gorillaz

damon albarnın "layihə" adlandırdığı elektro pop - hip hop - alt rok qrupu. rok elementləri çox az var, ona görə elə bir-başa elektro pop desək də, olar.
bu animasiya qrupunun yaradıcısı - rəssamı jammie hewlettdir. müsahibələrində qeyd edir ki, albom üçün hansı hekayənin yazılacağını, bu dəfə obrazların başına nə gələcəyini damon, jamie və digər yaradıcı qrup birgə işləyir. və əsasən, "gec olsun, güc olmasın" prinsipi ilə albom çıxarırlar, çünki albomun çəkilişləri uzun çəkən prosesdir.
qrupun 4 obrazı var: 2-D - axmaq, amma şirin obrazdır, digər qrup üzvü olan murdocun onun başına oyunlar açması səbəbilə gözləri yaxşı görmür, ona görədir ki, göz bəbəkləri yoxdur və gözünün altı həmişə qaradır. murdoc, ümumilikdə başı dərdlərdən uzaqlaşmayan, öz bildiyini edən və çılğın obrazdır. noodle qrupun elektro gitaristi kimi (bassist də ola bilər, yadımdan çıxıb) albomdan alboma kiçik qız uşağından nə istədiyini bilən qadına təkamül etmiş obrazdır. russel isə nə qədər yekəpər olsa da, bu məqamda ən ürəyəyaxın obrazımızdır.
2001-ci ildə çıxardıqları "gorillaz" adlı albomları yaxşı hesab oluna bilər, amma "demon days" və "humanz" "ən yaxşı gorillaz albomu" ifadəsini layiqincə öz aralarında bölüşdürə bilər.
2020-nin zibil olması bir qırağa, onlar ilin əvvəlindən bəri "song machine" adlı yeni layihəyə başlayıblar. burada 5-ci epizodda schoolboy Q ilə duet mahnıları "pac-man" dinləməkdən bezmədiyim mahnı olsa da, digər epizodlardan "desole", "momentary bliss", "aries" də əjdaha işlərdir.
fun fact: "desole" mahnısının klipində 2-D, noodle, russel çox xoşbəxt görünsə də, murdocu studiyada ağlayan yerdə görürük. bundan sonra murdoc öz twitter hesabında "i was ACTING (caps lockla)" yazaraq gorillaza daha çox inanmağıma səbəb olmuşdu.
hətta bir az həyatımı yoluna qoya bilsəm, gorillaza fanfic yazacam.

unudulmaz azərbaycan film replikaları

9-cu mərtəbədə olmağımıza baxmayaraq məhlədə futbol oynayan oğlanların bir-birinə "şahmat deyil e bu" dediyini dəqiqliklə eşitməyimizə ithafən:
- Ala, futbol elmdir e, o, sənin üçün şahmat deyil. Futbolu ayaqla yox, başla oynamaq lazımdır.
- Ayə, 35 metrdən başla qol vurmaq olar? Truskavetsdə bir oyunçu var, aləm.
- Ala, nə Truskavets, ala. Orda futbol var? Bir də sən futbol nədir, başa düşürsən?
(bax: ömrün səhifələri)

bna

başına döndüyümün ölkəsində sistemi səhv-sühv işləyən digər bir xidmət agentliyi. müəllimlər konfrans təşkil edib, yeni təkliflər irəli sürüblər. təkliflərə görə, "taksi fəaliyyətinin tənzimlənməsi, qanunvericiliyin təkmilləşdirilməsi və səmərəli nəzarət mexanizmlərinin yaradılması məqsədilə vahid dispetçer mərkəzinin yaradılması, tarif sisteminin və kvotanın tətbiqi eyni zamanda sahibkarlıq fəaliyyətinin təkmilləşdirilməsi nəzərdə tutulub. Konsepsiyanın icrası nizamlı, qanuni, sərnişinlər üçün təhlükəsiz və rahat, eyni zamanda sürücülər üçün zəmanətli taksi xidmətinin təşkilinə imkan verəcək".

bu qarışıqlıqda, bu hay-harayda 6-bazar günləri avtobuslarla bağlı olan məsələləri işıqlandırmaq əvəzinə, metrolarla bağlı açıqlamalar vermək əvəzinə indi də dərdləri taksilərdi.

gömrüklə bağlı qərarlarla istehlakçının gününü qara elədilər, o da inkişafa görə idi, indi də taksilərə ilişirlər, bu da inkişafa görədi.

animal farm

payız aylarında video oyununun çıxması planlanan, bu il 75 illiyi qeyd olunan distopik, satirik povestdir. corc oruel müəllimin "1984"ünü oxuyandan sonra oxuduqda bir az yavan qalır adamçün, amma ilk bundan başlanılsa, çox dövründən qabaqda olan əsərdi.
yenə bəsit və şablon oxucu düşüncəsi kimi, romanın kommunizmdən, spesifik olaraq, ssri-nin dalınca getdiyi, ya da öz ardınca apardığı kommunizmdən danışır. belə boş-boş şeylər, nəysə, bizim dildə resenziyaların başını buraxıb oxuyun. payıza da steamə gəlsin, oynayın.

oyunun treyleri:

(youtube: )

colonel bagshot

mahmut orhan da aralarında olmaqla bir neçə dj tərəfindən "six day war" adlı mahnıları "six day" olaraq mix halına çevrilmiş rok qrupudur. 70-lərdə çıxardıqları "Oh, What a Lovely War" adlı albomları çox ürəkdən, qəlbdən, səmimi bir albomdur, mahnılarının çoxu da chillingə xidmət edir.
qrup haqqında kədərləndiyim tək məqam "six day war" kimi müharibədən danışan mahnının sonradan kontekstindən tamamilə çıxaraq indi bir club mahnısına çevrilməyidir. bunun başqa formalarını da görmüşük, əslində. misal üçün insan haqlarından danışan, tommy butler tərəfindən ifa edilən "prison song" vaxt gəlir bir reper tərəfindən kokaindən, narkotikdən danışılan bir mahnıya çevrilir: future - mask off .

sözaltı etiraf

bir insanın fərqli zamanlarda eyni ardıcıllıqla eyni şeyləri yaşaması şəxsin tpoyluğundan xəbər verir, yoxsa qarşısına çıxan insanların ona uyğun olmamasından, bir dənə bunu öyrənsəm, dəhşət rahatlayacam, çünki şəxsən, belə absürd vəziyyətləri yaşamağı özümə layiq görmürəm. ümumiyyətlə, heç kimə layiq görmürəm. birbaşa özünə hörmətinə təsir edir, qalıb fikirləşirsən ki, bir də gördün hekayənin sonunda xarakteri 2 qəpiklik olmayan adam sən çıxdın, qarantiyan da yoxdur ki. sadəcə bir məsələ də budur ki, hələ insan ilk dəfə ayağı büdrəyəndən sonra ona qarşı özünü qorumaya alır, eyni şeylərə düşmür, fərqli düşünür, başqa cürə davranır, fərqli təhlil edir, amma yenə söhbət gəlir eyni yerə çıxır. day onda niyə bu qədər mübarizə aparırdım ki, birbaşa yaşayardım da olduğu kimi. dəhşət söhbətdi e, sözlük, bu başlığa hər il ən azı 1 dəfə dəyib cringe şeylər yazıb gedirəm, day üzrlü say.

füyuzat

ilk nəşrinin 1906-cı il dərc olunduğu, "molla nəsrəddin"lə hər daim baş-başa gedən romantik publisistləri ətrafına yığan mətbuat orqanımızdır. Cəmi bir il fəaliyyətdə olduğu dövr ərzində 32 say çıxarmağa müvəffəq olan bu jurnal, əslində, “Həyat” və “irşad”ın dəyərlərinə sahib və sadiq olan digər bir Əli bəy Hüseynzadə imzalı orqan idi.
Jurnalın ilk sayında məram və məqsədlərini açıqlayan Əli bəy Hüseynzadə "Həyat və meyli-füyuzat" məqaləsində füyuzat kəlməsinin mənasını açıqlayaraq yazırdı:

"Məcmuəmizə "Füyuzat" adı təsadüfi verilmiyor, bu nam həyatdan təbii olaraq təvəllüd ediyor... "Füyuzat" ləfzon "feyz"in cəmil-cəmi olub rifah və bərəkətə, bolluğa, maddi və mənəvi nemətlərin bolluğuna, tərəqqiyyat və kəmalatın şəniəyyi-təcəllisinə dəlalət edərsə də, fəqət əsl məfhumu səadət və ələlxüsus səadəti-mənəviyyədir, həqiqi zövq və səfalərdən ibarət bir səadəti-mənəviyyədir. Həyat isə mənayi batinisilə daimi bir meyli-səadət, bir meyli-füyuzatdır”.

“Həyat” qəzetindən bizə məlum olan “türkləşmək, müasirləşmək, islamlaşmaq” ideyaları Əli bəy Hüseynzadənin redaktorluğu ilə bərabər “Füyuzat”da da öz əksini tapmışdı. Bu cür mübarizpərvər sözlər, şəksiz ki, “Füyuzat” jurnalının nəşrini həmin dövr üçün labüd edirdi. Belə ki, qeyd etdiyim kimi, eyni ildə nəşrə başlayan “Molla Nəsrəddin” və “Füyuzat” jurnalları əqidə və məslək etibarilə eyni mövqeyə fokuslanmışdılarsa belə, forma, stil, müdafiə etdikləri dil baxımından aralarında fərqlərdən ibarət uçurumlar yaradırdı.

Həmin dövr üçün bu ədəbi-bədii və nəzəri-estetik qarşıdurma, əslində, milli mədəniyyətin intibahına müsbət təsir göstərdi. Belə ki, əks iki qütbü təmsil edən bu romantik və realist jurnallar daha sonradan yaranmış olan 2 ədəbi məktəbə - “Molla Nəsrəddin” ədəbi məktəbi və “Füyuzat” ədəbi məktəbinə başçılıq edir və “molla nəsrəddinçi” və “füyuzatçı” terminlərini nəinki mətbuatımıza, həmçinin ədəbiyyatımıza, dramaturgiyamıza gətirirdi.

"Molla Nəsrəddin" ilə "Füyuzat"ı fərqləndirən məsələlərdən biri dil məsələsi idi. Bir tərəfdə (nəsrəddinçilər) lakonik, satirik, xalq danışıq dilinə yaxın yazanlar, digər tərəfdə (füyuzatçılar) osmanlı türkcəsini mənimsəmiş, elmi və akademik yazmağı sevən publisistlər var idi.

Füyuzatçıların ağır dil ilə yazmasını tənqid edənlərin çoxluq təşkil etməsi publisistlərin, demək olar ki, hər nömrədə dil mövzusuna toxunmaqlarına sövq edirdi.

Hələ 9-cu nömrədə Əli bəy Hüseynzadə “Turani” təxəllüsü ilə “Türk dilinin vəzifeyi-mədəniyyəsi” məqaləsində türk dilini ərəb dilindən, fars dilindən fərqləndirən əsas məqamlara toxunub:

“Bir türk ədibi diyor ki, ərəbin dili din və məzhəb dili oldu. Fars dili şer və ədəb dili oldu. Türk dili isə dövri-cədid üşün tərəqqi və mədəniyyət dili olur. Bu həm zamanın, həm də məkanın iqtizaatındandır. Zamanca mədəniyyəti-islamiyyənin üçüncü dövrü, yəni dövri-əxiri başlıca türk tarixindən ibarət olduğu kibi, məkanca dəxi bu gün kürreyi-ərz üzərində türk dilindən daha müntəşir bir dil yoxdur”.

Jurnalın 16-cı nömrəsində isə Həsən Səbri Ayvazov “Lisan qovğası” məqaləsində ərəb, fars sözlərinin işlədilməsinə qarşı çıxan insanlardan məntiqli arqument gözlədiyini bədii suallarla əks etdirib:

“Diyorsunuz ki, açıq yazmaq üçün sırf tatarca yazmalı, türk, ərəb, fars sözlərini lisanımızdan çıxarmalı... Pək eyi, ərəbi, farsi sözlərini tərh edəlim. Ya bunların yerinə nə qullanalım? əksəri-cəridələrimizin yazdıqları kibi ruscayımı istemal edəlim?”

indi bir sual çıxır ki, bu müəllim bəyəm səhv deyirdi? əslində, yox, amma hələ "həyat" fəaliyyət göstərərkən iki baş redaktor - ə. hüseynzadə ilə əhməd bəy ağaoğlunun arasını vuran da yenə bu dil məsələsi idi. kiçik bir flashback edərək deyim ki, nəhayətində, əhməd bəy ağaoğlu "həyat"dan ayrılır və "irşad"ı yaradır.

"Anlaşılmaz yazmaq" sözləri bir qədər bizə incəsənətdə Fransız Dekadentləri xatırlada bilər. ilk dəfə XIX əsrin axırlarında Fransada meydana meydana çıxan dekadentizm cərəyanı simvolizm, sürrealizm, kubizm kimi cərəyanları özündə ehtiva edir. Rus tənqidçisi V.V.Stasov “Şeir aləminin sərgisindən” adlı məqaləsində deakdentizmin ilk dəfə Fransada yaranması və fərqləndirici cəhərlərinə dair yazır: “Dekadentlər fransız səmiyyətinin müasir durumuna müxalif olanlardır. Onların poeziyasının xarakterik xüsusiyyəti – aydın olmamaq, qeyri-müəyyənlik, yalnız ürəyin hərəkətinə və həssaslığına aid olan sirli suallara can atma nəticəsində yaranan mistisizmdir.”

Dekandentlərin 1885-ci ildə “Le Dekadent” adlanan ilk jurnalları çap olunur. Zamanında heç də hamı tərəfindən qəbul olunmayan dekadentizm imperializm dövrünün mürtəce cərəyanı kimi inkar olunmuşdur.
Onları füyuzatçılarla əlaqələndirlən əsas səbəb bu idi: Füyuzatçılar qəliz yazı tərzləri ilə xalqı öz ardınca aparmağı, onları maarifə səsləməyi əsas məqsədi halına gətirmişdi. Dekadentlər də yenə qəliz ekspressionist mövqeyləri ilə seçilirdilər. Fəqət dekadentizim öz məşhur “sənət sənət üçündür” şüarları ilə təbəqələşmənin ciddiliyini biruzə verir və sənətin yalnız cəmiyyətin yuxarı təbəqə şəxsləri üçün olduğunu qeyd edirdi.

"Füyuzat" haqqında çox yazmaq olar, ümumilikdə SSRi dövründə tədqiqatına icazə verilməyən və "Molla Nəsrəddin"lə müqayisədə Osmanlı tərəfdarı olduğu üçün "lazımsız", "seperatçı", "xain" adlandırılan bir mətbuat orqanı kimi yalnız son 20 ildə bu haqda danışmaq və araşdırmaq mümkün olub.

hal-hazırda müasir "füyuzat" jurnalı "Milli irsi Mədəni Tarixi Araşdırmalar fondu"nun tərkibində fəaliyyət göstərir. orada da maraqlı məqalələr olur "füyuzatçılar" , yaxud 1900-ların sosial-iqtisadi vəziyyəti və ya axc dövrü haqqında. nə qədər adekvat olurlar, onu deyə bilmərəm, amma keyfiyyətli məqalələr var, bu, dəqiqdi.

bundan başqa bdunun jurnalistika fakültəsində də bir "füyuzat mərkəzi" fəaliyyət göstərir. o da formal xarakter daşıyır, əslində, tədbirlər-filan olanda gəlib orada keçirirlər, bu qədər.

ümumiyyətlə, füyuzatçılar haqqında çox şey danışmaq olar. əhməd kamalından, həsən səbri ayvazovundan, hacı ibrahim qasımovundan, yaşıl qələm ictimai birliyi, yaxud füyuzatçı mətbuat orqanlarından və sairə.

mənbə: şamil vəliyev, "füyuzat ədəbi məktəbi" kitabı,
“Füyuzat” jurnalının transliterasiyası

whoosh

7 avqust tarixində dinləyicilərinə təqdim edilən deep purple albomu. deyim ki, bombadır, çox bilinir ki, deyil. müəllimlər də öz kolleqaları kimi kənara çəkilib instagram paylaşımları ilə gündəmə gəlsələr, daha yaxşı olar sanki. "step by step" bir az yaxşıdır hələlik dinlədiyim 6 mahnı içindən.

albomu uğursuz da adlandıra bilmərəm, əslində, amma bu qədər geniş tarixi olub bir də vaxtı ikən "deep purple in rock" ilə, "machine head" ilə nələr etmiş bir qrup olaraq indi onların üstünə çıxa bilməyən bir albom, sözsüz ki, köhnələrin kölgəsində qalır.

soft-rok desən var, gotik rok var, blüz-rok var. kaş bir az da keyfiyyətli mahnı olaydı, babalar ):

yazarların spotify playlistləri

70-80lərin groovy disko mahnıları dinləmək istəyəndə it's a bad life but you wanna groove ,

kədərli heavy metal, proq rok, randb dinləmək üçün it's a hot summer night and you wanna die ,

bir də "we were born wild" kimi triplərlə yaxşıca qazlanmaq üçün də you're on your way to destroy the world .

4 avqust 2020 beyrutda partlayış

10 dəqiqədir xəbər saytlarında tirajlanan partlayışdır . bu tweetdən də bunu dəqiqləşdirə bilərik.
səbəbləri və törətdiyi fəsadlar hələki qeyri-məlumdur. partlayışa yaxın məkanlarda yaşayan sakinlər 1 deyil, daha çox partlayış eşitdiklərini bildiriblər, amma partlayış səslərin eyni yerdən gəldiyi dəqiq deyil.

edit: partlayışın 10 km uzaqlıqda olan yaşayış binalarına da zərər verdiyi bildirilir. bir başqa rakursdan partlayış anı