+1 əjdaha
1. aze: gənc karl marks ssenarisinin yazılmasına 2010-cu ildə başlanmış, 2015-ci ildə isə çəkilişlərinin dörd ayda bitirilməsi ilə 2017-ci ildə tamaşaya qoyulmuş bir raoul peck imzalı bioqrafik film. Filmin toxunduğu mövzu diqqətəlayiq və əhəmiyyətlidir, xüsusən də solçu müxalifətin tərənnümündən ibarət kinematoqrafiya nümunələrinin bu cür qıtlıq yaşadığı bir dövrdə. Eyni şey john carpenter imzalı they live üçün də keçərlidir (sırf filmin şərhi üçün slavoy jijekin pervert's guide to ideology filminə baxmağa dəyər).Film 1844-1848-ci illəri əhatə edir. Çünki bu dövr keçmiş alman fəlsəfəsinin yavaş-yavaş torpağa tapşırılması, dialektik materializm fəlsəfənin doğumu və kapitalizmə qarşı radikal bir alternativ təşkil edən sosializm ideyalarının çiçəklənməyə başlaması baxımından səciyyəvidir. Filmdə kommunistlər ittifaqının doğumu və kommunist partiyasının manifestinin işıq üzü görməsi təsvir edilmiş olsa da, məni tam qane etmədi. Fikrimcə daha çox şey əks etdirilməli idi.
Özündə ideologiya ehtiva edən bioqrafik bir filmdən nələri gözlədiyimiz gün kimi aydın olsa da, filmin demək olar ki, təpədən-dırnağa qədər marksın seks həyatından ibarət olması gözləntiləri alt-üst edir. insanda bioqrafik filmdən ziyadə pornoqrafiya təəssüratı oyatdığını desəm şişirtmiş olmaram. Aydın məsələdir kinematoqrafiyada sevgi təsvir edilməlidir, seksin bundan ayrılmaz olduğunu nəzərə alsaq, seks səhnələrinin olması təəccüb doğurmamalıdır. Bununla belə, filmdə seksə həddən artıq yer verilib, bioqrafik bir film üçün seks səhnələrini lüzumsuz hesab edirəm, hətta mənə iyrənc görünür, ola bilsin buna səbəb qəti şəkildə pornoqrafiya əleyhdarı olmağıdır. insanların, eləcə də marksın, sekslə məşğul olduğunu bilirik, lakin insanların cinsi orientasiyasından asılı olmayaraq seks həyatlarının filmlərdə bu dərəcədə böyüdülməsi mənə görə mənfi haldır.
Bundan başqa aktyorluqlar əladır, bir marks obrazından eynilə belə bir aktyorluq gözləyərdim. Mənim filmə qiymətim 7.5/10
P.s. Seks barədə qeyd etdiklərim rusiya istehsalı trotski mini serialı üçün də keçərlidir. Yəqin ki, trotski ilə gənc karl marksı müqayisə etsək trotski sözün əsl mənasında sənədləşdirilmiş fahişəlik adını layiqincə daşıyar. Putin sağolsun, trotskini qana və seksə susamış bir şeytan kimi təsvir edərək öz oğru rejiminin ideoloji-tarixi vəzifələrini layiqincə yerinə yetirib.