acı həqiqətlər

Birdən birə ağlıma ibtidai sinifdə oxuyarkən atamın ilk dəfə ürək əməliyyatı keçirəcəyini öyrəndiyim an ağlıma gəldi. Məktəbin həyətində sinif yoldaşlarımla sırada durub, sinifə keçməyi gözləyərkən, içimdə yaşadığım, amma heç kimə büruzə vermədiyim o qorxu... Sözlərlə ifadə edə bilməyəcəyim hisslər yaşayırdım. Bir yanım "o həyətdən qaçmalısan, atanın yanına getməlisən." deyərkən, digər yandan isə ağlım anamın məni evdən yola salarkən dediklərində idi. O kiçik beynim proseslərin böyüklüyünü qiymətləndirə bilmirdi və mən atamın ölə biləcəyinə o gün özümü o qədər inandırmışdım ki, ondan sonra ölüm mənə heç bir şey kimi gəldi. indi atam yaşayır, yaxşı ki də mənimlədir, amma deyəsən onu beynimin bir bucağında elə həmin gün mən öldürdüm. Və bu acı həqiqəti az öncə anladım, hansı ki, o vaxtdan bəri mənə rahatlıq verməyib. Onu bir gün doğurdan da itirsəm, nə hiss edəcəyəm, heç bilmirəm. Bəlkə heç nə, bəlkə rahatlama, bəlkə də əzab?!

p.s. Atamı yetəri qədər çox istəyirəm.

azərbaycanda veqan olmaq

Çətindir. Həm məhsul tapmaq üçün, həm də mətbəximizə nəzər saldıqda hər şeydə heyvan məhsulları görmək olar. Vegetarian olmaq asandır nisbətən, amma yenə də yersiz qınaqlar olur. Hər lazımsız şeyə qınaq bildirib, lazımlılara göz yuman xalqımız bu məsələdə də öz performansını ortaya qoyur. Sanki qəbahətli bir iş tutmusanmış kimi davranmalar, məsləhətlər. Başa salmaq olmur ki, yemək mənim ağzıma gedir də, sənə nə? Mən özüm vegan yaxud vegetarian deyiləm, lakin ət məhsullarını sevməyən biri olaraq, bunlara məruz qalıramsa, gör indi onlar nə yaşayar. Öz fikrimə qalsa, mən də düşüncəni anlamıram bir az, heyvanlara şiddət olunmasına, yaxud onlara əzab verilərək hansısa məhsulun alınmasına qarşıyam. Lakin bir tərəfdən də dəyərləndirəndə, adi inək südü sağılmayanda xəstələnir, qızdırması qalxır mən bildiyim qədəri ilə. Deməli biz onun südünü sağmaqla əslində ona yaxşılıq edirik bir baxıma, yaxud toyuq yumurtayır, əgər kürt yatmaq vaxtı deyilsə, onun üçün bu yumurta əhəmiyyətsizdir məncə. Yenə də öz seçimləridir və bunu onların adına sorğulamaq digərlərinin işi deyil.

ədalətin ancaq adam adı olmağı

"Ədalət yoxdur" cümləsi özü də elə nisbidir. Ədalətsizlik nədir? Haqqının tapdalanması da demək olar. Lakin o utopik ədalətli dünya heç vaxt olmayıb, olmayacaq da. Bəlkə də olub, o da insan yeni yeni formalaşanda, hansı ki, hələ haqq anlayışı yox idi. Üstəgəl də ədalət anlayışı o qədər dəyişir ki, bir insanın ədalətli gördüyü hərəkət, digəri tərəfində tam ədalətsiz kimi dəyərləndirilir. indiki dünyada isə ədalət axtarmaq mənasızdır, sadəcə haqqın tapdalananda səsini çıxart, öz ədalətini yarat. Gücün çatırsa, çevrəndə bərpa elə, ən azı onların öz ədalətləri üçün savaşmağını tələb et. Yox əgər savaşçı ruhlu deyilsənsə və hələ bir də saf, emosional insansa, bu dünya həmin insan üçün cəhənnəmdir. Ədalətimiz üçün savaşaq, susmayaq. Hər mənada, hər kəsə qarşı.

introvertlik

Hələ də introvert, ya ekstravert olduğumu təyin edə bilməmişəm. Sanki tam ortadayam. Həm əylənərək vaxt keçirdiyim çevrəm var, həm də elə özüm tək də əylənə bilirəm. Tək gəzintilər ən sevdiyim şeylərdəndir. Alış-verişə çıxıramsa, mütləq tək olmalıyam, əks halda heç nə almadan evə qayıdıram. Amma gəzintilərim dostlarla da yaxşı olur. Ünsiyyətcil biri, eyni zamanda da utancaq, tanışlıqlardan qaçan biri olaraq hələ də özümü tapa bilmirəm, ya da düzgün formada axtarmıram. Yəni belə insanlar da var, ne idüğü belirsiz kişilər link

bakı

Bakı... hər zaman burada olub, bir o qədər də ola bilmədiyim şəhər. O şəhər ki, Bakıda olduqda belə ondan ötrü darıxıram. 22 ilimi burda keçirən biri olaraq, burada olmadığım 20-25 günün ardında təyyarənin enişini dörd gözlə gözləyən insanam. Bütün gecə həyəcandan yata bilməmişdim. Bakını əvəz edəcək şəhər varmı? Bakı həyatın özüdür. Bir tərəfində yeni tikili hündür bina olan küçənin digər tərəfində nəmişlikdən oboyları atmış 3-5 mərtəbəli binalar.. təzada bax! Küçələrində gəzdikcə üzümə vuran külək, tələsik atılan addımlar, adi bir payız günü, nə gözəl, nə doğmadır mənə. Bakıya baxdıqca bütün həqiqətləri görürsən, həqiqət isə acı olur. Çoxlarının bakını sevməmə səbəbi də elə budur. Həqiqətləri bakının küləyi dayanmadan vurur üzünə, sənsə, bunu ya qəbul edirsən, ya da qəzəblənirsən. Sən onu qəbul etdikcə, o da səni qəbul edir.

seks işçiliyi

Azərbaycan üçün hələ ki, çox uzaqda olan bir işçilik növü. Söhbət rəsmilikdən gedir yəni. Qeyri-rəsmi olaraq isə var olub, indi də var, sonra da olacaq. Fahişəlik də çox bərbad vəziyyətdədir. Qorunma tədbirləri yerlərdə sürünür. Zöhrəvi xəstəliklər baş alıb gedir. Seks işçiliyi legal olan ölkələr belə bununla bağlı problemlər yaşayırlar və nə qədər çalışsalar da, tam leqallaşma olmur. Bəziləri leqalizasiyadan qaçır, yaxud da sənəd problemləri ilə bağlı alınmır. Mütləqdir ki, gigiyenik qaydalar barədə maarifləndirmə aparılsın. Həm kişilər, həm qadınlar özlərini qorusalar, problem olmaz.

sindirella kompleksi

Bu nə milli mentalitetlə, nə də sırf cinsiyyətlə bağlı bir şey deyil. 1. Milli mentalitetlə bağlı deyil, çünki digər mədəniyyətlərdə də (avropa ölkələri, usa və s.) bu tip həyat tərzi sürən insanlarla rastlaşmaq mümkündür. Bizdə say etibarı ilə daha çoxdur, yenə müxtəlif faktorlar var. Məsələn, fərd öz gələcəyini düşünür və məsuliyyət almaq istəmir. Bunun üçün azərbaycanda onun üçün ən sadə və rahat yol ərə getməkdir. Heç kim səni bunda günahlandırmayacaq, hətta alqış tutacaq, səni təbrik edəcəklər. Fərd tamamilə həyatda qalmaq məsuliyyətindən azaddır. Avropada vəziyyət fərqlidir, fərd evlənməsə də, dövlət onu ac qoymayacaq. Buna görə də gözü heç bir iş görmədən varlı həyat yaşamaqda deyilsə, heç bu işlərə girişməyəcək. Qısası, inkişaf etmiş dövlətlərdə qadın, yaxud kişilər bu kompleksə düşürlər, çünki heç nə etmədən varlı həyat yaşamaq arzusundadırlar. Azərbaycanda isə "varlı həyat olsa, lap əla. Olmasa da, ən azı məsuliyyət yoxdur." düşüncəsi dominantdır. Bundan başqa, təbii ki, yetidirilmə tərzi və ictimai qınaq da rol oynayır. Azərbaycanda bu kompleks son dərəcə adi hal, hətta məqbulgörünən haldır. iEÖ-lərdə isə buna qarşı fikirlər birmənalı deyil. 2. Sırf cinsiyyətlə bağlı deyil, çünki bu kompleksi yaşayan kişilər də mövcuddur, hansılar ki, öz məsuliyyətlərini boyunlarına almaq istəmirlər. Son dövrlərdə qadınlarda bu kompleksin azalması ilə, kişilərdə əksinə olaraq artması da müşahidə olunur. Bu kompleksli Kişilər azərbaycanda azlıq təşkil edir. Əsas səbəbi ictimai qınaq və yetişdirilmə tərzidir. Əgər bu gün ictimai qınaq olmasa, bəlkə də elə qadınlar qədər sindirella kompleksli kişilər də ortaya çıxar. 3. Mən bu şəxsləri qınaya bilmirəm, öz seçimləridir. Bədbəxtdilərmi? Buna da bir fikrim yoxdur. Sadəcə hər kəs kimi onlara da hörmət edir və həyatlarında uğurlar arzu edirəm və ümid edirəm ki, həyatlarının sonunda yaşadıqları hər şey gözləri önündən keçərkən, mən niyə belə yaşadım deməzlər. 4. Bu kompleksli insanlar özləri qıcıqverici ola bilirlər, lakin mənə qıcıq verən onların həyat tərzi deyil, mənim yaşadığım həyat tərzinə söz atmaları və yerli-yersiz tövsiyələridir. Nə qədər sakit və hövsələli insan kimi dayansam da, içdən özümə sən hörmətini qoru, fikir vermə desəm də, bəzən son həddə gəlib acı bir formada onların mənim gözümdə olan reallığını üzlərinə vuracağımdan qorxuram. Ona görə də bu öz həyat tərzləri son dərəcə uğurlu imiş kimi davranıb ona buna da məsləhətlər yağdırmağı durdursalar, əla olar.

azərbaycan himni

Heyif ki, gənclər himnimizə qarşı bu tipli fikirdədirlər. 2 məktəbdə oxumuşam, hər ikisində himnə hörmət aşılanıb. Birində isə hər gün səhər dərs başlamazdan əvvəl himn verilirdi və himn başlayanda hər kəs sinifdə olmalı idi, deyildisə, olduğu yerdə dayanmalı idi (pilləkən, dəhliz və s. fərq etməz). Hər kəsin oxuyub oxumamasına da fikir verilirdi. 5-ci günlər isə bütün şagirdlər foyedə yığılaraq, himni oxuyurduq. Bu dəqiqələr hamımız üçün qürurlu idi, hər kəsin üzündə buni aydın görmək mümkün idi. indi də mənim üçün eyni dərəcədə əhəmiyyətlidir. Qaldı ki, musiqisinə və sözlərinə - həm şairi, həm bəstəkarı Azərbaycanın dəyərli sənətkarıdır. Musiqisi marş deyil və mənə görə bu üstünlükdür. Musiqisini dinləyərkən, sırf simfoniyaya məxsus eniş və qalxışlar mənim ruhuma işləyir. Sanki bir musiqi bu qədər tamamlayarmış bu sözləri.