+2 əjdaha
1. 2019-cu il 31 may tarixində netflix platformasında yayımlanan, 1989-cu il 19 apreldə central parkda Trisha meili adlı qadına qarşı baş verən hücum və buna görə günahlandırılan 5 qaradərilinin həbs həyatları haqqında çəkilən amerikan serialıdır. 4 seriyadan ibarət olan serial zaman-zaman ədalətsizliyin necə göz görə-görə edildiyini bir daha ən gerçəkçi halı ilə təsvir edir. Gənclərin məhkəmə prosesində sırf qaradərili olduqları üçün ağır formada ittihamlarından tutmuş onlara göstərilən qərəzli münasibət, o cümlədən 5 gəncin içindən islah düşərgəsinə deyil, birbaşa həbsxanaya göndərilən korey wise-ın məhbus həyatı boyunca yaşadığı əzablara qədər hər şey izləyici şəxsi dərindən sarsıdacaq. Şəxsən final bölümündə anasının koreyə günahsız olduğunu dediyi an ağladım, bir anda özümü koreyin yerinə qoydum və bu hissin necə ağrılı ola biləcəyini anladım.Serialda maraqlı məqamlardan biri hadisənin baş verdiyi dönəmdə adı tez-tez hallanan iş adamı Donald trumpın gəncləri sırf qaradərili olduqları üçün mühakimə etmədən birbaşa günahlandırması və 85 min dollar qarşılığında qəzetlərə onların edam edilməli olduğu ilə bağlı çağırış yerləşdirməsi serialda ciddi və haqlı şəkildə tənqid edilir. Qaradərililərlə ağlar arasında olan qeyri-etik münasibət, qaraların ədaləti təmsil edən şəxslər tərəfindən də ədalətsizliyə düçar edilmələri, günahsız olduqları isbatlandığı halda məhkəmə üzvlərinin onları ittiham etməsi dünyanın və hələ də ABŞ-ın yaxasından düşməyən irqçiliyi aydın halda göstərir.
Serialın sonunda günahkarın əslində koreylə eyni həbsxanada qaldığı və koreyin o əzablara rəğmən yenə də həyata və zülmə qarşı gəldiyini görüb günahını boynuna alan matias reyes olduğu ortaya çıxır. Bununla da 5 gəncə bəraət verilir və 2014-cü ildə Nyu-York məhkəməsi zərərçəkmişlərə 41 milyon dollar məbləğində təzminatın verilməsinə qərar verir ki, bu o tarixə qədər verilən ən böyük təzminat olur.
Bir sözlə, izləməyənlər varsa, mütləq izləməlidir.