23 mart 2021 süveyş kanalı böhranı

büyük resmi görme kursuna aid olarmı, bilmirəm, amma Çinin 27 mart iran-çin razılaşmasını ipək yolunun təhlükəsizliyini qarant altına alması məqsədilə imzaladığını, kanalda olan böhranın da bununla ucdan-qulaqdan əlaqəli olduğunu izah edən ekşi entry -si gördüm. Məntiqli gəldi açığı, ABŞ-ın güc itirdiyi açıq fakt idi.

azərbaycanlıların avtoritarizm və konservatizm sevgisi

Trump-ın qələbəsindən sonra qlobal dalğada avtoritar meyillərin artmasından sonra London business school tədqiqatçıları maraqlı bir araşdırmaya imza atıblar . Qısaca toplumdakı avtoritaryönümlü davranışların əsas səbəblərindən biri kimi iqtisadi çətinliklər hesab olunur. Bunda məqsəd o ola bilər ki, dominant liderin iqtisadiyyatı bərpa edəcəyinə inanırlar.
istisna etmirəm ki, Azərbaycan toplumundakı vəziyyət bundan fərqlidir. Vətəndaşların əksər hissəsini insan haqları, media, söz, vicdan azadlıqları maraqlandırmır, 2015-ci il öncəsi Azərbaycana qayıtmaq kifayətdir onlar üçün. Təki yanılım, təki səhv çıxım, amma mənim bu xalqın azadlıqlara dəyər verdiyinə dair zərrə inamım yoxdur. Bir şey ki, ilhama, eləcə də avtoritarlığa "rəqib" olaraq* şairi burada gülmək tutur hahah Tural Abbaslı kimi birini dəstəkləyir, ondan demokratiya gözləmək kimi xülya görürlər. Bununla ölkə insanın demokratiya anlayışının "müasirlik soyunmaq demək deyil" fəlsəfəsi ilə eyni olduğunu demək olar.

Konservatizmə gəldikdə isə bu əslində hər toplumda olan və son illərdə dəstəkçilərini artıran axımdır, bayden sonrası dünya üçün dəyişiklik gözləsəm də, bizə bunun heç bir təsiri olmayacaq əlbəttə* glş , bir halda ki bu kütlə 30 il əvvəl də eyni ağılda olana tərəf çıxırdı, indi də çıxır və özlərini aldatdıqları müddətcə çıxmağa da davam edəcək.
Əlqərəz, Azərbaycan xalqı əksərən hansı yola doğru gedirsə, onun əksinə irəliləmək daha məntiqli görünür mənə. Sonluğu da bu ölkəyə daş qoyanı yad etməklə bağlamaq istərəm* təbii ki qəlbimin dərinliklərində...

dublin konvensiyası

bu sifarişi verən: fövqəl insan

ilk olaraq 1990-cı ilin 15 iyun tarixində Avropa ittifaqına üzv 12 ölkənin (belçika, Portuqaliya, böyük Britaniya, danimarka, almaniya, fransa, irlandiya, italiya, Yunanıstan, lüksemburq, Niderland və ispaniya) imzaladığı və ittifaqa sığınacaq tələbində müraciət edən şəxsin sənədləşmə prosedurunun hansı ölkədə aparılmalı olduğunu müəyyənləşdirən sənəddir. Konvensiya imzalandığı tarixdən bir neçə dəfə genişlənməyə məruz qalmışdır; 1 oktyabr 1997-ci ildə avstriya və isveç, 1 yanvar 1998-ci ildə finlandiya, ai üzvlüyü olmamasına rəğmən 2001-ci ildə norveç ilə islandiya da bu konvensiyaya qoşulmuşdur. ikinci dublin tənzimlənməsi adlanan yenilənən protokol 2003-cü ildə danimarka istisna olmaqla bütün ai ölkələrinə tətbiq edildi, daha sonra isə 2008-ci ildə isə isveçrə ilə bu konvensiyanın hökmlərini yerinə gətirmək üçün razılıq əldə olunmuşdur. Konvensiyanın ən son variantı olan üçüncü dublin tənzimlənməsi 2013-cü ildə qəbul olundu və danimarka istisna olmaqla, yerdə qalan bütün ittifaq ölkələrini və islandiya, norveç, isveçəni əhatə etdi.

Konvensiyanın mahiyyəti odur ki, bir şəxs ai ölkələrindən ilk olaraq hansına daxil olmuşdursa, ona oturum icazəsinin verilməsi məsələsinə də məhz həmin ölkədə baxılır, bunun üçün Avropa komissiyası nəznində barmaq izi bazası yaradılıb. Bununla ittifaq qeyri-qanuni miqrasiyanın qarşısını almağı və sığınacaq müraciətinin bir ölkədən rədd cavabı aldıqda başqa bir ölkəyə müraciət edilməsinin qarşısını aldıqlarını düşünür. Lakin 2015-ci ildəki miqrasiya böhranı zamanı konvensiyanı imzalayan ölkələr bir sıra xoşagəlməz hallarla üzləşiblər. Məsələn, Macarıstan miqrantların həddən artıq olduğunu bildirərək Macarıstandan digər ölkələrə keçmiş və rədd cavabı alan qaçqınları qəbul etməyəcəyini bəyan etmiş, konvensiyanın işləmə prosesini dayandırmışdı. Həmçinin polşa, Slovakiya, bolqarıstan kimi ölkələr konvensiyanın bəzi şərtlərində dəyişiklik edilməsini tələb etmişdir. Almaniya isə həmin il bir neçə aylıq suriyalı qaçqınlar üçün konvensiya şərtlərini ləğv etmişdi, ölkəyə başqa Ai ölkəsindən gələn miqrantları qaytarmağı dayandırmışdı.

venture capital

startupların, şirkətlərin maliyyələşdirilməsi və onlara hərtərəfli dəstəyin (təcrübə, strateji partnyorluq və s.) göstərilməsidir. risk sərmayəsi də adlanan bu yardımda risk mahiyyəti etibarilə yeni startupın və ya şirkətin bazarda yüksəlib-yüksələ bilməyəcəyi ehtimalıdır, yəni ya batar, ya çatar məsələsi. Risk sərmayədarları angel investorlardan bir çox cəhətcə fərqlənirlər; "mələk yatırımçı"lardan fərqli olaraq risk sərmayədarlarının yatırım miqdarı çox böyük olur, o cümlədən bu sərmayədarları daha professionaldırlar, çünki mələk yatırımçı daha çox şəxsi səbəblərdən (qohumluq, yaxınlıq) yatırım edərkən onların əsas peşəsi məhz budur. Angel investorlar hər zaman fərdi çıxış edirlər, yatırımları öz hesablarına olur, risk sərmayədarları isə tərəfdaşlıqla yatırım edirlər, bu şirkət ola bilər, ya da başqa bir qurum (banklar, sığorta agentlikləri, universitetlər və s.)

sakit uşaq olmaq

Mən, açığı, indi də elə bilirlər çevrəmdəkilər, bir-iki ilə qədər ümumiyyətlə qaynıyıb-qarışmırdım, bir xeyli pis təsirini görüb daşını yavaş-yavaş olsa da atdım.

Əvvəla demək lazımdır ki, asosiallıq dövrü mənə xoş aura gətirmədi, içinəqapalı olduğum dövrlərdə ancaq mənfi düşünürdüm, buna görə də mənlə tet-a-tet danışmaq istəyən az olurdu. Təkliyin özünü xoşbəxt etdiyi bir insan görmədim, bəlkə də xoşbəxtik özü nisbi anlayışdır, bilmərəm. Mən özümdən götürəndə nəticə belə çıxır.

Axırda belə yaşayış olmaz deyib insanlara qarşı bütün qərəzlərimi yıxmağa başladım, salam belə verməyəcəyim şəxslərlə əvvəl məcburən, sonra isə maraqlı mövzular tapıldıqca həvəslə görüşürdüm, danışırdım. O vaxtlarda özümü həqiqətən xoşbəxt hiss edirdim, özümü aldatmırdım.

Zənnimcə sakit uşaq olmaq elə də problemli məsələ deyil, istəyindən asılı olaraq bunu deşib keçmək ya da özün kimi mühit tapıb orada vaxt keçirmək olar. Yuxarıdakı entrilər kimi döymək, döyülmək filan boş söhbətlərdir, bu yaşıma kimi nə döymüşəm, nə də döyülmüşəm* glş .

istanbul konvensiyası

Nə qədər gözlənilməz çıxsa da, Ərdoğanın qızları alınan qərara qarşıdırlar .

Ümumiyyətlə, nə qədər akp içində olsalar belə, müəyyən savadı olan və islamçıların "həyat tərzinə" uyğun yaşamayan qadınlar çoxdur və bu qərara etiraz etməyə başlayıblar. Söhbət konvensiyanın qətlləri sıfırlayıb-sıfırlamaması deyil, 20 illik təkbaşına iqtidarında bu qədər cinayətə rəğmən ağlıbaşında məcəllə yarada bilməyərək əldəki qazancı məhv etməkdən gedir. O cümlədən parlamentin ratifikasiyası ilə qəbul edilmiş sənədi gecənin bir vaxtında prezident fərmanı ilə ləğv etmək, hələ də hansı demokratik tutumdan danışa biləcəksiniz axı?

Qadın qətlləri məhz siyasidir, çünki kimlərsə öz kreslosunu əldə saxlamaq üçün bu qətllərdən, cinayətlərdən istifadə edir, bir baş ağılsız, cahil, məqsədləri xəyali düşmən yaradıb onunla "vuruşmaq" və bütünlüklə mədəniyyətə, insanlığa, haqqa, hüquqa düşmən kəsilmək olan insan sürüsü də bu geridəqalmış düşüncəyə sevinir, təkbirlərlə bəzəyirlər. Həm də siyasi heç bir qram biliyi olmadan, öz cahilliyini bir üstünlük bilərək. insanı ən çox bu yıxır.

Eyni gecədə daha iki qərar açıqlandı; birincisi, mərkəzi bankın sədri qovuldu, nədir nədir kürəkəninin puça çıxardığı 128 milyard dollar ehtiyatı daha tez bərpa edə bilmək üçün faizin artırılmasını istəyirdi, digəri də uğrunda az qala vətəndaş müharibəsi başladılan gezi parkı istanbul bələdiyyəsindən alınıb hansısa dinçi qəhbə vəqfə verildi. Bunların hamısı səs itkisinin qarşısını almaq üçün edilir, necə ki vaxtikən pkk ilə masaya əyləşib onu tərəf kimi qəbul etdilər, gülənçiləri bütün dövlət orqanlarına hiylələrlə, test cavabları ilə saldılar, indi də psixoz milliyətçilərdən, gicbəsər təriqətçilərdən səs almaq üçün ölkənin gələcəyi ilə oynayırlar, cümhuriyyət dəyərlərini göz görə-görə məhv edirlər.

Çox heyfsilənirəm, elə-belə də yox. Heç yoxdan qurulan ölkəni, illərlə yaratmaq istənilən düzəni 20 ildə heç elədilər.

bildir.az

Şirkətlər ilə müştərilər arasında əlaqənin qurulmasına kömək edən və müştərilərin təklif/şikayətlərini bildirdikləri platforma. Türkiyənin sikayetvar.com saytına bənzəyir, amma bunlar birbaşa şikayətlə girməyiblər bazara * glş
Mən biləni Azərbaycanda bu məzmunda ilkdir, nə də olsa yaxşı ideyadır, daha çox geribildirim görək.
sayt

Edit: kapital bank 1.7 balla ən çox müzakirə olunanlar arasında imiş. Qram təəccüblənmədim* glş

game night

2018-ci ildə çəkilən və baş rollarında jason bateman, rachel mcadams və Kyle chandlerin oynadığı amerikan komediyasıdır.

--spoiler--

Oyun dəlisi olan Max və annie adlı cütlük uşaq sahibi olmağa qərar verir, lakin max-in qardaşı brooksu qısqanması və özünü ondan zəif hiss etməsi max-da yetərsizlik yaradır, bu da onların cəhdlərini yarımçıq qoyur. Brooks bir gün max-annie və onların dostlarını öz evinə ənənəvi "oyun gecəsi"nə çağırır və həmişəkindən daha fərqli oyun oynayacağını deyir. Oyuna görə, brooksun evinə qəfil iki maskalı şəxs daxil olacaq və qonaqlardan birini qaçıracaqdı. Lakin işlər yolunda getmir və onların dublyor hesab etdikləri şəxs əslində həqiqi cinayətkarlar olur və onlar oyundan kənara çıxaraq max-i yox, qardaşını qaçırdırlar. Cütlüklər bunun oyun olmadığını anlamaları bir az gec olur, amma mənə görə filmin ən maraqlı səhnələri də məhz bundan sonra başlayır.
Hadisələrin bir-birinə qarışması, oyun içərisində qurulan oyunlar və xüsusən də max-annie-nin güllə çıxarma səhnələri * anlatılmaz, yaşanır :ddd

--spoiler--
Bütün senarini yazmaq istəmirəm, izləyib əylənmək daha yaxşı olar * glş sizə xoş izləmələr.

official secrets

2019-cu ildə çəkilmiş və real hadisələr əsasında senariləşdirilmiş dram-bioqrafik janrında olan film.

--spoiler--

Film ingilis kəşfiyyat və təhlükəsizlik qurumunda tərcüməçi olaraq çalışan katherine gun adlı şəxsin abş-ın iraqa girməsinə (ikinci körfəz müharibəsi) az qalmış müharibəni legitimləşdirmək üçün lazım olan səsi toplamaq məqsədilə birləşmiş millətlər təşkilatının təhlükəsizlik şurasına müvəqqəti üzv olan 4 ölkənin - qvineya, kamerun, Çili və bolqarıstandan olan diplomatlarına qarşı ediləcək casusluqla bağlı məlumatların əks olunduğu e-maili ələ keçirməsi ilə başlayır. Katherine böyük Britaniyanın da ABŞ ilə birgə müharibəyə girəcəyi üçün hiddətlənir və buna görə bu məlumatların yayımlanaraq xalqın xəbərdar edilməsi və hökumətləri müharibədən uzaqlaşdırması məqsədini güdür. Məlumat müxtəlif vasitəçilərlə the observer adlı qəzetə çatdırılır və buradan çap edilir. Abş-bb əvvəl bunu inkar etsələr də, ingilis kəşfiyyat qurumu daxilində casusun tapılması üçün ciddi yoxlamalara başlanılır, həmkarlarının zənn altında qalmaması üçün katherine hər şey etiraf edir.
Bununla müharibənin başlamağayacağını düşünsə də, ABŞ-ın böyük Britaniya ilə birgə iraqa ani hücumu hər şeyi dəyişir. Katherine bu dəfə də məhkəmə qarşısına çıxmalı olur və bəlkə də xainlik damğası ilə günahlandırılmasını gözləyirdi.
Uzunca davam edən məhkəmə prosesləri, katherinin kürd əsilli türk həyat yoldaşının oturum icazəsinin ləğvi və deportasiya təhlükəsi, katherinin etdiyini günah olaraq görmədən özünü müdafiə etməsi və hökumətdən müharibəyə başlamaqla bağlı lazım olan sənədləri tələb edib onları dürüstlüyə çağırması ilə irəliləyən hadisələr sonda hökumətin geri addım atması və gun-a ünvanlanan şikayətin geri götürülməsi ilə bitir.

--spoiler--

the killing of a sacred deer

2017-ci ildə böyük Britaniyada ərsəyə gələn, baş rollarında Nicole kidman, colin farrell və barry keoghanın oynadığı psixoloji-triller janrındakı filmdir. Film elə həmin il cannes film festivalında "ən yaxşı senari" nominasiyasında mükafatlandırılmışdır.

--spoiler--

Təcrübəli cərrah steven Həyat yoldaşı anna və iki uşağı - kim və Bob ilə xoşbəxt yaşayırlar. Bir əməliyyatına sərxoş vəziyyətdə girən steven əməliyyatın sonunda pasiyentinin ölümü ilə qarşılaşır və bundan çox sarsılır. O gündən etibarən bir daha içki içmir, ölən pasiyentinin oğlu 16 yaşında olan martinlə yaxından maraqlanmağa başlayır: ona hədiyyə alır, gəzir, yemək yeyir, evlərində qonaq olur. Martin də eyni addımları Stevenin ailəsi üçün təkrarlayır, ailəyə daxil olur və özünü oranın bir hissəsi olaraq görür. Amma hər şey bir anda dəyişəcəkdir.
Stevenin oğlu bob bir səhər yatağından qalxa bilmir, ailəsi onu tez xəstəxanaya aparır və bütün müayinələrdən keçirir. Heç bir nasazlıq olmamasına qarşı Bobun vəziyyəti ağırlaşır, artıq iştahadan kəsilirdi. Martin bobu ziyarətə gələndə Stevenin atasının qatili olduğunu özünə deyir, bunun qarşılığında stevenin də ailəsindən birini qurban etməsini tələb edir. Etmədiyi halda yoldaşı və uşaqlarının 4 addımdan sonra öləcəyini deyir: əvvəl yerimə qabiliyyətləri itəcək, sonra iştahaları, üçüncü addımda gözlərindən qan axacaq və sonda isə öləcəklər. ilk eşitdiyində buna əhəmiyyət verməyən steven qızının eyni simptomları göstərməsindən sonra hər şeyi dərk edir və bu lənəti aradan qaldırmaq üçün çalışır.
Filmin sonunda isə Steven çarəsiz qalaraq ailəsindən birini qurban vermək üçün gözü bağlı olaraq nişan almağa başlayır və oğlunu (hansı ki artıq 3-cü mərhələdə idi) öldürür və yalnız bundan sonra lənət aradan qalxır.

--spoiler--
Aktyorların hissiyatsız davranışları, xüsusən də annanın uşaqlarından birini öldürməyə ən başdan hazır olması və qızı hər dəfə lənəti xatırladanda onu vurması filmin elə ən psixoloji təsiri güclü tərəflərindən idi. Bu janrda nadirən nəsə baxdığımdan təsirinin güclü olduğunu deyə bilərəm.

12 xal

Azərbaycanın avroviziya musiqi yarışması üçün təşkil olunmuş ən böyük fan qrupudur. 2018-ci ildən etibarən fəaliyyətinə başlayan qrup ən son yenilikləri çatdırır, ictimai tv ilə (və ya yeni adlandırma ilə sadəcə itv) sıx əlaqəli olduğu üçün Azərbaycanın təmsilçisi, mahnısı və digər önəmli hissələri izləyiciləri daha tez xəbərdar edə bilir. Bunlarla yanaşı, digər ölkə təmsilçiləri ilə görüşlər təşkil edir, təmsilçilərin mahnılarına reaksiya videoları çəkir və Azərbaycan təmsilçiləri ilə bağlı müxtəlif promo videoları təşkil edir.

veb-səhifəsi
youtube səhifəsi

the catcher was a spy

2018-ci ildə amerikan yazıçısı Nicholas dawidoffun eyniadlı kitabı əsasında çəkilən film. Əsas mövzu isə ikinci dünya müharibəsində abş-ın almanların əlində atom bombasının olub-olmamasını öyrənmək məqsədilə xəfiyyəlik etməsi üçün birinə * moe berg tapşırıq verməsidir.

--spoiler--

Moe berg, 15 illik aktiv və peşəkar beysbol oyunçusu və olduqca intellektual bir şəxs olub. Bir oyun üçün Yaponiyaya yollanan berg gizlin yollarla tokyodakı stratejik əhəmiyyətli obyektləri (şəhər limanını, gəmiqayırma zavodlarını) çəkərək bunu bir yaxınının tövsiyyəsi ilə strategiya xidmətləri rəisinə ötürür və 12 dil biliyi də olduğu üçün işə qəbul edilir.
Almanların 1932-ci ildə kvant fizikasındakı nailiyyətlərinə görə Nobel mükafatı alan werner heisenberg ilə çalışdığını öyrənən kəşfiyyat onların həqiqətən də silah hazırlayıb-hazırlamadıqlarını dəqiqləşdirmək üçün moe berg-i anton aziz adı ilə isveçrəyə yolladılar.

Filmlə bağlı çox bir şey deməyəcəm, süjet xəttini çox daha maraqlı gözləyirdim, amma gözləntimi doğrultmadı. Hətta vaxt itkisi də deyərdim, düm düz başladı və bitdi. Bəlkə film tapılmadıqda izlənə bilər, gərək böyük gözləntin olmasın

--spoiler--