Avqustun 26-da Heydər Əliyev Fondunun prezidenti Mehriban Əliyevanın təşəbbüsü ilə xüsusi qayğıya ehtiyacı olan uşaqlar üçün şənlik keçirilib. Şənlikdə Azərbaycan torpaqlarının işğaldan azad edilməsi uğrunda mübarizədə canlarından keçmiş şəhidlərin övladları, həmçinin valideyn himayəsindən məhrum, internat məktəblərində tərbiyə alan, sağlamlıq imkanları məhdud və ya xüsusi qayğıya ehtiyacı olan uşaqlar iştirak ediblər. Bayram şənliyi uşaqlara xoş və unudulmaz bir gün yaşatmaq, asudə vaxtlarının səmərəli və maraqlı keçirilməsinə şərait yaratmaq, hər bir uşağın diqqət və qayğı ilə əhatə olunduğunu hiss etməsi məqsədi ilə təşkil edilib.
İstirahət məkanlarına xüsusi avtobuslarla gələn uşaqlar gün ərzində müxtəlif əyləncə proqramlarında, əyləncəli oyunlarda iştirak edib, yaradıcılıq emalatxanalarında və ustad dərslərində öz istedadlarını nümayiş etdirib, rəqs edib, həmyaşıdları ilə gözəl vaxt keçiriblər. Dəniz kənarında yay ab-havasında keçən gecədə uşaqlar hovuzda da əyləndilər. Tədbirlərdən zövq alan, müxtəlif oyunlarda iştirak edən uşaqlar üçün nahar süfrəsi də açılıb.
Doğum günləri bu tarixə düşənlər bu özəl günü həmyaşıdları ilə birlikdə sevinclə qeyd ediblər. Tədbirlərin sonunda hər uşağa Heydər Əliyev Fondu tərəfindən xatirə hədiyyəsi təqdim olunub. Qeyd edək ki, Heydər Əliyev Fondu həssas qruplardan olan uşaqlara hərtərəfli qayğı göstərməyə xüsusi diqqət yetirir.
Fond valideyn himayəsindən məhrum olmuş, eləcə də xüsusi qayğıya ehtiyacı olan, o cümlədən valideynləri vəfat etdikdən sonra cəmiyyətin himayəsində qalan, şəhid olmuş uşaqlar üçün mütəmadi olaraq istirahət proqramları təşkil edir, onların sosial müdafiəsinin gücləndirilməsinə yönəlmiş təşəbbüslər həyata keçirir. Mənbə: https://www.trend.az/azerbaijan/society/4218206.html © 2026 Trend İnformasiya Agentliyi.
Xülasə — davamını mənbədə oxuyun.
