mariya kürüsü

385 0 0 0

9. nəsil yazar

Entry: 385

★ wiki yazar

blok başlıqlarını gizlət

qlamur qızlar

tombili

dispozofobiya

bütün zamanlarda yazdığı ən əjdaha entrylər:

Notice: Undefined variable: userQuery in /var/www/soz6/sonhefte.php on line 84

Notice: Trying to access array offset on value of type null in /var/www/soz6/sonhefte.php on line 84

Notice: Undefined variable: anonim in /var/www/soz6/sonhefte.php on line 85

Notice: Undefined variable: idvv in /var/www/soz6/sonhefte.php on line 92

Notice: Undefined variable: idvv in /var/www/soz6/sonhefte.php on line 101

Notice: Trying to access array offset on value of type null in /var/www/soz6/sonhefte.php on line 102

anaya demək istədiklərimiz

+85 əjdaha

oğlan olmamışam deyə məni öldürmə cəhdinizi üzü-üzümə demisiz, canınız sağ olsun. günah mənimdi, qızam, üzrlü sayın. gətirib atmısız məni bu yekə heçliyin tam ortasına. nə ata qayğısı görmüşəm, nə bircə dəfə "qızım" sözünü eşitmişəm, nə bir dəfə "nəyin var?" sualın vermisiz, nə qayğım çəkilib, nə maddi, nə mənəvi təmin eləmisiz, heç nə, alabaşına külbaşına təhsildən başqa heç nə. eybi yox, keçirəm. bu gün mən varamsa o "mən"i yaratmağımda sizdən öyrəndiyim tək şey "valideyn necə olmur?" sualıdı. çox çox minnətdaram. sizdən biri olmayacam ən azından.
gün olub acından yata bilməmişəm, adın bilmədiyim uzaq qohumların paltarı ilə keçinmişəm, orası yamaq, burası cırıq. bir dənə kurtka almısız 2-də oxuyanda xl razmer, 11-i qurtarana qədər geyinmişəm, hələ də əynimə olur içinə pox. imkansızlıqdan nə əlavə məşğuliyyətim olub məktəbdənkənar, nə də bir şey. nə istəyim olub heç birini sizə deməmişəm, geri çevrilməyi çox yaxşı öyrətmisiz deyə. o qədər qırmısız ki məni, insanlardan qorxar olmuşam, bir dənə adamı yaxınıma buraxa bilmirəm, onsuz da çilik-çilikdi ruhum, gəlsin biri də əl vursun dağılım, sonra gəl yığ bunu, bacarırsan. olmur valla, olmur. hazırlığa verməyə pulunuz olmayıb deyə istədiyim ixtisasda belə oxumamışam a kişi. 14 yaşımda barmaqlarımın ucun iynə qan-qalaq edə edə 1-i 1 qəpikdən düymə tikmişəm, pul yığmışam özümə əyin baş almışam. özümü biləndən 1 qəpik ummamışam sizdən. indi də ummuram. görürsüz ki, 1 ailəyə kömək edəcək gündəyəm çox şükür. şərəflə, zillətlə, əzab-əziyyətlə qazanıram pulumu. iş orasıdır ki, hansı çətinliklə qazandığımı bircə siz bilirsiz, amma görmürsüz. heç vaxt yaxınımda olmamısız, bir valideyn kimi mənim gələcəyimi düşünməmisiz, buraxmısız başlı-başlına, indi də sizdən asılılığım evinizdə qalmağımdadı, vəssalam. səhv deyirəm? yox. elə bilirsiz böyümüşəm, xeyr, elə deyil. mən uşaq vaxtı qırıldığım yerdə qalmışam hələ də. o yer ki, oyuncaqsızlıqdan ağ vərəqə nəsə çəkib kəsib özümə oyuncaq bilmişəm, o yer ki, içim rəssamlıq sevgisiylə, şəkil çəkmək eşqiylə alışıb yanarkən sırf aylıq 20 manatdı deyə kursa qeydiyyatdan əliboş qayıtmışam, bir parçamı orda qoyub gəlmişəm bu günə. o yer ki, 5-10 qəpik yığa-yığa 7lik sadə karandaş almışam, mənim də fərqli karandaşım var, rəssamlardaki kimi demək üçün, hiss etmək üçün. o yer ki, səsimi boğazımda qoymusuz, imkan verməmisiz gedim musiqiyə. 100 faiz əminəm, istəsəz edərdiz bunu. istəmədiz. yaxşı, deyərsiz ki, imkan yox idi bla bla bla, yox idi doğmazdız da məni, nə məcbur idi, birini acından öldürdüz, onun əvəzinə məni gətirdiz yaşaya-yaşaya cəhənnəmi göstərməyə?
nəysə, elə bilirsiz bütün gün ağzım qulağımdadı, gülməkdən ağız kənarlarıma qırış düşüb, 32 dişim çöldədi deyə hər şey yaxşıdı, qızınız xoşbəxtdi. başıma göydən daş düşsün əgər o gülüşlərdən biri içimi həqiqətən isidirsə. hamısı fikrimi yayındırım deyədi. ağın çıxartmışam artıq, dəxli oldu olmadı hər şeyə reaksiyam gülməkdi, psix eləmisiz, havalandırmısız adamı.
bütün bunları ona görə dedim ki, xatırladım hardan hara gəldiyimi, necə gəldiyimi, kimlə gəldiyimi. heç kim lazım deyil mənə bütün bunlardan sonra. nə xoş günümü bilmisiz, nə də bəd. gün olub gözümün suyu duzdan yandırıb üzümü, xəbəriniz olmayıb. mariyadı da əşi, yəqin yenə internetdə nəsə xəstə it şəkli görüb ağlıyır. hə, hə.
bir də xatırladıram ki, mən də adamam, valla. arada mən də özüm haqqında nəsə düşünə bilirəm, nəsə istəyə bilirəm, məni də xoşbəxt edən nələrsə var, taxtadan düzəlməmişəm, mənim də duyğularım var, arada baxın bi mən tərəfə, görün məni, nə gündəyəm görün.
imkanınız olmayıb, canınız sağ olsun, nə deməli? siz bir qırağa, mən özüm tək ayaq üstə dura bilirəm artıq. hə, məni xoşbəxt edən şeylər əlimdə yoxdu, yaratmaq gücündəyəm, amma qoymursan, ana. sən ki bilirdin qızının piano sevdasını. bibimgildə cücələrim mahnısının bir hissəsini öyrənmişdim deyə gəlib evdə özünə piano çəkib həmin mahnını "çalan" qız uşağı mən idim axı, niyə belə ürəyimə köz basırsan mən yazığın, ay ana. imkan ver birini alıb qoyum evə, xahiş edirəm, hətta yalvarıram. çox yer tutmur, narahat olma. mane də olmayacam sənə. sən evdə olanda səndən icazəsiz piano açsam, gəl bu üzümə tüpür, o birinə ilişdir birin. amma qurban olum, mənim bu boz, bomboş, mənasız dünyamda özümə bir rahatlıq tapmağıma mane olma. imkan ver dağılmış ruhumu bir yerə yığan hansısa məqamlarım olsun. icazə ver böyüdüm özümü. uşaqlıq xəyallarımla yaşamaq istəmirəm, reallıq olsun istəyirəm, hiss edim istəyirəm, toxunum istəyirəm. rəssam, ya da piano çalan birini görəndə bilirsən nə qədər içim yanır? bilirsən nə qədər qısqanıram, ola bilmədiyim mənə necə həsəd aparıram?. artıq öyrənmişəm, mənim üçün dünyanın ən acımasız, ən qaranlıq yeri ailəmdi. bu evi mənə daha da çəkilməz eləmə, sadəcə evinə nəsə gətirmək üçün icazə verməyini istəyirəm, başqa heeç nə. inan mənə, o pianodan sənə zərər gəlməyəcək, hətta bəlkə sənə də toxuna bildi onun səsi, hardasa yatmış hislərini oyatdı bəlkə.
indi isə icazə ver, nolar..

65 əjdaha! 09.01.2021 03:01, mariya kürüsü

#316465 şikayət

Notice: Undefined variable: userQuery in /var/www/soz6/sonhefte.php on line 84

Notice: Trying to access array offset on value of type null in /var/www/soz6/sonhefte.php on line 84

Notice: Undefined variable: anonim in /var/www/soz6/sonhefte.php on line 85

Notice: Undefined variable: idvv in /var/www/soz6/sonhefte.php on line 92

Notice: Undefined variable: idvv in /var/www/soz6/sonhefte.php on line 101

Notice: Trying to access array offset on value of type null in /var/www/soz6/sonhefte.php on line 102

azərbaycanda qız olmaq

+49 əjdaha

geyim seçimini evə gələcəyin vaxta görə etməkdir. bunu çox dərin təəssüf hissi, qorxu, üzüntüylə həyata keçirməkdir bir də.
9-10-dan sonra gələcəmsə mütləq şəkildə minimum cəlbedici şeylərdən belə qaçıram, adi makyaj nədir onu da minimuma endirirəm, gözə görünmək istəmirəm, çünki qorxuram, özü də çox qorxuram. yaxşı, istədiyin kimi geyinib dirənmək falan filan, başa düşürəm, amma mən təkəm, onlar çox. yolun ortasında biri çıxıb təcavüz edib başımı kəssə mənə maraqlı olmayacaq dirəniş-mirəniş. bakının mərkəzini keçdim, elə ki 20 yanvardan çıxıb evə - sumqayıta gəlirsən ha, bax o yolda nələr çəkdiyimi nə qədər izah etsəm az. taksiyə minirəm, qorxuyla, birdən məni düşürməz, sürər başqa yerə. təklif edən n qədər olub çünki, hay-şüvən salıb aradan çıxmışam. düşüb evə gəlirəm, 5 dəq piyada yol gedəcəm, hardansa otluqdan-kolluqdan biri çıxır, hiss edirəm izlənilirəm, sürətimi artırıram, bir də görürəm yanımda. mən nə bilim indi əlində bıçağı hazır vəziyyətdə deyil? əlbəttə qorxacam. üstünə qoyub qaçıram, yolda 1-cə nəfər görəndə xoşbəxtlikdən qol-qanad açıb uçuram, qışqırsam kimsə tez köməyə gələr deyə. bəlkə də həmin adam da bunun bir tayıdır e, yenə də həmin an yalnız müsbət köklənməyə ehtiyacım olur. o qədər qorxuram ki, az qalıram dizlərimi atım yerə, əllərimi açım göyə ağlaya-ağlaya qışqıram ki, ay allah, məni niyə qız qəbul bildin bu xarabada? ikinci səhvi edib bura göndərmisən, heç olmasa oğlan edəydin, bu iztirabları çəkməzdim.
yolda elə tiplərlə qarşılaşıram ki, elələrin yola verirəm ki, evə çatanda "bu gün de iyi direndin" deyib təskinlik tapıram. tiplərə baxıb özümə xal təyin edirəm, bunu keçsəm 50 xal, o biri əli-üzü kəsik manyakı keçsəm 200 xal zad. buna da bu cür maraq qatıb özümü oyundaymış kimi aparıram, yoxsa çətin idarə edəm özümü.
belə yəni, azərbaycanda qız olmaq çətindir, sumqayıtda qız olmaq lap çətindir, bakıda işləyib sumqayıtda yaşamaq əndazəni keçmiş şəkildə çətindir. hamısının başı batsın.

38 əjdaha! 09.07.2021 23:58, mariya kürüsü

#331772 şikayət

qlamur qızlar

+51 əjdaha

son vaxtlar meyilləndiyim qız tipi.(?)

bir müddətdən sonra bezdim sport, gen, çox sadə şeylərdən. bir az da qırmızı lak vuraq, bir az da hündürdaban geyinək, bir az da makiyaj edək, bir az da mirror-selfiebaz olaq. nolacaq? dünyagörüşümüz qıraqdan çox darmış kimi görünəcək? əla! görünsün. elə biləcəklər ancaq dəb haqqında, baxım məhsulları haqqında bilirik? bilsinlər. qıraqdakıların necə gördüyü və düşündüyü bizim daxili mənimizdən bir qram nəsə əksiltmir ki nəticə olaraq.-* uzaqbaşı ancaq insanları qəliblərə salıb haqlarında bu qədər ümumi danışmağı bacarır insanların çoxu. bu da çox pis acığıma gəlir.

kimsə makiyajsız rahat olar, kimsə makiyajda. kimsə originallığa fikir verər, kimsə vecinə almaz, sadəcə ad, ya logo xoşuna gəlir, başqa heç nəyi vecinə almır. kiminsə maraq dairəsi ancaq makiyaj və baxım məhsulları ola bilər, mümkündür. bunu bilmək belə bacarıq tələb edir çünki.
ölürük ad qoymaqdan yana. bizimkisi ancaq çərçivə içində yaşayıb qıraq-bucaqdakıları da öz uyğun gördüyümüz çərçivəyə salaraq heey danışmaqdı. necə ucuzluq edirik halbuki.

ümid edirəm bir gün bu və bu qəbildən olan başlıqlar öz aktuallığını itirər. belə lazımsız şeyləri düşünüb beyninin rahatlığını pozmayan insanların sayəsində.
ya da ümid edirəm həmin qlamur, amma fikirləşdiyiniz kimi olmayan qadınlarla qarşılaşarsınız, hansı ki adam üzlərinə baxanda bar-bar bağıran savadının kölgəsində özünü üşümüş hiss edir. ya söhbət edəndə dərin və iti düşüncəsi beynində yara qoyur, necə yanıldığını görüb az-maz peşman da olursan. belə qəliblərdə yaşamaq yalnız və yalnız psixi sağlamlığımıza ziyandır.

44 əjdaha! 04.01.2022 23:53, mariya kürüsü

#342822 şikayət

siqaret çəkməyin müsbət cəhətləri

+47 əjdaha

uzun müddət siqaret çəkən insanların böyük qismi alzheimer xəstəliyinə tutulmur. çünki o qədər çox yaşaya bilmirlər.

33 əjdaha! 04.03.2021 14:13, mariya kürüsü

#321489 şikayət

yazarların paylaşmaq istədikləri musiqilər

+37 əjdaha

(youtube:

)

yazarın hal-hazırda dinlədiyi yox, sadəcə paylaşmaq istədiyi mahnı.
ömrüm boyu dəfələrlə qulaq asmışam, ancaq 1 dəfə dinləmişəm. 4 dəqiqə 36 saniyə nəfəs almamışam, ala bilməmişəm. mahnı deməyə dilim gəlmir, amma sözləri, musiqisi, müslüm maqomayevin səsi.. o qədər mükəmməldir ki, izah edilməz.
bu şedevri dinləyəndə balaca idim, ancaq başa düşürdüm ki, bir gün anam olmayacaq hamı kimi, hər şey kimi. arzu edirdim anamın ölümünü görməyim, elə bilirdim qaldıra bilmərəm. sonra da fikirləşdim ki, əgər mən anamın ölümünü görməsəm, onda anam mənim ölümümü görəcək və o üzüləcək. onun üzülməməsi üçün arzumu dəyişdim və özümə, anam üzülməsin deyə onun yoxluğunu qaldıracaq güc arzuladım.
bu mahnı da bir şeydən sonra yadıma düşdü. anamın nəsə zəifliyi var, həkimə getmir və aparmaq da mümkün deyil deyə nə olduğunu bilmirik. arada halı pisləşir, rəngi qar kimi ağarır, bütün bədəni quruyur, heç danışa da bilmir. yenə elə olmuşdu və vəziyyət o qədər ciddi idi ki, atam oturub ağlayırdı elə bizim yanımızdaca. bilirsiz nə oldu? anam 2 daşın arasında sözləri eşidilməyəcək halda, son sözlərini deyirmişcəsinə hıqqına-hıqqına mənə "hava soyuqdu, corab geyin, xəstələnərsən", atama da "böyük qız birtəhər oxuyub qurtardı, balacanı sənə tapşırıram və oxutmasan haqqımı halal eləmərəm" dedi. evdə siçan öldürüləndə hönkürtü vurub ağlayan biri olaraq gözümün suyunu axıtmalı idim bu mənzərəyə. bəs ağladım? yox. əlim ayağıma dolaşdı? heç. səsim belə titrəmədi? xeyr. ömrümdə bir hadisəyə verdiyim ən soyuq reaksiya idi. deyəsən, ən azından anam üzülməsin deyə ağlamayacaq qədər olmuşam artıq. kimə və ya nəyə təşəkkür etməliyəmsə, burdan təşəkkürlərimi göndərirəm.

Ana, səsin aydın səhər olar,
Ana, qəlbin keşik çəkər bizə,
Yolum üstə uzaq səfər olar,
işıq olar nurdan düşən gözə.
Mənim görən gözümsən sən, ana,
Ömrüm-günüm, özümsən sən, ana.

bütün anaları da gül qoxan əllərindən, ayaqlarından, üzlərindən öpüb bərk-bərk bağrıma basıram. daha bir entry'nin sonu.

22 əjdaha! 29.08.2020 01:43, mariya kürüsü

#303593 şikayət

sözaltı günlük

+37 əjdaha

gəlmişəm sənlə sevincimi bölməyə, əziz sözlük.
bu gün qardaşım cəbhədən evə qayıdıb. özü də sağ-salamatdı!

gördüyüm hər adamı öpüb qucaqlayasım, şirinlik paylayasım var. bu nə həsrət imiş mən çəkirmişəm və bu nə xoşbəxtlikdir mən yaşayıram, ilahi?!
səndən arzum budur ki, illər sonra yaşadığımız bu ağrı-acı, qürur dolu sevincimizə dəymə, bunu bizə çox görmə. və mümkünsə bizə bir də müharibə yaşatma. bizi keçdim, bizdən sonrakı nəsillər qəlblərində vətən, torpaq, ata, qardaş həsrəti ilə böyüməsin. yaşamasınlar bu hissi..
və əgər həqiqətən varsansa, bu dəqiqə içində olduğum, içində olduğumuz xoşbəxtliyin memarı olan 2877 şəhidin* 2783 hərbçi, 94 mülki şəxs yerini rahat et, torpağını nurla doldur, 5000-ə yaxın yaralının dünyasını ən rifahlı hala gətir. yaşayacağım nə xoşbəxtlik, nə sevinc varsa, hamısını al, onlara ver. itkin və əsir düşmüş əsgərlərin isə ailələrinə səbr ver, onları tez bir zamanda qovuşdur...

hə, günlük, müharibə bitibmiş, torpaqlarımız alınıbmış və mən bunu qardaşımın gəlişi sayəsində indi görürəm, eyforiyadan indi ayılıram sanki.
qələbəmiz mübarək!

33 əjdaha! 06.12.2020 13:44, mariya kürüsü

#312734 şikayət

ata

+32 əjdaha

arada məndən böyük olduğuna şübhə ilə yanaşdığım adam.
səhərin gözü açılmamış anamı otuzdurub yanında qarabağın dünənki oyunu haqqında danışırdı bütün təfsilatı ilə. anamın da çox güclü başı çıxır axı.. arada "həə"-dən, "hm"-dan atıb qulaq asdığını bildirirdi, vəssalam.
hələ 3-4 ay əvvəl özünə təzə telefon almışdı, alan kimi gətirdi verdi ki, bunun oyunu olmur? al buna oyun yüklə..
bəzən də elə bilirəm atama oyuncaq maşın alıb versəm, xalçanın üstündə oturub "vığn-vığn" deyə-deyə sürəcək..
eh,

(youtube:

)

25 əjdaha! 02.10.2020 08:44, mariya kürüsü

#305472 şikayət

tombili

+29 əjdaha

Fenomen pişik.
Pilləkən üstündə verdiyi pozla bir vaxtlar məşhur meme siması olub.

Sonra böyrək çatışmazlığından ölüb və 17 min imza toplanılaraq bələdiyyə icazəsi alınıb və həmin şəklin çəkildiyi yerə könüllü heykəltaraş tərəfindən heykəl düzəldilib qoyulub.

24 əjdaha! 01.07.2022 19:13, mariya kürüsü

#353060 şikayət

filmlərdən maraqlı detallar

+25 əjdaha

popeye the sailor man cizgi filmindəki popeye personajının ispanaq yedikdən sonra güclənməsi hadisəsinin bir kimyagərin vergül xətasının nəticəsi olması.
belə ki, alman kimyaçı erich von wolf tərəvəzlərin tərkibində olan dəmirin miqdarını araşdıran zaman 100 qram ispanağın tərkibində 3.5 mq dəmir olduğunu aşkarlamış, dəftərdə vergül qoymağı unudub 35 mq yazmışdır. insanlar da buna inanıb o qədər ispanağın üstünə tökülüşüblər ki, 19-cu əsrin sonlarına yaxın ispanaq satışı kəllə-çarxa çıxıb. popeyenin "spinach" konservini yeməklə güclənməsi də məhz buna görədir.

20 əjdaha! 19.08.2021 11:40, mariya kürüsü

#334447 şikayət

davamlı dava edən ailədə böyümək

+23 əjdaha

adi mübahisədən belə qorxacaq hala gəlməkdir.
düzdür, böyüdükcə ailədaxili münaqişələrə birbaşa təsir göstərə və azalda bilirsən, amma məsələ bu deyil. avtobusda 2 nəfər pəncərə üstündə didişəndə ürəyin əsir. qorxursan ki birdən məsələ ciddiləşər. əlbəyaxa olarlar, qışqırıb-bağırarlar. bilirsən sənə heç bir aidiyyəti yoxdur, ancaq qorxun, həmin mübahisənin sənin yadına salacaq, xatırlamağa və hiss etməyə təşviq edəcəyi şeylərdir.
qonşuda kimsə savaşır, mən evdə oturub az qala əsməcəyə düşürəm, elə bilirəm bu saat yenə qablar yerə çırpılıb sınacaq, kimsə yumruğunu qapının şüşəsinə vurub qolunu kəsik-kəsik edəcək, ya qonşular polis çağıracaq. hələ dava sonrası araya çökən ağır sükutu da hiss edirəm. sadəcə dəhşətdir.
nə qədər cürbəcür terapiyalardan keçirsən keç, seanslara girirsən gir, dərman atırsan at, uşaqlıq travmaları, özü də bu cüründən olanlar, doğrudan da çox çətin keçir. biz iz həmişə qalır oralarda və münbit şərait görən kimi yarasaya dönüb yapışır sinənə, beyninə, ruhuna. bu hissə yarasa deyirəm, özü də yepyekə qara yarasa. başqa cür təsvir edə bilmirəm hələ.

müsbət cəhəti də var amma. pisini dedik, yaxşısını da deyək. yaranacaq dava-qırğına qarşı zəifliyin var deyə, həm qabaqcadan problemin olmaması üçün düşünürsən, çətinliyə az düşürsən, həm də problem yaranmışsa, onu həll etmə bacarığın, analitik düşünmə qabiliyyətin artır. vakansiyalara baxanda tələblərin arasında "analitik düşüncə" görən kimi gülürsən ki, yesss, neçə illik təcrübəm var ahahags. başqa müsbət tərəfi yoxdur. buna da şükür, nə deyək.

20 əjdaha! 22.08.2021 23:14, mariya kürüsü

#334638 şikayət

hərtərəfli insan

+24 əjdaha

"acame of" (acam ee oooff) mesajıma "ingilisim zəifdi" cavabı verərək gecə-gecə güldürən yazar. yerdəyəm...

21 əjdaha! 04.11.2020 01:36, mariya kürüsü

#309195 şikayət

yazarlara verilən ən dəyərli hədiyyələr

+24 əjdaha

dünən şagirdlərimlə səhər idmanı etməyə çıxanda gördüm biri əlində ipə düzülmüş muncuq fırladır "təsbeh" əvəzi. bijuteriya ilə aramın heç olmamasına baxmayaraq şagirdimin muncuqları nəsə xoş gəlmişdi mənə və deyəsən hiss etdirmişəmmiş bunu..

bu gün dərsdə otaqdan çıxmışdım, qayıdanda gördüm yanındakı qıza tələm-tələsik nəyisə göstərir çantanın qabaq cibində. özü də şam sönməsin deyə əlimizi qıraqlarına divar kimi tuturuq ha, birdən görərəm deyə, bax, elə tutub bap-balaca yeməli əlini. yaxınlaşan kimi tələm-tələsik özlərini düzəldib üzümə qımışdılar. başa düşdüm ki, çantada nəsə özəl bir şey var. amma ağlımın ucundan keçməmişdi mənə aid olduğu, ona görə təkidlə soruşdum "o nədir?" deyə. axırda çarəsiz qalıb dedi ki, müəllimə dərsin axırında sizə bir şey verəcəm. amma axırında, indi yox..

1 saatı tikan üstündə oturubmuş kimi birtəhər yola verdi. dəqiqə başı da "axırı gəlsin deyə həyəcanlanıram e, müəllimə" deyirdi, mən monqol da elə bilirdim oxuduğum mətnin axırını deyir. sən demə dərsin axırını deyirmiş...

dərs qurtardı. çantasından 2 qolbaq çıxarıb dedi ki, "müəllimə, birini siz seçin, o biri də mənim olsun". mən də sadəni seçib digərini qaytardım. yanındakı qız qayıtdı ki, "hə, müəllimə, onu sizə düzəltmişdi, düz seçdiz". uşaqdakı düşüncəyə bax. birdən mənə verdiyini yox, özünə düzəltdiyini bəyənərəm deyə hər ikisini seçmək şansı verdi mənə, halbuki əminəm özünə düzəltdiyini daha özənlə və əziyyətlə hazırlamışdı, çünki daha mürəkkəb düzülüşü var idi ondakı muncuqların...

qolbağı görəndə çox pis kövrəldim, bəbəklərim böyüdü, gözlərimdən çıxan xoşbəxtlik qığılcımları gözümü, üzümü, bütün bədənimi isitdi. uşağın hər üzündən bir dəfə öpüb, bir dəfə dişləyib yola saldım..

qızı axşama çağırmışdım gəlib 5 dəqiqə dərsi danışıb getsin deyə. gələndə o da mənə düzəltdiyi qolbağı verdi, getdi. ümumiyyətlə, hansısa uşaq 1 dənə gül də gətirsə, gülü necə əzizləyib, necə xoşbəxtliklə güldanda evin ən görkəmli yerinə qoyduğumu görüb digərləri də gül gətirib* sonradan xəbər tutdum ki, qonşunun onları danlamasına rəğmən bağdan gizlincə qırıb gətirirmişlər evi doldurur. mən gül almışam deyə, onlar da gül verib deyə əl-ələ verib xoşbəxtlikdən göylərdə uçuruq. sevgi bu idi də, hə?.. özü də əsl xoşbəxt olan mən deyiləm, onlardı. erich fromm demiş, sevgi almaqdan daha çox verməkdir. çünki vermək, güclü olmağın ən gözəl izahıdır. məsələ konkretlik deyil, mücərrədlikdir. zənginliyini vermək, üstünlüyü vermək, xoşbəxtliyi verməkdir məsələ. və bunun yaşatdığı canlılıq, coşqu içində üzmək, verdikcə daha da zənginləşmək... əminəm, onlar məndən daha doludurlar, daha xoşbəxtdirlər. kaş, həmişə elə bu cür qalalar. amma ki.., eeehhhhhh...

məni heç olmadığım qədər dəyərli hiss etdirən həmin hədiyyələr bunlardı.

qəhvəyi rəng oğlan düzəltdiyidi. pul rezini ilə düzəldib özü də. yeyərəm axı...
digəri də 10 yaşlı qız uşağına xas çəhrayılıqla, bəzək-düzəklə... özü də qolbağı bağlamaq üçün yer qoymayıb, taxa bilmirəm. gərək deyim fix eləsin birtəhər...

iş orasındadır ki, heç birinin ağlı kəsməyib müəllimin biləyinin onların biləyindən daha qalın olduğu. hər ikisi öz biləyinə uyğun qolbağı düzəldib gəlib. ürəyim gəlmir birinin rezinini söküb, digərinə də təzə ip calaq edib öz ölçümə uyğunlaşdırmağa. ona görə sıxıla-sıxıla taxıram indi, taxacam da..

yox, əşi, entryni yazanda heç kövrəlmədim, gözlərim də dolmadı. nə danışırsız, kövrəlmək və mən?...

18 əjdaha! 16.11.2020 20:54, mariya kürüsü

#310718 şikayət

ilk stipendiya ilə alınacaq şeylər

+25 əjdaha

kasıb tələbənin almaq istəyib ala bilmədiyi şeylərdir.

o tələbə ki, pulu çıxmasın deyə kitabı pdf oxuyur, otağı üçün hansısa əşya ala bilmir, çünki otağı yoxdu, çipsini ancaq dostları alandan alana yeyir, aldığı stipendiyanı da, xərclərini minimuma endirib bir hissəsini məcbur yolpuluna ayırır, qalanını da evə...

24 əjdaha! 07.02.2021 12:58, mariya kürüsü

#319442 şikayət

sevil atakişiyeva

+27 əjdaha

25 əjdaha! 20.02.2021 17:25, mariya kürüsü

#320359 şikayət

ilk sevgi

+25 əjdaha

ilk uğursuz sevgim. 15 yaşım var idi. indi mənə nə qədər sevgi kimi gəlməsə də, onda keçirtdiyim hislər yadımdadı, dəhşət çox sevirdim. elə bilirdim o da sevir, elə deyilmuş. başınızı ağrıtmayım, qısası çox babat xəyanət yemişəm. başına döndüyüm mənlə bir yerdə 5-6 qızı fırladırmış, necəsə xəbərim oldu, yadımda deyil. bunu bilib ayrıldım. idmançı idi və ayrılmağımın səhəri günü yarışı vardı. ayrılanda çox pis xətrimə dəydi. bilmirəm, sizdə belə hallar yaşanır, ya yox, amma mənim xətrimə kimsə dəysə, mən bəddua eləməsəm belə o adama mütləq nəsə olur. nəysə, səhər getdi yarışda bir ayağı sındı. söz vaxtına çəkər, elə yayın bu vaxtları idi. sonra 1 aya yazdı mənə, çox peşman olubmuş, məni unuda bilmirmiş, bla bla bla. mən də inandım, kül başıma. inandım, 1 gün keçmədi xəbərim oldu ki, hələ də düzəlmiyibmiş, hələ də başqa 5-6 qızı eyni anda fırladırmış. adamda fərasətə və şərəfsizliyə bax da. vobşim, bu dəfə sərtləşdim, dedim inşallah o biri ayağın da sınar, yay boyu evdə dustaq qalarsan. təxmin edin noldu? elə o biri ayağının tam sağalmağına az qalmış, bu birin də sındırdı. entry-nin sonu.

20 əjdaha! 24.07.2020 15:26, mariya kürüsü

#301112 şikayət

xəyal qırıqlığı

+26 əjdaha

o gün iri ticarət mərkəzlərindən birində idik, dedim girim wc-yə. girəndə fikirləşmədim, çantanı qoydum güzgünün qarşısına, mənə lazım olan şey də çantamda. nəysə elə çıxmağı fikirləşirdim ki, gördüm aa yuxarıda dəmir var, ora 1 paçka qadın üçün ped qoyublar. ilahi, mən necə xoşbəxt oldum, necə sevindim, izah edə bilmərəm. həyəcandan gözlərimdən hərarətli kiçik ulduzlar çıxır, baxıram hamısı həmin paçka pedin ətrafında dövrə vurur, gördüyüm ancaq və ancaq odur. özümə görə sevinmirəm ha, ölkəmizə bu mədəniyyətin gəlməyinə sevirəm. sevincimin həddi-hüdudu yox. indi maksimum həyəcanla gözləyirəm ki, çıxım tanış-tunuşa bu şad xəbəri yayım, təmizlik işinə baxan qadınlardan 1-2 söz soruşum, "ee konuş bakalım nasıl oldu?" tipli. qapını açırdım, açmaz olaydım, gördüm tanış qız durub qapının ağzında, gözümün içinə adını qoya bilmədiyim birtəhər mənalı baxışlarla baxır, deyir ki, "içəridə paket qalıb e, mariya, girim götürüm, təzə almışam"...
vay vay, mənim keçirdiyim hisslər xıpp deyə qəfildən kəsilib nəfəsimi boğazımda qoymazmı? xəyal qırıqlığı məni çilik-çilik olmuş şüşə kimi hiss etdirməzmi? üzüntüdən donulu halda içəridən paçkanı özüm götürüb verdim qıza. danışdım məsələni, dedim 1-in də istifadə etmişəm, halal elə. indi qız gülür, mən reaksiyasız, qız gülür mən yavaş-yavaş üzülürəm, qız gülür, mən ağlamaq istəyirəm... dəhşət...

axırda üstündən bir az keçdi, özümü də tənbehlədim ki, ay yazıq, sənin hələ də gözləntin var buralardan? o boyda malla gündə neçə paçka always çatar axı? lap nə qədər olur olsun, bu jesti edərlər, səncə? dəli olmusan, nədi?

nə bilim e, demişdim bəlkə reklam xarakterli nədirsə təşkil ediblər, biz qaribanlar da fələkdən limitli xoş gün görərdik. o da olmadı...

(baxma: içində qalmış xoşbəxtlik)

24 əjdaha! 10.01.2022 23:50, mariya kürüsü

#343169 şikayət

sad nipple syndrome

+24 əjdaha

Məməucuna özü yaxud başqası tərəfindən, qəsdən yaxud təsadüfən toxunulduğunda özünü pis, depressiv hiss etməklə izah olunan sindromdur.

Aparılan araşdırmalar zamanı qadınların bəziləri bu hissi “günahkarlıq”, “ruhsuz”, “ev üçün darıxmaq”, “özümdən iyrənmək” kimi sözlərlə izah ediblər.

Səbəbinə gəlincə, bunun üçün xüsusi konkret araşdırmalar hələ ki aparılmadığı üçün dəqiq bilinmir. Bəziləri isə bunu məməucu “uyarıldığında” ifraz olunan dopamin hormonun qısamüddətli kəskin düşüşüylə əlaqələndirir.

Bu problemlə mütəxəssisə müraciət edənlərin çoxunu südverən qadınlar təşkil etsə də, süd verməyən qadınlarda da az görülmür. Sad nipple sindromlu südverən yaxud verməyən qadınlar arasında fərq yoxdur. çünki istənilən məməucu “uyarılması” oksitosin, dopamin hormonunun artışına səbəb olur və kifayət qədər toxunulduğunda süd turşusu adlandırılan laktat ifraz olunur.
Qadınlardan əlavə kişilər də bu sindromu yaşaya bilir. Sadəcə qadın məməucları daha həssas olduğundan müraciətçilərin böyük qismi qadınlardan ibarətdir.

Toxunulma dayandığı andan sindromun gətirdiyi mənfi hisslər azalmağa başlayır. deyilənə görə, narahat olacaq xüsusi bir şey yoxdur. ola bilər ki, çoxluğa müsbət təsir edən yanaşma sizə eyni təsiri bağışlamasın. Necə ki, məsələn, oral seks hamı tərəfindən pleasurable deyil.
Yox, psixoloji sağlamlığa və öz bədəninlə arandakı münasibətə mənfi təsir edəcək səviyyədədirsə, professional yoxlanışa ehtiyac vardır.

20 əjdaha! 24.09.2022 17:08, mariya kürüsü

#359878 şikayət

söz6 telegram qrupu (qeyri-rəsmi)

+24 əjdaha

təklif edirəm qrupun adı dəyişilib söz6 cyber sex olsun, rahat şırıl-şırıl olun nə qədər istəyirsiz.
qorxumdan qrupdan çıxdım ki, bu dəqiqə əllərində qalan salfetkanın şəklini də atacaqlar bura, görəndə halım dəyişəcək, qaytarıb eliyəcəm.
nəzərinizə çatdırım ki, qrupda 40-a yaxın insan var(mən çıxanda elə idi) sizdən başqa. biyabırçılıqdı, vallah, interaktiv ensiklopediyanın chat qrupuna bax, adam baxanda ürəyi qalxır. modlar bir əl atsa yaxşı olar. şəxsən sözlüklə maraqlanıb chat qrupuna baxsa idim tüpürərdim eksiklopediyaya da, o birinə də, bu birinə də.
bir az, çox az, çox-çox az hörmət, siz əzizinizin canı, başqa heç nə.

(bax: sözlükdən soyuma səbəbləri)

silinmiş entry.

22 əjdaha! 03.11.2020 00:28, mariya kürüsü

#309019 şikayət

yazarların həyatdan çıxardığı dərslər

+21 əjdaha

zaman bizi gözləmir və heç vaxt da belə olmayıb, nə də olmayacaq.

bu gün idman edib, şəxsi inkişafımıza vaxt ayırmaq lazımdırsa, ayırmalıyıq. gələcək iş planları qurub, sərmaye yığmaq lazımdırsa, etməliyik. sevdiklərimizi uzun zamandır görmürük, söhbət etmiriksə, mütləq şəkildə təşkil etməli, sevdiyimizi və dəyər verdiyimizi hiss etdirməliyik. sonra gün olur çatırsan 28 yaşa, görürsən bu vaxta qədər o qədər gah ora-gah bura qaçmısan, özünü o qədər səpələmisən ki, əlində yekə bir "sıfır" var, başqa heç nə. yaxınların da yavaş-yavaş həyatdan köçür, içində n qədər deyilməmiş söz, ifadə edilməmiş hiss qalmışkən. halbuki vaxtında ifrata çıxartdığın əyləncələrdən, sosial medialardan, ya hər işə soxuıan "burnundan" işlərinə, sevdiklərinə də vaxt ayırsa idin, indi haralarda idin, necə ucalmışdın. və necə daxilin təməl olaraq rahat idi.
iradəsizlik, plansızlıq və disiplinsizlik öldürür. geriyə baxanda hərəkət olaraq ancaq yemək, içmək, gəzmək, durmaq, yatmaq, sıçmaq görmək istəmiriksə, bir yanda "bundan belə nə edim axı?" sualına cavab axtarmağa çalışaraq, dilxor olub başımızı vurmağa divar axtarmaq istəmiriksə, elə indidən başlamalıyıq. sonrakı peşmançılıq onsuz fayda vermir, bunu bilirik, amma çəkdirdiyi daxili acını, vicdan sızıltısını və boşluğu da bilirik. bunu ən ümdə tutub elə davam etmək lazımdır həyata. yoxsa bizdən bir pox olmayacaq. ən pisi də elə bunu bilə-bilə yerində saymaqdır. götümüzü yerdən qaldırmağın vaxtı çoxdan gəlib.

14 əjdaha! 20.05.2021 01:26, mariya kürüsü

#327949 şikayət

genital bölgədə ph səviyyəsi

+23 əjdaha

əvvəla, ph turşuluq dərəcəsini göstərib və 0-14 arasında qiymətlər alır. 14-yə yaxınlaşdıqca əsaslıq(qələvi), 0-a yaxınlaşdıqca isə turşuluq dərəcəsi artır. məsəl üçün, dəniz suyunda 7.5-8.4 aralığında dəyişə bildiyi halda, limonda 2.2, insan dərisində 4.7-dir. əsas məsələ, qadının genital bölgəsindəki ph səviyyəsi isə təxminən 3.5-4.5 arasıdır. bu balans pozularsa(daha çox 4.5-dən böyükdürsə), bir çox infeksiyalara yoluxma ehtimalı artır. bura daxildir Bacterial vaginosis(BV), Trichomoniasis və s. ancaq ola da bilər ki, balans pozulsun və heç bir problem yaranmasın.
əgər genital bölgədə qaşınma, xoşagəlməz qoxu, yanma varsa, qeyri-adi axıntı görülürsə, bu balansın pozulduğunun işarəsidir və bunu ev şəraitində adi ph kağızını 1-2 saniyə boyu genital bölgəyə yaxın tutaraq ölçmək mümkündür.

genital bölgədə ph səviyyəsi hal-vəziyyətdən asılı olaraq dəyişir. məsələn, menopauza dövründə bu göstərici 5.3, cinsi əlaqə zamanı 7, hətta 8.5 ola bilir. bu da spermin yumurtaya çatması üçün qələvi mühit əlverişli olduğundan, yaxşı haldır.

ph səviyyəsini sabit saxlamaq üçün isə gigiyenik qaydalara riayət etmək, cinsi əlaqə zamanı prezervativdən istifadə, probiotik qəbulu, bir də süd məhsulları(daha çox qatıq) yemək kifayətdir.

18 əjdaha! 18.04.2021 01:31, mariya kürüsü

#324838 şikayət

sabun

+25 əjdaha

əksər xassələri piy tərkibi ilə müəyyən olunan kimyəvi maddə.
belə ki, inək və donuz piyinin tərkibindəki palmitin turşusu sabuna bərklik və köpüklənmə qabiliyyəti verir. olein turşusu soyuq suda həll olma və yuma qabiliyyətini, stearin turşusu isə isti suda yuma qabiliyyətini gücləndirir. kokos yağında olan laurin turşusu nə qədər çoxdursa, sabun soyuq suda o qədər çox həll olur, yuma qabiliyyəti artır və şişməsi azalır. donuz piyinin bir hissəsi olan linol turşusu sabuna xoşagəlməz iy verir və uzun müddət saxlanmasına mane olur.
bunlardan əlavə, sabunun tərkibinə ətirləyicilər, rəngləyicilər, nəmləndirici kimi qliserin, gənəgərçək yağı, lanolin, spermaset kimi vasitələr daxil edilir. antibakterial sabunları özəl qılan və pis qoxuları aradan qaldıran maddə kimi isə triklozandan istifadə olunur.

20 əjdaha! 16.03.2021 02:29, mariya kürüsü

#322191 şikayət

vəfat edən yaxınlarımıza demək istədiklərimiz

+25 əjdaha

əmimin əvvəl başqa evliliyinin də olduğunu 6-7 ildir öyrənmişəm. bizdə var axı, əlaqəni kəsməli olduğun dostunu düşmənə çevirmək, yolunu ayırdığın biri haqqında heç kimə danışmamaq, yeri gələndə pisləmək və s. qaldı ki boşandığın adam. elə vedrə bağlayacaqlar ki, insanların ucuzluq göstəricilərinin həqiqən bu qədər çox olduğunu düşünüb, üzvü olduğun bulanıq cəmiyyətə bir daha məəttəl qalıb, bir daha təəssüf edirsən.

həmin evlilikdən 2 uşağı var imiş, 1 qız, 1 oğlan. boşandıqdan sonra əmim onlarla əlaqəni minimuma endirib, nə qədər minimum olduğu 1-ci abzasdan bəllidir. başı qarışır yeni ailəsinə, köhnələr bir qıraqda.

gün gəlir, 1-ci yoldaşının qardaşı vərəmə yoluxur, bacısı bunu uşaqlarının yanında-evdə müalicə etdirir. bəli, evdə. yəqin edirəm ki, gigiyenaya max. önəm vermir və bu səbəbdən ki, uşaqların iksi də vərəmə yoluxur.

oğlanda problem ciddi deyil, qızda məsələ başqa yerdədi. həssas yanaşmalı, müalicə olunmalıdır.
xəstəliyini qəbul etmir və belə-belə vaxt keçir, gəlir çatır 21 yaşa. xəstəlik ağır formasını alıb, vəziyyət çətinləşib. türkiyədən-almaniyaya, almaniyadan-amerikaya, dünyanın dörd bir yanını gəziblər, ancaq heç bir həkim xəstəni öz üzərinə götürmür. sadəcə dərman yazır, vəssalam. qız inadından dönmür, xəstəliyini yenə qəbullanmır..

vəziyyət bu qədər ciddiliyə minəndə, əmim köhnə ailəsinin, qızının yanında olmağa çalışır. bizi onlarla tanış edir. bacımla onlara gedirik, yolda bir oğlan görürəm, yanımda bibim deyir əmimoğlu olduğunu. evə girirəm, çox, lap çooxx arıq bir qız, rəngi qaralmış, bənizi solmuş, beli bükülmüş şəkildə dayanıb, üzü gülür, amma gözləri fəryad dolu.. bir-birimizə yaxınlaşır və görüşürük. mən şokdayam, nə hiss etdiyim haqqında 1 qram fikrim yoxdu və tək gördüyüm ikinci mənin qarşımda oturduğudu. mən heyrət içindəyəm.

ağzını açır danışmaq üçün, ciyərdən bir dərin öskürək gəlir ki, qız artıq danışmağa cəhd də edə bilmir, boğulur. deyə bildiyi 1-2 söz o qədər xırıltılı səslə çıxır ki.. axx, xəstəlik...

bir az keçir, tibb bacısı gəlir sistem vurmaq üçün. qızın səbri çatmır, artıq dava-dərmandan bezib, qışqırıb sistemi tullayır bir qırağa. mən dolmuşam. bütün bunların nə demək olduğunu anlamağa çalışıram və dərin bataqlıqla itib-batıram sanki..

gün gəlir, qızın ürəyi tort istəyir və anasını yollayır tort almağa. o tortu yeyə bilmir, çünki anası evə gəlməmiş qızı bu dünyadan köçür.

öləndən sonra bir topa dərman tapılır. evdəkilərin yanında ağzına atıb, fürsət düşən kimi çıxarırmış. xəstəliyinə qəbullanmaq göstəricisi idi bu, ya qəbullanmamaq? qəbullanıbsa, deməli, artıq dərmana ümidi yoxdu və bunu boş akt olduğunu, özünü nəyin gözlədiyini bilir. ağır olmalıdı..

indi, sənə nə deyə xitab edim, nə deyim bilmirəm. atan 2 qat olub, ananı arada görürəm, duruşu, əndamı yerindədi, amma gözləri hayqırır, baxmağa cəsarət gərək. bəzən tort yeyəndə sən yadıma düşürsən və davam edə bilmirəm. kaşla başlayan cümlələr qururam öz-özümə.
kaş hər şey tamam fərqli olardı. başqa ailələrdə doğulardıq məsələn, daha xoşbəxt, daha mehriban, daha isti. heç olmasa,... ən azından səni daha öncədən tanıya bilərdim. elə ürəkdən istəyərdim ki, bunu. o qədər doğma gəlmişdin ki, mənə. o qədər ürəyimə yatmışdın ki..
var olduğuna ilk başlarda inanmadığım kimi, indi də artıq 4 ildir ki, ölümünə inana bilmirəm. məzarını da ziyarət etməmişəm heç. olmadığını qəbullanıram, ancaq səni o cür görməyə cəsarətim çatmır..

bir şeirdə deyilir ki,

bunda olmadı, neylək,
tək ömür bu deyil ki.

bu deyil, hə, ilahi?

indi mən də bu misralara sığınaraq soruşuram ki, varsa, başqa dünyada mütləq görüşəcəyik, hə?

21 əjdaha! 25.02.2021 03:14, mariya kürüsü

#320767 şikayət

akinchi project

+21 əjdaha

azərbaycandilli seqmentdə keyfiyyətli kontentlər hazırlayan təşəbbüslərdən biri, hətta deyərdim ən yaxşısı.

əkinçi layihəsi 2017-ci ilin yay aylarından fəaliyyətinə başlamış və hələ də aktiv olan multimedia platformasıdır. fəaliyyət illərində 30-a yaxın animasiya, 100-dən artıq studiya çəkilişləri, təqdimatlar müsahibələr hazırlamış platforma, hazırladığı kontentlərin yüksək keyfiyyəti ilə seçilir.

kontentlər, əsasən, müzakirəyə ehtiyacı olan, ancaq kifayət qədər müzakirə edilməmiş mövzuları özündə ehtiva edir. o mövzular ki, başqa media qurumları tərəfindən lazımi diqqət görməyib.

təəssüflər olsun ki, seçdiyi mövzular üçün istifadə etdiyimiz "lazımı diqqət görməyib" cümləsi platformanın özünə də aiddir. gördüyü işlərə baxanda bu fikrin nə qədər haqlı olduğu açıq-aydın hiss olunur.

maraqlı işlərindən bəziləri:

(youtube:

)

(youtube:

)

(youtube:

)

platformanın yaradıcısı vüqar salamlı və onun komandasına uğurlar diləyir və bütün diqqətdənkənar qalmış bu kimi layihələrin layiq olduqları yerə çatmalarını arzulayırıq.

19 əjdaha! 20.12.2020 00:40, mariya kürüsü

#313894 şikayət

Köhnə sevgilinin evlənməsi

+21 əjdaha

üzdə lomsayağı gülümsəmə yaradan hadisədir.

birdən hardansa yadına düşür, uzun zaman sonra profilinə baxırsan, nişan, toy şəkillərini görüb gülümsəyirsən mənasızcasına. gözlərindən ancaq qəm-kədər yağan, overthinkingdən boğulan birinin indi necə dünya xoşbəxti birinə transformasiya etməsi səni xoşbəxt də etmir deyil. onun uyğun münasibətin içində olduğunu görüb, həyatdakı hər şeyin necə nizamlı və qanunauyğun şəkildə baş verməsinə ayrı sevinirsən. içinə sərməstedici bir fərahlıq dolur. ümid bəsləyirsən gələcəyə dair. o dərəcədə mental çöküşdə olan biri ayağa qalxıbsa, sən də mütləq öhdəsindən gələcəksən fikirləşirsən. həyatındakı yarımçıq parçalarının böyük hissəsi tamamlanıb artıq, bəlkə də hamısı. arzuladığı "yoxmuş kimi olan" nişanı da baş tutub, xəyalını qurduğu avropa turu da. ona lazım olan, həqiqətən ehtiyac duyduğu adamı tapıbmış sən demə. hər halından bəllidir. indi necə sevinməyəsən axı? utanmasam "mənə niyə xəbər etməmisən?", "bişey-mişey var?" deyə mesaj da yazaram hələ. amma ağ eləməyim. şəkillərinə baxıb boş-boş gülməyə davam etmək tutacağım ən yaxşı iş olar hal-hazırda.

17 əjdaha! 06.02.2022 00:25, mariya kürüsü

#345103 şikayət

sözaltı sözlük

+20 əjdaha

Belə haqqında çox danışıb, çox bəlli eləmirəm, amma mən sevirəm e sözlüyü. Şərtsiz sevirəm özü də. Çöküb yerlərdə sürünəndə də, intellektual yazılardan partlayanda da, lap durğunluq dönəmində də.

Arada oturub fikirləşirəm ki, indi təsəvvür elə 16 yaşın var, sözlüklə tanış olmamısan və olmayacaqsan. implicit costun necə ağır olardı axı. Tanışlığın real və yaxın dostluğa çevrilən yazarlar olmayacaq, nə vaxtsa gecə sıxılanda "qarışdır" funksiyasın zorlamayacaqsan, mübahisə və müzakirələrə girməyəcəksən, bildiklərinin səhv olduğu sənə deyilməyəcək, ağrı-acıdan qıvrılanda, sevincdən göyün yeddinci qatına çıxanda bunları paylaşmayacaqsan, ağlına sual gələndə "yazarlardan biri cavab verər" deyib üz tutduğun məsləhətxana olmayacaq, postlarda hava ağırlığında söhbətlər etməyəcəksən, fərqli fikirlər oxumayacaqsan, oxuduqca özünü tanıma yolunda addımlar atmayacaqsan, beynində sual yaranmayacaq, umbay yağışına tutulandan sonra sənin də bəyənilmədiyin halların olduğu gerçəyiylə üz-üzə qalmayacaqsan, sırf entri yazmaq üçün öz ixtisasınla bağlı araşdırmalar edib entri girməyəcəksən. Bəli, sırf entri yazmaq üçün saatlarımı həsr edirdim mövzu ətrafında araşdırmaya. Axırda 2 abzas şey çıxırdı, amma necə xoşbəxt olurdum söz6 sözlük standartlarına cavab verən entri yazdığım üçün, yazdığımı camaat oxuduğu üçün. O qədər araşdırdım ki, bir müddət sonra universitetdə keçirilən dərsləri artıq "entri üçün əvvəldən öyrənmiş" vəziyyətinə gəlmişdim. Necə gözəl çağlar idi.

Düzdür, yazdıqlarımı başqa formada da yaşaya bilərdim, ancaq sizcə də sözlük bunun üçün çox ideal deyil? Sizcə də ən yaxşı versiyasın yaşamamışıq həmin sadalananların?

Hər şey bir yana, həmin insanları tanımamış öləcəkdik bəlkə. Fikirləşəndə necə vahiməli görünür axı. insan resursumuzun səviyyəsi necə olacaqdı?

Bəli, bizi də sözlük adam edib çıxardıb ortaya. Danmırıq bunu, böyük iftixar hissiylə deyirik. Canım sözlük, gözüm sözlük.

Kaş mücərrəd bir şey olmasaydı. Ancaq 0 və 1-lərdən ibarət olması faktı incidir. Ona görə deyirəm sözlük lüğəti və seçilmiş entrilərdən ibarət kitab yığaq, heç olmasa maddiyyata çevrilsin sözlüyün bir hissəsi.
Fiziki varlıq olsaydı da möhkəmcə qucaqlaşsaydıq, söhbətləşsəydik. Bəlkə onda ötürə bilərdim ona bəslədiyim bu ülvi hissləri, sevgini. Bu qədər üzvü, bu qədər yazını çiynində daşımaq asan olmamalıdır, bəlkə bir dərdi, bir sıxıntısı var bizə deyə bilmədiyi.-*
yoxsa yavaş-yavaş animizm yoluna girəcəm, sırf sözlüklə rabitəyə girə bildiyimə və məni eşidib başa düşdüyünə inanmaq üçün.

Keçirik əsas suala: Sözlük olmasaydı mən kim olardım?
Bütün məsələ budur.

14 əjdaha! 03.07.2022 02:18, mariya kürüsü

#353173 şikayət

Notice: Undefined variable: user_id in /var/www/soz6/sds-themes/vengeful-light/profile.php on line 1365

blok - başlıqlarını gizlət
Notice: Undefined variable: user_id in /var/www/soz6/sds-themes/vengeful-light/profile.php on line 1372

mariya kürüsü

son bəyənilənlər:

oxuyucuların bəyəndikləri: