25 yaşında mühasib: Xaricə yönəlmək, yoxsa Azərbaycanda ixtisaslaşmaq?

Salam hər kəsə.

Mənim 25 yaşım olacaq bu il və Azərbaycanda maliyyə-mühasibatlıq sahəsində işləyirəm. Təxminən 2 ildən çoxdur bu sahədəyəm. Son vaxtlar isə karyera və gələcək barədə ciddi tərəddüd içindəyəm və səmimi məsləhətlərə ehtiyacım var.

Bu yaxınlarda Financial Accounting imtahanından 48 bal topladım və kəsildim. Açığı bu hadisə mənim motivasiyama bir az mənfi təsir etdi. Beynəlxalq səviyyədə karyera qurmaq istəyirdim və bu istiqamətdə sertifikatlar barədə düşünürdüm, amma həm çətinliyi, həm də baha olması məni tərəddüdə salır.

Hazırda PMK-nın ikinci mərhələsinə hazırlaşıram. Digər tərəfdən isə belə bir sual da var: Azərbaycanda qalaraq yerli mühasibatlıq, vergi və əmək qanunvericiliyini çox yaxşı səviyyədə öyrənib bu sahədə dəyər yaratmaq daha doğru yol ola bilərmi?

Bəzən gündəlik həyatımda – məsələn nəqliyyatda, insanların həyat səviyyəsində və iqtisadi reallıqlarda gördüklərim məndə belə bir fikir yaradır ki, uzunmüddətli gələcək üçün ölkə xaricində yaşamaq və işləmək daha məntiqli ola bilər. Amma digər tərəfdən ölkədə qalaraq faydalı kontent və bilik paylaşımı ilə cəmiyyətə töhfə vermək də istəyirəm.

Yəni qısaca desəm, iki yol arasında qalmışam:

1. İngilis dilimi və beynəlxalq sertifikatları gücləndirib xaricə yönəlmək
2. Azərbaycanda qalaraq yerli mühasibatlıq və qanunvericilik üzrə ixtisaslaşıb bu sahədə dəyər yaratmaq

Bu vəziyyətdə olan və ya bu sahəni yaxşı tanıyan insanlardan bir neçə sualım var:

• Mühasibatlıq sahəsində beynəlxalq karyera qurmaq real olaraq nə qədər mümkündür?
• Yerli mühasibatlıq üzrə ixtisaslaşmaq uzunmüddətli perspektivdə nə qədər perspektivlidir?
• Bu sahədə olan biri üçün hansı istiqamət daha məntiqli ola bilər?

Səmimi fikirlərinizi və təcrübələrinizi eşitmək mənim üçün çox dəyərli olar.