+4 əjdaha
1. türkofobik baxışlarını "türk serialları" pərdəsi altında gizlədən yeni nəslin başqa bir Seymur Baycanıdır. Azərbaycanın yerli mediası düşüb türk seriallarının, türk aktyorlarının üstünə; bunlar xəbər keyfiyyətini aşağı salır... Yaxşı, bəs çıxış yolu nədir? Bu barədə bircə kəlmə də təklif yoxdur. Azərbaycan mediası nə etməlidir ki, ciddi gündəm yarada bilsin? Hansı addımları atmalıdır ki, ölkənin real problemlərinə toxunulsun, cəmiyyətin prioritetləri ön plana çıxsın? Bax, bu sualların cavabı yoxdur. Çünki əsl məqsəd heç də Azərbaycan mediasının keyfiyyətini, dəyərini qaldırmaq deyil. Sadəcə olaraq, öz daxilindəki o klassik türkofobik saplantılarını Azərbaycan mediası adı altında sırımağa çalışır.Azərbaycanlı yazıçıların qəribə metaforalarla, süni fəlsəfi dialoqlarla, qəribə ifadələrlə kitab yazmasını tənqid edir və bunun yeganə səbəbini "Kurtlar Vadisi" və ya "Çukur" seriallarına bağlayır. Öz aləmində elə dəqiq diaqnoz qoyur ki... Məsələn, falan yazıçı kitabında "Hissləri yaşamaq", "Arafta qalmaq" kimi ifadələr işlədib, bəs səbəb nədir? Çünki o, "Zuhal Topalla" verilişinə baxır. Falan yazıçının kitabı bərbaddır, səbəb? Çünki o da "Aşk-ı Memnu" pərəstişkarıdır. Bəh-bəh, o biri kitabın üslubu biabırçılıqdır, çünki müəllifi "Adını Feriha Koydum" serialını izləyib. O biri kitabda yüzlərlə banal, bayağı, pafoslu səhnə var, çünki yazarı vaxtilə "Selena" ilə "Sihirli Annem"ə baxıb...
Bütün tənqid yazıları eyni riyazi formul üzərində qurulub: qalın bir kitabın içindən bircə dənə türkcə ifadə yaxud söz tap, sonra da onu birbaşa hədəf seçdiyin hansısa türk serialına bağla. Kitabı bəyənmədin? Vəssalam, dərhal həmin müəllifi "türk seriallarına baxan", "türk mahnılarına qulaq asan" biri kimi damğala və aşağıla. Çünki əsl dərd problemi həll etmək yox, hər fürsətdə subyektiv nifrəti qusmaq üçün bəhanə tapmaqdır. Kitabın və ya medianın keyfiyyətini serial adları ilə ölçən bu bəsit, şablonçu təfəkkürün, sizcə, ədəbi mühitə zərrə qədər də olsa nəsə qazandırmaq ehtimalı varmı? Heç zənn etmirəm.