-pop kəllə çarxa vurmuşdu), televiziyada həm abş-da, həm də ssri-də möhtəşəm serialların yayımlandığı, bugünün film şablonlarının ilk dəfə istifadə olunduğu, əsasən action filmlərinin əfsanəvi olduğu, pop kulturanın, vaporwave-in, mtv-nin, Nintendonun dünyaya hökm elədiyi onillik. Özüm 90-larda uşaq olduğumdan yeniyetməliyimə kimi 90-ları ən gözəl 10 illik hesab edirdim. Sonradan çatmışdı ki, 90-lar bəlkə də ən çətin keçən illər idi. Bütün dünya üçün. Amma 80-lar məncə insanlığın ən son xoş dövran gördüyü zəmanə idi. Özüm o illərdə olmadığıma baxmayaraq nəsə doğma gəlir mənə o dövr. Bu entryni başlığa giriş kimi yazdım. Nədən başlayacağımı da bilmirəm açığı. Hər şeyi bu qədər mükəmməl olan başqa bir decade tanımıram.

7 əjdaha! 4cü böyük

19.12.2023 - 21:27 #381187 mesaj facebook twitter

12 əjdaha! 4cü böyük

11.09.2023 - 23:13 #378500 mesaj facebook twitter

...and justice for all

35 il bundan qabaq bu gün çıxmış Metallicanın ən komplike və progressive metal nümunəsidir bu şahəsər. Mənim də ən sevdiyim Metallica albomudur kendileri. Düzü bir çox mənbə albomun çıxış tarixini 25 avqust 1988 kimi qeyd edib. Bəziləri 28 avqust, bəziləri 6 sentyabr. Amma mən rəsmi saytda yazılan tarixə istinad edib yazıram entryni. Sözlərlə təsəvvür edilə bilməyəcək bir recorddur bu. Bir çoxuna görə də Metallicanın son mükəmməl albomudur. Düzdü bu biraz aşırı fikirdi. Amma həqiqətən də bu albomun üzərinə çıxa bilmədi qrup. Pik nöqtəsi budur. Ümumiyyətlə 1986-1990 Metallicası hərtərəfli olaraq əjdaha idi. Əfsanəvi 89 Seattle konserti buna sübutdur. Cliff Burton abimizin olmadığı ilk işdir. Onun əvəzinə hardcore metalhead, bundan əvvəl Flotsam and jetsamın üzvü olan Jason Newsted bas gitarada ifa edib. Hamının bildiyi kimi albomda Jasonun bass trackləri sıfır kimi bir şeydir demək olar ki. Konkret ayıb ediblər yazığa. Günahkar da əlbəttə ki, lars xiyarıdı. Recordun son miksində Steve Thompsona basın səsini qısmağı, əvəzində isə drum-ın səsini artırmağı deyir və olan olur. Amma Allah var lars bu albomda əjdaha kimi ifa edib. Justice-dən st. Anger-ə. Hardan hara. Heyf. Nəysə keçim əsas məsələyə.
1) Blackened. Mahnının əsas riffini yetim Jason yazıb. intro reverse edilmiş qaydada ifa edilir Və mahnının atmosferinə uyğun qaranlıqdadı. Bunu tərsindən miksləməyi də Newsted əmi təklif edib (Nankor Metallica). Mahnı o dönəmdə Ssri və ABŞ-ın arasında nüvə təhlükəsi məsələsinin yenidən gərginləşdiyi üçün yazılıb. dünyanın rənginin qaranlığa qərq olmasından, ana təbiətin məhv olmasından bəhs edir. Mənim ən sevdiyim Metallica mahnısıdır bu arada.
2) ...and justice for all. Adından da bəlli olduğu kimi ədalət mövhumundan və bakirə, gözləri bağlı Lady Justice-in zorlandığından və dünyada baş verən ədalətlə bağlı aktual problemlərdən danışır. O qədər qarışıq rifflərdən ibarət olub ki, qrup ilk dəfə 2007-də canlı ifa edib.
3) eye of the beholder.  Mahnı söz azadlığının olmasına baxmayaraq ABŞ-ın əslində o qədər də azad bir yer olmadığını deyir. Kirkin atdığı son solo insana əla hisslər yaşadır.
4) One. Metallicanın öz prinsiplərini pozub ilk video klip çəkdiyi mahnıdır. Bir əsgərin müharibədə minaatan zərbəsindən səsini, görmə qabiliyyətini, eşitməsini, ayaqlarını, əllərini itirib öz zehnindəki fikirlərin səsləndiyi track. Sözün əsl mənasında adamın tüklərini biz-biz edən epic əsərdir. Həmçinin qrup ilk Grammy mükafatını bu mahnıya borcludur.
5) the Shortest Straw. Mahnı 50-ci illərdə Joseph Mccarthy adlı senatorun qabağına gələn random insanları kommunistlikdə günahlandırması və istəklərinə ən qısa yoldan çatması haqqındadı. Ümumi olaraq mccarthyism bir insanın istəyinə çatması üçün hər cür cındırlığı etməsi hadisəsidir.
6) harvester of Sorrow. Bu isə içki içən və narkotik qəbul edən atanın sonda öz ailəsini bunların təsirində öldürməsi haqqındadır.
7) the frayed ends of sanity. Ən çətin və demək olar ki, konsertlərdə 2-3 dəfə çalınan Metallica mahnısıdır. Bipolar və paranoid bir şəxsin ağlını itirməsindən danışılır.
8) to live is to die. Rəhmətlik Cliffin anısına  yazılmış instrumental hüzn abidəsi. Sonda Hetfield əmi Burtonun yazdığı şeiri səsləndirir.
9) dyers eve. Və nəhayət sonuncu trackdə isə James uşaqlığındakı travmalara görə ailəsini günahlandırır. Atası ailəsini tərk etmiş, anası isə James yeniyetmə ikən vəfat edib. Albomun Ən Thrash parçasıdır.
Ümumi olaraq baxsaq 10 out of 10 albomdur. Metallicanın kulminasiyasıdır.  Dinləyin, dinlətdirin.





9 əjdaha! 4cü böyük

07.09.2023 - 19:36 #378391 mesaj facebook twitter

kill 'em all

40 il əvvəl bugün çıxarılan, metallicanın və ümumiyyətlə thrash metal tarixinin ilk və ən yaxşı albomlarından biri. (əslində ilk thrash metal nümunəsi Exodusun "bonded by blood" albomudur.  Amma Record və release ərəfəsində bəzi problemlər çıxır və 1985-də çıxarılır. Metallica "yeməyənin payını yeyərlər" deyib sadəcə.) Albom əslində "metal up your ass" adlanmalı idi. Lakin qrupun record şirkəti Megaforce, coverın və adın distributorlar tərəfindən rədd edilə biləcəyini deyərək bunların dəyişdirilməsini tələb edirlər.

Bunu eşidən Rəhmətlik bassist Cliff Burton abimiz "why don't we just kill 'em all?" deyə soruşur və beləliklə albomun adı əmələ gəlir. Canımız Megadethin yaradıcısı Dave Mustaine də orijinal metallicanın üzvü idi. Bu albomdakı "jump in the fire", "phantom Lord", "metal militia" və "the four horsemen" tracklərinin rifflərini yazmışdı. Horsemenin adı əslində "the mechanix" idi və bildiyimiz mahnıdan daha sürətli idi.  Daha sonra albomun recorduna 1 ay qalmış Mustaine dayı metallicadan qovulur və möhkəm şəkildə "obijnik" qalaraq Megadeth əfsanəsini qurur. "mechanix" trackini də özünün ilk "killing is my business" adlı albomuna qoyub intiqamını alır. (Ki zatən mahnının literal yaradıcısı odu və əvvəlki qrupu panic ilə bunu ifa edibmiş) Yaxşı da edib çünki iki möhtəşəm qrupu qazanmışıq. Mustainenin yerinə də kim gəlsə yaxşıdı? Bizim bu məşhur Wah-wah Kirk hammett. 1 ay ərzində Satriani kimi ifa etmək üçün Mustainenin sololarını güc-bəla öyrənir. Özündən əlavələr də edir. Albomun açılış tracki "hit the lights" elə Metallicanın tarixdə ilk record etdiyi mahnı olur. Bundan qabaq bu, James Hetfieldin əvvəlki qrupu "leather charm"da da ifa etdiyi mahnı olub. "seek and destroy" isə 2003-dən bu yana 70 faiz olaraq konsertlərin son tracki olur. Anesthesia rəhmətliyin əla bass solosudu, amma ömrü kimi yarımçıq təsir bağışlayır. Albom ümumi olaraq, türklər demiş "çiğ"di. Hetfield əminin səsi bildiyin Punk rock vokalıdı. Sanki crossover thrash, hardcore punk üslubundadı. Metallicanın ilham aldığı Motorhead, killing joke, ramones, venom və misfits qruplarından bunu anlamaq olur. Nwobhm cərəyanından iron maiden və diamond head-i, heavy metalın banisi olan black sabbath-ı da bəzi tracklərin soundunda tapmaq olar. Və nəzərə alın ki, adamlar belə bir şeyi 20-21 yaşlarında yaradıb. Bundan sonrakı "ride the lightning" albomunda isə elə bil qrup olgunlaşmağa başlayır və bu ilk recordun "raw" tonuna bir daha yaxınlaşmır. Bəlkə də kill 'em all xətti ilə davam etsəydilər load və reload kimi mediocre albomlar ortaya çıxmazdı. Bir tərəfdən də bu soundda getsəydilər Ride the lightning, master of puppets və and justice for all kimi şahəsərlər də olmazdı. Nəticə olaraq, əfsanə qrupun əfsanə albomudur. Gedin və 40-cı il şərəfinə bir də dinləyin əziz metalhead qardaşlarım və bacılarım.


14 əjdaha! 4cü böyük

25.07.2023 - 00:33 #376177 mesaj facebook twitter

12 əjdaha! 4cü böyük

05.07.2023 - 17:28 #374746 mesaj facebook twitter

propaqanda afişası

Bunların nümunələrini 'space race' ərəfəsində Ssri çox hazırlayıb. Baxanda bəzilərinin həqiqətən də epik alındığı görünür. Adamın ürəyindən lap poster kimi divardan asmağı gəlir.

"sosializm bizim başlanğıc meydanımızdır."


"Dünyalar və əsrlər boyunca"


"kosmosdakı zəfərimiz sovet ölkəsinə bir himndir."


"interkosmos dostluq və əməkdaşlıq peykidir."


"ulduzlara inadla və cəsarətlə. Qəhrəmanlıq sərhəd tanımır."


"fəxr et sovet insanı. Dünyadan ulduzlara gedən yolu açdın!"


"kosmosda öndər olan sovet xalqına eşq olsun!"

16 əjdaha! 4cü böyük

29.06.2023 - 14:12 #374494 mesaj facebook twitter

20 yanvar 1990-cı il hadisələri

Azərbaycan tarixinin ən müəmmalı hadisələrindən biri. Çoxu bu faciənin yalnız ayın 19-dan 20-nə keçən gecə olub bitdiyini zənn etsə də, məsələ elə deyildi. Demək olar ki, fevralın ortalarına kimi nəinki Bakıda, o cümlədən Neftçalada, Lənkəranda, Kürdəmirdə, Gəncədə (keçmiş adı Kirovabad) və Naxçıvanda da vəziyyət çox gərgin olub. Bu entrydə hadisələrdən əvvəl və sonra çəkilən, amma nəyəsə görə medianın ya az, ya da heç istifadə etmədiyi tarixi fotoları qısa açıqlamaları ilə yazmağa çalışacam.
21 yanvar 1990. Bakının hələlik boş olan mərkəzində sovet əsgərləri.


21 yanvar. Avtobusun güllələr tərəfindən məhv edilmiş ön şüşəsi.


22 yanvar. insanların kpss partiya biletləri.


26 yanvar. Binanın damında döyüş vəziyyətində olan əsgər.


27 yanvar. Küçədə gedən axtarış. Hadisədən 1-2 gün keçən kimi əsgərlər çoxlu sayda xalq Cəbhəsi üzvünü yoxlayıb həbs edirdilər.

28 yanvar. Həmin dönəmdə şəhərin adi halı.


28 yanvar. Şəkil özü hər şeyi deyir.


30 yanvar. Bakıda xüsusi təyinatlı əsgərlər.


3 fevral. Şəhidlər xiyabanı.



22 yanvar. Əsgərlər tərəfindən tutulmuş bir şəxs.


24 yanvar. Məşhur 'Salyan' kazarması. 19 yanvara qədər burada sovet əsgərlərinin yoldaşları və uşaqları provakatorların tərtib etdiyi təxribat nəticəsində mühasirədə qalmışdılar. 19 yanvardan sonrakı bir neçə gün ərzində həmin ailələr təxliyə olunmağa başladı.


28 yanvar. Etiraz aksiyası.


15 Yanvar. Gənc tamaşaçılar teatrından Bakı ermənilərinin təxliyəsi. 13 yanvardan 19 yanvara kimi Kgb əlaltıları camaatın psixologiyası ilə oynamış və provakatorlar tərəfindən xalqın qəzəbi Bakıda yaşayan ermənilərə və ruslara tuşlanmışdı. Sanki bunu edərək xalqı, Ermənistandan qovulan Azərbaycanlıların intiqamını almağa inandırmışdılar.


Həmin təxribatlardan bəziləri:
Darvazaya yazılmış "ruslar" sözü


Bakıda hansısa bir binanın divarına yazılmış 'burada ermənilər yaşayır' cümləsi.


21 yanvar. Dövlət informasiya agentliyi olan 'azərinform'u qoruyan əsgərlər.

Göründüyü kimi baş verənlər heç də sadə və göydən paraşütlə enən şeylər deyildi. Xalqı bu vəziyyətə çatdıran qorbaçov başda olmaqla, kqb, onların 1988-ci ildəki meydan hərəkatının içinə qoyduğu əlaltı təxribatçılardır. Məhz onların sayəsində hadisələrin yönü bilərəkdən dəyişildi, televiziyanın enerji bloku partladılaraq camaat fövqəladə vəziyyətdən xəbərsiz hala salındı, 19 yanvar gecəsi əsgərlərə silahlı ekstremistlər tərəfindən atəş açıldı,(hətta statistika 37 əsgərin öldürülmə halını qeyd edib. Salyan kazarmasının qarşısında əməlli-başlı xəndəklər qazılaraq döyüş vəziyyətinə keçilib. Bunu videolarda görə bilərsiniz.) təbii ki, bunun nəticəsində əsgərlər də pərakəndə halda cavab atəşi açaraq günahsız insanları qətl etdi. Əgər cəbhənin radikal qanadı öz təşkilatının içində üstün gəlməsəydi, və təxribata çox asan aldanan adamlar olmasa idi, bəlkə də hadisələr bu həddə gəlib çatmazdı.

16 əjdaha! 4cü böyük

06.03.2023 - 20:15 #368345 mesaj facebook twitter

kpss işi

1992-ci ildə Rusiya parlamentinin 37 deputatının müraciəti və məsələni sırf siyasi səbəblərlə gündəmə gətirməsi ilə keçmiş sovet ittifaqı kommunist partiyasına qarşı açılmış məhkəmə. Yeni "yaranmış" federasiyanın əsas məqsədi isə, onsuzda ləğv edilmiş ümumittifaq kommunist partiyasının əmlakı haqqında sərəncam vermək idi. Biraz əvvələ getsək KPSS-in ittiham edilməsi söhbətini 80-cı illərin axırlarında başladığını görə bilərik. 15 Respublikanın hamısında etnik münaqişə ocaqlarının yaranması və qorbaçov başda olmaqla partiyanın bu problemlərin həll olunması prosesindəki bacarıqsızlığı və ümumiyyətlə hər şeyi əlinə-üzünə bulaşdırması xalqların öz partiyasına inamsızlığı ilə nəticələnmişdi. Camaat deputatlara qarşı hücum edir və Leninin heykəllərini yavaş-yavaş dağıdırdı. Xalqların bir-birinə qarşı etdiyi deportasiyalar, qırğınlar və o cümlədən, Sovet ordusunun müxtəlif bölgələrə müdaxiləsi, iqtisadiyyatın gündən-günə çökməsi, 1991-ci il avqust qiyamının uğursuzluğu və nəhayət hüquqi cəhətdən heç bir əhəmiyyəti olmayan Belovej sazişinin imzalanması nəticəsində Ssri dağılandan sonra partiyanın məhkəmə qarşısında cavab verməsi duma tərəfindən tələb olunur. ictimai rəy fondunun Rusiyanın 14 böyük şəhərində məhz bu barədə anketi aparılır. Camaatın 50 faizi partiyanın ittiham edilməsini istəyir. Lakin digər 50 faiz qarşı çıxır. Əvvəlcə partiyanı nürnberq və ya stalinin vaxtındakı məşhur Moskva məhkəmələri kimi ictimaiyyətə açıq şəkildə ittiham edilməsini istəyirlər. Daha sonra isə qapalı formada keçiriləcəyini bildirirlər. Ekspert kimi gələn dövlət qulluqçuları məlumatların açıqlanmaması və məhkəməyə qatıldığı tarixdən etibarən 5 il müddətində ölkəni tərk etməməsi barədə müqavilə imzalayırlar. Təbii ki, məhkəmə təşkil olunması qərarından sonra qərb mediası bundan xüsusi coşğunluqla bəhs edir. Amma bir problem var idi. Konstitusiyada hakim partiyanın müttəhimliyi barəsində heç bir qanun yox idi. Partiyanı hansı qurumun mühakimə edəcəyi bəlli deyildi. ittihamçılar da bu partiyanın tərkibindən çıxmışdılar. 1991-ə qədər bu məhkəmədəkilərin hamısı bir-birini idarə edirdi. Amma birtəhər çıxış yolu tapılır və demək olar ki, konstitusiyaya tez-bazar bir maddə əlavə edilərək işə başlanılır. Burada partiyanın mülkiyyət hüququları, keçmiş deputatların digər ölkələrdə olan bank hesabları, partiyanın "qızıl ehtiyatları" və partiyanın 20 milyonluq qızıl orduya dayanaraq törətdiyi cinayətlər (1990-cı ilin 20 yanvarında baş verən Bakı qırğını da bura aid idi) barəsində işlər qaldırılır. Bir proses iştirakçısının məhkəmədə apardığı qeydlər maraqlıdır: "kpss mühakimə olunur. Harada? Beynəlxalq kommunizmin mərkəzi Moskvada. Kim mühakimə edir? KPSS-in keçmiş üzvləri. Hakimlər sovet universitetlərinin diplomlarını alıblar, onlar Qərbi Avropa məhkəməsinin qara paltarındadırlar, lakin onların arxasında rsfsr-nın gerbi asılıb. ittihamçılardan biri kpss üzvlüyünə keçmiş namizəd yakunindir. O məhkəmədə bir dövlət qurumundan sənədləri oğurladığını etiraf edən populist meydançıdır. Şahidlərdən biri isə kgb-nin qəddar hərəkətlər törətdiyini deyən, iri dekolteli xanım albatsdır. Mənə elə gəlir ki, o qoqolun səhifəsindən çıxıb. Şahidlərdən digəri isə keçmiş Ssri propaganda departamentinin rəhbəri yakovlev idi. Etiraf edirəm ki, ona "sən cia agentisən?" sualını verdim. Əlbəttə ki, sualımda satirik məzmun var idi. Bizim bu absurd teatrımızda dərin bir realizm var idi. Bu məhkəmə ümumiyyətlə lazım idimi?"
Müttəhimlərdən biri isə, keçmiş dövlət planlamasında rəhbər olan rıjkov idi. Onu infarkt keçirməsinə baxmayaraq 7 saat ərzində ayaq üstə saxlamışdılar. Özünün "izvestiya" qəzetinə müsahibəsində o bildirib ki, onu Çernobıl, partiyanın qızılları və Bakı faciəsi haqqında ittiham ediblər. Partiyanın ümumiyyətlə qızılı olmadığını, lakin dövlətdən ayrı olaraq KPSS-in öz büdcəsi olduğunu və bu puldan üzvlərin öz şəxsi maraqları üçün istifadə etdiyini, çernobıl hadisəsində partlayış olandan sonra özünün də bir saat ərzində ora getdiyini, oradakı əhalinin sürətlə oradan təxliyə edildiyini və radiasiyanın böyük miqyasda əraziyə yayıldığını və bunu ölçməyin çox çətin olduğunu bildirib. Bizi maraqlandıran əsas məsələ isə təbii ki, 20 yanvar hadisəsidir. Rıjkov bu hadisə ilə bağlı müsahibədə belə cavab verib: "Etnik zəmində ilk cinayətlər başlayan kimi mən SSRi Ali Sovetinin Rəyasət Heyətində Bakıda fövqəladə vəziyyətin tətbiqi ilə bağlı məsələ qaldırdım. Azərbaycan Ali sovetinin Rəyasət Heyətinin sədri Elmira Qafarova bunun əleyhinə kəskin çıxış edib, mənim hadisələri qızışdırdığımı bildirdi. Nəticədə Dağlıq Qarabağda fövqəladə vəziyyət rejimi tətbiq edildi. Bakıda vəziyyət gərginləşməkdə davam etdi, talanlar başladı. Hava limanı və dəmir yolu bağlı idi, insanların qaçmağa yeri yox idi. Sonra mən Xəzər dənizi vasitəsilə Krasnovodska bərə təxliyyəsi təşkil etmək əmrini verdim. 300 minə yaxın insan çıxarıldı. Amma müstəntiqi insanların həyatı yox, qoşun yeritmək əmrini kimin verdiyi maraqlandırırdı. Qərarı Qorbaçovun kabinetində birgə qəbul etdik. Lukyanov, Yazov, Kryuçkov, Bakatin və mən orada idik. Yazov əmr istədi. Qorbaçov Medvedevə qoşunların yeridilməsi ilə bağlı mətn hazırlamağı və gecə yarısına qədər mətbuatda dərc etməyi tapşırdı. Medvedev mətni gecikdirdi və yalnız səhər nəşr etdi. Qoşunlar isə bizim görüşdən dərhal sonra yola çıxdı. Medvedevin əmri sabotaj etdiyini deyirlər, hansı ki buna şübhə edirəm. Məncə bu işlərin necə getdiyini görmək üçün qəsdən edilmiş bir hərəkət idi. Saat 23.00-da Azərbaycan Mərkəzi Komitəsinin birinci katibi Vəzirov {Vəzirov yanvarın 18-də istefa vermişdi və Azərbaycan ssr faktiki olaraq başsız idi} mənə zəng edib ordunu dayandırmağı xahiş etdi. Gecə Yazov zəng vurdu, o da Qorbaçovun yanına gedə bilməyib. Dedi ki, qoşunları atəşə tuturlar. Əsgərlər arasında ölənlər də var. Nə edəcəyini soruşdu. Cavab verdim ki, atəşə atəşlə cavab verəcəklər. Gecə Qorbaçov da üç dəfə mənə zəng etdi. Mən ona vəziyyəti, o cümlədən gülləbaran və ölənlər barədə məlumat verdim. O, mənə belə cavab verdi: “Yaxşı, dediyinizi edin”. Mən siyasətlə məşğul olmamışam, problemi həll etmişəm." Bu da hücum əmri verən politbüro üzvünün etirafları. Məhkəməyə qayıtsaq, sonda qərar belə oldu: "rsfsr kommunist partiyasının ləğvi konstitusiyaya uyğun deyil. RSFSR Kommunist Partiyasının konstitusiyaya zidd fəaliyyəti ilə bağlı faktlar üzrə daha geniş araşdırma aparılsın. Rusiya Kommunist Partiyasının orqanlarının və təşkilatlarının fəaliyyətini məhkəmə yolu ilə dayandıran bu fərmanın qalan bəndləri, onun əmlakı dövlətin qorunmasına verilsin. 1991-ci ilin avqust-sentyabr aylarında KPSS-in faktiki olaraq dağılması və ümumittifaq təşkilatı statusunu itirməsi nəticəsində KPSS-in buraxılması ilə əlaqədar işlərə xitam verilsin. Kpss və RSFSR kp-nın aparıcı təşkilat strukturları onun tərkib hissəsi kimi Rusiya Federasiyasının Konstitusiyasına uyğun olaraq tanınsın və RSFSR Kommunist Partiyası müstəqil siyasi partiya kimi təsis edilməsin." Bu məhkəmədən sonra 1993-cü ildə dövlət dumasına seçkilər keçirildi. Jirinovskinin yaratdığı Rusiya liberal demokrat partiyası seçkilərdə qələbə qazandı. Maraqlısı odur ki, seçkilərə "SSRi-ni mühakimə et!" və "sovet nürnberq məhkəməsini sən təşkil edirsən!" kimi devizlərlə gedən rldp qazanandan sonra "keçmiş partiya üzvlərinin gələcəkdə mühakimə olunması cəhdlərinin qarşısını almaq üçün deputatları istintaq və məhkəmə cəhdlərindən qoruyan deputat toxunulmazlığı" qanununu qəbul etdi.
Nəticə olaraq "Kpss işi" heç bir ciddi nəticə vermədən bağlandı.

11 əjdaha! 4cü böyük

25.02.2023 - 21:38 #367982 mesaj facebook twitter

8values

insanların siyasi mövqeyini 70 suallıq test ilə təxmin edən veb sayt. Github əsaslıdır. Adından da bəlli olduğu kimi 8 dəyər əsasında siyasətin hansı tərəfində olduğumuzu bizə bildirir.
4 kateqoriyaya 2 dəyəri bölüb testin sonunda hansının neçə faiz olduğunu da göstərir.
1. iqtisadi olaraq bərabərlik və bazar iqtisadiyyatı.
2. Diplomatik olaraq milliyətçilik və beynəlmiləllik.
3. Sivil olaraq liberallıq və avtoritarlıq.
4. ictimai olaraq ənənəvi və elmi.
Əlbəttə tam dəqiqliyi ilə aydınlaşdıra bilməsə də, şəxsin fikirlərinə oxşar bir şeylər tapıb çıxardır. Şəxsən özüm əvvəllər 2-3 dəfə edib, solçu populist falan çıxırdım. Amma bugünkü halda dövlətçi sosialist çıxdım.

8 əjdaha! 4cü böyük

22.02.2023 - 22:22 #367866 mesaj facebook twitter

/ 20 »
Notice: Undefined variable: user_id in /var/www/soz6/sds-themes/vengeful-light/profile.php on line 1365


blok -   başlıqlarını gizlət
Notice: Undefined variable: user_id in /var/www/soz6/sds-themes/vengeful-light/profile.php on line 1372

Son bəyənilənlər