pünhan alatavalı

Qalmasa gizlin sədəf qoynunda dəryanın gözü
iz sürərmi surətin seyrində mənanın gözü

Şəhri-zibadan susuz səhraya büllür yol çəkib
Görmək üçün haləti-Məcnunu Leylanın gözü

Cilveyi-nuri-cəmali-həqqi seyran etməyi
Yusifin hüsnündə məşq etmiş Züleyxanın gözü

Məryəmin rəhmində seyr etmiş Xudanın rəhmini
iltifati-həqqə şahiddir Məsihanın gözü

Daği-Sinadan dəxi ey dağlı sinəm dön geri
Səndə həqqin nuru yoxdur məndə Musanın gözü

izzətim,başim,gözüm olsun fəda eşqində,ey
Kainatın fəxri,ərşin tacı,dünyanın gözü

Yar açır gün çöhrəsindən hər gecə nur örtüyün
Heyrətindən bağlanır hər dəfə Pünhanın gözü

7 fevral 2024 növbədənkənar prezident seçkiləri

ilham Əliyevin demokratik seçki keçirə biləcəyinə ümid edən məsum (ya da axmaq) insanların hələ də var olduğunu göstərən seçki. Bir şeyi birdəfəlik qəbul etməliyik. ilham Əliyev heç vaxt 70 faizlə seçilməyəcək, bunu istəməyəcək. Çünki, o yaxşı başa düşür ki, 70 faiz qarşı tərəfdə ümid yaradır, gələn seçkilərdə müxalifət daha da özünə inamla qatıla bilər. Hökumət hər dəfə özünə 90 faizin üstündə səs yazır ki, belə bir ümid işartısı olmasın heç kimdə. Hətta qıraqdan baxan olmasa 100 faiz də yaza bilərlər. Ona görə də, ilham Əliyevin güclüdür deyə demokratik seçkilər keçirməsi indi də, gələcəkdə də sadəcə mənasız ümiddir. Belə şey olmayacaq.

matrilocal

Evləndikdən sonra ərin arvadın evinə köçməsi ənənəsi, bir növ arvada getmək (baxma: Ərə getmək). Yəni evləndikdən sonra bəy gəlinin evinə yaşamağa gedir. Hətta 18-ci əsrə qədər bəzi yunan adalarında mövcudluğunu qoruyub bu ənənə. Güman ki, anaxaqanlığı dövründə daha geniş yayılıb. Azərbaycanda isə arvad ərin evinə getdiyi üçün patrilocal olur. Azərbaycan dilinə tərcüməsini tapa bilmədiyimə ingilis versiyasını yazdım.

7 fevral 2024 növbədənkənar prezident seçkiləri

ilham Əliyev təbii ki, demokratik seçkilərdə qalib gələr. Əslində bütün avtoritar liderlər ilk demokratik seçkilərdə böyük ehtimalla qalib gələr. Ancaq burada bir məsələ var, demokrarik seçkilər olsa təbii ki, 90 faiz səslə qalib gəlməyəcək. Təqribən 70 faiz səs yığar. Bu nəyə səbəb olar?
1. Komanda daxilində ona olan inamı azaldar, yüksək vəzifəli şəxslər prezidentə etimadın az olduğunu hiss edib ona qarşı birləşə bilərlər
2. Müxalifətdə inamı artırar, gələn seçkilər üçün daha inamla və əminliklə mübarizə apararlar.
Yəni ilham Əliyev qalib yüksək faizlə qalib gələrək həm öz komandasına, həm də qarşı tərəfə öz gücünü göstərir və özlərinə inamsızlıq yaradır. Ona görə də bu dəfəki seçkilərdə də yüksək faizlə qalib gələcək.

7 fevral 2024 növbədənkənar prezident seçkiləri

Hazırkı vəziyyətdə görünən odur ki, AXCP seçkiyə getməyəcək. Rəsmi açıqlama olmasa da üzvlərinin, funksionerlərinin yazdığı postlardan belə görünür ki, artıq bu məsələ AXCP üçün bitib: Yenidən boykota gedəcəklər. Sadəcə problem ondan ibarətdir ki, boykot "mən seçkiyə getmirəm, kim istəyir getsin" demək deyil. Boykot seçiciləri səfərbər edərək səsverməyə getməsinin qarşısını almaq və bununla da hökumətə olan etimadı zəiflətməkdir. AXCP isə insanların seçkiyə getməməsi üçün heç bir kampaniya aparmır, sadəcə özü getmir. Bunun bir nəticəyə çatması mümkün deyil.

Müsavat hələ ki, nə edəcəyinə qərar verməyib amma hətta getsə belə təqribən 1 ay içində 40 min imzanı yığacaq potensialı görünmür məncə, nəzərə alsaq ki, qışdır və tətil gəlir qabaqdan.

Real partiyası da hələ bir şey demir. Natiq Cəfərlinin yazdığı statusdan belə görünür ki, partiya daxilində fikir ayrılıqları var. ilqar Məmmədovun yazdığı statusdan belə anlaşılır ki, onun fikri seçkiyə getməməkdir çünki enerjilərini bu seçkiyə sərf etsələr parlament seçkilərinə hazırlaşa bilməyəcəklər.
Beləliklə hər şey hələ ki, ortadadır. Heç bir qəti fikir yoxdur. Mənim şəxsi fikrim odur ki, bu problemləri aşmağın tək yolu vahid namizəd ilə çıxış etməkdir. Ən azından Müsavat və AXCP bunu edə bilərlər. Bu həm iş yükünü azaldar, həm cəmiyyətdə həmrəylik və canlanma yaradar.