ölən biri üçün darıxmaq

inanclı insanlara paxıllıq etdirən bir hissdir.
Əvvəllər inanclıydım, darıxanda təsəllim olurdu ki, mən danışanda eşidir məni, mən dua edəndə ona çatır səsim, nəhayətində isə mən də öləndə görüşə biləcəyik.
indi isə bilirəm ki, torpaq olub, elementlərə çevrilib bədəni, ruh deyilən şey də var, ya yox bilmirik.
Darıxırıq, amma o hiss etmir, danışırıq onunla amma o eşitmir.
Yuxuda bəzən adam qışqırmaq istəyir amma səsi çıxmır, qaçmaq istəyir amma ayaqları tərpənmir, bax onlara bənzədirəm bu hissi..
Hər kəs bir gün yaşayacaq, amma heç kəsə bunu vaxtsız köçən biri üçün yaşamağı arzu etmirəm.. qalanı isə səbr, səbr, səbr..

cavab qaytarmaq

düzgün davranış şəkli deyil, amma baxır nəyə cavab qaytarmaq deyirsən.
uşaqlığımı, yeniyetməliyimi, indi isə gəncliyimi ideala yaxın sayılacaq qədər düzgün, bütün etik və mədəni çərçivələrə uyğun davranaraq yaşamışam. bacardıqca hamıya qarşı. bu əslində tələb edilən yaşam şəkli deyil, amma bundan zövq alıram doğrusu.
sözüm onda deyil.
o qədər düzgün şagird idim ki, müəllimlərin təhsilim, təlim-tərbiyəmlə bağlı deməyə arqumentləri yox idi. bir psixologiyası yerində olmayan, baş bəlası, ömrümüzü-günümüzü qara əskiyə bükən, xaosdan bəslənən zavuçumuz var idi. yerli-yersiz şeylərlə bizi günahlandırırdı. niyə etmisiniz sualını verəndə, biz izah etməyə çalışanda isə, deyirdi ki, cavab qaytarma.
tək o da yox, bu problemi daha başqa bir müəllimimlə də yaşayırdım. mən haqqımı sonuna qədər müdafiə etməkdə həmişə israrlı olmuşam. hər izah edəndə, cavab qaytarma deyib susdurmağa çalışırdılar. haqlı olduğumu bilirdim.
böyümüşəm, o yaşımdan dəfələrlə ağıllı və təcrübəliyəm. indi də bilirəm ki, haqlıydım. təhsilimizdən, beynimizdən, intellektimiz, bacarıqlarımızdan istifadə etmək əvəzinə boş-boş konfliktlərlə bizi məşğul edirdilər. çox əla uşaqlar var idi o sinifdə. indi də hamısı yaxşı statuslardadır. başları belə şeylərlə yorulmasa, belə boş sözlərlə susdurulmasalar, harda olardılar, allah bilir.
məncə azərbaycan cəmiyyəti bu ifadəni təyinatı üzrə istifadə edə bilmir. ona görə də o susdurulan şagirdlər susan fərdlərə, vətəndaşlara çevrilir.
məncə cavab qaytaraq, haqsız olan hər şeyə qarşı, bütün cəsarətimizlə. tərbiyədən kənara çıxmayaq, amma düzgün aqrumentlə çıxış ediriksə, cavab qaytarmaqdan heç vaxt çəkinməyək.

yaxşı yaşamaq vs şərəfli yaşamaq

Ancaq bizim kimi demokratiyadan, ədalətdən məhrum, yalanın, yaltaqlığın, qorxaqlığın həyatın hər sahəsini öz cənginə aldığı ölkələrdə qarşı-qarşıya qoyulacaq seçimlərdir. Mərdi qova-qova namərd edirlər bizdə. Ona görə də nəinki yaxşı yaşamaq, yaşamağa çalışmaq uğruna belə insan şərəfini hər an itirmə təhlükəsiylə üz-üzədir. Bəziləri sevərək edir bunu. Bəziləri də gözünün önünə dolandıracaq ailəsini gətirib gecələr ürəyinə od basa-basa. Fərdlər itirsə dərd yarı, cəmiyyət köklü formada şərəfini itirəndə isə, çıxılmaz vəziyyət yaranır. Bunu yaşamayım, yaşayaraq övlad böyütməyim deyə xaricə hazırlaşıram. Bu həll yolu deyil, qaçış yoludur. Amma hələ ki, növbəti 5 illiyə əlimdən daha yaxşısı gəlmir. :(
Ümidvaram heç kəsin bu iki seçim qarşısında qalmadığı cəmiyyətə çevrilə bilərik.

yaradıcı ağıllı gözəl insanların yalnız olması

əsl yaradıcıların həyatları elə də sıradan olmur. duyğuları qarışıq olur, əhvalları tez-tez dəyişə bilir. bəzən kədərləri, susqunluqları yaradıcılıqlarına ilham ola bilir. "öz dünyaları olur" ifadəsi daha çox uyğun gələr bu duruma. və bu qədər dəyişikliyə səbr edə bilmək, hər zaman anlayışla qarşılamaq çətindir. əslində hər zaman çətin olub. amma indiki - yəni hər şeyin çox tez yaşanıb, hər şeydən çox tez doyulan, bezilən, seçimlər də çoxdur deyə əlindəkiləri başqasıyla rahatca dəyişə bilən insanların bu qədər çox olduğu dövrdə, bu iş lap da çətinləşir.
tam yaradıcı deyə bilmərəm özümə, işim o sahəyələ əlaqəli deyil. amma dünyaya gələcəyə ümidlə baxan, hələ də nəyisə dəyişmək, nəyisə qurtarmaq istəyən bir insanam. dünyaya çox əhəmiyyətli bir missiya üçün gəldiyimə, nəyisə düzəldəcəyimə inanıram. öz kiçik həyatımdan, çevrəmdən çıxıb, milyonlara toxuna bilməyin arzusundayam. eyni arzuları paylaşan, hər fikrimi, bu axmaq da, çılğın da, çətin də olsa - eyni həyəcanla qarşılayan adam axtarıram.
insanlar isə deyir ki, əşi neyləyirsəne yaşa getsin də..
bu cümləni o qədər çox eşidirəm ki..
eşitməyəcəyim birini axtarıram. o da olmadığı, ya hələ də qarşıma çıxmadığı, ya da ümumiyyətlə doğulmadığı (allah eləməsin) üçün yalnızam.
məncə bir çox insanlar da oxşar hissləri paylaşır mənimlə.

sözlükdə yaraşıqlı oğlanların olmaması

bura nisbətən daha seçilən və intellektual insanların yığıldığı fikrimi şübhə altına alan başlıq.
yazarlar iddia edir ki, gözəl qızlar, yaxud yaraşıqlı oğlanlar ağıllı ola bilməz. bu iki sifəti bir-birinə antonim qoyurlar.
yaxşı - pis antonimdir, gözəl - çirkin antonimdir. ağıllı - axmaq antonimdir.
ağıl və gözəlliyin nə əlaqəsi var. hərəsi ayrı bir xüsusiyyəti xarakterizə edən sifətdir.
cəmiyyətdə gözünüzə xarici görünüşünə uzun zaman xərcləyir deyə gözəl görünən axmaqlar var deyə, bütün gözəllər axmaqdır demək düz olmaz məncə. və ya əksinə. bütün ağıllılar da çirkin olmur.
əsas niyyət gözəl olsun -*

rusiya-ukrayna münaqişəsi

Gözəl yazılar var. Bütün gün oxuduğumuz siyasi analizlərdən, faktlardan, gözlənilən nəticələrdən yazmaq fikrim yoxdur. Bu hadisə 3 gündür bütün həyatımın, fikirlərimin, söhbətlərimin mərkəzindədir.
Özümü o savaşın içində hiss edirəm və buna məhəl qoymayan insanları anlaya bilmirəm. Niyə belə fikirlisən?" soruşanlara da qışqıraraq sual vermək istəyirəm ki, "axı niyə siz deyilsiniz?!" Müharibə var.
Ukraynaya qarşı əvvəllər xüsusi sevgim, yaxud marağım olmayıb. Hərbi texnika baxımından geridədirlər, boşuna insanlar qırılır, onsuz da Rusiya udacaq o ölkəni və s və s. Bütün bu fikirlər boş danışıqlardır mənə görə. Cəsarətləri var! Mübarizdirlər! Əzmkardırlar!
Hamımızın adına, azadlıq, insanlıq, demokratiya adına, diktaturaya qarşı təkbaşına savaş içərisindədirlər. Kütlə deyillər, xalqdırlar, millətdirlər. insanı da, millətləri də onların mübarizəsi ucaldır. Onları qalib edən budur. Bu günləri övladlarıma danışacağam, əgər o günlərədək bizim də başımıza bombalar yağmasa. Özlərinin gücünü, liderlərinin cəsarətini, indiyə qədər tarix kitablarından oxuduqlarımı yox, yaşadıqlarım və gördüklərimi danışacağam.
Ümidvaram Ukrayna bu savaşdan uğurla çıxar. Əgər tanrı, kainat, yaxşı enerjilər - hər nə varsa artıq, hamısı onlarla olsun! Sülh olsun!

varlı olunsa ediləcəklər

Olmaq üçün əlimdən gələni etməyə çalışıram deyə, şərtə bağlamayaraq, təvazökarlıdan xeyli uzağa qaçıb, həm də kainata müsbət mesajlar ötürmək adına mən zəngin olsaydım yox, mən zəngin olanda başlığına cavab verəcəyəm.
Çoxdur planım. amma ən önəmlisi istedadlı tələbələr, şagirdlər üçün fond yaradacağam. qoy ürəkləri istədikləri kimi, layiq olduqları yerlərdə oxusunlar. bir də qoca evsizlər üçün baxım evi.
özümü də düşünürəm, əlbəttə, mələk də deyilik. dünyanı gəzəcəyəm. Luks maşın arzulamıram, amma gözəl döşənmiş, geniş otaqlı, 2 mərtəbəli, amma böyük kitabxanalı bir ev quracağam.

uzaq məsafəli münasibət

Allah alsın bu məsafələri, biz də dincələk..
Yaşadığım tək münasibət növüdür. Münasibətimin bitmə səbəbi idi. 2 gün öncə də bir yaraşıqlıyla bu səbəblə heçnə başlamamış sağollaşdıq ki, ikimiz də uzaqdan münasibət istəmirik. Mənim də qəlbimin pəncərələri ömrü boyu uzaqdakılara açılır deyə, normal əldə tutulası bir şey yaşaya bilməmişəm.
Klassik səslənsə belə məsafələr heç nəyə əngəl deyil, sevgi olan yerdə hər şey sadəcə böyük, ya kiçik ölçülü bəhanə ola bilər ancaq. iki tərəf istəsə, səbr etməyə niyyətli olsa, əla da alınar.

Amma məsafələr birini tanımağa əngəldir məncə. Birini hər gün görməyiniz şərt deyil, amma müxtəlif situasiyalarda onu izləmək, müxtəlif mühitlərdə davranışlarını görmək, üz-üzə sevinmək, üz- üzə mübahisə etmək şərtdir. Ekran arxasından baş verən hər şey ən yaxşı halıyla belə şəkil dəyişdirir, heç vaxt realda olduğu kimi olmur. Ən azından mənim kimi bütün duyğularını gözləri, qaşları, baxışı, jest və mimikaları ilə daha yaxşı ifadə edən biri üçün beləsi alınmır.

Ona görə də məncə birini tanımağa yeni başlayırsınızsa, bunu ekran arxasından etməyin, görüşün, izləməyə fürsətiniz olsun.
Həm də gənclikdir bu, birgə yaşayın, birgə gəzin, birgə əylənib, birgə üzülün.

Yenə də bacarıb, bir yerə çıxanlara eşq olsun! Sevgi varsa, hər şəkli gözəldir.

sözlük yazarlarının valideyn olacağı təqdirdə edəcəkləri

Özüm böyüməmiş böyütməyəcəyəm. Onu dünyaya gətirməyi planlamışamsa, onun izni və istəyi olmadan bu dünyaya gəlişi onun üçün hazırlayıramsa, bütün travmalarımdan, bildiyim, bilmədiyim bütün psixoloji problemlərdən azad olub, sonra edəcəyəm bunu. Əlbəttə, mənimlə eyni fikri bölüşən atasıyla birgə. Səhvsiz olmağımız qeyri-mümkündür, amma çalışacağam bunu bacardığım qədər ən yaxşı formada edim. Oxuyacam, oxuyacam, çoxlu oxuyacam bu haqda. Atasını sevəcəyəm! Hə, bir də çoxlu dillər öyrədib, gözəl mahnılarla böyüdəcəm. illər sonda o mahnılar ona xoşbəxt uşaqlığını xatırlatsın deyə.