1. bu sifarişi verən: zazoza
Problemli və hər hansı praktik həllə gətirib çıxarmayan deyim. vergi ictimai infrastrukturun və dövlətin sosial servislərinin, ümumiyyətlə dövlətin bütün funksiyalarının maliyyələşdirilməsində əhəmiyyətli və əsasən aparıcı rol oynayır. Üstündə getdiyin yollar vergi əsasında salınıb. Dövlətin sənin hüquqlarını təyin etmək (tutalım mülkiyyət hüququ) və qorumaq imkanı da (bu hüquqları nə qədər yaxşı qoruduğu ayrı mövzudur) elə vergi əsasında formalaşır. Istifadə etdiyimiz hər hansı servis üçün pul ödəyiriksə, bu dövlət tərəfindən təşkil ediləndə, niyə bunun üçün ödəlinən pul oğurluq olsun? Əlbətdə ki vergilərin miqdarı, necə yığılması və necə istifadə olunması ilə bağlı çoxlu problemlər və əsaslı tənqidlər ola bilər lakin bunlar ayrı mövzulardır, özü-özlüyündə vergi oğurluqdur demək deyil. Düzdür, dövlətin servislərini seçməkdə azad deyilsən (bir çox ictimai infrastrukturu istifadə etməkdən azad da ola bilmərsən. Non-excludablelardır.) vətəndaşsansa vergi verməkdə məcbursan. Lakin praktik olaraq başqa cür mümkün görünmür. Vergi ləğv olunsa (dövlətin başqa maliyyələşdirmə imkanlarının olmadığını/yetərsiz olduğunu fərz edək, ki az sayda ölkələr istisna olmaqla bu belədir), tutalım polisin funksiyasını yerinə yetirmək üçün özəl qurumlar ortaya çıxmalı olacaq. indi də onlara ödəniş etməli olacaqsan. (Həm də bunlar pul qarşılığında haqsızlıq etməyə ən azı korrupsioner bir dövlət məmuru qədər, yəqin ki ondan da çox meyilli olacaqlar) Bu sadəcə bir nümunədir. Yollar necə salınacaq? Müdafiə necə təşkil olunacaq? Hər şey üçün özəl şirkətlərə ödəniş etməli olub, vergi kimi ödədiyin məbləği verməkdən azad olmayacaqsan. Eyni zamanda da, müxtəlif praktiki problemlər yaranacaq. anarxo-kapitalistlərin təbliğ etdiyi bu formada qurulan cəmiyyət realistik deyil, ən azından dövlətdən daha çox problemlidir. Buna görə də vergi oğurluqdur demək düzgün çıxmır. Əlavə olaraq da deyilə bilər ki vergi ilə maliyyələşən ictimai infrastruktur sərvət qazanmaq üçün fərdə imkan yaradırsa, həmin fərd də öz növbəsində bu infrastrukturu və bunun üzərində qurulan iqtisadiyyatı vergi ödəyərək dəstəkləməlidir.