osman hamdi bəy

osmanlı dövrünün məşhur rəssam, arxeoloqu, " müzey-i-hümayun"-un direktoru.

Gənc yaşında Avropada görüb öyrəndikləri, incsənətə yanaşmanı vətənində də tətbiq etməyə başlaması, Onun bu sahədə islahatları ölkənin mədəni həyatında böyük inkişafa və irəliləyişə səbəb olur. Osman Hamdi bəy ilk islahatlarından birində qazıntılar zamanı tapılan artefaktların, eləcə də yerli sənət əsərlərin xaricə göndərilməsini qadağan edir. Xaricilərin arxeoloji qazıntılarına türk təmsilçilərin qatılmasına şərait yaradır.

istər həyatının dövlət məməurluğuna həsr etdiyi illəri, istərsə də muzey işi, arxeologiya və təhsildəki fəaliyyəti olsun, Osman Hamdi bəy heç zaman rəssamlığı kənara qoymur. Daim işləyir və bir-birindən əlvan koloritli əsərlər yaradır. Oxumağa, maariflənməyə üstünlük verən və bunu təbliğ edən sənətkar əsərlərində də kitablara, qiraət edən insanlara, xüsusilə gənclərə yer verib.

Hamdi bəyin rəssamlıq yaradıcılığında əsas mövzulardan biri də Osmanlı cəmiyyətində qadına olan baxış, islamda qadının mövqeyidir. Bu əsərə də diqqətlə baxanda ilk gözə çarpan məqam qızın geyimi və baş örtüyüdür. Axı islamda qadının bu cür bədənə yapışan, onun cizgilərini bəlli edən libaslara və saçın görünməsinə qarşı “tabu” var. Lakin rəssam qızı elə bu cür də təsvir edib. Bəzi fikirlərə görə, bununla Hamdi bəy qadının islam qanunlarına laqeydliyini, eləcə də “dini savadsızlığını” göstərməyə çalışır. yaxud da, əksinə, oxuyub-öyrənməyin geyimdən və bu cür “xarici elementlərdən” asılı olmadığını, dini ehkamların qadın azadlığını məhdudlaşdırdığını vurğulamaq istəyir.

mənbə: muza- ııı buraxılış

maus

Art Spiegelman şah əsəri olan Maus seriyası artıq illərdir ki, ən yaxşı komikslərdən biri hesab olunur. Pulitser mükafatına layiq görülmüş ilk və hələ ki, yeganə komiks olmasıyla adını tarixə yazdıran bu əsərdə II Dünya müharibəsindən, Holokostdan və yəhudilərin başına gələnlərdən danışılır. Əsərin personajları yazıçının öz ailəsi və tanışları olduğuna görə komiks insana daha səmimi gəlir və getdikcə qəhrəmanları başa düşür və daha da bağlanırsan. Nasistləri pişik, yəhudiləri siçan, polyakları isə donuz formasında göstərməsi və ümumiyyətlə, çoxlu simvolikalardan istifadə etməsi əsəri oxuyarkən müəyyən hisslər oyatmaqla yanaşı, düşündürməyə də vadar edir.

Mənbə: muza- ııı buraxılış.

the chain

fleetwood mac-in rumours albomunun 7-ci treki.

həm qrup üçün, həm də albom üçün digər mahnılardan daha xüsusi hesab edilən “The Chain” digər treklərdən fərqli olaraq yazılmasında bütün qrup üzvlərinin iştirak etidiyi ilk mahnıdır.
Standart rok mahnısı strukturu üzərində qurulmuş mahnının 2 əsas hissəsi var idi: bənd/nəqarət və outro (final).

Folk, hard rok və kauntri janrlarından təsirlər hiss olunan 7-ci mahnı Amerika və Böyük Britaniya musiqi siyahılarında ilk 10-luqdakı yerini ciddi şəkildə qoruyub saxlaya bilməsə də, 2011-ci ildə Formula kampaniyalarında istifadə olunması, 2017-ci ildə isə “Guardians of the Galaxy Vol. 2” filmində yer alması ilə birlikdə “Rumours” albomunu tanıdan əsas mahnılardan birinə çevrilmişdir.

qrup üzvlərinin bu qədər uzaq, amma iş səbəbilə bu qədər yaxın əlaqələr qurmuş olmağı məhz elə “The Chain” mahnısı ilə birbaşa əlaqəlidir. “Chain” deyəndə nəzərdə tutulan o zəncir elə onların arasında olan zəncirin, yəni mənəvi bağın əksi idi.

Mənbə: muza- ııı buraxılış

antonin artaud

Antonin Artaud haqqında bir şey yazmaq olduqca maraqlıdır, çünki şəxsin yaradıcılığı və şəxsi həyatı çox diqqət çəkicidir; həm teatr yazıçısı, həm rejissor, həm aktyor, həm şair, həm teatr nəzəriyyəçisi. Həyatının müəyyən mərhələsində psixoloji mərkəzə köçürülərək elektro şoka məruz qalmış sənətçi.

Qərb teatrına qarşı mütləq bir müharibə elan etmişdi. Hakim teatr yanaşmasına və nəzəriyyəsinə qarşı "Qəddarlıq Teatr”ı adı ilə bir çıxış hazırlamışdı. Bu teatr manifestini daha çox Şərq-Bali teatrından təsirlənərək yaradıb. Onu şərq teatrına doğru yönləndirən şey isə bu teatrın bir ritual şəklində işləməsi idi. O, xüsusilə, ağrı, əzab və bu kimi digər "qara" duyğular ilə bir ritual havasında keçən teatr tamaşasının "mədəni" insanın daxilində basdırılmış yabanı hisslərinə səslənərək o insanı bir növ aydınlanma, təmizlənmə içinə çəkməyə çalışacaqdı.

"Əgər kütlələr teatra getməkdən soyuyubsa, hamımız teatrı alçaq bir səviyyədə sənət və bir əyləncə vasitəsi olaraq qəbul edib onun pis instinktlərimizdən təcrid olunma vasitəsi olaraq istifadə etmişiksə, bunun səbəbi bizlərə gərəyindən artıq "Bax teatr budur, yəni yalan və fırıldaqçılıqdır,"- deyə deyilməsindəndir".

Antonin Artaud - ” The Theatre and its Double”

Mənbə: muza- ıv buraxılış

martin margiela

Martin Margiela. O, moda dünyasının səssiz, sakit, hələ də kəşf edilməyən yüksəkliklərində öz ruhunu qidalandırır. 1985-ci ildə Parisdə, Jean Paul Gaultierin dizayn köməkçisi vəzifəsində düz 2 il çalışıb.

Ondan sonra isə həyat yoldaşı və iş ortağı Jenny Meirensin köməyi ilə “Maison Martin Margiela”nı yaratdı

Martin Margielanın modaya həvəsi 1960-cı illərdə ilk dəfə gördüyü nüfuzlu dizaynerlər - Andre Courreges və Paco Rabannenin iştirak etdiyi televiziya şousu səbəbilə yaranıb. Martin Margiela öz brendi ilə məşğul olsa da, 1998-ci ildə “Hermès”də qadın geyimlərinin kreativ direktoru vəzifəsini də icra edirdi. Onun öz işinin çox qəribə olduğunu düşünən bəzi səliqəsiz moda tənqidçilərinin və yaşı keçən “Hermes” müştərilərinin ilkin şübhələrinə baxmayaraq, onun işləri sonda çox uğurlu qiymətləndirildi.

mənbə: muza- ıv buraxılış

makoto shinkai

Makoto Niitsu - bilinən adı ilə desək, Makoto Shinkai yapon anime rejissoru, manqaka və eyni zamanda seyyu(səs aktyoru)dur.

Yapon ədəbiyyatı üzrə təhsil aldığı müddətdə uşaqlar üçün rəsmli kitablar çəkərək karyerasına başlayıb. 5 illik müddət ərzində kompüter oyunları hazırlayan şirkətdə çalışsa da, bu, onu heç vaxt qane etməyib. Bu işi onun qrafika və animasiyalar mövzusunda inkişaf etməsinə kömək olsa da, öz üzərində çalışmaqdan zövq alan Şinkayın ağlı hər zaman uzunmetrajlı işlərdə olub.

indiyə qədər haqqında ən çox eşidilən təriflərdən biri də “yeni Miyazaki” olaraq adlandırılmasıdır. Bu ifadə bir çox insanı qıcıqlandırsa da, onlara haqq verməmək əldə deyil. Makotonun istedadı və hadisələrə qarşı fərqli yanaşmasını əsərlərində mükəmməl şəkildə göstərməsi izləyicilər üçün aydın məsələdir. Hər ikisinin işləri üçün ortaq cəhət dərin hiss və düşüncələrə yer verilməsi, insan təbiətinin dərinliklərinə enərək bunu gözəl kompozisiya ilə izləyiciyə çatdırılmasıdır.

mənbə: muza- ıv buraxılış

cleo de 5 a 7

1962-ci ildə "fransız yeni dalğa" adlandırılan cərəyanın yeganə qadın rejissoru olan agnes varda tərəfindən çəkilən film.

Həmin dövrün rejissorları öz novator və etirazçı əsərləri ilə fərqləndiyi üçün elə Aqnes Varda da mühafizəkar ənənələri yıxan, feminist filmləri ilə məşhurlaşıb. “5-dən 7-yə Kleo” filmində isə onun öz dövrünə olan etirazını, həmçinin daha bəşəri və melanxolik tərzdə görürük.


Filmdə Kleonun öz xəstəliyinin cavabını gözləyərkən keçirdiyi 5-dən 7-yə qədərki 2 saatı izləyirik. Amma bu 2 saat Kleo üçün və onunla empatiya quran biz izləyicilər üçün daha gec axır. Elə Vardanın verməyə çalışdığı hiss məhz bu idi: “ölməkdən qorxan bir insanın “heç kim baxmayanda mən kiməm?” sualı ilə keçirdiyi bir neçə saatı, əslində, adama necə də bir ömür kimi gəlir”. Üstəlik dövrlər, sənətçilər necə dəyişir dəyişsin, bu kimlik problemi heç bir mədəniyyətdən yan keçə bilmir.

mənbə: muza- ı buraxılış

lucky daye

həm aranjeman, həm də bəstəkarlıqla məşğul olduğuna görə, yaradıcı insan kimi, ne-yo, ella mai və trey songz kimi bir çox sənətçiyə bu mövzuda kömək etmişdir.

Lucky Daye-i fərqləndirən və dinləyənlərin qısa zamanda rəğbətini qazanmasına səbəb olan əsas faktoru “Ənənəvi R&B-ni qeyri-ənənəvi formada təqdim etməyə çalışması” kimi ifadə etmək olar. Belə ki, elə onun səs gətirən "Painted" albomunun funk, soul və jazz elementlərini özündə birləşdirməsi, dinləyərkən hiss etdiyiniz "groove" və maraqlı bəstəkarlıq bacarığı onu ənənəvilik və vaxtı keçmiş dəblə uzlaşmaqdan xilas etməklə qalmır, ənənəvi R&B-ə yeni bir nəfəs verir. Hər halda bu yenilikçilik öz zəminində "köhnə janrlar da bugünkü auditoriyanı ələ keçirə bilər" ideyasını daşıyır.

mənbə: muza- ı buraxılış

sürrealizm

Fransız sözü olan sürrealizm “reallığın fövqündə dayanmaq”, “realizmdən üstün” kimi mənaları ifadə edir. 20-ci əsrin sonuncu avanqard cərəyanı olan sürrealizm 1910-cu illərin sonlarında - Birinci Dünya müharibəsindən sonra Fransada fəlsəfi, ədəbi və bədii bir hərəkat kimi meydana gəlib. Bu söz ilk dəfə 1918-ci ildə ildə fransız şairi Guillaume Apollinaire tərəfindən işlədilib. Cərəyan psixoanalitik nəzəriyyədən, xüsusən də, sigmund Freudun sərbəst birləşmə və xəyali görüntülər haqqında fikirlərindən təsirlənib.

Sürrealizmin fotoqrafiyaya ilkin təsirini isə 1920-ci illərdə Piktorialist cərəyan daha da artırıb. Belə ki, bu cərəyəna görə fotoya rəsm kimi yanaşılır və rəsm əsərlərinə tətbiq olunan qaydalar, nəzəriyyələr fotoya da tətbiq olunurdu.

mənbə: muza- ıv buraxılış

prisoners

alman rəssam kathe kollwitzin 1908-ci ildə yaratdığı əsərdir.

əsərdə beş yüz il əvvəl - XVI əsrin ilk yarısında feodal zülmünə və kilsənin ədalətsizliyinə qarşı etiraz edən yoxsul kəndlilər əks olunmuşdur. Kəskin etirazların təcəssümü kimi, rəssam bəzi insanların əlinin kəndirlə bağlandığını və bütün kəndlilərin tikanlı tellərin arxasında tutulduğunu təsvir edib. məhkumluğun sonu kimi onları Əlbəttə ki, ya edam, ya da çox ağır cəzalar gözləyirdi, heç biri bağışlanmayacaqdı. Onlar yoxsulluq və insafsızlığa göz yumaraq dayanmadan işləməyə məcbur edilmişdilər. itaət etməkdən boyun qaçırdıqları üçün hər biri cəzasını çəkməli idi. Orta əsrlərdə Avropada intizamı bu şəkildə təmin edilirdi.




Mənbə: muza-ıv buraxılış

muzey

tarixi maddi – mənəvi dəyərləri olan müxtəlif sənət əsərlərinin qorunub saxlanıldığı və eyni zamanda öyrənildiyi mədəniyyət ocağı

Muzey tarixin müəyyən məqamını özündə yaşadan, ötən əsrin tarixi hadisələrindən xəbər verən eksponatlar üzərində tədqiqat işlərini aparan, onları toplayan, qoruyan, sərgiləyən və keçmişdən bu günə, bu gündən gələcəyə ötürən körpüdür. Biz muzeylərə sadəcə olaraq qiymətli əşyaların, maddi – mənəvi sərvətlərin saxlanıldığı yer kimi baxa bilmərik, çünki burada qorunub saxlanılan hər bir tarixi və bədii əhəmiyyət kəsb edən eksponat, əşya mənsub olduğu xalqın tarixini, qədimliyini və milliliyini əks etdirir.

Muzeylər insanların incəsənətə olan marağından və bu incəsənət əsərlərini toplamaq meylindən yaranmışdır. ”Muzey” sözü yunan dilində istifadə olunan “mouseion” sözündən meydana gəlmişdir. Belə ki, bu söz yunan mifologiyasında ilham pəriləri olan “muzalar” adında ilahələrə həsr olunan məbəd idi. ”Muzalar” qədim yunan mifologiyasında incəsənət və elm ilahələri hesab olunurdu.

mənbə: muza- ııı buraxılış

sergey yesenin

Elə şairlər var ki, şeirləri yüz il keçsə də, populyarlığını itirmir. Sergey Aleksandroviç Yesenin belə böyük rus şairlərindən biridir. Şairin öz ədəbi istiqamətini tapmaq heç də asan olmamışdır. Vaxt var idi ki, yeni xristian şairlərin yanında çıxış edirdi, və ya imajistlərlə birlikdə yeni ədəbiyyat yaradırdı. Ancaq sonunda, o, xristian, və ya imajist şair deyil, sadə şair olduğunu bildirdi.

O, 9 yaşında artıq ilk şeirlərini yazmağa başlamışdı. Ryazanda “Xəstə Dumalar” adlı şeir kitabını nəşr etdirməyə çalışdı, lakin kitabı nəşr etmədilər. Məktəbdən sonra Moskvaya gedən şair tezliklə tətillərdə fəal iştirak etməyə başlayır. Bu, onun şeirlərində də öz əksini tapır. Ancaq tezliklə Moskvadakı həyat gənc şairi sıxır və o, dostu Panfilova məktubunda yazır: "Moskva ruhsuz bir şəhərdir və günəşə, işığa can atan hər kəs oradan qaçır”.

ilk toplusu olan "Radunitsa" ona uğur gətirmişdi. Lakin 1917-ci ildən- kralın şərəfinə şeir yazmaqdan imtina etdikdən sonra onun problemləri başlayır.

Şair "yoldaş", "məni sevmirsən, peşman deyilsən", "gülümsəməyin" adlı məşhur şeirlərin müəllifidir.

Mənbə: muza- ııı buraxılış

max ernst

dadaizm və sürrealizm cərəyanının ən görkəmli nümayəndələrindən biri sayılan alman rəssam, heykəltəraş, şair və yazıçı.

2 aprel 1891-ci ildə Almaniyanın Brühl şəhərində anadan olan Ernst 1909-cu ildə Fəlsəfə üzrə təhsil almaq üçün Bonn Universitetinə daxil olur, lakin qısa bir müddətdə təhsilini yarımçıq qoyub rəssamlıqla məşğul olmağa başlayır. 1912-ci ildə Kölndə Paris rəngkarlıq ustalarının sərgisi ilə qarşılaşır (Sonderbund sərgisi) və sərgini izlədikdən sonra rəssam olmaq qərarına gəlir. Heç zaman bu sahə üzrə təhsil almayan, əzmkarlığı ilə bu sənətin dərinliklərinə yiyələnən Ernst kubist Pablo Picasso və post-impressionist Vincent Van gogh , paul gauguin kimi əfsanəvi sənətkarların rəsm sərgilərində iştirak edir və gördüyü əsərlər onun incəsənətə olan baxışına dərin iz buraxmışdır.

Mənbə: muza- ııı buraxılış

life is strange

" dontnod entertainment" oyun şirkəti tərəfindən hazırlanmış, " square enix" tərəfindən yayımlanmış və 11 avqust 2014-cü ildə elan olunmuş multiplatform oyunudur.

hekayə əsas obraz olan max-ın polaroid kamerasıyla "təsadüfən" mavi kəpənəyin şəklini çəkən zaman saçları mavi olan bir qızın (kloe) həyatını xilas etdiyi andan etibarən başlayır və bu olanlardan sonra onun həyatında heç nə əvvəlki kimi davam etmir.

çoxumuz kəpənək effekti (butterfly effect) haqqında bilirik. oyunda seçim edildiyi zaman ekranın sol üst küncündə bu hərəkətin bir nəticəsi olacağını xatırlatmaq üçün də kəpənək simvoluna rast gəlirik. bu, oyunu oynayan şəxsin verdiyi qərarın kəpənək effekti yaratdığını bizə xatırlatmaq üçündür. max-ın davamlı olaraq zamanla oynaması yavaş-yavaş təbiətə də təsirini göstərməyə başlayır və oyun zamanı arcadia bay-də iqlim dəyişikliyi baş verir. oyunun sonluğu da oyunçunun seçimləri ilə əlaqədardır.

mənbə: muza- ııı buraxılış

solanin

inio asanonu məşhurlaşdıran, 2000-lərin ən populyar və ən çox oxunan "slice of manga"larından biri.

mangakanın hekayələri oxucuya yaxın olan və hamının hiss edə biləcəyi situasiyaları çox incə və emosional şəkildə verir. bu mangada da hekayə ofisdə işləyən meiko adlı gənc qızın, onun sevgilisinin və qurduğu rok qrupunun ətrafında cərəyan edir. həyatından narazı olan meiko işdən çıxır və bundan sonra həyatı naməlum istiqamətdə getməyə başlayır.

mənbə: muza- ıv buraxılış