dilənçi

insanların empatiyasından pul soran peşə sahibləri. Yaşlılar, əlillər, uşaqlar daha "uğurlu" olur bu işlərdə. Əslində dilənçilərin arasında da qruplaşmalar, hətta bu qruplaşmalar arasında rəqabətlər olur. Deyilənlərə görə dilənçilərin də konkret iş bölgələri olur və o yerlərdən çox kənara çıxmırlar. Əksəriyyəti minimum əməkhaqqıdan yüksək, hətta daha çoxunu qazanırlar. Zibilliklərdə eşələnmək, məzarlıqlarda yatmaq isə bir dilənçinin artıq professional olduğunu göstərir. Yəni zibillikdən götürdüklərini yemirlər sadəcə onlarla diqqət çəkirlər. Qısacası insanların vicdani hislərindən istifadə etmək üçün bütün düymələrə basırlar.

nostalgiya

Marketinqdə belə istifadə oluna bilən, demək olar ki bütün insanların zəif nöqtəsi. Özüm də nostalgiya asılısı olduğum üçün bəzən incitdiyini desəm yalan olmaz. Keçmişim indiki halımdan daha yaxşı deyildi. Gələcəyimin də keçmişimdən daha pis olacağını düşünmürəm. 20-li yaşlarda olsam da nostalgiya bataqlığına çəkilirəm bilmədiyim səbəblərdən ötrü. Nostalgiya deyilən bu hiss ya da hər nə isə yenilikləri qəbul etməyimə imkan vermir. Dinlədiyim musiqilərə belə mədudiyyətlər qoymuşam fərqində olmadan. 2000-ci illərdən sonra çıxmış bir şeyə qulaq asmamalıyam. Bu illərdə yazılmış kitabları oxumamalıyam.
Beynin gələcəkdən qorxması məlumdur. Gələcək bilinməzlik deməkdir və bilinməzlik də təhlükədir beyin üçün. Ona görə gələcək qayğısı olan insanlar bu bataqlığa düşməyə daha çox meyilli olurlar. Bir də təbii ki indiki halından məmnun olmayanlar. Psixi narahatlıq keçirən şəxslərin baxdığı şeylərə təkrar baxması, oxuduğu kitabları təkrar oxuması əslində qismən doğrudur. Beyin onu qorxudan gələcəkdən və iynə kimi batan indiki zamandan qaçmaq üçün bir yerə yönəlir: keçmişə. Nə qədər bərbad da olsa keçmiş artıq bitib deyə beyin onu aktual təhlükə saymır. Əksinə bəzəyib düzəyir və bizim üçün elə bir illuziya yaradır ki biz o bərbad keçmişimiz üçün belə darıxırıq. insanların bu zəif nöqtəsi həm marketinqdə, həm sosial şəbəkələrdə, filmlərdə, musiqilərdə qısacası istifadə oluna bilən hər yerdə istifadə olunur. işə də yarayır.

kivanç tatlıtuğ

Əslində modelyer olub aktyorluğa sonradan qədəm qoymuş boşnak əsilli türkiyəli aktyor. Teatr təcrübəsi olmayan bir aktyordan haluk bilginer performansı gözləmək məntiqsizdir. Amma kıvanç aktyorluq sahəsində özünü çox inkişaf etdirmiş biridir. Türkiyə standartlarına görə yaraşıqlı olmasaydı bu qədər məşhur ola bilərdi mi mübahisə doğurur. Amma faktdır ki bu adam sevilir və aktyorluğu bacarır. "Gümüş" serialında və xüsusilə "Aşk-ı Memnuda" tanınmışdır. 2000-ci illərdə çəkilmiş bu iki serialda kıvançın özünü necə inkişaf etdirdiyini aşk-ı memnuda daha aydın görmək olur. Serialın ikinci sezonunda aktyorluğu ilə önə çıxır daha çox. Serial bitdikdən sonra Beren saat adlı xalamızdan fərqli olaraq eyni obraza yapışıb qalmayaraq aktyorluğu ilə də diqqət çəkmişdir.

gürcüstan

Qafqaz ölkələri arasında gələcəyi ən parlaq olan dövlət. Abxaz və osetinlərlə olan qırışmalardan zədə alsalar da, torpaq itirsələr də rusiyaya boyun əyməyib üzlərini qərbə doğru çevirmələri heç pis addım deyil. Qərb yaxşıdır mı? Xeyir. Amma gürcüstanın bu yaxınlaşmadan alacağı mənfəətləri nəzərə alsaq bu riskə getməyə dəyər. Ölkə çox kiçikdir və qeyri-gürcü etnik qrupların sayı çoxdur. Azsaylı etnik qruplar arasında türklər (azərbaycanlı, tatar, çox az axısqalı) ən böyük qrupu təşkil edir. Ardıyca abxazlar, ermənilər, ruslar və osetinlər gəlir. Kürdlər, yunanlar kimi çox kiçik etnik qruplar da əhalinin tərkibində mövcuddur. Kartvel xalqı olan gürcülər abxaz-adıq xalqı olan abxazlarla və irandilli osetinlərlə etnik konflikt yaşayırlar. Gürcülər digər azsaylı xalqlarla adətən o qədər də konfliktə girməzlər.

öyrənildiyində təəccübləndirən məlumatlar

Süd vəzi xərçənginin nadir olsa da kişilərdə də görülə bilməsi. Görülmə ehtimalı çox azdır. Bütün süd vəzi xərçəngi xəstələrinin heç 1%-i belə deyil kişilər. Amma ölüm riski qadınlardan daha yüksəkdir. Qadın orqanizmi həm süd vəzi xərçəngi ilə mübarizədə daha uğurlu olur, həm də tibbi müdaxilə üsulları daha çoxdur. Kişilərdə süd vəzi xərçəngi 60 yaşdan tez görülmür. 60-70 yaş arası kişilərdə risk daha çox olur.
Kişilərdə süd vəzi embrional dövrdə yarımçıq formalaşır. ilkin cinsi əlamətlər ortaya çıxdıqda esterogen (qadınlıq hormonu) testeronun yanında passiv qaldığı üçün kişilərdə süd vəzi inkişaf etməz və buna görə də öz funksiyasını yerinə yetirə bilməz (hormonal pozuntuları olan kişilər istisnadır, onlarda süd vəziləri böyüyə bilir).
Kişilərdə görülən bu onkoloji xəstəlik qadınlardakına bənzərdir. Süd vəzində tədricən böyüyən kütlə, süd vəzi ətrafındakı toxumalarda dəyişikliklər, qanlı axıntılar əsas əlamətlərdəndir. Eyni şəkildə müalicə üsulları da digər onkoloji xəstəliklərdə olduğu kimidir.

azərbaycanda universitet oxumağın üstünlükləri

300 il əvvəl rusiyada istifadə olunan mühazirələrin sərsəfil gündə tərcümə olunmuş formalarını əzbərləməkdir. Üstəlik praktikaya ehtiyac duyulmur (siz duyursunuz universitet yox). 4 ilinizi, tibb oxusanız 6 ilinizi müəllimlərin eqolarını şişirmək üçün verirsiniz. Heç bir şeyi tənqid etmirsiniz, sorğulamırsınız (siz kimsiniz ki). Nəticədə bir parça kardonunuzu alıb işsizlər ordusuna qatılırsınız.
(baxma: göydən 3 alma düşə bilmir, çünki kasıbsınız)

təkcə mənmi edirəm deyə düşünülən şeylər

Whatsappda səs göndərdikdən sonra öz səsinə qulaq asıb yerə girmək. Mümkün qədər səs göndərməməyə çalışsam da bəzən əlacsız qalıb göndərirəm. Biri də demir ki ay üstün zəka sahibi göndərmisən yaxşı eləmisən sonra öz səsinə qulaq asmaq niyə?
Əslinə qalsa bunun sadə və çoxları tərəfindən bilinən bir elmi açıqlaması var. Öz səsimiz səs tellərimizdə yaranmış dalğalardır və bu dalğalar kəllə qutusundan birbaşa daxili qulağa yönəlir. Yəni özümüz öz danışığımızı təkcə xarici qulağımızla eşitmirik. Bu da öz səsimizi başqalarının eşitdiyindən fərqli formada eşitməyimizə səbəb olur. Yəni başqa insanların qulağına çatan səsimizlə özümüzün eşitdiyimiz səsimiz fərqli olur. Təbii ki, bunu diktofon, mikrofon kimi səs cihazları ilə eyniləşdirmək olmaz. Bu cihazlar səsi insan qulağının qəbul etdiyi kimi qəbul etmirlər. Ona görə də çıxan səs bizə çox fərqliymiş kimi gəlir. Məsələn, köhnə model telefonlarda sanki səslər eyniymiş kimi gəlirdi. Sadəcə qadın mı, yoxsa kişi mi olduğunu ayırd edə bilirdik hətta. Amma texnologiya inkişaf etdikcə səs keyfiyyəti də artdı. Amma tamamilə insan qulağı kimi işləyən bir texnologiyanın olması hələlik mümkünmüş kimi görünmür.

prens

Türkiyə istehsalı, tarixi-komediya janrında olan internet serialı. BluTv-də yayımlanır. Giray altınok serialın həm ssenaristi, həm də başroludur. Türkiyə standartlarının üstündə olduğunu demək olar. Çəkilişləri dünyada çox nadir istifadə olunan virtual studiyada həyata keçirilmişdir. Döyüş səhnələri, görüntülər əladır. Aktyor/aktrisa seçimləri çox yaxşıdır (ebru şahin deyilən silikon bidonu istisna). Çağdaş onur öztürk, ceyda düvenci, serdar orçin və xüsusilə aslı tandoğan personajlara çox uyğun seçimlər olub.
Hadisələr "bongomia" adlı kiçik, zəif bir ölkədə cərəyan edir. Prens romada aktyorluq təhsili almış, ailədən həmişə çıxdaş olunan, adı belə qoyulmamış şahzadədir. Ailədə daim xəyanət, sarkazm, intriqalar baş verir (aşk-ı memnunu xatırladırdı bəzən). Prens siyasətdən anlamayan, çərənçi, feminen bir adamdır. Ailəsi tərəfindən sevilmədiyi üçün daim ayağının altı qazılır. Bəzən təsadüflə, bəzən də hiyləgərliyi ilə işin içindən çıxaraq həyatına davam edir. Prens axmaq kimi görünsə də əslində ağlını sadəcə özünü xilas etmək üçün istifadə edir.
Serialın hələlik 2 sezonu yayımlanıb. Bəzi yerlərdə satirik şəkildə sosial mesajlar verməyə çalışıblar amma çox tutuzdura bildiklərini düşünmürəm. Absurd komediya olduğu üçün serialda məntiq axtarmaq onsuz da lazım deyil. Təkcə prensin mallıqları və hiylələri üçün yox hərəkətli səhnələri və axıcı məzmunu üçün də baxmağa dəyər. Çünki serial tamaşaçını axmaq yerinə qoyub hər şeyi təsadüflərə bağlamır. Öz dünyasında bir məntiqi var hadisələrin. izlənəsi serialdır. Ümid edək ki, 3-cü sezonda xarablamasın.

kayahan

Öldükdən sonra qədri bilinmiş bəstəkar-müğənni. Bəstəkarlığı ilə daha çox ön planda olmuşdur illərlə. 80-ci illərdə əsasən bəstəkar olaraq tanınır lakin 90-cı illərdə artıq müğənni kimliyi ilə ekranlarda görünməyə başlayır. Bəstələyib söz yazdığı bir çox mahnı klassikləşmiş və bəzilərinin şöhrəti avropaya qədər yayılmışdır. Əsasən nilüfer ilə olan əməkdaşlığı ilə tanınır. Lakin sonradan bu ayrılmaz ikilinin arası dəyir. Mediada nilüfer-kayahan qalmaqalının səbəbi olaraq nilüferin kayahandan aldığı mahnıların ödənişlərini tamamlamadığı, həmçinin kayahanın nilüferin kölgəsində qalması səbəbilə kayahanın bunu kompleks etməsi kimi səbəblər göstərilirdi. Çünki nilüfere verdiyi mahnılar kayahan ifasında bəyənilməmişdir. Hətta araları dəydikdən sonra kayahan nilüfere mahnılarını ifa etməyə qadağa qoymuşdu. Həm bu səbəblə, həm də mediaya etdiyi bəzi açıqlamalara görə həmçinin şəxsi həyatında etdiklərinə görə 90-cı illərdən etibarən kayahan hater toplamağa başlamışdır. Media tərəfindən şişirdilmiş sezen aksu-nazan öncel rəqabətində heç dəxlisi belə olmadan tərəf tutaraq digər tərəfi təhqir edəcək qədər gözü dönmüşdü bir müddət. Amma xəstələndikdən sonra bütün bunlar unudulmuşdur. Bəlkə də mediaya elə göstərilmişdi. Ölməzdən əvvəl nilüfer ilə barışmışdır. indi də türkiyədə pop musiqisinin babalarından sayılır və mahnıları dillər əzbəridir.

Komfort zona

Şəxsi inkişafçıların dediyinin əksinə həmişə zərərli olmayan zonadır. "Komfort zonandan çıx həyatın dəyişsin, her şey yaxşıya doğru getsin" hər zaman özünü doğruldan bir fikir deyil. Amma komfort zonadan asılı olmaq özünü qəfəsə kilidləyib açarını əlində saxlamağa bənzəyir. Deyək ki, iş mühitinizdən razı deyilsiniz. iş yoldaşlarınızla aranız yaxşı deyil, maaşınızdan razı deyilsiniz və ya bəlkə də yüksəlmək istəyirsiniz amma işinizə qiymət qoyulmur və s. Bunların fərqindəsiniz, araşdırıb nəticəyə gəlmisiniz ki sizin üçün daha yaxşı iş yerləri var. Əgər siz hazırki iş yerinizi tərk edə bilmirsinizsə deməli bu mühit artıq sizin üçün "toksik" bir komfort zonasıdır. insan beyni yeniliyi sevməz. Rituallara, vərdişlərə meyillidir. Çünki yenilik bilinməzlik deməkdir beyin üçün. Bilinməzlik isə təhlükədir. Bununla yanaşı beyin tənbəldir, "azacıq aşım, ağrımaz başım" deyərək insanı risk almaqdan çəkindirər, neqativə fokuslanar. Əgər "komfort zonandan çıx həyatın dəyişsin" deyilirsə buna bənzər halları əhatə etməlidir. Həqiqətən bu zonadan çıxsanız, hətta risk alsanız həyatınızda pozitiv bir dəyişiklik baş verə bilər. Yoxsa ümumiyyətlə komfort zonası olmayan bir insan olmaq mümkün deyil. Komfort zonası bir ehtiyacdır. Həmin zona hər kəsin özünə aiddir. Stressin, təşvişin minimuma endiyi zonadır. 7/24 işləməli, özümüzü inkişaf etdirməli, hər saniyəni faydalı keçirməli deyilik. əgər insan öz komfort zonasında xoşbəxtdirsə niyə də oradan çıxsın? Əgər olduğu vəziyyətdən şikayət edirsə bu başqa məsələ. Onda demək olar ki "Komfort zonandan çıx". Əks halda durduq yerə həyatınızın içinə gül qoymağa ehtiyac yoxdur.

kürd dili

Qərbi iran dillərindən biri. Fars dili kimi iran dillərinin qərb qrupunda təsnif olunur. Fars dili qərbi iran dillərinin cənub-qərb, kürd dili isə şimal-qərb qrupuna daxildir. Lakin, fars dili ilə qarşılıqlı başa düşülməsi çətindir. Kurmanci, sorani, pehlevani, qorani kimi bir neçə dialektə bölünür. Dialektlər arasında böyük fərqlər var. Hətta bu fərqliliklərə görə bəzi dilçilər "kürd dil ailəsi" adı altında dialektlərin ayrı amma əlaqəli dillər olduğunu iddia edir. Bu məsələdə haqlılıq payları var çünki dialektlər arasında da qarşılıqlı anlaşılmada çətinliklər olur. Məsələn, soranicə danışanlarla kurmanci danışanlar bir-birini çətinliklə anlayır. Ən çox danışılan dialekt kurmanci dialektidir. Azərbaycan kürdləri də bu dialektdə danışırlar. Kurmanci dialektində bildiyim bir neçə ifadə var:
Silav - Salam
Tu çawayi? - Necəsən?
Ew çiye? - O nədir?
Ev çiye? - Bu nədir?
Saet Çande? - Saat neçədir?
Rune - Otur
Rabe - Qalx
Ez başim - yaxşıyam
Spas - sağ ol/təşəkkürlər
Gelek spas - çox sağ ol
Uğur be - xudahafiz/sağ ol
Nave te çiye? - Adın nədir?
Nave mın ...e - mənim adım...dır
Nizanım - Bilmirəm
Dızanım - Bilirəm və s.
Fars dilindən fərqli olaraq sözlər cinsiyyətə görə ayrılır.
(Entrini yazarkən kürd dili bildiyimin fərqinə vardım. CV-yə əlavə etməyi düşünürəm artıq) (diş ağardan smaylik)

müəllimlərin unudulmayan sözləri

Rolunu çox yaxşı ifa edən aktyor/aktrisaların böyük ehtimalla psixi pozuntulardan əziyyət çəkdiyini demişdi bir müəllimim. Əvvəl çox iddialıymış kimi gördüyüm bu sözün əslində inandırıcı bir açıqlaması varmış. Həmin müəllim belə açıqlamışdı bu fikrini:
insanların mühitdən asılı olaraq müxtəlif rolları var (məsələn, bir insan öz ailəsində övlad, işlədiyi məktəbdə müəllim, baba-nənəsinin yanında nəvədir və s.). Hansı ki bunlara "persona" deyilir. Bunlar bizim sosial maskalarımızdır. Hər bir insanın (psixopatalogiyası olmayan) personaları var. Ancaq nə qədər maskalansaq da şəxsiyyətimizin "nüvəsini" təşkil edən xüsusiyyətləri maska altında gizlədə bilmirik. Məhz buna görə eyni mühitdə, eyni personalı amma bir-birindən fərqli insanlar oluruq, maska bizi tam dəyişə bilmir. Amma çox üstün qabiliyyətli artistlər öz şəxsiyyətlərindən tamamilə sıyrılaraq başqa kimliyə bürünürlər. Şəxsiyyəti ani olaraq yox etmək ortalama bir beynin edə biləcəyi bir şey deyil." Müəllimin sözünə qüvvət, fitri istedadlı hesab etdiyim bir aktyora nəzər salaq:
Joaquin Phoenixin başrolda olduğu "Joker" filmi üçün aktyor bilərəkdən 23 kilo çəki itirib. Bunu sırf rejissorun istəyi ilə etməyib. Canlandırdığı obraz Arthur Fleck çıxdaş olunmuş, yazıq, tənha, xəstə bir obraz idi. Aktyorun hədəfi də əvvəlcə bu personajın kimliyinə bürünmək idi. ikinci mərhələdə isə Arthurun ikinci kimliyinin cildinə girməli olur. Arthur və joker eyni bədəndə 2 zidd şəxsiyyətdir. Arthur sakit, passiv və yazıq biridir. Buna qarşılıq olaraq joker isə sosyopatdır. Heç bir addımını düşünməz, cinayətdən qəti peşman olmaz. impulsivdir, qayda-qanun tanımaz və cəmiyyətə qarşı çox böyük nifrəti vardır. Uzun sözün qısası Joaquin Phoenix öz şəxsiyyətini öldürüb basdırmadan bu cür çətin bir rolu (rolları) bu qədər mükəmməl ifa edə bilməzdi. Əgər joker içində arthur, arthur içində Joaquin görmürüksə deməli bu insan müvəqqəti də olsa kimlik dəyişib. Kənardan asan görünə bilər. Amma bu tip insanların sadəcə işlərinin nəticələrinə ekrandan baxa bilirik. Əksəriyyətimiz "bundan sonra elə olacağam/belə olacağam" deyib heç bir dəyişiklik edə bilmirik məsələn. Heç birimizin heç vaxt şəxsiyyətdən vaz keçmə kimi niyyəti olmur. Amma bu insanlar işləri üçün şəxsiyyətlərini dondura bilirlər. Bəlkə bu mövzu nə vaxtsa ətraflı araşdırılacaq və doğru olub olmadığından əmin olacağıq. Nəticədə bu tip fitri-istedadlara çox nadir hallarda rast gəlinir.

mabel matiz

Məşhurlaşmaq üçün çox ağıllıca addımlar atmış türkiyəli musiqiçi. ilk albomu tamamilə öz mahnılarından ibarət idi və o çox rəğbət görmədi. Amma aysel gürel xatirəsinə hazırlanmış albomda 80-ci illərin xit mahnısı "sultan süleyman"-ı ifa etdi və çox bəyənildi. Sonrakı albomunda necə etdi bilinməz mete özgencil və yıldız tilbeden dəstək aldı və yavaş-yavaş ekranlarda daha çox görünməyə başladı. Əsas partlayışını isə "gök nerede" albomu ilə etdi. Bu dövrdə də nazan öncel onu dəstəklədi. Mabeli öz səhnələrinə çıxarmağa başladı və öz klassiklərindən biri olan "bir hadise var" mahnısını ona verdi. Hansı ki "gök nerede" albomunun "gel" ilə birlikdə əsas partlama səbəbi olan iki-üç mahnıdan biri idi. Öz yerini bərkitdikdən sonra isə yenə müstəqil çalışmağa başladı. "Maya" və "fatih" albomlarında demək olar ki, çox mahnısının müəllifi özüdür. Bəstəkarlığı və söz yazarlığı çox yaxşıdır. "Gel", "müphem" və "karakol" mahnıları ən sevdiklərimdir.

avara

Türk dillərinə fars dilindən keçmiş söz. Müasir Fars dilində "avareh" olaraq deyilən bu söz qədim iran dillərində də işlənirdi. Pəhləvicə "apar" şəklində olan bu söz şəklini dəyişərək bir çox dilə "awar" və ya "avar" kimi keçmişdir. Qədim iran dillərində "zorla almaq, qapmaq, əlindən almaq" demək idi. Maraqlı bir məsələ də odur ki, bu söz türkcədəki "apar" felinin mənasına bənzər mənaya gəlir. Bəlkə də "avar" deyilən qədim köçəri xalqın adı da bununla bağlı idi. "Avara" sözü farscadan keçmiş olsa da bir ehtimal fars dilinə də sanskritcədən keçmiş ola bilər. Hind dilində də bu söz var çünki.
(baxma: Avaara hoon)

yıldız tilbe

Sezen aksu kimi bir mafiya anası ilə çox biabırçı şəkildə tərs düşməsinə baxmayaraq albomları rekord satış rəqəmlərinə çatmış bəstəkar-müğənni. "Yürü anca gidersin" albomu 2003-cü ildə çıxmış və 2,5 milyon kaset satmışdır. Əsasən öz mahnılarını özü bəstələyir və söz yazır. ibrahim tatlıses ilə də dava edənə qədər iboya bir çox hit mahnı vermişdir. Şəxsi həyatını gizləməz. Gizləməyə də çalışmaz çünki başqalarının nə düşündüyü vecinə deyil. Bəlkə də istedadı ilə birlikdə bu qədər sevilməsinin səbəbi də göründüyü kimi olmasıdır. Sevənləri də onu "delidir ne yapsa yeridir" deyə düşünərək sevir böyük ehtimal.

talışlar və farslar arasında əlaqə

Türk xalqları arasındaki əlaqə qədər olmayan əlaqədir. Sırf rəqəmlər kimi təməl anlayışlar oxşayır deyə talışlara və farslara eyni millət demək düzgün deyil. Buna çox oxşar hind dili də var amma heç vaxt farslar və ya talışlar hindlilərə qardaş demirlər. Bir azərbaycanlı bir türkməni anlamaqda çox çətinlik çəkməz. Adicə belə yoxlamaq olar: Hər hansısa bir qablaşdırılmış məhsulun üzərində qazax, qırğız, türkmən dillərində yazılmış şeyləri oxuduqda anlamaq olur. Hətta altay türklərini belə qismən anlamaq olar. Talış dili bilən biri giləkcə və mazandarancanı çox asanlıqla anlayar. Çünki eyni qrupdadır bu dillər (kaspi qrupu). Amma bu xalqlar fars dilini (əgər farsca bilmirlərsə təbii ki) anlamazlar. Talış dili bilən biri ilə apardığımız müqayisədə qarşılıqlı başa düşülməsi 10-15% ancaq olmuşdu. Əslində eyniköklü sözlər heç də az deyil. Amma o qədər fərqlənir ki, dəqiqələrlə düşündükdə bu sözlərin eyni mənşəli olduğunu dərk etmək olur. Talış dili bilməsəm də o söhbətdən yadımda qalanlar:
Havz (talışca) - Səbz (farsca) - yaşıl
Pə (talışca) - pedər/baba (farsca) - ata
Do (talışca) - derəxt (farsca) - ağac
Dıl (talışca) - del (farsca) - ürək
Sə (talışca) - sər (farsca) - baş
Bu iki dilin təməl anlayışlarında müəyyən qədər oxşarlıq var. Amma danışıq məsələsinə gəldikdə, cümlə və ifadələri anlamağa gəldikdə bu qohumluq o qədər də görünmür. Talış dilinin lüğət tərkibi, qrammatikası fars dilindən çox daha mürəkkəbdir. Fars dili ərəb və türk dillərinin güclü təsiri altında qalmışdır. Lüğət tərkibi və qrammatikası ilə hind-avropa dilləri arasında çox fərqli bir mövqedə durur. Talış dili isə hind-avropa xüsusiyyətlərini daha yaxşı qorumuşdur və türkcədən daha fərqli formada təsirlənmişdir. Əgər çox məcbur eləsək ki talışları və farsları bir-birinə calayaq onda ancaq bunu deyə bilərik ki, bu millətlər çuvaşlar və azərbaycanlılar qədər oxşardır. Bir azərbaycanlı da bir çuvaşı vur-tut 10-15% faiz anlayar.