abadyerinbülbülüxarabanınbayquşu

7 əjdaha! 06.10.2024 23:21, abadyerinbülbülüxarabanınbayquşu

2010-cu illər və sonrasında doğulan fərdləri əhatə edən nəsil. Mən bu entrini yazarkən ən böyük fərdləri artıq 14 yaşında yeniyetmə qızlar/oğlanlardır. Bir reallıq var ki, hər nəsil özündən sonrakını pisləyir. Bu istisnasız belədir. Məsələn, X nəslinin "nifrəti" Y-dən Z-yə, Z-dən alfaya doğru artan sıra ilə gedir. Mən də Z nəslinə aid olan biri kimi alfaları sürüməyə gəlmişəm (diş ağardan smaylik).
Z nəsli böyük texnoloji yeniliklər gördü. Bu nəslin nümayəndəsi kimi qozqıran, antennalı nokia telefonlardan açılıb-bağlanan telefonlara keçidi gördük. Sonra isə bu telefonlar smartfonlara çevrildi və bizim demək olar ki, böyük əksəriyyətimiz internetlə tanış oldu. Yəni Y nəslindən fərqli olaraq biz sürətli inkişafa şahidlik etdik. Z nəsli texnologiyanın içinə doğulmadığı üçün real sosial münasibətlər qurmaq, real oyunlar oynamaq, pis-yaxşı ailəmizlə vaxt keçirmək şansımız oldu. Biz ilk vaxtlarda klaviaturada yox qələmlə yazmalı, məlumatları internetdən yox kitablardan öyrənməli olduq. Təbii ki, texnologiyanın inkişafı bizim bu bacarıqlarımızın hamısına təsir etdi. Baxdığımız cizgi filmlərdə belə çox bariz dəyişkənliklər gördük. Nisbətən solğun rəngli, daha sərt süjet xəttinə malik cizgi filmlər getdikcə həddən artıq parlaq rəngli, sürətli, səs-küylü cizgi filmləri ilə əvəz olundu.
Alfa nəsli isə tamamilə texnologiyanın, rəqəmsal dünyanın içinə doğulmuş nəsildir. Bu nəslin nümayəndələri artıq texnologiyanın əsirinə çevrilmiş z-lərin törəmələridir. Alfaların oyunları da, sosial həyatları da, tədrisləri də rəqəmsaldır. Bu fərdlər gözlərini açan kimi sosial şəbəkələrlə, youtube-la, mobil və ya video oyunlarla tanış olurlar. Daha böyük problem internetin qaranlıq tərəfləri ilə də çox erkən tanış olurlar. "Youtube kids" kimi senzuralı tətbiqlər yaradılsa da bu tip addımlar uşaqları təhlükədən qoruya bilmir. Seksual kontentlərdən tutmuş şiddət dolu oyunlar, videolar bu fərdlərin sadəcə 1 toxunuş uzağında olur. Çox qısa, çox sürətli informasiya bombardımanına məruz qalan bu balaca beyinlər zərər görməyə başlayır. Belə ki, texnologiya bu fərdlərə xəyal qurmaq fürsəti belə vermir. Onsuz da bir toxunuşla rəngli bir dünya açılırsa uşaq beyni niyə özünə əziyyət verib xəyal qursun ki? Rollu oyunlar, oyuncaqlar artıq bu uşaqlara cazib gəlmir. Xəyal qurmayan uşağın təfəkkürü, təxəyyülü inkişaf edə bilər mi? Bir neçə il sonra görəcəyik. Süni intellekt deyilən şeyin getdikcə inkişaf etməsi belə bu nəslin gələcəyini sual altında qoyur. Texnologiya təkcə xəyal qurmağı deyil düşünməyi, qərar verməyi, yaradıcılığı da bu nəslin əlindən alır. Çox kiçik yaşlardan uşaqlar texnoloji vasitələrdən asılı olurlar. Telefonu/planşeti əllərindən aldıqda sanki narkomanlar kimi yoxsunluq böhranı yaşayırlar.
Qeyd etdiyim kimi hər nəsil özündən sonrakının gələcəyini qaranlıq görür. Ümumiyyətlə yaxşıya doğru mu, pisə doğru mu gedirik bilmirəm ancaq ümid edirəm ki alfa nəsli məni yalançı çıxarar və dövrün tələbinə uyğunlaşaraq "hakimiyyəti" ələ alar.

#388179 şikayət

amazing world of gumball

7 əjdaha! 27.09.2024 19:21, abadyerinbülbülüxarabanınbayquşu

6-cı sezonu istisna baxmadığım bölümü qalmayan animasiyalı sitcom. Baxdığı hər şeydə məntiq axtaran, ssenaridə qopuqluq, boşluq gördükdə baxdığı hər nədirsə onu yerin dibinə soxan biri olaraq illərdir ki hipnotizə olunmuş kimi izləyirəm bu serialı. Bölümlərin bir çoxu bir-birindən qopuq, bəzilərinin sonu yarımçıq olsa da heç bir bölüm bir-birini təkrar etmir. Düşündürücü, sarkazmla dolu, fantastik aləmlə real aləmin tamamilə bir-birinə qarışdığı bu dünyanın heç bir qəhrəmanı ssenaridən kənarda qalmır. Hətta ən işəyaramaz, heç bir özəlliyi olmayan personajların belə (məs. Molly) niyə yoxa çıxdığını görə bildiyimiz bölümü var. Başrollar debil, yan rolların əksəriyyəti idiot. Amma bu qədər məntiqsizlik və fantaziyanın içində belə real həyata toxuna bilirlər. Məsuliyyətsiz, passiv ata Richard, dominant, çalışqan və sərt ana Nicole, əkiz kimi böyüyən (əslində böyüyə bilməyən) Darwin və Gumball, yaşına görə çox yüksək intellektli, buna görə də vaxtından öncə böyüməyə məcbur qalaraq sosial həyatı bərbad olan Anais. Hətta yeri gəldikdə bütün personajların böyüdüyü mühiti və həyat şərtlərini də yumorla göstərərək onları gözümüzdə günahsız obrazlara çevirə bilirlər. Belə qeyri-adi bir Cartoon network şahəsəridir gumball.

#388069 şikayət

prens

6 əjdaha! 20.11.2024 00:08, abadyerinbülbülüxarabanınbayquşu

Türkiyə istehsalı, tarixi-komediya janrında olan internet serialı. BluTv-də yayımlanır. Giray altınok serialın həm ssenaristi, həm də başroludur. Türkiyə standartlarının üstündə olduğunu demək olar. Çəkilişləri dünyada çox nadir istifadə olunan virtual studiyada həyata keçirilmişdir. Döyüş səhnələri, görüntülər əladır. Aktyor/aktrisa seçimləri çox yaxşıdır (ebru şahin deyilən silikon bidonu istisna). Çağdaş onur öztürk, ceyda düvenci, serdar orçin və xüsusilə aslı tandoğan personajlara çox uyğun seçimlər olub.
Hadisələr "bongomia" adlı kiçik, zəif bir ölkədə cərəyan edir. Prens romada aktyorluq təhsili almış, ailədən həmişə çıxdaş olunan, adı belə qoyulmamış şahzadədir. Ailədə daim xəyanət, sarkazm, intriqalar baş verir (aşk-ı memnunu xatırladırdı bəzən). Prens siyasətdən anlamayan, çərənçi, feminen bir adamdır. Ailəsi tərəfindən sevilmədiyi üçün daim ayağının altı qazılır. Bəzən təsadüflə, bəzən də hiyləgərliyi ilə işin içindən çıxaraq həyatına davam edir. Prens axmaq kimi görünsə də əslində ağlını sadəcə özünü xilas etmək üçün istifadə edir.
Serialın hələlik 2 sezonu yayımlanıb. Bəzi yerlərdə satirik şəkildə sosial mesajlar verməyə çalışıblar amma çox tutuzdura bildiklərini düşünmürəm. Absurd komediya olduğu üçün serialda məntiq axtarmaq onsuz da lazım deyil. Təkcə prensin mallıqları və hiylələri üçün yox hərəkətli səhnələri və axıcı məzmunu üçün də baxmağa dəyər. Çünki serial tamaşaçını axmaq yerinə qoyub hər şeyi təsadüflərə bağlamır. Öz dünyasında bir məntiqi var hadisələrin. izlənəsi serialdır. Ümid edək ki, 3-cü sezonda xarablamasın.

#388743 şikayət

zövq verən kiçik çılğınlıqlar

7 əjdaha! 01.10.2024 15:44, abadyerinbülbülüxarabanınbayquşu

Avtobusda yer istəyən xalaya yox demək:
- Olar mən oturum ayağım ağrayır?
- Yox.
- Hə?! Hıı sağ olun.
1 dəqiqə sonra xala gözümün içinə baxaraq: şərəfsizə bax dilimlə yer istəmişəm yox deyir...
Nəticədə xala ayaq üstə durur. Yanındakı xalalarla birlikdə bütün azərbaycan gəncliyini ağ yuyub qara sərir. Günümün 5 saatı onsuz yolda keçir üstəlik də gediş haqqı aylıq 60 manata dirənib. Sənin canın candırsa mənimki də badımcan deyil ki ay xala.

#388115 şikayət

introvertlik

5 əjdaha! 15.12.2024 14:21, abadyerinbülbülüxarabanınbayquşu

Kənardan bədbəxt kimi görünən insan qrupunun sahib olduğu şəxsiyyət tipi. Bəzilərinin bildiyinin əksinə bunun valideynlərlə münasibətlərlə, uşaqlıq travmalarıyla əlaqəli olduğu heç bir elmi araşdırma ilə sübutunu tapmış deyil. Hətta introvertlərin prefrontal korteksinə qan axımının daha sürətli olduğu, beynin dopaminə fərqli reaksiyalar verməsi kimi fikirlər ortaya atılıb amma bunlar da etibarlı sayılmır. Yəni insanların niyə introvert, ekstrovert və bunların kəsişməsi olan ambivert olduğunu hələ də bilmirik. Yayğın bir mifə görə introvertlik anormallıq kimi qəbul edilir. Çünki introvertlər ekstrovertlərə nəzərən sayca daha azlıq təşkil edir (bu da mübahisəlidir əslində). Özüm də introvert biri olaraq ətrafdan bunun anormal olduğunu deyən bir yığın insanla qarşılaşıram ailəm də daxil olmaqla. insan çox mürəkkəb bir varlıq olduğu üçün belə kateqoriyalara sığışacaq qədər bəsit deyil bu işlər. Yəni introvert deyə etiketləsək belə bu da əslində bir şkalaya daxildir və n qədər forması var. Həmin formaya aid olmaq da bu introvertlərin eyni olması demək deyil. 2011-ci ildə aparılmış bir araşdırmada introvertlər belə qruplaşdırılır:
1. sosial introvertlər. Təzadlıq kimi görünsə də introvertlər autistiklər və ya şizoidlər kimi psixi pozuntudan əziyyət çəkən şəxslərdə olduğu kimi sosial marağı olmayan insanlar deyillər. Bu tip introvertlər kiçik və səmimi bir qrupun üzvü olurlar və bu qrup daxilində sosiallaşmaqdan həzz alırlar.
2. Düşüncəli introvertlər. Düşünməyi, yeni fikirlər irəli sürməyi sevirlər və yaradıcı ola bilirlər. Bu tip introvertlər sosial tip qədər sosial deyil.
3. Təşvişli introvertlər. Rahat hiss etdikləri qruplar istisna olmaqla digər insanla münasibətdə narahatlıq duyurlar. Ona görə də özlərinə tanış olan mühitlərdə olmağı üstün tuturlar.
4. Sərhədli introvertlər. Bu tip insanların yeni insan qrupuna adaptasiya olması üçün müəyyən qədər vaxt lazımdır. Adaptasiyadan sonra sakit formada öz fikirlərini ifadə efməyə başlayarlar. Yəni bu introvertlər yeni mühitlərdən qaçmazlar.
Göründüyü kimi introvertliyin ayrıldığı tiplərdə də çoxlu ortaq nöqtələr və fərqliliklər var. Yəni bir introvert bir neçə tipin xüsusiyyətini daşıya da bilər, heç bir tipə aid olmaya da bilər.
Bu şəxsiyyət tipini patologiyadan ayırmaq heç də çətin deyil. Əgər patoloji bir vəziyyət varsa bu həmin şəxsin öz həyatına ya da başqasının həyatına mənfi təsir göstərməlidir. Sosial fobiya, şəxsiyyət pozuntuları kimi pozuntular buna görə patologiya sayılır.

silinmiş entry.

#389104 şikayət

tualetdə yaradıcı fikirlərin peyda olması

7 əjdaha! 21.09.2024 12:43, abadyerinbülbülüxarabanınbayquşu

Sinir sistemini və beyni yaxşı tanıyanlar üçün təəccüblü olmayan hadisə. Təbii ehtiyaclar ödənilmədikdə stress yaradır və insan bu stressogen faktordan qurtulmağın yolunu axtarır. Yəni təbii ehtiyac ödənmirsə beyin başqa şeyləri düşünməyə fürsət tapmır. Amma ehtiyac ödənərkən dopamin səviyyəsi qalxır. Çünki bədən ehtiyacını ödəyib rahatlayır deyə beyin də rahatlayır və ehtiyac ödəndiyi üçün dopamin ifraz edərək özünü mükafatlandırır. Dopamin ifrazı da öz növbəsində məntiqli qərar verməyə, yeni ideyalar yaratmağa şərait yaradır.

#387987 şikayət

erkin koray

5 əjdaha! 08.11.2024 23:55, abadyerinbülbülüxarabanınbayquşu

Cem karaca və barış manço ilə bir tutulmasını qəbul edə bilmədiyim musiqiçi. Məşhur mahnıları arasında da plagiatlar çoxdur. "Şaşkın", "Fesüphanallah" ərəb mahnılardır məsələn. Ən məşhuru "öyle bir geçer zaman ki" də hind mahnısıdır. 50-ci illərdə Lata mangeshkar tərəfindən ifa edilibmiş. "Estarabim" və "Deli kadın" da həmçinin erkin babanın qarnını doyurmuş digər plagiat mahnılardır. Siyahını çox uzatmaq olar. Məsələ say deyil. Məsələ başqa millətlərdən musiqi götürmək də deyil. Ay "baba" madəm ki götürmüsən, heç olmasa bunların həqiqi bəstəkarlarının adını qeyd et. Albomlarda "söz/müzik: erkin koray" yazmaq nə deməkdir? internet olmayan vaxtlarda heç kəsin ağlına gəlmirmiş deməli zibillərimizin üstü bir gün açılar deyə. Türkiyədə xaricdən alınmış mahnı ifa etməyən müğənni yoxdur onsuz da. Başda ajda pekkan (ərəb, fransız əsasən), nilüfer (yunan, italyan), sezen aksu (yunan, erməni, azərbaycan) olmaqla çox adam "idxal" edib vaxtilə. Amma vicdanla bəstəkarlar albomlarda qeyd olunub. Erkin baba isə öldü getdi və plagiatların hesabatını vermədi heç kəsə. Rock'un babası deyildi ona illərlə və barış manço kimi bir əjdaha ilə müqayisə olundu. Bircə oğurluq etməklə özünü geri saldı digərlərindən. Yoxsa pis söz yazmırdı ən azından.

#388581 şikayət

azərbaycan kinosu

4 əjdaha! 23.09.2024 19:50, abadyerinbülbülüxarabanınbayquşu

Son nəfəsini 2000-ci illərin əvvəlində verərək azərbaycan musiqisinin yanına gedən sahə.

#388023 şikayət

aqressiya

7 əjdaha! 20.11.2025 12:17, abadyerinbülbülüxarabanınbayquşu

qəzəb hissi ilə qarışdırılsa da, əslində aqressiya hiss deyil, davranışdır. aqressiya bəzi hallarda qəzəbdən doğulur. məsələn, biri sərhədlərimizi pozduqda həmin insana qarşı qəzəb hissimiz oyanır. sonrasında isə reaksiya veririk və bu reaksiyanın adı aqressiyadır.

aqressiya həmişə qəzəbdən doğulmur və mənim də bu entridə diqqət çəkmək istədiyim aqressiyanın qorxu ilə əlaqəsidir. adətən belə insanlar qorxunu maskalamaq üçün aqressiv davranış göstərirlər və həqiqətən də istədiklərinə nail olurlar. çünki qorxan birinin hər zaman qaçacağı düşünülür. halbuki qorxan biri bu üç reaksiyadan birini verə bilər: savaş, don və ya qaç. sözü gedən insanların verdiyi reaksiya isə adətən "savaş" olur. aqressiyanın əlbəttə ki, sağlam olmayan formasından söhbət gedir. belə insanlar xroniki şəkildə aqressiv davranış göstərirlər. ən xırda şeyə belə həddən artıq şiddətli reaksiya verirlər. halbuki, bu insanlar əsasən həssas, özgüvəni zəif, özünü yetərsiz hiss edən insanlar olur. bu xüsusiyyətləri həmin şəxsin nüvəsi kimi düşünün. kənardan baxan çox insan bu nüvəni görmür, aqressiya adlanan "qabığı" görür. şəxs öz qorxusunu, utancını aqressiya altında gizlədir.

məsələn, itirmək qorxusu olan biri "səni itirməkdən qorxuram" deməyi zəiflik hesab etdiyi üçün qarşısındakı insana aqresssiya göstərə bilər. və ya yetərsizlik və özgüvənsizliyini gizlətməyə çalışan biri ən xırda bir tənqidə qarşı qışqır-bağır sala bilər.

aqressiya bir çox hallarda avtomatik şəkildə üzə çıxan refleks kimi davranır. şəxs bunu idarə etməyi bacarmır. bioloji açıqlaması bu şəkildədir: aqressiya zamanı beynin heyvani hissələri, yəni limbik sistem aktiv olur. bu hissədə yerləşən amiqdala adlı bir hissə həddən artıq aktiv olur və bu da reaksiyaların şiddətlənməsinə səbəb olur. beynin ön hissəsi, yəni prefrontal korteks isə insani hissədir və bu hissə aqressiya zamanı demək olar ki, deaktiv olur. bir də aqressiyanın qorxudan yarandığını nəzərə alsaq limbik sistem tamamilə cızığından çıxır və insani beyin bunu idarə edə bimir. yəni aqressiya yaşayan insanların niyə belə kontrolsuz olduğunu anlamaq çətin deyil.

bəs bunun çarəsi var mı desəniz, əlbəttə var. aqressiya göründüyü kimi səbəbsiz deyil və o səbəblər aradan qaldırıldıqda aqressiya da azalır və sağlam səviyyəyə qayıdır. təcili olaraq aqressiyanı azaltmaq üçün isə mindfulness texnikalarını yoxlamağa dəyər. mindfulness bədənin verdiyi reaksiyaları və duyğuları daha yaxşı tanımağa kömək edir və aqressiv reaksiya anında beynin insani hissəsini oyadaraq məntiqli hərəkət etməyə kömək edir.

#394162 şikayət

sevilməyən insan tipləri

5 əjdaha! 22.12.2024 17:44, abadyerinbülbülüxarabanınbayquşu

(baxma: dərd yarışdıran tiplər). Bir səhv edib bu yonulmamış kötüklərə probleminiz olduğunu deyirsiniz. Dialoqunuz başlamamış bitir və bu tipin dəhşət-ül vəhşət dərdlərini danışdığı monoloq başlayır.
(baxma: azərbaycansayağı şəxsi inkişafçılar)
istisnasız bu tiplərin hamısı özü bir baltaya sap olmayan tiplərdir. Amma buna baxmayaraq sizə kariyera tövsiyəsi verir (özü işsizdir), evlilik məsləhəti verir (1 il evli qalıb səydərək bir səbəbdən boşanıb), əxlaqdan, böyüyə-kiçiyə hörmətdən danışır.
(baxma: din fanatikləri)
Dini inancınızı bildirmək istəmədiyiniz halda sizi din söhbəti içinə çəkib kafir çıxara bilirlər. Bundan həzz alırlar çünki özlərini ultra-dindar hiss edirlər.
(baxma: feministlər və maskulinistlər)
Türkiyəlilərin deyimi ilə aynı bokun laciverti olan bu tiplər qadın və ya kişi olduqları üçün özlərini üstün hiss edir, güya bu cinsiyyətlərin hüquqlarını qoruyurlar. Bu tiplər qadın və ya kişi olmanın bioloji bir fərq olduğunu deyil sanki ayrı primat növü olduğunu düşünürlər. Saçı ağlından uzun olan feminişlər radikallığa, kişi düşmənliyinə, beyni əzələlərinin onda biri qədər inkişaf etməmiş "maskulin" kartoşkalar qadın düşmənliyinə, öz həmcinslərinə qarşı alçaldıcı münasibət göstərməyə meyilli olurlar.

#389222 şikayət

azərbaycanda əsgərlik

+9 əjdaha

Yaşlı nəsil tərəfindən haqqında "Kişilik məktəbidir", "getməyənə qız vermirlər", "getməyənə iş vermirlər" kimi mifologiyaların uydurulduğu zad.
Bu mövzuda yaşlı nəslin nümayəndəsi olan "sevimli" bir qohumumla aramda keçən dialoq:
- Kişilik məktəbidir əsgərlik adamı möhkəmləndirir. Qeyrəti olan gərək getsin.
- Getməyən kişi olmur deməli?
- Vətən namusdur, onu qorumaq da kişinin işidir.
- Sən əsgərlikdə harada olmusan?
- Ukraynada ( fəxrlə)
- Kimi qorumusan? Kimə xidmət eləmisən? Sovetə yəni ruslara, düzdür? Sənin vətənini işğal edənlərin sərhədlərini qorumusan?
Və dayı büzüşdü, başını yelləyib heç nə demədi. Əvvəlcə özümdən böyüklə bu qədər kobud danışdığım üçün peşman oldum amma deməsəydim də xəstəlik tapardım.
(baxma: içinde kalıp dert olacağına dışarı sal mert olsun)

8 əjdaha! 17.10.2024 08:59, abadyerinbülbülüxarabanınbayquşu

#388314 şikayət

Absurd mahnı sözləri

5 əjdaha! 25.09.2024 12:23, abadyerinbülbülüxarabanınbayquşu

Ciddi ortamlarda beynimin içini palatka toyuna çevirən o möhtəşəm mahnı:
Zəng zəng zəng elə
Bu qara qıza zəng elə
Kamış səni çox sevir
Sən kamışa zəng elə...
- Kəmalə günəşli

#388045 şikayət

avara

4 əjdaha! 10.11.2024 21:09, abadyerinbülbülüxarabanınbayquşu

Türk dillərinə fars dilindən keçmiş söz. Müasir Fars dilində "avareh" olaraq deyilən bu söz qədim iran dillərində də işlənirdi. Pəhləvicə "apar" şəklində olan bu söz şəklini dəyişərək bir çox dilə "awar" və ya "avar" kimi keçmişdir. Qədim iran dillərində "zorla almaq, qapmaq, əlindən almaq" demək idi. Maraqlı bir məsələ də odur ki, bu söz türkcədəki "apar" felinin mənasına bənzər mənaya gəlir. Bəlkə də "avar" deyilən qədim köçəri xalqın adı da bununla bağlı idi. "Avara" sözü farscadan keçmiş olsa da bir ehtimal fars dilinə də sanskritcədən keçmiş ola bilər. Hind dilində də bu söz var çünki.
(baxma: Avaara hoon)

#388614 şikayət

metroda candy crush oynuyan qocalar

5 əjdaha! 26.09.2024 19:15, abadyerinbülbülüxarabanınbayquşu

Rus və azərbaycan dillərində söz oyunu oynayan qocalar cəmiyyətinə rəqib olan tonton qocalardır. Özüm ingilis versiyasında 1174-cü səviyyəyə gəldiyim üçün qocalığımda aralarına qatılmağı hədəfləyirəm.

#388061 şikayət

sözlüyün yazarlara qazandırdıqları

6 əjdaha! 15.07.2025 01:29, abadyerinbülbülüxarabanınbayquşu

Beynimin içərisindəki zir-zibili boşaltmaq üçün bir qutudur söz6. Hansı informasiyalar ki ağırlıq edir, indi işimə yaramır, olduğum odlu qəfəsdən məni dartıb çıxara bilmir mən də yazıram. Elə-belə yox, uzun-uzun yazıram fərqində olmadan. Başımın içindən bir-birinə bağlı zəncir kimi çıxır yazdıqlarım. Madəm ki mənə faydası yoxdur bildiklərimin, onda bəlkə bir iki nəfər görüb eliyər bir şey öyrənər. Heç kəs mənə istinad etməz təbii ki, çünki mənbə göstərəcək qədər də ciddiyə almıram yazdıqlarımı deyərdim amma düzünü desəm sadəcə bildiyimi yazıram. Mənbələri yadımda olmasa belə doğruluğundan şübhə etmədiyim hər şeyi yazıram. Yazmağa davam da edəcəyəm yaşadığım müddətdə. Qarşılıq filan da gözləmirəm...
(Əslində olan: bayquş bilgisini pulla satsa mənbəli, qrafikli avropa standartlarına uyğun məqalələr yazar)

#391707 şikayət

həyatdan soyudan müəllimlər

5 əjdaha! 13.12.2024 01:07, abadyerinbülbülüxarabanınbayquşu

Təcrübələrimə əsasən Əksəriyyəti sovet töküntüsü olan müəllimlərdir:
1. Məktəbdə olarkən dərsliyin üzündən oxuyub, gələn dərsdə çətin məsələləri tələb edən fizika müəllimi gördü bu gözlər. Dərslikdən oxuyacaqdıqsa sən niyə varsan ey qütb ayısı deyən yox idi. Keçmədiyi dərsi tələb edib uşaqları təhqir edəcək qədər düşmüş biri idi.
2. Uşaq döyən müəllimlər. indi vəziyyət necədir bilmirəm ancaq təqribən 2018-ci ilə qədər müəllimlərin uşaq döyməsi normal qarşılanırdı (bəlkə də mən oxuduğum yerdə belə idi, bilmirəm). Kitabını evdə qoydu, dərsə gecikdi deyə şillələnmiş, ingiliscə sözü səhv tələffüz etdi deyə şillə yemiş (bu mən idim), verdiyi sualın müəllimin xoşuna gəlməməsi nəticəsində üzünə dəftər atılmış uşaq gördük. Oxuyan/oxumayan, qız/oğlan demədən qum torbasına döndüyümüz vaxtlar olurdu.
3. Ayrıseçkilik edən müəllimlər. Sinfin çərənçi, meymun uşağına qarşı həmişə pozitiv ayrıseçkilik edən müəllimlər olurdu. Şit-şit zarafatlar edən, sinif yoldaşlarını alçaldan bu uşaqların eqosu daha da şişirilirdi.
4. Hər dərsdə qanı qara olanlar. "Başım ağrayır sakit olun" deyə deyə ili başa vuran müəllimlər var idi. Elə bil ki maaş almayıb xeyriyyə məqsədi ilə dərs keçir. Dövlət sənə o maaşı verirsə canın da çıxsa dərsini keçməlisən ya da gedərsən yerinə başqa adəm oğlu gələr. Əlbəttə uşaq ağlı ilə bunu sorğulayan, şikayət edən olmurdu. Həmin müəllimlər də 45 dəqiqəni səbət kimi oturub yola verirdi.
5. Özündən başqa müəllimin yanına hazırlığa gedən uşağı sıxışdıran müəllimlər. Abituriyentlərin qorxulu yuxusudur bunlar. Qiymət kəsmələr, hər dərsdə hər hərəkətə görə danlanmalara qədər iş böyüyə bilirdi.

#389082 şikayət

yazarların nicklərinin ai-ilə şəkli

5 əjdaha! 03.04.2026 07:23, abadyerinbülbülüxarabanınbayquşu

#398543 şikayət

müəllim uşağı olmaq