challenger deep

tr: challenger çukuru
az: challenger uçurumu
marian çökəkliyinin cənubunda yerləşən, dünyanın bilinən ən dərin nöqtəsidir. konkret dərinliyi bilinmir neçədir. internetdə müxtəlif rəqəmlər var, amma ümumi olaraq 10920m ilə 10980m arasındadır. istənilən halda, mənim illər əvvəl məktəbdə öyrəndiyim kimi, 11022m deyil, azdır.* bütün təhsil həyatım bir yalandan ibarət imiş

dünyada bu dərinliyə cəmisi 4 insan enmiş və hamısı da sağ-salamat geri qayıtmışdır:
1) 1960 - Jacques Piccard və Donald Walsh
2) 2012- james cameron
3) 2019 - Victor Vescovo

həmçinin, ora sağ-salamat enib-qayıtmış şeylər arasında rolex də var.

marian çökəkliyi

Sakit okeanın qərbində yerləşən dünyanın ən dərin çökəkliyidir. adı, əslində, dilimizə tam düzgün tərcümə olunmamışdır. bir az mübahisəlidir. ingiliscədə "mariana trench"-dir. trench sözü hardasa səngər, xəndək anlayışını verir.

bizə -ya da ən azından mənə- elə öyrədiblər ki, sanki marian, okeandakı hansısa iri dəlikdir, konkret bir nöqtədir. internetdə də adını yazan kimi bu tip şəkillər çıxır. halbuki bu belə deyil. coğrafi olaraq baxdığmızda da görürük ki, marian çökəkliyi aypara şəkillidir, uzunluğu 2500km-dən çox, eni də 70km-dir. Hətta dibi 15 km enində yastı bir sahədir. yəni konkret bir nöqtədən söhbət gedə bilməz. marian - ümumi bir bölgə, çox böyük bir ərazidir. misalçün, sahəsi azərbaycandan 2 dəfə böyükdür.

eyni zamanda, onu da deyim ki, "dünyanın ən dərin yeri?" sualına "marian çökəkliyi" demək, xırdalığa getsək, heç də dəqiq sayılacaq cavab deyil. "dünyanın ən hündür yeri" deyiləndə "himalay dağları" və ya "nepal" yox, "everest" dediyimiz kimi, bu sualın da cavabı, əslində, "challenger deep"dir. wikipediada "challenger uçurumu" kimi qeyd olunub və bəli, "həmin o nöqtə" deyəcəyimiz dərinliyin adı, əslində, bax budur.
həmçinin (baxma: challenger deep/-362382)

rolex

çayları, kofeləri süzün, yaxın oturun. adı çəkilən şirkət haqqında Azərbaycan dilindəki ən samballı məlumatı oxumaq üzrəsiniz.

rolex - Əsası ingiltərədə Hans Wilsdorf və alfred davis tərəfindən qoyulmuş isveçrə mərkəzli lüks saat markasıdır. ilk başda " wilsdorf&davis" adlansa da, 1919-dan etibarən Wilsdorfun təşəbbüsü ilə rolex olaraq dəyişdirilmişdir. Belə fərziyyə edirlər ki, "royal" və "luxury" sözlərindən ilhamlanaraq bu ad seçilib.
Şəkildə modellər: 1) explorer, 2) datejust və 3) Explorer 2

rolexin Bu günlərə gəlib çıxmağındakı ən önəmli faktorlar tarixdə bir çox ilklərə imza atmağı ilə bağlıdır* şaşırdık mı? Hayır . Bu adam(Hans wilsdorf) dünyada qol saatı anlayışını "dirildən" insan olub. Bilinənin əksinə, özü saatsaz olmayıb. 19 yaşında saat şirkətindən gələn iş təklifini qəbul etdikdən sonra bu sektoru tanıyıb.

O dövrdə(1900-1910-lar) əksəriyyət cib saatı istifadə edirdi. Qol saatları da vardı təbii ki, amma əsasən qadın aksesuarı kimi sayılırdı. Geniş şəkildə istifadə edilməməsinin ən önəmli səbəbi zamanı tam dəqiq göstərə bilməməsi idi. illərlə saatlar haqqında məlumat toplayan hans wilsdorf isə 1905-ci ildə o dövr üçün vacib göstərici olan bir sertifikasiyaya sahib ilk qol saatını istehsal etməyi sonunda bacarmışdı.
Hansı ki bu sertifikatlaşma saatın xronometrik olaraq dəqiq işlədiyinin birbaşa sübutu idi, yəni artıq qol saatları da zamanı cib saatları qədər göstərə biləcəkdi.
Həmin ilk saat.

rolexin Saat dünyasındakı yenilikləri tək bunla bitmir. Adamlar:
1) 1926-cı ildə dünyanın ilk su və toz keçirtməz saatını, yəni bu gün belə istehsal olunan məşhur rolex oyster modelini tanıtdılar

və təbii ki, güclü reklam etdilər bu saatı. reklam da nə reklam e özü də. 1927-də La-manş kanalını keçən ilk qadın üzgüçünün,

1933-cü ildə everest zirvəsinin üstündən keçirilən ilk uçuş zamanı pilotların,

1935-də dünya sürət rekordu qırarkən malcolm campbellin qolunda Rolex oyster vardı.

Bununla da şöhrətlərinə şöhrət qatırdı rolex və "odda yanmaz, suda batmaz" bir lüks saat izlənimi yaradırdılar.
2) 1931-ci ildə rolex oyster perpetual adını verdikləri dünyanın ilk "özü özünü quran mexaniki", yəni hamımızın bildiyi adıyla avtomatik qol saatını ixtira etdilər. Hansı ki Bu saat avtomatik qol saatlarının ulu babası sayılır.
(diqqət edin, "self-winding* öz-özünü qurma anlamına gəlir. Bu anlayış barədə" qol saatı" başlığında geniş izah vermişəm " sözünə xüsusi vurğu var)

3) şirkətin 40 illik yubileyi münasibətilə 1945-ci ildə içində təqvim göstəricisi yer alan, ayın tarixini göstərə bilən dünyanın ilk avtomatik qol saatını, bu gün dünyanın ən məşhur saatlarından olan rolex datejust modelini satışa çıxardılar;

4) 1953-də 100 metr sukeçirməzliyə sahib ilk dalğıc saatını(diver watch) - əfsanəvi rolex submarineri tanıtdılar;

5) 1956-cı ildə isə həftənin gününü göstərən dünyanın ilk avtomatik qol saatını (baxma: rolex day-date) ixtira elədilər.

gördükləri işi necə bir peşəkarlıqla etdikləri barədə nəsə deməyə ehtiyac belə yoxdur. dənizçilər üçün yatch Master 2, Dalğıclar üçün submariner, pilotlar üçün air king, sevgilisi başqa ölkədə olanlar(:d) üçün gmt master 2 və s. bu kimi spesifik saatları olduqları kateqoriyanın ən mükəmməl saatı olacaq şəkildə istehsal edirlər. istehsal ildə bəlirli bir sayda olur və bilinənin əksinə, sırf əl əməyindən istifadə olunmur. Rolex bildirir ki, əgər bir işi ən yaxşı şəkildə hansısa cihaz edə bilərsə, onu texnologiyaya; insan edə bilərsə, əl əməyinə həvalə edir. şirkət haqqında bir sıra maraqlı məqamlar da var. misalçün:
1) şirkət internet üzərindən satış etmir. bir rolex saatı əldə etmək üçün mütləq mağazanın özünə yaxınlaşmaq lazımdır. adamlar belə hesab edir ki, müştəri saatı almadan öncə ona toxunub hiss etməlidir. Üstəlik, həmin dəqiqə də saatı satmırlar. Adınız qeyd olunur və növbəyə yazılırsınız. Bəzən aylar çəkən növbə sizə çatanda gəlib yeni saatınızı əldə edirsiniz.
Şəkildəki modellər: 1) gmt master 2, 2) sea dweller, 3) datejust

2) bakıdakı rəsmi mağazadan rus vətəndaşı olan biri rolex ala bilməz, satmırlar. səbəbi rusiya-ukrayna münaqişəsi ola bilər, amma əsas səbəb çox güman ki, bakıdakı qiymətlərin rusiyadakından daha ucuz olmasıdır, bir neçə min dollar fərq var. bu məlumatı isə hardan bildiyimi soruşmayın, amma 100% dəqiqdir, təcrübədən keçirilib.
Şəkil: rolex gmt master 2 "pepsi". "pepsi" deyilməsinin səbəbi saatın bezelinin pepsi rənglərində olmasıdır. özəlliyi "dual time", yəni ikinci bir saat qurşağındakı zamanı göstərə bilməsidir. Diqqət edin, saatın 4 əqrəbi var.

3) rolex şirkətinin səhmləri yoxdur. dünyada səhmi olmayan yeganə şirkətdirlər* əmin deyiləm, bütün dünyadamı, yoxsa sırf saat dünyasında , səhmdarı olmaq qeyri-mümkündür. çünki şirkət, qurucusunun adını daşıyan hans wilsdorf vəqfinə aiddir. buradan da aydın görünür ki, rolex saatına verdiyiniz pulun bir qismi xeyriyyə işlərinə gedir. ancaq təbii ki, bütün gəlirləri bu vəqfə getmir.
Şəkil: rolexin Pilot saatı olan rolex air king - yüksək təzyiq, cazibə, maqnit sahəsi və zərbələrə dözümlü, ultrahəssas mexanizmə sahibdir.

4) rolex, saatlarını patenti özlərinə məxsus olan və " oystersteel" adlandırdıqları poladdan istehsal edir. bu, hər yerdə gördüyümüz 316l polad deyil, 904l kateqoriyasına aid bir poladdır. emalı üçün xüsusi texnologiya lazımdır, əziyyətli və çox xərcli işdir. Məlumat üçün: 904l poladdan aerokosmik, kimya sənaye və s. bu kimi yüksək texnoloji sahələrdə istifadə olunur və korroziyaya dözümü çox yüksəkdir.
Şəkil: Rolex submariner "hulk" - dalğıc saatıdır. 300m sukeçirməzliyə, ultrabənövşəyi şüalar, duzlu və xlorlu suya davamlı rənglərə və ən əsası, suyun zülmət dərinliklərində 8 saatadək mayak kimi parlayacaq fosfora sahibdir.

5) poladdan əlavə rolex, patentini aldıqları və özlərinin istehsal etdikləri, everose adında çəhrayı çalara malik 18 karat qızıla sahibdir. gördüyümüz o "rose gold" saatlar bu materialdır və əslində "everose" adlanır.
Şəkil: rolex day-date everose diamond dial.

6) 2012-ci ildə rejissor james cameron marian çökəkliyinin dibinə, 10900 metrə enərkən ekskluziv olaraq bu missiya üçün titanium materialından istehsal olunmuş Rolex Sea-Dweller DeepSea Challenge saatı da onunla birgə idi (təbii ki, kabinin içində yox, çölündə) və o dərinlikdə işləməyə davam edirdi.

analoji olaraq, 1960-cı ildəki ilk dalış zamanı da bir rolex aparılmışdı və həmin saat da o təzyiq altında işləməyi bacarmışdı.
Rolex deep sea special 1960

Və Ata-bala eyni kadrda. -*

7) rəsmi satışa çıxarılmış ən ucuz rolex saat oyster perpetual modelidir və başlanğıc qiyməti 7.000 dollar civarıdır.

lakin yüksək tələb olduğundan şəkildə sağda gördüyümüz "tiffani blue" siferblat versiyanı hazırda 40.000 dollardan aşağı tapmaq mümkünsüzdür. Məhz o modelin qiymətinin bu qədər artmasının ayrı hekayəsi var, başqa entriyə qalsın.
Edit: artıq "niyə?"si yazılıb. (baxma: tiffany mavisi/-372552)

son olaraq, çox təəssüf ki, rolexin timsalında lüks saatlar haqqında "50 manatlıq saat da, 50min manatlıq saat da eyni zamanı göstərir" kimi ucuz düşüncələr var. lakin məsələyə bu aspektdən baxmaq heç də düzgün deyil. razıyam, hər nə qədər inanılmaz işçilik, əl əməyi və titizliklə istehsal etsələr də, qiymətlər çox bahadır. amma nəzərə almaq lazımdır ki, rolex zamanı göstəricisindən daha çox status göstəricisidir. eyni zamanda -iqtisadiyyatdan anlayışı olanların da biləcəyi kimi- bu saatlar və bu tip əşyalar(sənət əsərləri və s.) zəngin insanların öz sərvətlərini saxlama metodlarından biridir. 1 milyon pulu həm kağız, həm də 5-6 (və ya 1) saat formasında düşünün, onda anlayacaqsınız. sabah başınıza bir iş gəlsə, bütün bank hesablarınız bloklanacağı halda qolunuzdakı zadı bir anda 10, 100 minlərə çevirə bilərsiniz. eyni zamanda, illər keçdikcə dəyərlənən əşyadır, qiymətləri əksər hallarda düşmür.
Məsələn, aşağıdakı 1969 paul newman's daytona saatı əvvəlcə 3,7 daha sonra da 4,3 milyon dollara satılıb. Hazırki qiyməti 10 milyondan yuxarıdır.

qeyd: yazar bu entrini qolunda 25 dollarlıq casio vintage saatla yazmışdır.

bürclər

bu vaxtacan bürclərlə "haşır-neşir" olan 3 qız tanımışam və bu 3 qızın 2-si məni bir az tanıyandan sonra dəqiqliklə bürcümü tutuzdurmuşdu. 3-cüsü isə 2-ci variantda tutuzdurmuşdu.
Okey, çoxumuz bilirik, oxumuşuq ki, bürclərin gopologiya və ümumiləşdirici ifadələr olduğu dəfələrlə təcrübə edilib. amma bu hadisələr həmin vaxtı çox qəribə gəlmişdi. üstəlik, özlərindən çox əmin formada və çox rahat, çox professional şəkildə bir əminliklə danışırdılar, ürkmüşdüm.

Bürclərin ən əyləncəli tərəfi bunu xoşlayan birinə öz bürcünüzü səhv deməkdir. O dəqiqə qarşıdakı başlayacaq ki "ay daa, filan-filan şeylər tam sənsən ee". Siz də oturun qıraqdan tamaşa izləyin. işin qəribə yanı sonra başlayır. Axırda qayıdıb deyəndə ki, bəs bürcüm o deyil, başqasıdı, məqsədim bunların sadəcə boş bir şey olduğunu göstərmək idi. Qarşıdakı adam yenə də qəbul eləmir. Beyinləri avtomatik halda sizi yeni bürcünüzlə bağdaşlaşdırıb yenidən eyni cürə işləməyə davam edir. qəribə gəlməsin heç kimə, şəxsən təcrübə etmişəm. indi oturub yada salanda insanın belə axmaq ola biləcəyi qarşıısnda söz tapmıram...

Proqnozlara gəldikdə isə, bürclərdən olsa, mən çoxdan həyatımın qadınını tapıb evlənmiş, iş karyeramda pikə çatıb xoşbəxtliyin qapılarını taybatay açmış olmalıydım, ammaaaa???

yağış

Ən zəhləm gedən təbiət hadisəsi.
Camaat bunda nə romantika görür, anlaya bilmirəm a kişi.

Hər dəfəsində dəhşətli bir diskomfort hissi gəlir mənə. Yağış hər yağanda özümü həddən artıq cılız, hər islandıqca alçalmış kimi hiss edirəm. Yolda tələsən, qaçan adamları, xüsusilə də, şalvarlarını, ətəklərini çirmələyib dabanları ilə sudan keçməyə çalışan yaşlıları, aşağı təbəqədən birilərini, palçıqlı ərazidə canıyla əlləşən adamları görəndə içimdəki bu aşağlanma duyğusu daha da artır. Hələ rayon yerində lap belə şey hiss edirəm...sözlərlə ifadə edə bilmirəm o hissi. Ölkənin ən inkişaf etmiş yeri bakıdı, amma nə kanalizasiya sistemi, nə yolları - heç bir şeyi yağış üçün əlverişli deyil. Elə bilirəm yağış insanları rəzil-rüsvay etmək, onları "sındırmaq" üçün var və işini də layiqincə görür. Bura bakıdı e, avropanın ideal infrastrukturlu hansısa şəhəri deyil. Millət bunda nə romantika görür, anlaya bilmirəm, a kişi.

Hər dəfə yağış yağanda dədəmin o vaxtı universiteti bitirəndə pravanı hədiyyə etmək istəməsinə qarşı çıxmağımı sorğulayıram. Maşına, demək olar, yeganə və ən çox ehtiyac duyduğum vaxt yağış yağan günlərdir. Onun dərdindən Maksimum dərəcədə yağışlı günlərdə çölə-bayıra çıxmıram. çıxanda da Hər dəfə ağlımdan "pravanı götürsəydim, indi altımda maşın, rahat gedib işimi görmüş olacaqdım" fikri keçir, qulağımda da söhbəti öyrənəndə dostumun: "xasiyyətini sikim, ay zobrist, imkan ver də, görürsən kişi sənə yaramaq istəyir", - sözləri cingildəyir. Hər şeyimi: texnoloji şeyləri, sezonluq geyimləri maksimum dərəcədə sukeçirməz olmağına çalışıram ki, bu duyğu azalsın, amma hər dəfə olur. Tutqun hava, yağış konkret boğur məni. Camaat bunda nə romantika görür, anlaya bilmirəm a kişi.

O gün səhər saat 6-dı, 7-ə işləyir. Axır vaxtlar nə yesəm mədəm dəhşət qıcqırmağa başlayır deyə siqaret də ləzzət eləmirdi. mən də 2-3 gündü siqaret çəkmirdim, nəsə könlümə düşdü həmin an. Dedim tez düşüm yan blokun böyründəki "dayı marketi"ndən alım gəlim, 24 saat açıq olur. Olmadı məhlədəki rahat market də açıqdı onsuz da. Ayağımda sadə ayaqqabı, əynimdə adi uzunqol çıxdım evdən. Qapını bağlayanda blokun pəncərəsindən eşitdim ki, aha, deyən, yağış yağır. Əynimə nəsə geyinmək barədə düşünürdüm ki: "ala 2 addımlıq yoldu da, tez alıb qayıdacam", - deyib eləmədim. Andıra qalsın ə-hə. Blokdan çıxıb sürətli addımla yerimdən götürüldüm. Paaart. Girdim suya. 5-6 saniyə sonra aşağıdan hissiyyat gəldi ki, artıq ayağımda nəmlik var. Binanın tininə çatdım, gördüm dükan bağlıdı. "payçini", - deyib dönüb boylandım ki, məhlədəki rahat marketin də işıqları yanmır, o da bağlıdı. Tez Məhləni kruqladım, 5 marketin 5-i də bağlıdı a kişi. Özümə də indi yedirə bilmirəm qayıdıb adam kimi geyinib gəlməyi. Bir tərəfdən evdə kimsə oyanmasın istəyirəm, digər tərəfdən də: "onsuz da ayağım uje nəm olub", - deyirəm içimdən. "bura qədər gəlmişəm, orda bir dənə neptun vardı, ona baxım. Metro çıxışındakı köşk budu-buradı", - falan-filan, cart-curt deyə-deyə qaldım tam-tamına 5 köşk, əlavə 4 marketin bağlı olması reallığı ilə üzbəüz.

Axırıncı köşkün də bağlı olduğunu görüb qayıdırdım. Təmiz başımı itirmişdim, Yoldan keçəndə fikir vermədim, addımımı asfalta qoyan kimi topuğuma qədər suya girdim. Ay bləə, elə bil başımdan qaynar su tökdülər də, təmiz gijdıllağ oldum da həmin an, əsəbdən partlayırdım. Təsəvvür elə, addım atanda Ayağımı qaldırıram içindən su çıxır. Yolu keçdim, çıxdım səkiyə, başımı qaldıran kimi gördüm nəə? avtobus gözləyən bir qaqaş və yanımdan keçib metroya gedən bir xala mənə əcaib nəzərlərlə baxır. Baxış da nə baxış! Bir an diqqət elədim özümə, utandım yerə girdim konkret, deyirəm bircə yer yarılsın girim içinə. Baxıram indi adamlara, hamısı paltoda, payız kurtkasında, başlarında papaq, bir mənəm yesir kimi adi uzunqolda, "lütəccə" olan. Özü də əllərimi salmışam cibimə, külək də əsir, üşüməkdən özümdən də asılı olmadan çiyinlərimi çəkmişəm yuxarı, bildiyin tüfeyli dəli qoyun kimi panika içində ora-bura vurnuxuram. Artıq əsəb-zad qalmayıb, rəzillik duyğusu bürüyüb məni. Deyirəm indi bu dəqiqə qaqaşın biri yaxınlaşacaq ki, "brat bu havada çöllərdə qalmısan, gələ bu manatı, yeməyə nəsə alarsan". Mənə baxan birini görəndə: "göründüğü gibi değil abi açıklayabilirim" demək keçir içimdən. O qədər aşağılanmış hiss edirəm ki, utancımdan Ağız açıb siqaret də istəyə bilmirəm birindən, deyirəm indi deyəcək bu pasyak kimdi.

Gördüm artıq iş-işdən keçib e. Bizdən 300-400 metr aşağıda, dünya dağılsa da açıq olacaq köşk var, Götürüldüm ora. Adama rast gəlməyim deyə ara yollarla gedirəm. Yanından keçəndə sönmüş ümidlərlə baxdım, gördüm dostumun dostunun işlətdiyi şərab dükanı var, daş qoyanını sevdiyim, ora da bağlıdı. Nəsə, saat 7 olurdu artıq, getdim axırda o köşkdən aldım siqareti, tez yandırdım birini. Yolda gələndə yoxuş çıxmağın verdiyi təngnəfəslik, külək, yağış imkan vermədi ləzzətin çıxarım. Çatdım evə, ayaqqabını soyundum. Dolabdan götürdüm paltonu atdım çiynimə. Otağıma keçirəm. ayaqlarım da o qədər sudu ki, bildiyin "lırç-lırç" edir hər addımım. Oturub 5-6 dəqiqə ayağımı dirədim atapleniyaya, özümə gələn kimi siqaret yandırdım. içinə azzarım olsun, 3-4 tüstü sonra başladı yenə andıra qalmış mədəm qıcqırmağa...

Mən anlaya bilmirəm, indi bütün bunlardan sonra bir nəfər oturub adam kimi başa salsın görüm, camaat bu yağışda nə romantika görür a kişi?

sözlük yazarlarının hobbiləri

(baxma: umbay profilləri incələmək)
Sözlükdəki hobbimdir. oxumağa entri tapmayanda -bu çox vaxt gecələr olur- girib online olan umbay tapıb bir-bir entrilərini oxuyur, profili özümçün dəyərləndirirəm. Çoxu entri yazan olmur, hesab boş olur. Bir qism elələri olur ki, adamın nə iş gördüyü bəlli olmur. Vəziyyətə pozitiv yöndən yanaşmağa çalışıram deyə, entrilərə "umbay* bizim keysdə 'derek' " vermirəm ki, həvəsləri sönməsin; təkcə xoşuma gələnləri bəyənirəm* bu, əslində, ümumi sözlük prinsipimdir . Amma arada adamın qabağına elə umbaylar çıxır ki, təəccüblənirsən: "görəsən, bunu niyə yazar eləmirlər?" Çox xoşuma gəlsə, eləmirəm tənbəllik, bir dənə də tərif mesajı. Mənim modlara yazmağım yaxşı çıxmır deyə, məcbur yazıb özlərinə deyirəm ki, özləri modlardan xahiş eləyib təsdiq istəsinlər.

Bunlar qalsım qırağa e. Gör nə deyirəm. Deməli, O gün bir hesab çıxdı qabağıma. Girdim oxuyum. Gördüm umbay ola-ola hər entrisi 10-a yaxın bəyənmə, nə qədər favori alır. 3-4-nü ana səhifədən oxuyandan sonra təsadüfən necəsə oldu, entriləri chrome-da ayrı-ayrı pəncərələrdə açası oldum. 1-2-sinə baxandan sonra diqqətimi cəlb elədi ki, adamın hər entrisini favorilərən yazarlar eyni adamlardı. Özü də ki, hamısı umbay, nə hikmətdisə, hər entrisini favoriləyirlər. Bu dəm keçdim həmin o favoriləyən umbayların hesabını incələməyə. Nə görsəm yaxşıdı? Gördüm o həmin umbayın entrilərini favoriləyən bu 4-5 umbay ancaq və ancaq bu adamın entrilərini favoriləyir. Çox güman ki, bu hesabların hamısı o birinci adama məxsusdu, çünki başqa məntiqli bir fikir ağlıma gəlmir.

Dolayısılə, bütün yazarları "umbaylara dəstək" aksiyasına dəvət edərək bu hobbi ilə məşğul olmağa çağırıram. Düzü, sözlük bu dəqiqə ölüb, o yazarların özünə dəstək verən lazımdı. Amma nəysə, suyu bulandırıram artıq, çox dərinə getmədən entrini bitirim. -*

orient

Məşhur saat istehsalçısı yapon şirkəti. 1950-ci ildə qurulub, 2009-cu ildə digər bir yapon nəhəngi seiko korporasiyasının törəmə şirkəti olub, 2017-ci ildə isə tamamilə tərkibinə qatılmışdır. Ancaq yenə də öz marka adıyla saat istehsal etməyə davam edir. Hətta tabeçiliyində olsa da, zaman-zaman eyni seqment seiko modelinə elə alternativ çıxarır ki, onu kölgədə qoyur.

Retro saatlarla azca maraqlanmış olan birinin orientin məşhur "3star"(org: 3 звезды) modellərini bilməməsi mümkünsüzdür. Hətta bəlkə də bir çoxumuz ata/babalarının qolunda bu saatlardan görüb. Qısa Məlumat üçün: vaxtilə ssri-də də məşhur olmuş "3star" modelləri şirkətin giriş seqmenti, avtomatik qol saatı idi.

istehsalı 60-cı illərdə başlayıb və bu gün də davam edir. Hətta iş o yerə gəlib çatdı ki, insanların artıq antik sayılan o köhnə modellərə olan axınını görən orient son illərdə retro rəng siferblata sahib modellər istehsal etməyə başlayıb. Bütün orient-lərdə olduğu kimi saat 12 istiqamətində marka logosu və adı, saat 6 istiqamətində isə modelin simvolu olan 3 ədəd ulduz və altındakı "21 jewels" yazısı, saat 3 istiqamətində isə "day/date", yəni həftənin və ayın gününü göstərən çərçivənin olması "3star"-ın xarakteriktik özəllikləridir.

Tarix göstəricisi əksəriyyətində 2 dilli idi: ingilis və ərəb. Ancaq ölkələrə görə dəyişən türkcə, ruscə, ispanca olanlar da vardı. hətta ing/rus/ərəb - üçü birində olan nadir modellərə də rast gəlmək mümkündü. Girib tap.azda "orient" deyə axtarış edib bu antik saatlarla müəyyən dərəcədə tanış ola bilərsiniz.
Şəkil: orient "freza" modeli.

Mən özüm illərdir, ara-ara marağıma düşdükcə açıb axtarıram zövqümə uyğun, 70-80-lərin istehsalı olan birini. Bir dəfə çox yaxşı vəziyyətdə, ağ siferblatlı birini tapmışdım, ancaq heyif ki, dəqiq işləmədi. Mən də təmir elətdirib saatı, necə deyərlər, "usta görüb" vəziyyətinə salmaq istəmədim. Amma Bilsəydim, o vaxtı qaytarmaq yerinə təmir etdirərdim, çünki o gündən bu günə ortalama qiymətləri daha da bahalaşıb. -* hələ Bir dostumda orientin "freza" deyilən kvadrat modeli vardı, nə qədər dilə tutdum, qiymət dedim, satmadı ki, yadigarıdır. Əslində, orientlə ilk tanışlığım bu olub elə. Necə deyərlər, "ilk bakışta aşk". Şəkillər, həqiqətən də saatın original halını yansıda bilmir, çünki bəzən fərqli-fərqli rəngləri fərqli işıq altında "şit" görünə bilir. Amma Siferblatı hansı rəng olursa, olsun, istər yaşıl, istər qızılı, istər göy, istər qara - saatı qolda görən kimi o rəng tonundan, dizaynından bilinir ki, tarixin bir parçasıdır. Sanki canlıdır, bir xarakteri, personajı var.

Ümumiləşdirib yekunlaşdırmalı olsam: Sadə, "şık", vintage, içində gərəksiz göstəriciləri olmayan, əsl klassik saat görüntülü, ölümsüz* yəni mexaniki modelləriylə* bəli, saydıqlarımın hamısı bir saatdadır könlümü fəth etmiş saat firması.

29.12.2022 editi: uzuun axtarışlardan sonra yeni il münasibətilə özümə 30 illik olsa da, çox yaxşı vəziyyətdə qalmış nadir tapıntı bir model aldım. Xoşbəxtəm.

azərbaycanda karqo şirkətləri

"görəsən, ən sərfəlisi hansıdır?" deyə düşünürsənsə, tam doğru ünvandasan.
Dünən bir post çıxdı qarşıma. Ən uyğun karqo şirkətini seçməkdə çətinlik çəkənlər üçün əsl yaraya məlhəm postdur. Qoyuram bura, özünüz baxın, qarşılaşdırın.

yazarların hazırda düşündükləri

daimi olaraq müşahidə edirəm. 4-cü gündən 5-ə keçən gecə sözlükdə aktivlik çox aşağı olur. bu dəqiqə onlayn yazar yoxdur məndən başqa, bayaq derek buralarda idi, o da gedib artıq. qəribədir ki, eyni müşahidə oynadığım oyunlarda da keçərlidir, hazırda serverdə adam çox azdı. təxmin etmək çətin deyil ki, cümə və ən əsas da həftəsonu aktivlik birdən-birə dəhşət artır. sadəcə, anlamadığım şey odur ki, niyə məhz ən az aktivlik hər dəfə 4-cü günün gecəsi olur? Təxmin edəsi olsaydım, bazardan birə, ya da birdən ikiyə keçən gecəni deyərdim, amma belə deyil.

o biri tərəfdən də il yarım sonra başladım entri yazmağa. yazmaq deyəndə ki ara verdiyim dönəmdə yazıb "saxla" dediyimiz o "taslak" hissəyə atdığım entrilərdir. hələ bura təzə-təzə gələndə dediyim şey(#322374) yenə də oldu. düzdü, orada dediyimə elə o vaxtdan ara vermişəm, amma hər ehtimala qarşı eyni prinsiplə davam eləmək daha doğruymuş kimi gəlir.

jbl

Hansı yönü ələ alınırsa, alınsın, bir bose, sony və ya marshall deyil. Anlaya bilmirəm ki, Rəqib firmalarından hər zaman geri qala-qala necə bu qədər rəğbət görə bilir. Üstəlik, demək olar, eyni qiymət aralığında olurlar.

Qulaqlıq məsələsində əgər keyfiyyət görmək istəyirsinizsə, adını çəkdiyim markalara yönəlməkdə fayda var* hə, bir də sennheiser var təbii ki. amma çox az modelin görmüşəm bakıda, ona görə adını çəkmirə . Real olaraq da test etmişdim. Basslar daha sərt və tizlər isə boğuq gəlmişdi. Üstəlik material keyfiyyəti də digərləri qədər deyil. Məncə, ümumiyyətlə, marshall material və hissiyyat olaraq adı çəkilənlərin hamısından daha yaxşıdır.

Qeyd: söhbət qiymətlərin(ikinci əl bazarında belə) minimum 150-200 azn olduğu orta, üst və premium seqmentin "over-ear" və "on-ear" dediyimiz tip qulaqlıqlarından gedir. Yoxsa 10-15 manata Büdcə dostu Qulaq içi qulaqlıq alacaqsınızsa, jbl ən yaxşılardandır, özümdə də bu dəqiqə var evdə.

immanuel kant

cinsiyyətçi olduğu ilə tanınan filosof.

Bir müddət əvvəl haqqında məlumat axtaranda Bir sitatını görüb bir kənara qeyd etmişdim, dedim qoy bura yazım* bizim dildə mənası qalmır deyə türkcə yazmağı daha məqsədəuyğun saydım :

bir erkeğe aptal demek ona söylenebilecek en can sıkıcı şey iken, bir kadına çirkin demek onun canını sıkabilir.

anti-hero

Tr: anti-kahraman
Az: Anti-qəhrəman
Bu ifadəylə tanışlığım marvel sayəsində olub deyə, çalışacam elə marvel dünyasından, sadə izləyicinin belə bildiyi şeylər üzərindən nümunə göstərim. Çünki Anti-qəhrəman anlayışına fərqli-fərqli təriflər verirlər. Həmçinin bu termin altında hətta bir-biri ilə böyük ziddiyyət təşkil edən obrazların adı çəkilir deyə, bu anlayışın spesifik bir sahədə nə anlama gəldiyindən danışmaq daha düzgün olar. Çünki ümumi baxası olsaq, ghost rider və jack sparrow hər ikisi Anti-qəhrəmandır, amma bu iki Personajın bir-birləri ilə qətiyyən oxşarlıqları yoxdur.

Anti-hero, ya da öz dilimizdə desək, Anti-qəhrəman özündə yaxşı və pis cəhətlərin biləşdiyi, yəni həm qəhrəmanlara, həm də mənfi obrazlarla xas xüsusiyyətlərə sahib obrazlardır. Bunlar "villain", pis insan sayılmırlar, ona görə ki, məqsədləri məhv etmək, məsum insanlara zərər vermək, cəmiyyətdə xaos yaratmaq deyil. hətta özləri "şər qüvvə", mənfi obrazlarla mübarizə aparırlar. Eyni zamanda, superqəhrəman da sayılmırlar, çünki onların "ədalət tərəzisi", cəza anlayışları fərqlidir və yeri gələndə zərər verməkdən, öldürməkdən və s bu kimi qəhrəmanlığa zidd şeylərdən çəkinmirlər, hətta əksər vaxtı elə məhz bunu edirlər.

Ən bəsit misal üçün, Spider-Man olan peter parker əmisini öldürən cinayətkarı tutanda onu öldürmək əvəzinə, polisə təslim edib hüquqi cəza almasına şərait yaratmışdı. punisher kimi tanıdığımız frank castle isə ailəsini öldürənləri tək-tək tapıb, necə deyərlər, qanına qəltan edirdi. Göründüyü kimi, təməldə eyni şeyi istəyirlər: cinayətkarın cəzalanması. Amma qəhrəman qanunla iş görür, Anti-qəhrəman isə öz başına buyruq. Punisherin timsalında venom, deadpool, wolverine, ghost rider kimi digər məşhur Anti-qəhrəmanlar da eyni cür hərəkət edirlər. Uzun sözün qısası, filmdəki Anti-qəhrəmanı anlamaq üçün bu təməl şeyləri bilmək kifayətdir.

Həm də ki, Bu qədər izah etdik, ancaq di gəl ki Anti-qəhrəmanı qəhrəmanlardan ayıran əsas məsələni son olaraq tək bir dialoqla da bəsitləşdirə bilərik.
punisher: i think you and me are the same.
daredevil: That's bullshit, Frank, and you know it.
punisher: Only i do the one thing you can't. You hit'em and they get back up. i hit'em and they stay down!