hououin kyouma


613   0   0   0
2.nəsil yazar
entry: 613
reytinq: 215
karma: 0
izləyən: 29
oxunma: 98,450






stranger things

Mənə görə hər növbəti sezonu əvvəlkindən daha maraqlı idi. Hər sezonda fərqli situasiyalar və personajların yaşlarının irəlilədikcə hadisələrə necə yanaşmasını gördük. Nadir seriallardandır ki, qrupa sonradan qoşulan bir personaj belə "artıq" biri kimi görünmür. Duffer qardaşlar aktyor seçimində hər dəfə çox uğurlu addımlar atırlar. 4-cü sezon indiyə qədər ən çox büdcəsi olan və ən uzunmetrajlı sezonudur serialın. Hər bölüm 1 saatdan çox olduğu üçün 2 hissəyə ayırıblar serialı. ilk 7 bölüm 27 mayda yayımlandı, qalan 2 bölüm isə 1 iyulda yayımlanacaq. 2 bölümə sıxışdırıla bilməyəcək qədər çox suallar var ortada. 5-ci sezonun son olacağını Duffer qardaşları açıqlamışdılar amma son sezona hansı vəziyyətdə gedəcəklər orası maraqlıdı. Düzdür, bəzi çox bəyənmədiyim nüanslar oldu amma fikrimcə 4-cü sezon çox uğurlu alınıb. Həmişəki kimi bölümlərdə istifadə olunan mahnılar illər sonra yenidən hit olacaq. Serialın ən çox sevdiyim cəhəti personajların və ümumi abu-havanın çox təbii olmasıdır. Çox rahatlıqla içinə girə bilirsən mövzünün. Bəlkə də 90-larda doğulduğum üçün də mənə əlavə səmimi gəlir.

1 əjdaha! hououin kyouma

29.05.2022 - 23:48 #350521 mesaj facebook twitter

matia bazar

1975-ci ildə Genoada yaranmış italyan qrupudur. Qrupa tam bir janr demək çətindir ama bir növ latın, tango musiqisiylə pop rock və elektronik elementlərin qarışımı kimidir. Solo tu, per un'ora d'amore, stasera che sera, ma perche?, che male fa kimi qışın ortasında belə yayı gətirəcək qədər istiliyə sahib ifaları var. Qrup bu günə qədər fəaliyyətinə davam edir amma yaradıcı beşlikdən(Piero Cassano, Aldo Stellita, Carlo Marrale, Giancarlo GolziAntonella Ruggiero) heç biri artıq qrupda deyil.
italyanın ən məşhur musiqi yarışmalarından biri olan Sanremo Music Festivalda 12 dəfə iştirak etmiş və iki dəfə qalib gəliblər. 1979-cu ildə isə italyanı eurovisionda təmsil ediblər.

per un'ora d'amore:

(youtube: )

stasera che sera:
(youtube: )

2 əjdaha! hououin kyouma

21.04.2022 - 23:42 #348957 mesaj facebook twitter

erik ten hag

Son illərdə potensiallı məşqçilər siyahısında adı ilk sıralarda yazılan insanlardan biri idi və nəhayət Premier league-ya keçid etdi.
2017-ci ilin sonlarında başına keçdiyi ajax ilə bu günə qədər 2 eredivisie, 2 hollandiya kuboku və 1 dəfə də super kuboku qazanıb. Hal-hazırda ligada ajax ilk sıradadır və böyük ehtimalla united-a 3 eredivisie çempionluğu ilə getmiş olacaq. Ajax indi çox güclü bir klub olsa da Erik ilk gəldiyində bir neçə ildir çempion ola bilməyən klub halında idi. Gəldiyi gündən bu yana kluba gətirdiyi əksər oyunçularla ajaxı yenidən diriltti. Daha çox gənc oyunçulara üstünlük verən bir məşqçidir. Son çıxan xəbərlərə görə də United-ın qarşısına qoyduğu əsas şərtlərdən biri də o idi ki, oyunçu heyəti üstündə tam söz sahibi olacaq. Yəni, istədiyi oyunçunu göndərə bilər və istədiyi oyunçular da alınmalıdır. Rangnick ilə birlikdə bir neçə il ərzində Manchester United-ı yenidən arxa-arxaya PL qazandığı günlərə gətirə biləcək potensialı var.

2 əjdaha! hououin kyouma

21.04.2022 - 21:50 #348951 mesaj facebook twitter

the batman

Son illərdə izlədiyim ən gözəl filmlərdən biri oldu. Bir də qeyd edim film, super qəhrəman filmi yox, tam olaraq film. Çünki, super qəhrəman filmlərinin artıq öz janrları və izləyici kütləsi var. Bu film isə hər kəsin izləyə biləcəyi, detallarla bol, keyfiyyətli bir detektiv filmidir. Aktyor seçimləri 10 üstündən 10-dur. Pinqvindən Batman-a qədər hamı personajının necə bir olduğunu tam dərk edib. Ümumi filmin aurası da çox realdır. Yəni, həqiqətən gotham adlı bir şəhərin olduğu və heç də gözəl bir yer olmadığı hissini çox yaxşı hiss etdirir izləyiciyə. Bu cəhətdən kinematoqrafiyası çox gözəl alınıb. izlədikdən sonra oxudum ki, Matt Reeves filmi çəkəndə Alfred Hitchcock-un və daha bir çox 1960-1980-ci illərdə çıxmış detektiv filmlərindən ilhamlanıb. Pattinson-un canlandırdığı Batman-in cavan, depressiv və içinəqapanıq görünümü ilə Zoe Kravitz-in Cat Woman personajının canlı, aktiv hərəkətləri bir-biri ilə çox gözəl uyğunlaşıb. Açığı ilk görəndə bu ikisinin uyğunluğu barədə şübhələrim vardı amma yersiz bir şübhə imiş. Filmin 3 saat olması da rejissora fikirlərini izah etmək üçün imkan yaradıb. Çünki, heç bir mövzünü tələsib, üstündən keçməyib. Düzdür, böyük ehtimalla bəzi yerlərində, xüsusilə gənc nəsil izləyicilər sıxıla bilər uzun monoloqlara görə amma filmin ilk dəqiqəsindən görünür ki, rejissor personajlarını tam formada nümayiş etdirmək istəyib izləyiciyə. Hər şeyi izahlandırıb və izləyicidə "bu niyə belə oldu?" hissiyatı yaranmasına macal verməyib. Oxuduğuma görə də film qəşəng pul qazanıb. Bu o deməkdir ki, 2-ci film dəqiq çəkiləcək. Həvəslə növbəti filmi gözləyirəm. DC diqqətli yanaşsa sırf bu yeni qaranlıq abu-havalı, super qəhrəman aurasından uzaq filmləriylə yenidən marvelə rəqib ola bilər.

1 əjdaha! hououin kyouma

18.04.2022 - 22:37 #348808 mesaj facebook twitter

duman

Təşkilatçıları konkret tülkülüklə məşğuldu. iticket.az sırf ucuz(səhv etmirəmsə 15-30 azn-lik) biletlər satıldıqdan sonra instagramda konsertin elanını verdi. indi yerdə qalan biletlər isə 90-190 azn arasıdır. Meet&greet olmadığı müddətcə hər 2-3 ildən bir gələn türk qrupu üçün belə qiymətlər qoymaq absürddür. Onda deməli muse filan gəlsə bilet qiymətləri 250 azn-dən başlayacaq.

Bunlardan savayı hansı ağılla rock konsertini konqres mərkəzində etmək qərarına gəliblər? 2019-cu ildə gül kimi elektrada konsert vermişdilər. Məqsəd daha çox bilet satmaqdırsa onda expoya keçirtsinlər konserti amma konqres mərkəzinin nə əlaqəsi var? Bilmirəm bu konqres mərkəziylə müqaviləmi bağlayıblar ya sponsorlarıdımı nədirsə açıqlanan 5 konsertdən 4-ü burada keçirilir. Bakıda oturacaqlı zaldan çox ayaq üstü konsertlərin keçirilə biləcəyi zallar lazımdır amma onda biletləri sıraya görə dədə-baba qiymətinə sata bilməyəcəkləri üçün yapışırlar belə oturacaqlı məkanlardan. Təbii ki, başa düşüləndir, təşkilatçılar da pulun qazanmalıdır konsertlərdən amma arada bu konsertlərə gələn izləyiciləri də fikirləşsələr əla olar.

9 əjdaha! hououin kyouma

26.03.2022 - 23:30 #347986 mesaj facebook twitter

discogs

(bax: discogs.com)
Plastinka, cd, kaset qısaca içində musiqi olan hər şeyin satıldığı bir saytdır. Əksər satıcı daha çox ikinci əl məhsullar satır amma yeni məhsul satanlar da az deyil. Məhsulun vəziyyəti Mint(yeni), Near Mint(demək olar ki, yeni. Böyük ehtimalla salafanı açılıb və ən uzağı 1-2 dəfə oxutdurulub), Very Good+(müəyyən qədər istifadə olunub amma ciddi bir problemi yoxdur), Very Good(çox istifadə olunub amma yenə də işə yarayandır), Good Plus+(ciddi cızıqları var. Plastinkadırsa oxudanda ciddi tıqqıltılar və atmalar olur), Good(plastinkadırsa bəzi mahnılar heç oxumaya bilər, oxusa da tez-tez ata bilər və səsi keyfiyyətli deyil), Poor(bərbad haldadır. Özü üçün yox amma bəlkə qutusu yaxşı vəziyyətdədirsə ona görə almaq olar) kimi qeyd olunur.
Hələ ki, təcrübələrimə görə Azərbaycan üçün shipping cəhətdən ən uyğun ölkə Almaniyadır. Hollandiyadan filan bir plastinka üçün shippingə 20+ euro istənilirsə Almaniyadan 6-7 euro-dan başlayır. Əsas diqqət etməli olduğunuz şey hər alışveriş saytında olduğu kimi burada da satıcının reytingidir. Əgər son 1-2 ayda yazılan feedback-lərdə narazılıq edən azdırsa və ya yoxdursa rahatlıqla sifariş verə bilərsiniz.

1 əjdaha! hououin kyouma

11.03.2022 - 02:57 #347004 mesaj facebook twitter

altın gün

2016-cı ildə Jasper Verhulstun facebook-da paylaşdığı "Türk musiqiçiləri axtarılır" elanıyla yaranmış folk/funk/psychedelic rock qrupudur. Qrupun iki vokalisti Merve DaşdemirErdinç Ecevit Yıldız Türkiyə əsllidir, qalan üzvlərin hamısı isə Niderlandlıdır. Altın Günün bütün mahnıları köhnə turk folk* ifalarının coverlarıdır. Bu günə qədər 4 albomları çıxıb.

Goca dünya:

(youtube: )

yanıyorum:
(youtube: )

6 əjdaha! hououin kyouma

09.03.2022 - 02:18 #346894 mesaj facebook twitter

sofiane pamart

25 aprel 1990-cı ildə Fransada doğulmuş, əslən mərakeşli olan məşhur Fransız pianistidir. Fransada tipik klassik pianisti stilindən uzaq görünümü ilə tanınmışdı. Konservatoriya oxumağına və öz bəstələrinin demək olar ki, hamısı sırf modern classical janrında olmasına baxmayaraq, Koba LaD, Vald, Maes, Sneazzy kimi bir çox rap ifaçısı ilə də duetləri var. Bu günə qədər 6 albomu çıxmışdır.

LOVE:

(youtube: )

3 əjdaha! hououin kyouma

08.03.2022 - 22:54 #346879 mesaj facebook twitter

celeste

2018-ci ildə çıxmış və həmin ilin The Game Awards* şousunda ilin ən yaxşı indie oyunu mükafatını qazanmış platform oyunudur. Oyunun teması bundan ibarətdir ki, Madeline adlı baş personaj Celeste dağlarına çıxmağa çalışır və bu yolda o öz daxili problemləriylə üz-üzə gələrək zirvəyə çatır. Düzdür oyunun çox maraqlı dizaynı və oyun stili olsa da oyunun bu qədər sevilməsinin səbəbi oyunun mövzusunun hər kəsin başına gələn bir şey olan insanın öz daxili problemləriylə mübarizə aparmasıdır. Oyunu hal-hazırda 1 milyondan çox satılıb və indie bir oyun çox böyük bir uğurdur bu. Çünki, nəticə olaraq loru dildə desək 4-5 insan tərəfindən hazırlanmış bir oyun idi.

2 əjdaha! hououin kyouma

24.02.2022 - 03:59 #346160 mesaj facebook twitter

celeste

2005-ci ildə Fransanın Lyon şəhərində qurulmuş Black/Sludge Metal/Post-Hardcore qrupudur. Əksər fransız qrupu kimi mahnı sözlərinin demək olar ki, hamısı fransızcadır. Assassine(s) adlı yeni albomlarıyla birlikdə tam 6 albomları çıxıb bu günə qədər. Albomlarının üz qabıqlarıyla, musiqi tərzləriylə özlərinə xas bir duruşu var qrupun.

2 əjdaha! hououin kyouma

24.02.2022 - 03:49 #346158 mesaj facebook twitter

mor ve ötesi

Bakıdakı konsertlərində təşkilatçılıq sıfır yox, biabirçılıq səviyyəsində olsa belə konsert özü çox yaxşı keçdi. Çünki, həm gələn insanlar qrupu tanıyan, bilən insanlar idi həm də ac idilər belə bir konsertə. Bir mahnını belə tək oxumadılar ki, qrup üzvləri, daha doğrusu Harunun dediklərinə görə nə bu qədər insanın gələcəyini gözləyirmişlər nə də bu qədər iştirak edəcəklərini. Sırf buna görə də gələn il yenidən gəlmək istədiklərini qeyd etdi. Əslində bundan qat-qat çox insan gələrdi amma konsert düz əməlli reklam olunmadığı üçün bir çox insan çox gec xəbər tutdu.
Səs keyfiyyəti də gözləniləndən yaxşı idi, səbəbi də odur ki, gördüyüm qədərilə öz komandaları ilə gəlmişdilər Bakıya. Yəni, bütün hər şeyi özləri qurmuşdu deyəsən. Çünki, qrupun arxasındakı monitordan hər ifaya uyğun klipin yayımlanması, işıq sistemləri, səsin zalın hər nöqtəsində eyni səviyyədə səslənməsi kimi faktorları daha çox qrupla tez-tez işləyən insanlar bu qədər səlis edir.
Konserti 3 kamera çəkirdi. Ümid edirəm bu çəkiliş boşuna deyildi və youtube tipli bir sayta yüklənilər nə vaxtsa.
Son olaraq başa düşürəm 90 dəqiqə əksər insana az gəldi amma az gəlməsinin səbəbi onda idi ki, demək olar fasilə vermədilər. Fasilə vermədikləri üçün də insanlar hansı ara 90 dəqiqə keçdi bilmədi. Ancaq, bir çox qrupların konserti elə 90-120 dəqiqə arası dəyişir. Çünki, optimalı budur. Bunlara baxmayaraq, əgər tamaşaçıların belə olacaqların bilsəydilər 120-ə çəkərdilər fikrimcə. Bunun da cavabını ümid edirəm növbəti ildəki konsertlərində biləcəyik.

9 əjdaha! hououin kyouma

26.12.2021 - 18:52 #342207 mesaj facebook twitter

as i lay dying

2000-ci ildə San Diego, California, ABŞda yaranmış Metalcore qrupudur. Qurulduqları dövrdən bu yana janrının ən məşhur qruplarından biri olaraq sayılırlar. 2014-2017-ci illər arası vokalist Tim Lambesis "hitman" tutub, öz həyat yoldaşını öldürtmək istəməsinə görə həbsdə olduğundan qrup o üç illik müddətdə fəaliyyətini dayandırmışdı. Tim 2017-ci ildə həbsdən çıxdıqdan sonra tək başına da olsa as i lay dying adı altında yeni albom çıxardacağını qeyd etmişdi amma qısa bir müddət sonra digər qrup üzvləri də yenidən qrupa qayıtdı və 2019-ci ildə shaped by fire adlı 7-ci albomları işıq üzü gördü.

3 əjdaha! hououin kyouma

22.12.2021 - 00:49 #341982 mesaj facebook twitter

ali koç

Fenerbahçe prezidenti olduğu gündən bu yana hələ ki, futbol komandasında bir sezonu eyni məşqçiylə bitirə bilməmiş prezidentdir. Azarkeşlərə futbol komandasıyla bağlı nə söz vermişdisə hamısının əksini etdi. Komandanı mən yox, məşqçi və "sporting director" idarə edəcək dedi və nəticədə yenə öz bildiyini elədi. Hər ilin əvvəlində "bu il pilot klubumuzu açıqlayacağıq" deyib, sonda heç bir klubla razılaşa bilmədi. idarə heyətinə futboldan anlayışı olan insanlar yox, hər dediyinə "hə" deyəcək tipləri gətirdi. Kömək etmək istəyənləri də bir-bir uzaqlaşdırdı heyətindən. Gətirdiyi hər məşqçi üçün "bu məşqçiylə bir neçə illik planlarımız var" deyib, hər birini 4-5 ay ərzində komandadan uzaqlaşdırdı. Həm cocu həm ersun həm erol həm də vitor pis məşqçi idi? Yox, sadəcə heç birinə rahat istədiklərini etmək şansı vermədi. Mətbuata, hər yerindən duran tv şərhçisinə əzdirdi məşqçilərini. Birini belə qorumadı. Digər yanda isə Beşiktaş hal-hazırda müvəqqəti məşqçisi olan Önder Karaveli-ni pisləyən bir proqrama görə o dəqiqə twitter-dən yazı yayımladı və göstərdi ki, məşqçilərini elə hər yerindən duran pisləyə bilməz. Hər məşqçiyə yarım-yamalaq komanda heyəti verib, bununla məni çempion elə dedi. Məşqçilərin istədiyi 1-2 oyunçunu alıb, qalanlarını ya rogon-dan ya da öz bildiyi yerlərdən aldı. Əlindəki komandaya uyğun yox, maddi və başqa səbəblərə görə məşqçilər seçdi. Cocu-nun əlindən ən vacib iki futbolçusunu(Josef və Giuliano) avqustun axırına yaxın göndərib, yerinə düz əməlli oyunçu gətirə bilmədi sonra günah cocu-da oldu, Ersun-un komandasının nə sol cinah müdafiəçisi var idi nə də düz əməlli müdafiəçisi amma səhv edən Ersun kimi görüldü, Erol-un komandası kağızda yaxşı görünsə də qətiyyən onun oynadığı stilə uyğun deyildi amma günahkar Erol oldu, Vitor əlindəkilərlə bir sistem uyğunlaşdırmağa çalışırdı ki, bu səfər də Rıdvan Dilmen kimi insanların sözünə görə bütün komandanı qatdı bir-birinə amma nəticədə yenə Vitor bacarmadı deyildi. Ən əsas məsələ bu 4 sezonda da bəzi oyunçular sırf bəyənmədikləri üçün məşqçilərinin ayağının altını qazdılar və prezident olaraq görünən bu insan heç nə edə bilmədi bunlara qarşı. Bəzən hətta əksinə bir az da özü mobbing etdi məşqçilərinə. Hər məşqçisində bir nöqsan tapdı amma bir dəfə də "biz səhv elədik" deyə bilmədi. Bundan sonra da çətin ki, bir uğur qazana bilsin. Fenerbahçe-yə gələndə kadıköydə az qalsın qucaqlarda gəzdirilən insan, indi eyni yerdən yalnız polislərin köməyilə çıxa bilir. Seçkiyə nə vaxt gedəcək məlum deyil amma getmədiyi müddətcə fenerbahçe futbol komandasından bir uğur gözləmək ütopik sayılar. Heç olmasa artıq bəllidir ki, növbəti seçkidə qarşısında Eyüp Yeşilyurt tipli biri yox, Saadettin Saran, Gürel Aydın kimi insanlar olacaq. Aziz Yıldırım kimi pis niyyətli, klubu öz biznesi üçün istifadə edən biri deyil Ali Koç, əksinə klubu ən yüksək yerlərdə görmək istəyir amma istəməklə bacarmaq bir-birindən fərqli şeylərdir. Çox böyük ümidlərlə gələn bir prezident idi amma artıq gedəcəyi günü azarkeşlər həvəslə gözləyir.

2 əjdaha! hououin kyouma

22.12.2021 - 00:35 #341981 mesaj facebook twitter

vitor pereira

1 yanvar 2021-ci ildən bəri boşda olmasına baxmayaraq, iyulun 2-də "başqa məşqçilərlə razılaşa bilmədiyimiz üçün yox, bizə uyğun olduğu üçün seçdiyimiz" məşqçi adı altında 4 səhifəlik "yarım kalan hikayeyi tamamlamak için geldi" twiti ilə gətirilmiş və cəmi 5 ay yarım komandanın başında qalmış Fenerbahçe məşqçisidir. ilk gəldiyində "Vitor ilə uzunmüddətli planlarımız var" deyirdi prezident utanmadan. Bir daha məlum oldu ki, heç bir xarici məşqçiylə razılaşa bilmədikləri üçün məcbur Vitor-un qapısına gedəsi olmuşdular son anda. illərdir Vitorun taktikasının 3-4-3 olduğunu bilməyən yoxdur. Adicə transfermarkt-a belə girib, baxsan "Preferred formation" bölməsinə 3-4-3 qeyd edilib. ilk dövründən hamıya da məlum idi ki, Vitor tərs adamdı, "komanda mənimdir" ideologiyasında hərəkət edən məşqçidir. Öz bəyəndiyi, öz gətirdiyi futbolçulara üstünlük verib, "ulduz" oyunçularla problemlər yaşayan biridir. Öz sisteminə uyğun deyilsə Ronaldo-yu belə göndərib, yerinə portuqaliyanın 2-ci ligasından oyunçu gətirib, oynadacaq bir xarakteri olan insandı. Komandanda Mesut, irfan Can kimi oyunçuların olmasına baxmayaraq, yenə də gətirdin bu adamı. Gətirdin, onda heç olmasa axıra qədər məşqçinin arxasında dayan, əzdirmə insanlara. Transferlərini də taktikasına uyğun elətdirməyə çalışdı. Koç-un Min Jae, Rossi, Crespo kimi futbolçuların varlığından belə xəbəri yox idi. Gətirdiyi hər oyunçu da komandaya kifayət qədər yararlı oldu. 3-4-3-ün cinahlarında oynayacaq oyunçular istədi. List verdi amma bir dənəsini belə ala bilmədilər. Özü gedib, Ferdi-dən, Osayi-dən, Muhammed-dən sağ/sol cinah yarımmüdafiəçisi düzəltdi. Tisserand-ı az qala hamımız qovurduq amma bir anda 3 nəfərlik müdafiənin ən vacib oyunçularından birinə çevirdi. Mərkəzə Eustaquio olmadı Morita-nı istədi amma ən axırda güc bəla Crespo-nu gətirə bildilər, üstünə bir də Rogon əmidən Meyer-i hədiyyə elədilər. Hücuma striker istədi amma sırf rogon-dandı deyə Berisha gəldi ki, çox gözəl futbolçudur amma striker deyil. Bunlara baxmayaraq, Trabzonspor oyununa qədər də kifayət qədər yaxşı oynayırdıq. Komanda da 3-4-3-ə yavaş-yavaş uyğunlaşırdı amma sağolsun bizim uber prezident gedib, öz məşqçilik kariyerasında bir zibil bacarmamış Rıdvan Dilmen-in, Mesut-un mızıldanmalarına görə məşqçinin işinə qarışıb, komandanı 4 müdafiəçili sistemə qaytardı. Həmin vaxtda da gələn-gedən əzdi fenerbahçe-ni. Ondan sonra da 3-4-3-ə qayıtsaq belə məşqçiylə futbolçular arasında əlaqə qopmuşdu. Nəticədə Ali Koç dövründə "məşqçi" adı altında məhv edilmiş növbəti bir insan oldu sadəcə.

4 əjdaha! hououin kyouma

21.12.2021 - 23:52 #341977 mesaj facebook twitter

ralf rangnick

Öz futbol kariyerası adi keçsə də məşqçi olaraq demək olar ki, getdiyi yerdə uğur qazanmış alman məşqçidir. 1983-1988-ci illə arasında artıq oynadığı klublarda həm məşqçi həm də futbolçu kimi kariyerasına davam edirdi. Məşqçilik kariyerasındaki ilk uğuru isə o dövrdə 3-cü pillə liqa* olaraq bilinən Regionalliga Süddə olan Ulm 1846 klubunu növbəti 2 il ərzində bundesligaya çatdırması olmuşdu. Səhv etmirəmsə getdiyi hər klubu bundesliga səviyyəsinə çatdırmağı bacarıb. 2012-ci ildən isə Red Bull-un RB SalzburgRB leipzig klublarıda sporting director* vəzifəsinə keçmişdi. Bu zaman ərzində isə bu klubları ən yüksək səviyyələrə çıxartmış, potensiallı bir çox futbolçunu da kluba qatmışdı. 2019-2020-ci illər arası isə bütün Red bull futbol klublarının Global Sports Director vəzifəsinə keçmişdi. Yəni, həm RB Salzburg həm RB Leipzig həm New York red bulls həm də RB Bragantino klublarının idarəsi onda idi. Klubların məşqçilərini də özü seçirdi. 2018-ci ildə RB Leipzigə məşqçi kimi o dövrdə 1899 Hoffenheimin məşqçisi olan Julian Nagelsmanni gətirmək istəyirdi ama Nagelsmann bir il daha klubda qalacağını demişdi Rangnickə. Sırf buna görə növbəti 1 il ərzində kluba başqa məşqçi gətirmək əvəzinə özü məşqçilik etdi. Sonrasında da yerini Nagelsmann-a verdi.

Rangnick modern alman futbolunun atası kimi görünür. Gegenpressing-in də yaradıcısı Rangnick olaraq bilinir. Onun fikrincə izləyici oyuna baxarkən futboldan zövq almalıdı. Sırf sıxıcı oyunla da olsa qalib gəlmək onun ideologiyasına uyğun gəlmirdi. Bundan izafə texnologiyadan da istifadəni məşhurlaşmasında rolu olmuşdu. Bir çox yeni sistemlərdən istifadə edərək təkcə futbol sahəsində yox, fərqli metodlarla da futbolçuların zəif nöqtələrini inkişaf etdirmək üçün çalışıb həmişə. Hal-hazırda dünyanın güclü futbol klublarındakı alman məşqçi hegemoniyasının səbəbi də bu insandır. Jürgen Kloppdan Roger Schmidtə Thomas Tucheldən Julian Nagelsmanna qədər bir çox məşqçi ya rangnick sayəsində bu səviyyələrə çatıb, ya da ondan ilhamlanaraq öz taktikalarını yaradıb. Ralf-in bu məşqçilərin əksinə bu dövrdə qədər "elit" klublarda işləməmə səbəbi isə getdiyi klublardan istədiyi tələblər olmuşdu. Çünki, sırf bir sezonluq bir məşqçi deyil. Gedirsə o klubda alt yaş kateqoriyalarından əsas komandaya qədər futbol ilə əlaqəli hər sahədə söz sahibi olmağı istəyir. Bunun da ən yaxşı nümunəsini Red bull klublarında göstərmişdi. Nəhayət istədiyini isə ona Manchester United verdi. United SAF sonrasında konkret məşqçi üyüdmə klubuna çevrilib. Çünki, 27 illik SAF hegemoniyasından sonra yeni bir sistem oturtmaq əvəzinə elə hər hansı bir məşqçini gətirməklə nəyisə düzəldə biləcəklərini fikirləşirdilər. Təbii ki, bu alınmadı və nəhayət yolları rangnickə düşdü. Hazır ki, vəziyyətə görə sezon sonuna qədər məşqçi sonra da məsləhətçi/sporting director tipli bir rolu olacaq böyük ehtimalla klubda. Tək problem var idi, o da Rangnick normalda cavan futbolçularla oynamağa üstünlük verən bir məşqçidi. Çünki, onlar həm öyrənməyə daha meyllidi həm də daha tez istədiyini yerinə yetirir. United-da isə hal-hazırda Ronaldo-dan pogba-ya qədər bir çox ulduz futbolçu var. Əslində bir növ bu da onun özü üçün ayrı bir testdir ki, belə bir elit səviyyə klubda nələr bacara biləcək. işinə qarışılmasa united növbəti 2-3 il ərzində yenidən aid olduğu səviyyələrə çata bilər fikrimcə.

3 əjdaha! hououin kyouma

10.12.2021 - 03:38 #341255 mesaj facebook twitter

flyleaf

2002-2016-ci illər arası fəaliyyət olmuş, Bell County, Texas, ABŞ çıxışlı Alternative rock qrupudur. Bu dövr ərzində 4 albomları çıxmışdır və elə ilk albomdan məşhurluq qazanmışdılar. Debut albomları* 1 milyondan çox satış əldə etmişdi. 2000-lərin ən məşhur alternative rock qruplarından biri idi Flyleaf. Bəzi ifalarındakı dini temalara görə də daha çox christian rock qrupu kimi də görülürdülər.
ilk üç albom boyunca vokalda Lacey Sturm idi amma 2012-ci ildə oğlu dünyaya gələndən sonra qrupdan ayrılmışdı. Yerinə isə qısa bir müddət əvvəl dağılmış Vedera qrupunun vokaliti Kristen May keçdi və onunla da bir albom çıxardılar. 2016-cı ildə də May həm ailəsiylə daha çox vaxt keçirmək istədiyini həm də bu 4 il ərzində heç vaxt özünü qrupun bir parçası kimi hiss etmədiyini qeyd edərək qrupdan ayrıldığını açıqlamışdı. Lacey qrupun məşhurlaşmasında böyük rol oynamışdı deyə bir çox dinləyici heç vaxt May-i yeni vokal kimi qəbullana bilməmişdi. Əslində tam olaraq dağıldıqlarını heç vaxt açıqlamayıblar amma 2016-cı ildən bəri qrup bu barədə məlumat verməyib deyə bir çox yerdə hələ ki, "on hiatus" yazılır.

1 əjdaha! hououin kyouma

09.12.2021 - 04:41 #341211 mesaj facebook twitter

vagabond

1998-2015-ci illər arasında kodanshanın morning adlı həftəlik çıxan seinen jurnalında yayımlanmış mangasıdır. Manga əfsanəvi mangaka Takehiko inoue tərəfindən çəkilmişdir. Manga məşhur yapon qılınc ustası Musashi Miyamotonun həyatından bəhs edir. Əslində manga özü Eiji Yoshikawa tərəfindən yazılmış və 1935-ci ildə yayımlanmış musashi adlı romanın manga adaptasiyasıdır. Yəni, mövzu tamamilə o kitabdan götürülmüşdür. Mangasının hələ ki, 327 chapteri çıxmışdır. myanimelist-də hal-hazırda ən yaxşı 4-cü mangadır. Bu günə qədər dünya üzərində 82 milyondan artıq kopyası satılıb və bununla da ən çox satılan mangalar arasında yerini alıb.

Manga özü hələ ki, bitməyib. Mövzu yarıda qalıb amma mangaka inoue 2015-ci ildən bəri dayandırıb çəkməyi. Səbəb olaraq da çəkdiyi digər mangalarına fokuslanmaq istədiyini qeyd edib. Nə vaxtsa mövzuya qaldığı yerdən davam edəcək amma o gün nə vaxt gələcək hələ ki, məlum deyil. Bu qədər məşhur və çox satılan manga olmasına baxmayaraq isə bir dəfə animesi çəkilməyib. Səbəbi tam məlum deyil amma böyük ehtimalla mangaka inoue heç bir studiyanın bu qədər uzun metrajlı bir mangaya keyfiyyətli bir anime çəkə biləcəyinə inanmır.

2 əjdaha! hououin kyouma

06.12.2021 - 03:10 #341085 mesaj facebook twitter

berserk

Usta mangaka Kentaro Miura tərəfindən çəkilən 1989-2021-ci illər arası yayımlanmış seinen mangasıdır. 1989-1992-ci illər arası hakusenshanın Monthly Animal House adlı, 1992-2021-ci illər arası isə Young animal adlı jurnalında yayımlanmıdır. Manga/anime dünyasının ən məşhur işlərindən biri kimi görülür Berserk. Bu günə qədər yüzlərlə manga və anime sırf Berserkdən ilhamlanaraq çəkilib. Personajlarından tutmuş qrafikasına qədər hər şeyilə əfsanəvi bir mangadır. Demək olar ki, myanimelist saytı açıldığı gündən bu yana da ən yaxşı mangalar siyahısında birinci yeri heç kimə verməyib. Bu günə qədər isə mangası 50 milyondan çox satış əldə edib və bununla ən çox satılan mangalar arasında üst sıralarda yerini alıb. Mövzusunu qısaca desək Guts adlı personajın başından keçənləri bəhs edir, tək başına müharibəyə qoşulması, sonralıqca bir qrupa daxil olması, qrupun başçısı ilə arasındakı mübarizəsi, eyni qrupda olduğu bir qıza qarşı olan sevgisi və ən sonda o başçısına qarşı olan intiqamından bəhs edir. Manganın fantaziyadan dramaya, romantikadan macəralara qədər demək olar ki, hər şeydən bir az var.

Adaptasiya olaraq bir neçə dəfə fərqli arclar üzərinə qurulmuş animelər çəkilsə də heç biri istənilən səviyyədə olmayıb. Yalnız 1997-1998-ci illər arası yayımlanmış Kenpuu Denki Berserk 25 bölümlük animesi bir çoxları tərəfindən bəyənilir amma burada da manga həddindən artıq geniş olduğu üçün mövzu daxilində xırda dəyişiklər olub. 2012-2013 illəri arasında isə 3 filmi yayımlandı və bu 3 film isə yalnızca golden age hekayəsinə həsr olunmuşdu.

Təssüf ki, kentaro miura 26 may 2021-ci ildə 54 yaşında vəfat etdi. Əslində mangası qətiyyən bitməyə yaxın belə deyildi amma hələ ki, miuranın çəkdiyi qədərilə bitirilmiş kimi görünür. Verilən məlumatlara görə miura illərdir birgə işlədiyi köməkçilərinə hekayəni davam etdirmələri üçün mövzunun sonuna qədər necə gedəcəyini draft kimi yazıb, qoyub amma hələ ki, manganın yayımlandığı şirkət və köməkçilər qərar verməyiblər ki, bu draft üzərində işləsinlər yoxsa manganı elə burada bitirsinlər.

5 əjdaha! hououin kyouma

06.12.2021 - 02:42 #341080 mesaj facebook twitter

vinland saga

13 aprel 2005-ci ildən bəri Kodanshanın aylıq çıxan afternoon adlı sırf seinen mangaların yayımlandığı jurnada çıxan, Makoto Yukimura tərəfindən çəkilən mangadır. Mangasında hal-hazırda 188-ci chapterə çatmışıq. Mövzusunu qısaca desək ən güclü Vikinglərdən birinin oğlu olan yeniyetmə Thorfinnin atasının qatili Askeladdı öldürməyə gedən yolundan bəhs edərək başlayır amma sonralıqca artıq Thorfinn-in illər keçdikcə başından keçənlərdən bəhs edən bir seinen mangasıdır. Mangaka çalışdığı qədər Viking tarixinə sadiq qalmağa çalışıb. Hətta sırf buna görə səhv etmirəmsə islandiyaya getmişdi ki, təbiətini filan mümkün qədər bənzər çəkə bilsin. Ancaq, manga boyunca sırf Skandinav ölkələrindən yox, bəzi Avropa ölkələrinə də səyahətləri olur.

Fikrimcə Vinland Saga son illərdə çıxmış ən gözəl və maraqlı mangalardan biridir. Xüsusilə berserk, vagabond, kingdom kimi mangaları bəyənənlər üçün çox uyğun seçimdir. Boşuna deyil ki, myanimelist kimi bir saytda hal-hazırda ən yaxşı 11-ci mangadır.

2019-cu ildə mangaya sadiq qalaraq anime adaptasiyası çəkildi. Animesinin ilk sezonu 24 bölümdən ibarətdir. 2-ci sezonunun elanı verilsə də hələ ki, nə vaxt yayımlanacağı məlum deyil. Animesini izləmədiyim üçün mangadakı hansı hissəyə qədər çatdıqlarını və ya mangasından çox fərqlənib-fərqlənmədiyini bilmirəm. Ancaq, myanimelist kimi bir saytdan 8.73 bal alıbsa böyük ehtimalla izləməyə dəyər animesi var.

2 əjdaha! hououin kyouma

06.12.2021 - 02:19 #341075 mesaj facebook twitter

powerwolf

2004-cü ildə Saarbrücken, Saarland, Almaniyada qurulmuş power Metal qrupudur. Debut albomları Return in Bloodred dövründən məlum idi ki, növbəti illərin headliner qruplarından biri olacaqdı. ilk 4 albomları metal blade records leyblı adı altında çıxsa da sonralıqca Napalm Records kimi onları daha yaxşı reklam edəcək bir şirkətə keçid etdilər. Bir metal qrupu fikirləşin ki, hər klipi filan minimum 4-5 milyon baxış sayı əldə edir youtube-da. Digər musiqi janrlarına baxdıqda az görünə bilər amma metal janrı altında kifayət qədər yaxşıdır. Nəticə olaraq da hal-hazırda festlərin qrup listində adı ən üstdə yazılan qruplarından birinə çevrilib. Hit ifa yazmağı çox gözəl bilirlər və digər qruplar kimi ciddi davranmaqdansa daha öz keflərinə uyğun hərəkət edirlər. Satanizmdən xristianlığa, seksdən qurdlara, mifik hekayələrə qədər bir çox fərqli mövzu barəsində ifaları mövcuddur.

3 əjdaha! hououin kyouma

06.12.2021 - 00:46 #341072 mesaj facebook twitter

/ 20 »

blok -   başlıqlarını gizlət

Son bəyənilənlər