sozaltı western



əjdaha lazımdı   izlə   lələ   mən   googllalink

    1. bu sifarişi verən: samuel

    Səhər şəfəqi texasın sonsuz quraq çöllərini işıqlandırır. Qəsəbələr yenidən canlanır. Texasın kənarında yerləşən sözaltı qəsəbəsində ovçular, fermerlər, dəli qanlı kovboylar və quldurlara qarşı savaşan şeriflər günə başlayır. barlarda və küçəboyu Divarlarda axtarılır: anyone; mükafat: 10 min $ yazısını görənlər heyrətə düşmür əksinə mükafat əldə etmək üçün hazırlıqlara başlayırlar.

    Qəsəbənin şerifi timidus öz köməkcisi samuel ilə birlikdə ofisində cinayət işləri ilə maraqlanır. Qəsəbədə hər şey öz qaydasında kimi görünsə də oğurluq və bank yarmaq cəhdləri xeyli artıb. Şerifi əsas narahat edən məsələ hələ də ritorika öyrənmiş sırtıq yobaz-ın qatilinin tapılmaması idi. ritorika öyrənmiş sırtıq yobaz, 1 ay əvvəl, qəsəbə barlarının birində, gecə vaxtı saat 3 radələrində naməlum maskalı şəxs tərəfindən vəhşicəsinə, 6 dəfə atəş açılaraq qətlə yetirilmişdi. Şahidlərin söylədiyinə görə qatil onu öldürərkən “gəbərməlisən! Onun üçün gəbərməlisən! demişdi.

    Şerifin qızı la jolie fille həyətdə cücələri yemləyəndə ağacın arxasında gizlənən birisinin ona diqqətlə baxdığını görür. Soyuq qanlılığını qoruyan la jolie fille, qəflətən əlini kəmərinin sağında ustalıqla gizlətdiyi revolverinə götürür. Silah atmağı ona atası, anasının ölümündən sonra evdə tək qaldıqdan sonra öyrətmişdi. Özünü göstərməyi ona əmr edərkən sanki gizlənənin kim olduğunu anlamışdı. Və təbii ki də yanılmamışdı, həmin adam, la jolie fille-ni sevən amma heç cürə fikirlərini ifadə edə bilməyən və çoxları tərəfindən əzik xarakterli kimi tanınan asosyal adam idi. O, gününün çoxunu evdə keçirər, barların yolunu tanımaz, qızlarla və digər qəsəbə sakinləri ilə məcbur olmadıqca ünsiyyətə girməzdi. Özünü qorumaq üçün silah atmağı belə öyrənə bilməyən bir tip idi. Amma bir gün, la jolie fille-ni təsadüfən at sürərkən görmüş, ona aşiq olduqdan sonra isə dəyişilməyə başlamışdı. “yenə sən! Axı sənə dedim ki, sənə qarşı heç nə hiss etmirəm! əgər bu cür hərəkət etməyə davam etsən, atama deyəcəm səni quldurlar olan həbsxanaya atsın!”-deyən la jolie fille, silahını yerinə qoydu. Qorxuya düşən asosyal adam o dəqiqəcə ağlayaraq qaçmışdı. Onun ağlamağı la jolie fille-ni pis hiss etdirmişdi.

    çernyayevskiağsaqqal barda gizlincə yeni soyğun planı üzərində işləyirlər. Bu dəfə hədəf şişi yandırıb kababı yandırmayan adam-ın yeni qurduğu bankı soymaqdı. çernyayevski və ağsaqqal əzəldən dost idi, qəsəbədəki ən böyük soyğunları onlar təşkil edir amma şerif heç cürə onları həbs etmək üçün dəlil tapa bilmirdi. Elə bu vaxtı şerif köməkcisi samuel içəri daxil olur. çernyayevski və ağsaqqal ona aşağılayıcı göz ilə baxır. Samuel, çernyayevski və ağsaqqal-ın ən böyük düşməni idi. Dəfələrlə aralarında dava düşmüş, amma şerifin qorxusundan məsələni çox böyütməməyə çalışmışdılar. Samuel hər zaman içdiyi pivədən istəyir və onu alaraq kənarda oturub içməyə başlayır. çernyayevski və ağsaqqal öz içkilərini alaraq bardan çıxmaq istəyəndə samuel onları çağırır. təklifi geri çevirməyən çernyayevski və ağsaqqal, samuel ilə bir masada əyləşir. ətrafdakılar növbəti dava olacağını zənn edərək bardan çıxmağa başlayır. Samuel isə əlində olan zərfi açaraq yazılı kağızı stolun üstünə qoyur, kağızda belə yazılıb: “növbəti soyğun yeri şişi yandırıb kababı yandırmayan adam-ın bankıdır!“

    1-ci Seriyanın sonu.
    2. bu sifarişi verən: samuel

    Anyone meşədə gözünü açır. Bir neçə həftədir ki, aclıqdan əziyyət çəkdiyinə görə xeyli zəifləmiş, güclü əzələləri ərimişdi. Gecədən qalan kofesini içərək yola düzəlir. Ağlında sadəcə iki şey var idi, o da əsas qatili taparaq ədalətə təslim etmək və qəsəbəyə geri dönərək əvvəlki nüfuzunu bərpa etmək. əslində, ədalət də ona qarşı qərəzli mövqe nümayiş etdirmiş və sadəcə bir neçə dəlilə əsaslanaraq haqqında axtarış əmri çıxarmışdı. Təbii ki də bunda şerif timidus-un da rolu az olmamışdı.
    Belə olan halda qaçmaq anyone üçün yeganə çıxış yolu idi. Axtarış əmrindən sonra digər qəsəbələrdən də kovboylar, mükafat üçün anyone ovuna çıxmışdı.
    Gün ərzində meşədə xeyli yol qət edən anyone, sonunda sözaltı qəsəbəsindən 77 mil uzaqlıqda yerləşən qızılağac qəsəbəsinə çatdı. Gecəyarısı olduğuna görə qəsəbədə adam nəzərə çarpmırdı. Belə bir vəziyyətdə qəsəbəyə girmək olardı. Düzdü, onsuz aclığına güc gələ bilməyən anyone üçün başqa seçim yox idi. qəsəbəyə doğru irəliləyən anyone-a qəribə gələn yolun ortasında başı vəhşicəsinə dağılıdılmış it balası idi. Diqqətlə baxanda it meyidinin hələ təzə olduğunu dərk etdi çünki qan hələ isti idi. şüphəli şəkildə Qəsəbənin Girişinə çatan anyone, qızılağac adının altına belə bir söz yazılan taxta parçasına diqqət yetirdi: “qəti olan hökm, sadəcə, allaha məxsusdur!...”

    çernyayevski və ağsaqqal təəccüblü şəkildə samuel-ə baxırdı. Bir müddət səssizlikdən sonra samuel, silahını çıxardı və stolun üstünə qoydu. əslində, çernyayevski və ağsaqqal elə oradaca samuel-i öldürə bilərdi amma şerif köməkcisini öldürməyin cəzası edam idi.
    “üçümüzdə bilirik ki, qəsəbədə olan soyğunların hamısını siz təşkil etmisiniz.” – dedi samuel. “əlimdə olan bu vərəq parçasını kim yazıb bilmirəm amma məndə əvvəlki bar soyğununu sizin təşkil etdiyinizə dair dəqiq məlumatlar var.” Çernyayevski səssizliyini qoruyurdu amma ağsaqqal-ın səbri tükənmişdi. “həmin məlumatları şerifə verməmək üçün nə istəyirsən?” – dedi ağsaqqal. Samuel şeytani bir gülümsəmədən sonra cibindən bir şəkil çıxardı. Çernyayevski və ağsaqqal şəkilə bir müddət baxandan sonra bunun anyone-ın şəkli olduğunu dərk etdi. “təklifim olduqca aydındır, mənə sadəcə anyone-ın dirisini ya da kəlləsini gətirin. Mən də əlimdə olan bütün dəlilləri yox edim.” – deyən samuel həmin anda gözündə alacağı şərəf medalını düşünürdü. Bu, həm də şerifin gözündə yüksəlmə və şerifin qızı la jolie fille ilə evlənmək üçün əsas namizəd olmaq demək idi. əslində, samuel, la jolie fille-yə qarşı heç nə hiss etmirdi amma şerifini qızını almaq gələcəkdə qəsəbənin şerifi olmaq demək idi. “anyone-ı sadəcə siz yaxalaya bilərsiniz! 30 gün ərzində onun dirisi ya da ölüsü mənə çatmasa, özünüzü 25 illik həbsxana səyahətinə hazırlayın!” – deyən samuel silahını cibinə qoyaraq bardan çıxdı. əsəbi şəkildə stolu aşırdan ağsaqqal silahını çıxardı, samuel-ə arxadan atəş açmaq üçün çölə tərəf yönələndə çernyayevski ona əngəl oldu. “onun ölümü bizim edamımız deməkdir.” – dedi çernyayevski. Ağsaqqal-ı hirsləndirən şey samuel-ə xidmət etmək yox, bir zamanlar qəsəbənin ən usta kovboyu olan anyone-ı yaxalamaq məcburiyyətində qalmaq idi. anyone, ritorika öyrənmiş sırtıq yobaz-ın sirli qətlindən əvvəl qəsəbədə ən böyük nüfuza sahib olan kovboy idi. yaxaladığı 30-dan çox cinayətkarı ədalətə təslim eləmiş, qatı cinayətkar tommy darwinson-u öldürərək onun adına qoyulmuş böyük məbləğdə pulu qazanmışdı. Belə olan halda anyone-ı tutmağın heç də asan olmayacağı mənasına gəlirdi. “texas mərkəzinə gedib yeni silahlar təmin edəcəm. Səhər saat 5-də qəsəbənin mərkəzində atın ilə birlikdə məni gözlə.”- deyən çernyayevski atına minib gözdən uzaqlaşdı. Ağsaqqal isə əsəbi şəkildə bardan viski alaraq evinə doğru yönəldi. Onun evi qəsəbənin mərkəzindən xeyli uzaqda yerləşirdi. Tək yaşayırdı, indiyənə kimi heç vaxt evlənmək və ya birisi ilə yaşamaq kimi fikirlərə qapılmamışdı. əslində, hələ gənc idi, qəsəbədəki bəzi qızların sevimlisi idi.
    Xoşladığı yeganə qız la jolie fille idi. onu xoşlamağının səbəbi onun digər qızlara bənzəməməsi idi. hələ yeniyetmə vaxtından onu xoşlayırdı amma ikili arasında heç vaxt bir eşq məcarası baş verməmişdi.
    o, Günün bir çox hissəsini öküzlərini örüşə çıxarmaqla və atış təlimi etməklə keçirərdi. Həmin gün də öküzlərini örüşə çıxardıqdan sonra axşamüstü evə gəldi və bardan aldığı viskini içməyə başladı. Gecəyə yaxın yatdı.
    Saat 4:30-da yuxudan oyanan ağsaqqal, hazırlanaraq atına mindi və qəsəbə mərkəzinə yollandı. Qəsəbənin mərkəzində isə heç kim nəzərə çarpmırdı. Bu, çox qəribə idi. çünki çernyayevski əsla gecikməzdi. Saat 5:15-i göstərirdi amma ondan hələ də bir iz yox idi. getdikcə şübhələnməyə başlayan ağsaqqal ətrafa nəzər salmağa başladı. Kor-koranə axtarışdan nəticə çıxara bilməyən ağsaqqal, şiddətli baş ağrısı səbəbindən evə dönmək qərarına gəldi. “yəqin işi uzanıb, onsuz yerimi bilir. O, məni tapar” – deyə fikirləşən ağsaqqal, evinin qapısına çatdı. Qapını açaraq içəri girəndə gördüyü mənzərə onda şok təsiri yaratdı. Gözlərinə inana bilmirdi, axı bu necə ola bilərdi?! əlini ağzına aparan ağsaqqal, diz çökərək hönkür-hönkür ağlamağa başladı. Gördüyü mənzərə həqiqətən qorxunc idi. evin giriş qapısından bir neçə addım uzaqlıqda olan yerdə tavan dəlinmiş və qarmaqdan çernyayevski-nin gözləri oyulmuş, bədəninin hər tərəfinə işgəncə edilmiş meyidi asılmışdı...

    Yuxusundan qan-tər içində ayılan la jolie fille, saatın hələ 6 olduğunu gördü. Atası evdə yox idi. erkəndən işə getmişdi. Bayıra çıxaraq quyudan bir vedrə su çıxardı və evin arxa tərəfində yerləşən hamama yönəldi. Səhərləri duş almaq onun ən sevimli məşğuliyyəti idi. duşdan sonra mətbəxdə kofesini hazırlayaraq içməyə başladı. Özünü hələ də gümrah hiss edə bilmirdi. Gözünün qabağından asosyal adam-ın ağlamaqlı sifəti getmirdi. Xüsusilə bir insanın qəlbini qırmağı heç istəmirdi, hələ anasının son nəfəsində ona dediyi “çalış heç kimin qəlbini qırma qızım! Qoy sənin qəlbini qırsınlar amma sən onların qəlbinə toxunma!” bu sözlər hələ də qulağında idi. gözləri dolan la jolie fille, otağında gedərək ən sevdiyi bənövşəyi rəngli köynəyi ilə ayağı gen qum rəngli şalvarını geyindi. Revolverini həmişəki yerində, bel hissəsində gizlətdi. Makyaj etməyi çox sevməsə də aynanın qarşısında dayanaraq atasının ona yeni ildə aldığı pamada ilə dodaqlarını qırmızıya boyadı, yanaqlarına isə xəfif qırmızı rəng verərək həyəcanla otaqdan çıxdı. Son dəfə qapıdakı aynada özünə baxan la jolie fille, həqiqətən də çox cəlbedici görünürdü. Qapıdan bayıra addım atanda isə saatın hələ də erkən olduğunu vecinə almadı. Axurdaki Ağ atını tumarlayan la jolie fille, dərin xəyallara daldı. Sanki vicdanı onu rahat qoymurdu. Ata minən la jolie fille, qəsəbə mərkəzinə doğru gedirdi. Səhər erkən olduğundan mərkəzdə çox adam gözə dəymirdi. Günəş hələ təzə-təzə çıxırdı. Sözaltı Kafe ilə üzbəüz yerləşən Üç mərtəbəli binanın qabağında atını bağladı. Pilləkənləri tez-tez çıxan la jolie fille, ikinci mərtəbədə sağ qapını döydü. Qapını açan yox idi. la jolie fille daha da sərt şəkildə qapını döyərək, açılmasını tələb edirdi. Birdən orta qapı açıldı. Ora tərəf yönələn la jolie fille, qapını açanın yaşlı qadın olduğunu gördü. “orada yaşayan yoxdur.” – deyən həmin qadın qapısını örtərkən la jolie fille, ondan asosyal adam-ın harada yaşadığını soruşdu. “o, mənim oğlumdur. Sizə nə üçün lazım idi ki?” – deyə yaşlı qadın soruşdu. “mən onun dostuyam, ona demək istədiyim bəzi vacib sözlərim var. Onu görə bilərəm?” – dedi la jolie fille gülümsəyərək. “hmm. Onun çox dostu yoxdur.” – dedi yaşlı qadın. “hələ qız dostu olduğunu ilk dəfədir ki eşidirəm.”
    La jolie fille-ni içəri dəvət edən yaşlı qadın ona oğlunun otağını göstərdi. Qapını döyən la jolie fille, həyəcanla içəri daxil oldu. Yazı yazmaqla məşğul olan asosyal adam, gözlərinə inanmırdı. Hələ dünən onu qovan qız indi onun otağında idi. “atım binanın qarşısındadır. Bəlkə bir yerlərə gedək?” – deyən la jolie fille, gülümsəyirdi.
    2-ci seriyanın sonu
    3. bu sifarişi verən: samuel

    Şerif timidus və köməkcisi samuel, qorxmuş vəziyyətdə çernyayevski-nin meyidini izləyəndə, bayırda sifəti ağarmış, gözləri ağlamaqdan qızarmış ağsaqqal, atına minərək sürətlə uzaqlaşmağa başladı. Samuel onu sorğu-sual üçün geri çağırmaq istəsə də timidus sorğunun daha sonra da aparıla biləcəyini dedi.
    “əlləri kəndir bağlandıqdan sonra atın arxasında süründürülüb, buna görə də əlləri biləkdən çıxıb. Süründürülmə faktını bədəndəki yaralar da sübut edir.” – diqqətlə araşdırma aparan samuel dedi. “daha sonra qurbanını tavandan asan qatil, onun ölümündən sonra gözlərini oymuş, bədəninə müxtəlif işgəncələr etmişdir.”
    “səncə bunu kim edib? Bunu edən Ritorika öyrənmiş sırtıq yobaz-ın da qatilidir?” – timidus soruşdu.
    “yox, inanmıram ki eyni adam olsun. Çünki, bu qatilin öz tərzi var. Istəsə idi asanlıqla qurbanını güllələyə bilərdi. Amma o daha çətin yol seçib.” – samuel cavab verdi.
    “hər halda əlimizdə dəlil yoxdu, ona görə də qatil anyone da ola bilər.” – timidus bunu deyərək patrolları meyidi götürməsi üçün göstəriş verdi.

    Faytonun arxasında əlləri və ayaqları bağlı halda kabusdan ayılan anyone, hələ də harada olduğunu dərk edə bilmirdi. deyəsən, gördüyü kabus yox, məhz elə yaşadıqlarının bir parçası imiş. Fayton irəliləyirdi və anyone olanları yavaş-yavaş xatırlamağa başlayırdı. Yadına sala bildiyi qızılağac qəsəbəsində yerləşən bara daxil olaraq içki içməsi və daha sonra başına gələn zərbə nəticəsində huşunu itirməsi idi. böyük ehtimalla, onu mükafat üçün ədalətə təslim etməyə aparırdılar.
    Bu sırada faytonu idarə edən shemmusi və köməkcisi chromosome öz aralarında alacaqları mükafat haqqında danışırdılar. Saat 7 olardı. Sübh çağı idi. gecədən indiyə kimi faytonu çəkən atlar yorğun idi. meşə yolunun daşlı olması da atlar üçün çətinlik törədirdi. Atların dincəlməsi və səhər yeməyi üçün faytonu saxlayan shemmusi və chromosome, arxadan anyone-ı yerə düşürdərək ona da biraz çörək və su verdilər. Anyone soyuqqanlılığını qoruyurdu.
    “sizcə də bu qədər əziyyətin qarşılığında sadəcə 10 min dollar almağınız az deyil?” – dedi anyone.
    “məqsədimiz mükafat yox, sənin kimi əclafları ədalətə təslim etməkdir!” – deyə shemmusi cavab verdi.
    Anyone-ı arxaya atdıqdan sonra yenidən yola düzələn shemmusi və chromosome, günortaya qədər dayanmadı. Yolun meşə olan hissəsi bitmiş və artıq daha uzun olan çöllük hissəsi başlamışdı. Havanın isti olması və yaxınlıqda heç bir su birikintisinin olmaması atları əldən salmışdı. Çöllüyün ortasında düşərgə salmaq qərarına gələn shemmusi, atları faytonda olan su ilə suvarmağı chromosome-yə tapşırdı. Shemmusi isə tərini silərək faytonun arxasından anyone-ı düşürtdü və ona biraz su verdi. Istinin təsiri nəticəsində anyone olduqca bitkin görünürdü. Chromosome həyəcanla shemmusi-yə: “əgər qarşıda su tapa bilməsək, çölün ortasında susuzluqdan öləcəyik!”
    “yox, narahat olma. 6 mil aralıda bildiyim bir quyu var. Orada həmişə su olur.” – dedi shemmusi.
    Danışmağa belə halı olmayan anyone, elə oradaca yuxuya getdi. Gecə yarısına doğru hava biraz sərinləmişdi. Shemmusi, choromosome-yə ayıq olmasını tapşırsa da o da yuxuya getmişdi. Gecədən xeyli keçmiş anyone yuxudan ayılmışdı. Keçmiş şöhrətli həyatını fikirləşəndə uzaqdan 3 dənə atlının sürətlə gəldiyini gördü. əvvəlcə səssiz qalmağı düşünsə də bunun yaxşı fikir olmadığı qənaətinə gələrək, shemmusi-ni yuxudan oyatdı. Cəld şəkildə chromosome-yi yuxudan oyadan shemmusi, tüfəngini doldurmağa başladı. Chromosome də öz növbəsində revolverini hazır vəziyyətə gətirdi. Qarşıdan sürətlə gələn üç atlı təqribən 10 dəqiqəyə düşərgəyə çatacaqdı.
    “gələn atlılara qarşı heç bir şansınız yoxdur! Onlar üç, siz isə 2 nəfərsiniz. Və üstəlik sadəcə birinizdə tüfəng var. Qarşıdan gələnlər çöl quldurlarıdır və onlar peşəkar atıcıdır!” – dedi anyone. “məni sərbəst buraxın, sizin üçün onları məhv edərəm.”
    Bu fikir ilə razı olmayan shemmusi, atlıların getdikcə yaxınlaşdığını görərək başqa şansının olmadığını dərk etdi. Chromosome-nin də umbay bir atıcı olduğunu bilən shemmusi, anyone-ın qollarını və əllərini açaraq, onu azad etdi. revolver-lərini anyone-a verdikdən sonra shemmusi, tüfəngi ilə nişan aldı.
    Qarşıdan sürətlə gələn quldurlara ilk atəşi tüfəngi ilə shemmusi açdı. Bundan sonra quldurlar, bir-birindən xeyli aralandı. Güclü atışma başladı quldurlarla düşərgə arasında çox az məsafə qalmışdı. Quldurların atəşi ilə atlar ürkdü və qaçmağa başladı. Anyone cəld tərpənərək atların birinə minməyə nail oldu və sürətlə quldurlara tərəf çapmağa başladı. Quldurların biri ilə üzbəüz gələn anyone, revolver-i ilə atəş açaraq onu yerə sərməyi bacardı. Bu arada digər iki quldur düşərgə ətrafında dövrə vururdu. Faytonun içində güc bəla ilə atəş açan shemmusi çox çarəsiz görünürdü. Anyone düşərgəyə doğru çaparaq atəş açmağa başladı. Bunu görən digər quldur, tüfəngi ilə atəş açaraq anyone-a tərəf atını çapırdı. Anyone, başqa yolunun olmadığını dərk edərək atından tullandı və qulduru başından vuraraq öldürdü. Qorxuya düşən sonuncu quldur isə qaçaraq uzaqlaşdı. Anyone düşərgəyə tərəf gələrək can verən shemmusi-yi və bədəni deşik-deşik olmuş chromosome-yi gördü. Shemmusi-nin son xahişini nəzərə alan anyone, onu başından vuraraq əziyyət çəkməsinin qarşısını aldı.
    Məyus halda quldurdan qalan ata minən anyone, gözdən uzaqlaşdı.

    Kofesini yavaş-yavaş içən asosyal adam, la jolie fille-yə baxaraq gülümsəyirdi. Həyatında ilk dəfə idi ki, bir qızla eyni stolda oturmuşdu. Həyəcanlı idi. la jolie fille-nin gözəlliyi sanki onu iflic etmişdi. La jolie fille ilə asosyal adam əvvəlcə sözaltı kafe-dən iki fincanlıq kofe almış və daha sonra isə qəsəbədən aralanaraq, böyük çinar ağacının altında oturmuşdu.
    “keçən dəfə sənin qəlbini qırdığım üçün çox məyusam. Elə olsun istəməmişdim...” – la jolie fille dedi.
    “yox, günahkar olan mənəm. səni xəlvəti izləmək düz hərəkət deyildi.” – asosyal adam dedi.
    “bilirsən, həmişə sənin niyə hamıdan fərqli olduğunu düşünürdüm. Mənə çox qəribə gəlirdi.” – la jolie fille dedi.
    “məni bu hala gətirən özüm yox, mühitdir. Həmişə əzildim, döyüldüm hətta öz ailəm tərəfindən belə sevilmədim...” – asosyal adam dedi.
    La jolie fille, asosyal adam-ın sifətindəki məyusluğu görəndə onu sevindirmək üçün əlini tutdu və dedi: “artıq tənha deyilsən. Səni sevən birisi var.”
    Amma əslində, la jolie fille sadəcə asosyal adam-a acıdığı üçün ona onu sevdiyini deyirdi.
    “sən yalan deyirsən! Mənə acıdığın üçün belə edirsən!” – asosyal adam bunu deyərək qaçmağa başladı. La jolie fille onun arxasınca qaçsa da onu tutmağa nail olmadı. Çox qəribə hisslər keçirən la jolie fille, atına minərək evə döndü. Makyajını sildi, geyindiyi cəlbedici paltarları çıxardı və yenidən əvvəlki la jolie fille oldu. Asosyal adam-ın belə davranmağı ona çox qəribə gəlmişdi, halbuki dediyi sözlərin asosyal adam-ın xoşuna gələcəyini düşünmüşdü. Məyus halda özünü yatağa atan la jolie fille, axşama kimi yatdı. Yuxusunda asosyal adam-ı ağlayan görmüşdü. Özünü çox pis hiss edən la jolie fille, otağından çıxaraq mətbəxə girdi və bir bardaq su içdi. La jolie fille, qonaq otağından səs gəldiyini eşitdi. Səssizcə otağa tərəf yönəldi və qulaq asmağa başladı. Danışan atası timidus ilə köməkcisi samuel idi.
    “mən sizə çox təşəkkür edirəm və sizin oğlunuz olmaqdan qürur duyuram. Qızınızı xoşbəxt etməyə çalışacam.” – bu sözləri samuel-dən eşidən la jolie fille, eşitdiklərinə inana bilmirdi.
    3-cü seriyanın sonu


sən də yaz!