sözlüyün praktiki istifadələri

istədiyiniz bir çox şey haqqında məlumat əldə etmək. indiyə qədər haqqında başlıq olacağını gözləmədiyim şeylər barəsində belə başlıq olması çox möhtəşəmdir. istər ümumi dünyagörüşünü, istər azərbaycan haqqındakı dünyagörüşünü artırmaq üçün idealdır. Hətta mən deyərdim ki, azərbaycan barəsində dünyagörüşünü artırmaq üçün ən mükəmməl yerdir. Bu sözlüyün sayəsində olmadığım yerlərə getmiş, doğulmadığım zamanlara səyahət etmiş, düşmədiyim mühitlərə düşmüş kimiyəm.
Nəyinsə haqqında məlumat əldə etmək istəyəndə kitablardan fərqli mənbələrə də müraciət etmək lazımdır və sözlük bu rolu mükəmməl formada yerinə yetirir. Buradakı insanların mövzular barəsində fikirlərini öyrənmək hadisələrə baxış bucağımı dəyişdirə bilir və ya dəyişdirməsə də heç olmasa hadisələrə qarşı tutulmuş fərqli mövqelərdən xəbərdar oluram.
Ən sevdiyim iki cəhəti odur ki, sözlük müxtəliflik doludur və səmimidir. Birinci cəhət barəsində daha ətraflı danışası olsaq, demək istəyirəm ki, burada hər cinsdən məlumat tapmaq mümkündür. Məsələn, olur ki, birdən-birə hansısa mahnı, kino ya da kitab yadımda düşür, axtarışa verirəm, əksər hallarda o haqda başlıq tapılır və mən sevincək olub bir-bir entryləri oxuyuram. Ya da bir də görürsən ki, hansısa anlayışa, inanca, siyasi ideologiyaya, cəmiyyətdəki hər hansı problemə və s. göstərilən münasibət haqqında məlumat almaq istəyirəm, yenə də dadıma sözlük çatır. Və yaxud hansısa görkəmli bir şəxs haqqında məlumat almaq istəyirəm, vikipediya darıxdırıcı gəlir və budur, yenə həmin doğma sözlük. Mən düşünürəm ki, mənim dünyagörüşümün xeyli artmasına (düzü indi də o qədər dünyagörüşlü olmasam da, 3-4 il əvvəlkinə nisbətən hədsiz dərəcədə yaxşı vəziyyətdəyəm) iki şey səbəb olub: birincisi, ingilis dili ilə ciddi şəkildə məşğul olub öyrənmək və bunun nəticəsində ingilisdilli kontenti qəbul etmək, anlamaq. ikincisi, sözaltı sözlüyü kəşf etməyim. Azərbaycan dilində bu cür platformanın olması doğrudan da əladır. ikinci ən sevdiyim cəhətə yəni səmimiliyə daha dərindən nəzər salaq: insanlar fikirlərini xalqın danışıq dilindən çox da uzaqlaşmayaraq bildirir. Jarqon sözlərə məhdudiyyət qoyulmur. Sərbəst, rahat bir şəkildə insanlar fikirlərini açıqlaya bilir.
Bu məkanı bir cümlə ilə ifadə etməli olsam, deyərəm ki, bir ensiklopediya ilə maraqlı söhbətlərin kəsişməsidir. Sözlük həqiqətən də böyük bir nemətdir.
Bura ilə demək olar ki bir ildir tanışam, lap əvvəldən oxucuyam (lap əvvəldən deyəndə saytın qurulmasını yox, mənim saytı tanıdığım vaxtı nəzərdə tuturam), qısa müddət ərzində yazarlıq etdim, sonra yazarlığı tərk etdim. Sonra isə yenə yazmaq həvəsim oyandı və təzə hesab açıb yenidən başladım.
Tez-tez düşünürəm ki, görəsən bu sayt barəsində başqalarına söhbət açımmı ya yox. Əvvəl istəyirəm deyim sonra şeytan deyir ki, qismətlərində varsa özləri tapacaqlar :D
Mən çox da sosial bir insan deyiləm. Buna görə də ünsiyyət ehtiyacımın tam ödəndiyini hiss edə bilmirəm. Sözlükdə yazar olmağın buna müsbət təsir edəcəyi fikrindəyəm. Elə lap birinci dəfə də yazar seçilib entrylərimi yazanda özümü xeyli xoşbəxt hiss eləmişdim. Fikirlərini ifadə eləmək hər bir insanı xoşbəxt edər fikrimcə.