aileen wuornos

Mənə görə, ağıllara "nature or nurture?" sualını gətirən insanlardan olan, ən məşhur qadın seriyalı qatillərdən biri.
1956-cı ildə çalxantılı münasibəti olan olduqca gənc ana və atanın qızı olaraq anadan olan qəhrəmanımızın anası 14 yaşında ikən 16 yaşlı atası ilə evlənir. 2 il davam edən bu evlilik ərzində onun qardaşı anadan olur. Aileen dünyaya gəlməmişdən öncə atası həbsdə ikən anası atasından boşanır. Atasının şizofren olduğu, uşaqlara qarşı cinsi cinayətlər törətdiyi və həbsdə ikən özünü asaraq intihar etdiyi deyilir. Aileenin 4 yaşı olarkən anası onunla qardaşını hər ikisi alkoqolik olan valideynlərinin yanına tərk edir. Aileen sonralar babasının ona dəfələrlə cinsi zorakılıq tətbiq etdiyini, döydüyünü, qardaşının Aileenlə cinsi birlikdəlik yaşadığını deyəcəkdi. 11 yaşından etibarən siqaret, qida və narkotik qarşılığında cinsi əlaqəyə girdiyi deyilir. 14 yaşında babasının qonağı tərəfindən təcavüzə uğradıqdan sonra Aileen hamilə qalır. Uşaq dünyaya gəldikdən sonra uşaq evinə verilir. Bu zaman ərzində isə Aileen məktəbdən qovulur, nənəsi qaraciyər xərçəngindən ölür. Nənəsinin ölümündən sonra babası tərəfindən küçəyə atılır. Bundan sonra aktiv şəkildə seks işçiliyi ilə məşğul olaraq həyatda qalmağa çalışır. 20 yaşında 69 yaşında yaxt klub prezidenti ilə evlənsə də, şiddət tətbiq etdiyi üşün 9 həftə sonra boşanırlar. Bundan bir neçə gün öncə qida borusu xərçəngindən vəfat edən qardaşının sığortasından 10000$ əldə etsə də, pulu tezliklə xərcləyərək bitirir. Seriyalı qətllərə başlamamışdan öncə onun silahlı soyğun, maşın oğurluğu, polisə dirəniş göstərmə kimi maddələrdən hökm aldığı bilinir. 1998-ci ildə lezbiyan barda tanış olduğu sevgilisi ilə münasibəti seriyalı qətllərə görə 1991-ci ildə həbsinə qədər davam edir. Tyria Moor Aileenin 1988-1990-cı illər arasında törədəcəyi kişi qətllərinin şahidi olacaqdı. Wournos-un iddiasına görə, öldürülən şəxslər seks işçiliyi ilə məşğul olarkən ona təcavüz edən şəxslərdir. Aileen 2002-ci ildə letal iynə ilə edam edilir.
"I robbed them, and I killed them as cold as ice, and I would do it again, and I woukd kill another person because I've hated humans for a long time".
"If you can't be a good example, at least be a horrible warning".

qızların xoşuna gələn oğlan tipləri

Baxır da indi. Eləsi var, surətpərəstdir, eləsi var yox. Mən surətpərəst deyiləm. Ən azından biri yaraşıqlıdır deyə münasibət düşünmürəm. Məni çəkən insanın prinsipiallığıdır.
Amma ümumən sadəcə 1 şeyə aydınlıq gətirmək istəyirəm. Hə, qadın sevir kişiyə yaslanmağı. Kim sevmir ki, yorulanda başını qoymağa çiyin olmasını? Kişilər də sevir bunu. Amma qadının güclü kişi istəməyi onun bütün həyatına sahib olan kişi istəməyi deyil. Sevgisini göstərməyi bacaran, çətin vaxtda isti qucaq, sığınacaq olan birini istəməkdir. Çığıran, "onu qoymuram", "bunu edib, qələt edirsən", "əlimin yumruğu zordur" deyən kişi çox olsa, hozu olar.
Qısası qadın güclü kişi sevir. Amma gücü tək qadın yox, hamı sevir.

adhd

Qardaşımda olan xəstəlik. Əslində xəstəlik kimi baxmaqdan çox həyat tərzini ona uyğunlaşdırmaq lazımdır. Bu uşaqlara psixiatrlar müalicə yazır və psixoterapevt dəstəyi almalıdırlar. Mən gözümün qabağında qaqaşda demək olar ki, bütün əlamətləri görürəm. Diqqət dağınıqlığı, impulsiv hərəkətlər, alkoqol və siqaret kimi pis vərdişlərə meyillilik, yerində otura bilməmə kimi şeylər olur. O idmana getməyən günü özü də dəliyə dönür, biz də dəli oluruq. Adını 5 dəfə çağırırsan, ondan sonra çatır ki, onu çağıran var. Nəsə tapşırırsan, beyin havada olduğundan ya baş-ayaq edir ya da etməyi unudur. Bir insan evin içində nə qədər gəzə bilər? Valla bəlkə o adam evdə 2-3 kilometr gəzir. Düşünün indi vəziyyəti. Arada zarafata sənin mexaniki enerjini elektrik enerjisinə çevirsək, Bakı işıqlanar deyirəm. impulsiv hərəkətlərinə görə insanlarla da çətin dil tapırlar. Hətta sonra o hərəkəti niyə etdiyini soruşanda səbəb tapa bilmirlər, "bilmirəm, nəsə o moment elə oldu" deyirlər. Qardaşımın müəllimlə sözünün tərs düşmədiyi gün az qala yox idi. Ya yerində niyə oturmursan davası olurdu ya da ki, müəllimə ani cavablar verirdi. Danlaq yeyirdi. Əvvəl dediyim kimi adhd diaqnozlu şəxslərin substance abuse, yəni zərərli maddə tükətiminə meyli olur. Məsələn, sırf sakit bir küncdə otura bilmək üçün yarım litr çaxırı başına qaldırmaq. adhd-si olan uşağa dəcəl adı qoyub, yola verməyin. O uşağa da zülmdür. Bizdə qardaşım axır dilə gəldi ki, məni həkimə aparın. Heç bir işimi görə bilmirəm. içim sıxılır, hövsələm çatmır. Belə.

bioloji cins nisbətinin pozulmasına görə azərbaycanın ikinci olması

Vəziyyət biyabırçıdır. Qıza hamilədir deyə zorla qaynana, baldız, qaynata tərəfindən ( diqqət etdinizsə, ərin adını çəkmədim. Çünki haradadır , onda rus demiş o "dux" ki, qadın mənimdir, icazə vermirəm desin) aborta gətirilən qadınlardanmı danışaq, qız uşağıdır deyə bütün imkanlardan məhrum edilən, hamı tərəfindən 2-ci sort məhsul kimi davranılıb, at minnəti qoyulan qızlardanmı, sırf qızdır deyə ata qayğısı, sığalından maksimum məhrum edilən qızlardanmı, ya bütün bədbəxtliyinin səbəbinin qız doğmaq olduğunu düşünən anadanmı?
Halhazırda diri doğuşlarda 100 qıza 114 oğlan düşür. indi oğlanlar Nataşa, Anna, Saşa ilə evlənəndə də məlum yerlərini cıracaqlar ki, bəs sən azərbaycan elinin qəşəng günelləri ola-ola Nataşa ilə evlənirsən. Günel tapsa, evlənəcək. Bir aza qadınlar ölkədə hərəm qura biləcək kişilərdən.
Aparılan araşdırmaya görə hələ də kişilərin 49,5%-i, qadınların 22,5%-i ailədə qız uşağını maddi yük kimi görür. A siz səysiniz? Pul qazanan, hətta müdür olan qızlar yoxdur? Potensialı olmayan sümsük oğlunuzun bir yerini qaldırmaq yerinə ona qoyduğunuz mayanı qıza qoysanız, pul doğar sizə. Kişini saxlayacaq qədər pul qazanar. ironiya bir yana, normal təhsil verilmiş insanlar qadın, kişi olmasından asılı olmadan qazanc qazanır. Qız maddi yük deyil, əksinə normal diqqət ayrılanda ailəyə dəstəkdir. Müşahidələrimə də əsasən evdə təhsili və ya işi olmayan qadın varsa, yalnız kişi işləyirsə, o ailənin kriz anlarında durumu bərbad olur.
Məsələ o möhtəşəm namus məsələsidirsə, vəziyyət ,demək, daha pisdir. Əgər siz kişiliyi ətrafınızı qorumaqda görən kişi olmağınıza baxmayaraq bir qız uşağını təhlükədən qoruya bilməyəcəyinizi düşünüb, qızı abort etdirirsinizsə, demək, kişi deyilsiniz. Qorxaqsınız.
Uşaq gözünü açandan uşağa ancaq mətbəxin yerini öyrədən, uşağın belə hər hərəkətinə vedrə qoşan zehniyyətdir o selektiv abort edilənlərin səbəbkarı.
Ps. Qorumaq deyəndə evə bağlayıb, yediyi, içdiyini burnundan gətirməyi nəzərdə tutmuram.

sözaltı günlük

Sevgili günlük, günü gündən insanlara qarşı səbrimin tükəndiyini hiss edirəm. Halbuki əvvəl mənə "səndə daş səbri var" deyirdilər. Getdikcə kiçik məsələləri belə izah etməyə hövsələm çatmır, əsəbləşirəm. Evdə sırf marağa "hara gedirsən, nə üçün gedirsən, bu detal nədir" soruşulanda belə sonra deyərəm deyib yola verirəm. Çünki o detalı da izah etməyə hövsələm çatmır bəzən. Şeylər bir az tərs gedəndə əlimdəki əşyanı parçalayasım gəldiyi də olur. Yüksəkdən danışıq da bir müddətdir çilədən çıxarır məni. Özüm alçaqdan danışan biriyəm və məndən yüksəkdən danışmağım tələb ediləndə yoruluram, öz səsim başıma düşür. Az öncə sahə həkimi məni tərsləyib, səsini qaldırdı deyə içimdə yaranan qəzəbi təsvir edə bilmirəm. Qadını parçalamaq istədim rəsmən. Əsəbdən gözüm doldu. Qadının qırtlağına basasım gəldi. Mən nə ara belə əsəbi oldum bilmirəm.

həkimlik

Çox qəribə şəkildə həkim olduğu üçün deyinən, amma yenə doğulsam, yenə həkim olardım deyənlərin seçdiyi peşə. Deyəsən həkimlər mazoxistdir. Lol. Bir müddət sonra qabağından adam gələndə adamı analiz edə bilən, türk demiş insan sarrafı olan az deyil bu peşədə. Evində uşağın qızdırsa da,xəstəxanada xəstəyə baxmaq və bunu içdən gəldiyi üçün eləməkdir həkimlik. Ona görə özünü tam həkimliyə verən insanın ailəsində problem olur. Çünki onu anlamırlar.
Həkimlik həm də səbr edə bilməkdir. Gecə 12 belə olsa, sabah soruşa biləcəyi sözü illah o gecə vaxtı sənə zəng edib soruşan xəstə yaxınına səbr eləmək, mənasız sual verən xəstə və yaxınına səbr eləmək, insanların dəhşətə salan axmaq hərəkətinə səbr eləmək. Heç nə demirəm, elə təkcə Terapevtik sahədə işləyənlərdə həqiqətən daş səbri var. sən aydan sual verəndə qabağındakı çaydan danışar. Sən də elə etməlisən ki, nə şiş yansın, nə kabab. Həm normal anamnez yığa biləsən, həm də pasient "sözümü kəsdi, mənə hörmətsizlik elədi" tripinə girməsin. Pediatriya isə dəhşətdir. Biz bir dəfə dərsə gedəndə yalan olmasın, bir uşağın yanında 5 adam gəlmişdi. Həkimin yanında hərəsi bir avaz danışacaqdı indi. Hələ əl vurmamış, həkim qapıdan girən kimi var gücü ilə çığıran uşaqlar var. Uşağın qabağında öz anası olsa, uşaq evdə elə eləsə, 100 faiz qapazı yeyər. Amma təəssüf ki, bəzən o səbr kasası daşar və səni səbrini basmadığın üçün də günahlandırarlar. Həkimlik həm də yersiz minnət yeməkdir.
Demirəm, həkimlərin hamısı bombadır, əladır. Amma olan-qalan motivasiyaları ağır iş rejimiylə sömürülən, üstünə də at minnəti yeyən insanı günahlandırmaq düz deyil.