+18 əjdaha
1. Judith Leyster, "Man Offering Money to a Young Woman" 1631
Bu rəsm XVII əsrin azsaylı qadın rəssamlarından biri olan Judith Leysterə məxsusdur.
Rəsmdə stulda oturan və lampanın işığında tikiş tikən gənc qadın təsvir edilmişdir. Qadının ayaqları yanan kömürlə dolu ayaq isidicisinin üzərində dayanır. Əlində bir ovuc metal pul olan bir adam onun üzərinə doğru əyilərək sol əli ilə çiynindən çəkişdirir. Qadın diqqətini tikişinə cəmləyib kişiyə tərəf dönmək üzrədir, lakin ona tamamilə məhəl qoymur. Diqqət yetirdiyi tikiş işi onun fəzilətini vurğulayır. XVI və XVII əsr yazılarında tikiş zəhmətkeşliyi (baxma: Diligentia) simvolizə edirdi.
Xəz papağı alnına qədər aşağı çəkilmiş kişi qızarmış yanaqları, qıyıq gözləri və sadə şərfi ilə iffətli və məsum görünən qızdan xeyli yaşlıdır. Etibarsız alman personajları ilə əlaqəli olan kişinin başındakı “moffe-muts”-hərfi mənada “Hun papağı” onu pis tip kimi qeyd edir. Arxasındakı divara vurduğu bədheybət kölgə onun qorxulu görünüşünü daha da artırır. O, əlindəki bir ovuc metal pul ilə gənc qadının diqqətini çəkməyə çalışaraq onun sevgisini almaq istəyir. Lakin gənc qadın kişinin təklifinə cavab vermir və narahat olmadan işinə davam edir. Leyster XVII əsr rəssamlığında qeyri-adi olmayan bu mövzuya öz şərhini bu cür əlavə edib. O, qadına israrla yanındakı kişiyə məhəl qoymamasına icazə verib.
Rəsmin rentgen görüntüsündən görünür ki, kişinin əli əvvəlcə qadının sol çiynində, az qala boynunda olub; masanın durduğu yer də bir qədər dəyişdirilib. Qadının geyimi və örtüyü də ciddi dəyişikliklərə məruz qalıb. Bu, çox sərbəst, lakin eyni zamanda dərinliyində məna kəsb edən rəsm üslubunu göstərir ki, burada rəsm yalnız yaradılma prosesində son formasını alır.
