2000-ci illər — ən bəyənilən yazılar

+14 əjdaha

1. hər dəfə yadıma düşəndə daxilimdə qəribə bir ab-hava yaradan dövrdür. düzdür, o illəri az yaşamışam amma mənim üçün bir xüsusiyyəti var. bugünkü günlə müqayisədə, çağalıq illərimiz idi, rifahımız bəlkə bugünkündən daha yaxşı idi, qloballaşma hələ nə idi tam bilməzdik, müasir texnologiyalar ilə yeni tanış olurduq, mətbuatda daha artıq bir sərbəstlik var idi, yadımdadır yaşadığım gəncə şəhərində tez-tez sosial-demokratların adını eşidərdik, xüsusən də, hökumətə qarşı müxalifətçilikləri ilə əlaqədar. o illər mənim üçün sarı rəngdədir, necə ki, 21-ci əsrin başlanğıcındakı rəngli şəkillər daha çox sarımtıl idisə də, o illər də təsəvvürümdə sarı rəngdə canlanır. 2000-ci illəri fikirləşəndə daimai ağlıma yay gəlir, heç qış gəlmir, hərçənd ki qış mənim favorit fəsilimdir. bəlkə də bütün bunların uşaqlıq ilə əlaqəsi var. gəlin bir şeyi qəbul edək, 21-ci əsrin əfsanələrindən danışanda həmişə ağlımıza 2000-ci illər gəlmir ? indiki vaxtlar isə monotondur, hər şey adiləşib, 2000-ci illər yeni dünyanın bakirəlik illəri idi. bugünkü gündə həyat black mirror'a dönübsə, 2000-ci illər, bugünkü "black mirror"ı başladacaq texnologiyaların uşaqlıq dövrü idi. ara-bir o dövrdə çəkilmiş şəkillərə baxanda gülürəm, bizim hazırda fotoşop adlandırdığımız texnologiyalar əslində necə də uşaqca idi o vaxtlar. hansı ki, həmin o şəkil effektlərini filan bugün öz şəklində tətbiq etsən sənə gülərlər, halbuki o vaxtlarda bütün bunlar inqilab idi ! sonra isə sosial şəbəkələrə baxıram, o illərdə əsasən myspace yayğın idi. üzr istəyirəm azərbaycandan kənara çıxdım, ölkəmizdə myspace bildiyim qədərilə tanınmayıb. bizdə əcaib adlı saytlar sosial şəbəkə xidmətini görürdü. dünyada isə myspace kimi şəbəkələr. bu cür şəbəkələrdə, o illərdə paylaşılmış postlara baxanda mənə çox qəribə bir təsir bağışlayır. çünki dedim axı 2000-ci illər çağalıq illərimiz idi, sadəcə bizim üçün yox, bütün dünya üçün. gələcəkdən çox, keçmiş mənə maraqlı gəlir. nəsə heyfim gəlir ki, o illəri tam yaşaya bilmədim, hazırda bəyəndiyim bəzi şeylər ilk dəfə o illərdə yarandı, kaş ki, zamanda geriyə qayıdıb bəyəndiyim şeylərin doğum anlarını müşahidə edə bilsəydim. 2000-ci illər, əsir düşmüş dünyanın sonuncu dirənən istehkamı idi.