sözlüyün partizanları

hechliyin_menasi
qardakı ayaq izləri
heçözüdəbilmir
momoko

vəzifəsinə xitam verilən partizanlar:
nellie crain

qeyd.
siyahı tamdır -*

sözlüyün moderatorları

bakirfikir
timidus
burdan qubadlıya qədər gedən adam
feronia
vosabi
sözaltı sözlük
dördüncü meymun
anyone
nellie crain

vəzifələrinə xitam verilən moderatorlar:
molla nəsrəddin
hououin kyouma
ubermensch

qeyd.
naməlum digər 2 moderator da ubermensch tərəfindən bildirildi.

what is enlightenment

Immanuel Kant tərəfindən 1784-cü ildə yazılmış və həmin ilin dekabr ayında "Berlinische Monatsschrift" jurnalında nəşr edilmiş məşhur esse. Kantın cavab verməyə çalışdığı sual Rahib Johann Friedrich Zöllner tərəfindən 1 il əvvəl intellektual elitanın cavablandırması üçün ortaya atılmışdır. O dövrün bir sıra intellektualları bu sualı cavablandırsa da, cavablar arasında ən təsirli və yadda qalanı Kantın yazdıqları olmuşdur. Kant aydınlanmanın - insanların intellektual tərəqqisinin zəif olmasının səbəbini onların zəka cəhətdən geri olması ilə deyil, onların düşünməkdən, araşdırmaqdan, sorğu-sual etməkdən qorxması ilə, bunları etməyə cəsarətlərinin olmaması ilə əlaqələndirmişdir. Bunu isə ilk dəfə romalı şair Horace-in istifadə etdiyi latınca motto - Sapere Aude ! - bilməyə cəsarət et! (dare to know!) ilə ifadə etmişdir.

aşağıda " Heinrich Heine Universität Duesseldorf" universitetinin doktorant tələbəsi Zülfiyyə Əbdürəhimova tərəfindən azərbaycan dilinə edilmiş tərcüməni oxuya bilərsiniz:

aydınlanma nədir?

Königsberg, Proyzen (Preusen, 30 Sentyabr 1784-ci il)

Aydınlanma bir insanın onun öz qəbahəti üzündən yetkin olmama vəziyyətindən çıxmasıdır. Yetkin olmama insanın başqa birinin onun üzərində rəhbərliyi olmadan öz ağlından istifadə etmə qabiliyyətinin olmamasıdır. Yetkin olmamağın səbəbi o zaman insanın özündən qaynaqlanır ki, onun səbəbi ağlın zəifliyindən yox, insanın öz ağlından başqasının rəhbərliyi olmadan istifadə etmək cəsarətsiziliyindən və sərbəst qərar verə bilmək bacarıqsızlığından irəli gəlir. Sapere aude! Deməli, aydınlanmanın aparıcı şüarı belədir: Öz ağlından istifadə edəcək cəsarətin olsun!

Tənbəllik və qorxaqlıq əsas səbəblərdir ki, insanların böyük əksəriyyəti hətta təbiət onları başqası tərəfindən idarəetmədən azad edəndən sonra (naturaliter maiorennes) belə ömür boyu yetkinləşməmiş qalır; elə eyni səbəbdən də özünü başqasının tabeliyinə atmaq insanlara çox asan gəlir. Yetkin olmamaq necə də rahatdır! Mənim əvəzimə düşünən bir kitabım, vicdanım olan bir din xadimim, qidalanmamı götür-qoy edən bir həkimim və s. varsa nəyə görə özümə əziyyət verlməliyəm?! Pulunu (xidmətlər və ya əşyalar üçün t.) ödəyə bildiyim müddətcə düşünməyimə ehtiyac yoxdur; başqaları mənim əvəzimə bütün darıxdırıcı işləri üzərlərinə götürəcəklər. insanların böyük əksəriyyəti (zərif cinsin nümayəndələri də daxil olmaqla) yetkinliyə doğru addımı təhlükəli sayır çünki hər şeyi nəzarət altında saxlayan qəyyumlar bunun üçün əllərindən gələni edirlər. Bu qəyyumlar öz ev heyvanlarını (idarə etdikləri insanları t.) ilk növbədə axmaq etməklə və onları qayğıkeşcəsinə mühafizə etməklə daha sonrakı mərhələdə bu zavallı yaradılışlara onlara verilən çərçivədən kənara çıxdıqları və sərbəst hərəkət etmək istədikləri halda bunun onlar üçün necə təhlükəli olduğunu aşılayarlar. Əslində isə bu təhlükə o qədər də böyük deyil, cünki bir neçə dəfə yıxılmaqla artıq sərbəst yeriməyi öyrənmək mümkündür, sadəcə belə bir nümunə (sərbəst addım atmaq istəyərək uğursuzluğa düçar olma t.) insanları təkrar uğursuz cəhdlərdən çəkindirir.

Məhz bu səbəbdən də hər bir insana onun üçün artıq təbii bir hala çevrilmiş yetkin olmama vəziyyətindən çıxış cəhdi çox çətin görünür. O, bu halını məmnuniyyətlə qəbul edib və müvəqqəti olaraq öz ağlından istifadə etmək qabiliyyətinə malik deyildir, çünki ona heç vaxt buna cəhd etməyə imkan verilməyib. Qaydalar və çərçivələr insanın təbiətin ona bəxş etdiyi qabiliyyətlərindən ağılla istifadə və ya sui-istifadəyə mane olmaqla insanın yetkin olmama vəziyyətini əbədi bir hala çevirən mexaniki vasitələrdir. Kim bu maneələri qıraraq ondan kənara çıxarsa hətta ən dar bir arxın üzərindən belə rahat hoppana bilməz, çünki o, bu cür sərbəst hərəkət növünə heç də alışqan deyil. Ona görə də düşüncə tərzi üzərində özü işləməklə yetkinləşmiş və özünə inamla addımlar atmağa nail olan çox az insan vardır.

Bunun əksinə olaraq bir kütlənin aydınlana bilmə ehtimalı daha böyükdür; və hətta ona bu cür bir azadlıq verilərsə onun qarşısını heç nə ala bilməz. Çünki bu kütlənin içərisində -hətta qəyyumların sırasında belə- həmişə bir neçə azad düşünən insan tapılacaq ki, yetkin olmaqlarını əngəlləyən boyunduruğu atdıqdan sonra, insan dəyərinə hörmətlə yanaşmağı və sərbəst düşünməyin hər bir fərdin borcu olduğunu ətrafa yayacaqlar. Burada xüsusi olan bir məqam vardır: bir zamanlar qəyyumlar tərəfindən boyunduruq altına salınan kütlə, sonradan özü qəyyumlarını boyunduruq altında qalmağa məcbur edəcək, əgər o (kütlə t.) buna özləri də hər cür aydınlanmaq qabilliyyətindən məhrum bəzi qəyyumları tərəfindən təhrik edilərsə. Xurafat yaymaq bu dərəcədə zərərlidir, çünki sonda bu xurafat onu yayanın özündən qisasını alır. Ona görə də bir cəmiyyət ancaq yavaş-yavaş aydınlana bilər. Hərçənd ki, bir inqilab vasitəsilə despotizmdən və zənginliyə və ya hakimiyyətə həris təzyiq rejimindən xilas olmaq olar, amma bu yolla heç vaxt əsl düşüncə islahatına nail olmaq mümkün deyil; əksinə köhnələri kimi böyük bir avam kütləyə yüyən olacaq yeni xurafat meydana gələcək.

Bu səbəbdən də aydınlanmaq üçün azadlıqdan başqa heç nəyə ehtiyac yoxdur; amma bu azadlıq azadlığın zərərsiz forması olmalıdır: öz ağlından hər mənada ictimai şəkildə istifadə edə bilmək azadlığı. indi hər bir yandan bu çağırışları eşidirəm: düşünməyın! Bir zabit: düşünmə, təkrar et! Vergi müfəttişi: düşünmə, vergini ödə! Din xadimi: düşünmə, inan! deyir. (Bu dünyada ancaq bir ağa vardır ki: istədiyiniz qədər və istədiyiniz şeylər haqqında düşünün, amma itaət edin, deyir.) Beləcə azadlığa hər yerdə məhdudiyyətlər qoyulur. Bəs hansı məhdudiyyət aydınlanma üçün maneədır, hansı yox və hansı hətta yararlıdır? – Mənim cavabım budur ki, ağlından ictimai istifadə (der öffentliche Gebrauch) həmişə azad olmalıdır və ancaq bu, insanlar arasında aydınlamanın yayılmasına səbəb ola bilər; ağıldan şəxsi istifadə isə (der Privatgebrauch) isə çox hallarda aydınlanmanın qarşısını kəsməyəcək dərəcədə məhdudlaşdırıla bilər (buna icazə olmalıdır anlamında, t.). Ağıldan ictimai istifadə dedikdə bir fərdin fikir adamı olaraq mütaliə edən kütlə qarşısında öz ağlından isitfadə etməsini nəzərdə tuturam. Ağlın şəxsi istifadəsi dedikdə isə bir insanın ona həvalə olunmuş vəzifəsində və ya yüksək bir postda vətəndaşlara xidmət edərkən ağlından istifadəsini nəzərdə tuturam. Hərçənd, ictimai maraqlara xidmət edən bəzi işlərdə müəyyən bir mexanizm olmalıdır ki, onun vasitəsilə icma üzvlərinin müəyyən hissəsi sadəcə passiv qalsın və süni razılıq yolu ilə hökumət tərəfindən ictimai maraqlara xidmət edən məqsədlərə yönəldilə ya da ən azından bu məqsədlərə ziyan gətirməkdən saxlanıla bilsinlər. Məhz burada düşünməyə icazə yoxdur, əksinə burada sadəcə tabe olmaq lazımdır. Lakin özünü bu ictimai idarəetmə sisteminin bir hissəsi hesab edən birisi eyni zamanda bir icmanın, hətta geniş mənada dünyəvi bir cəmiyyətin üzvü olaraq fikir adamı kimi kütləyə öz yazıları ilə müraciət edirsə (məsələn, mətbuat vasitəsilə t.), razılaşmamaq azadlığı o dərəcədə olmalıdır ki, bu onun üzvü olduğu həmin ictimai idarəetmə orqanına zərər vurmasın. Belə bir vəziyyətin mənfi təsirini düşünün: bir zabit özündən yüksək rütbədə olan birindən əmr alır və zabit bu əmrin məqsədəuyğunluğu və yararlılığı barədə fikir yürütməyə başlayır; onun vəzifəsi ancaq tabe olmaqdır. Lakin bir zabitə düşünən biri olaraq hərbi xidmətdə yanlışlıqlar barədə öz iradlarını bildirmək və həmin iradları cəmiyyətin müzakirəsınə çıxarmaq imkanı heç vaxt qadağan olunmamalıdır. Bir vətəndaş onun üzərinə qoyulmuş vergini ödəməkdən imtina edə bilməz; birinin ödəməli olduğu vergini kobudcasına tənqid etməsi bir skandal kimi cəzalandırılmalıdır (hansı ki ictimai asayişi poza bilər). Buna baxmayaraq, eyni vətəndaş məlumatlı biri olaraq cəmiyyət qarşısında vergilərin ədalətsizliyindən açıq şəkildə danışarsa, bu, heç də onun vətəndaş borcuna qarşı bir mövqedə çıxış etməsi anlamına gəlməz. Eyni prinsiplə, bir rahib şagirdlərinə və icmaya kilsənin qaydaları çərçıvəsində xidmət etməlidir, çünki o, həmin vəzifəyə bu şərtlə götürülmüşdür. Lakin bir din alimi olaraq onun tam azadlığı vardır və hətta onun borcudur ki, hansısa dini simvolun (və yaxud doktrinanın t.) yanlışlığı haqqında diqqətlə nəzərdən keçirilimiş, arxasında pis niyyətin dayanmadığı fikirlərini dinin və kilsənın daha yaxşı istiqamətlənməsi üçün ictimaiyyətə təqdim etsin. Bu cür davranış onun vicdanını heç cür ləkələmir. Çünki o, kilsə missiyasının aparıcı qüvvəsi olaraq öyrətdiyi şeyin özünün istədiyi kimi deyil, kilsənin qaydaları çərçivəsındə və onun adından yerinə yetirmək üçün həmin vəzifəyə təyin olunub. O, deyəcək ki: bizim kilsə bu və ya digər şeyləri öyrədir; bunlar kilsənin istifadə etdiyi arqumentlərdir. O, heç özünün belə tam əminliklə inanmadığı (dini t.) qaydaların təbliğinə özünü həsr edə bilər, çünki mümkündür ki, bu qaydaların içində həqiqət gizlənmiş olsun və ya onlarda ən azından dərində din ilə ziddiyyətdə olan bir şey yoxdur. Əgər rahib sonuncunu tapdığını fikirləşirsə, o, vəzifəsini vicdanla icra edə bilməyəcək və bu halda vəzifəsindən uzaqlaşmalıdır. Deməli, vəzifə öhdəlikli bir müəllimin ağlından öz icması qarşısında istifadə etməsi ancaq və ancaq “ağıldan şəxsi istifadə” sayılır, çünki bir dini icma kiçik (və ya lokal t.) bir yığıncaqdır, əsas odur ki, bu bir icmadır, ölçüsündən asılı olmayaraq; və bu icma qarşısında rahib azad deyildir və belə bir azadlıq üçün ona şərait yaradılmamalıdır, çünki o başqa birinin (kilsənin) adından işləyir. Bunun əksinə olaraq, rahibin bir din alimi kimi yazılarla ictimaiyyətə və hətta dünyaya müraciət etməklə öz düşüncəsindən istifadə etməyə və şəxsən öz adından danışmağa sərhədsiz azadlığı vardır. Çünki xalqın qəyyumlarının (ruhaniyyət işlərində) özlərinin yetkin olmasına gərək yoxdur düşüncəsi absurdları əbədiləşdirən bir absurddur.

Bəs, rahiblərdən ibarət bir cəmiyyətin – məsələn Kilsə Məclisi – və ya ali Classis’in (Hollandlar bu cür cəmiyyəti belə adlandırır) hüququ olmamalıdırmı ki, öz aralarında and içməklə dəyişilməsi mümkün olmayan bir doktrina üzərində razılaşsınlar, bununla da kilsənin hər bir üzvü və onların vasitəsilə xalqın üzərində davamlı qəyyumluğu təmin etmiş, həm də əbədiləşdirmiş olsun? Mənim cavabım belədir: bu heç cür mümkün deyildir. Belə bir razılaşma ümumiyyətlə mənasızdır və insanların aydınlanmasını həmişəlik olaraq əngəlləyəcək; və o hətta ən yüksək instansiyalar, Raystaq (Reichstag) və ya hansısa təntənəli müqavilələrlə təsdiq olunsa belə. Bir dövr, belə razılaşmalar yaradaraq ondan sonra gələn dövrdə biliyin genişlənməsi, yanlış təsəvvürlərin təmizlənməsi və ümumiyyətlə aydınlanmanın davam etməsi imkanlarına maneə yaratmamalıdır. Belə bir addım insan təbiətinə – hansının ki əsasını daim irəliyə gediş təşkil edir – qarşı cinayətdir və sonrakı nəslin belə razılaşmaları səlahiyyətsiz və özbaşına qəbul edilmiş sayaraq onlardan imtina etməyə tam haqqı vardır.

Xalq üçün nələrin qanun olaraq qəbul edilib edilməməsinin məqbulluğu belə bir sual ilə yoxlanmalıdır: bu xalq özü belə bir qanuna tabe olmaq istəyirmi? Bunu müəyyən bir qısa zaman çərcəvəsində – daha yaxşı düzəlişlər gözləntisi ilə – etmək olar ki, müəyyən bir qayda-qanun bərqərar olsun. Bu zaman hər bir vətəndaşa, xüsusən də rahibə, azadlıq verilməlidir ki, o, bir fikir adamı olaraq açıq şəkildə yazılar vasitəsilə dövrünün təsisatlarının qüsurları haqqında öz düşüncələrini ifadə etsin. Müvəqqəti tətbiq edilmiş bu qayda-qanun mövcud vəziyyətin, təsisatların incəlikləri haqqında anlayış açıq şəkildə elə bir nöqtəyə çatana qədər saxlanılır ki, vətəndaşlar səslərini birləşdirməklə (hamısının yox əlbəttə) hökmdara belə bir təklif göndərir: dərin götür-qoydan sonra dini təsisata dəyişilik etməyə qərar vermiş icmalar hakimiyyət tərəfindən qorunsun və köhnə dini təsisatda qalmaq istəyənlərə mane olunmasın. Lakin açıq şəkildə heç kim tərəfindən tənqid olunmayan dini qaydaları qəbul etmək və bununla da bəşəriyyətin yaxşılaşmağa doğru irəliləyişini məhv etmək, eyni zamanda da gələcək nəsli nəzərə almamaqla ona (gələcək nəslə t.) zərbə vurmaq yol verilməzdir. Bir insan bilməli olduğu şeylərdə aydınlanmanı şəxsən özü üçün, o da ancaq müəyyən müddətə, arxa plana keçirə bilər; lakin ondan ümumiyyətlə vaz keçmək – tək özü üçün olsun, ya da daha pisi: sonrakı nəsil üçün – insanlığın müqəddəs hüquqlarının pozulması və ayaqlar altına salınması deməkdir.

Əgər bir şeyə xalqın özünün belə öz taleyi üçün qərar vermək haqqı yoxdursa, monarxın buna heç haqqı olmamalıdır; çünki onun qanunvericilik statusu məhz bu prinsipin üzərində dayanır ki, o, bütün xalqın iradəsini öz iradəsində birləşdirmiş olsun. Əgər monarx bütün həqiqi və ya təsəvvür edilən (və ya həyata keçirilmiş və ya planlaşdırılmış t.) irəliləyişlərin vətəndaş üçün tətbiq edilmiş qayda-qanun çərçivəsində baş verdiyini görərsə, o zaman həmin monarx xalqın mənəvi seçimlərini (burada din t.) onların öz öhdəsinə buraxmalıdır; monarx buna qətiyyən qarışmamalıdır, lakin qoruyucu funksiyasını saxlamalıdır ki, bir fərd digərinə güc tətbiq edərək onun aydınlanmasına mane olmasın. Bir monarx öz əzəmətini o zaman zədələyir ki, o, hökumətinə xalqın öz dini baxışlarını əks etdirdiyi yazılara nəzarət hüququ verir, hətta o, (hökmdar t.) bu addımı pis niyyətlə atmasa belə. Bu zaman o özünü belə bir qınağa məruz qoyur: Caəsar non əst supra grammatıcos, həm də – və daha çox – əgər o, öz ali hakimiyyətini o qədər alçaltmış olsun ki, öz dövlətində, öz rəiyyətinə qarşı bəzi tiranların dini despotizmini müdafiə etsin.

Əgər soruşularsa: biz indi aydınlanmış bir dövrdə yaşayırıqmı? Cavabım belədir: Yox, lakin aydınlanma dövründə yaşayırıq. Çünki, əgər kimsə fikirləşirsə ki, insanlar dini məsələlərdə öz düşüncələrindən başqasının rəhbərliyi olmadan yaxşı istifadə edə bilərlər, hər şeyi hal-hazırda olduğu kimi qəbul edərək analiz edib deyə bilərəm ki, bu o qədər də doğru fikir deyil, yəni belə bir aydınlanma dövrünə hələ yetişməmişik. Lakin artıq aydınlığa doğru gedən yolun açıq olmasını, aydınlanmağa qarşı maneələrin get-gedə azaldığını deməyə imkan verən işarələri görürük. Bu baxımdan, indiki dövrü aydınlanma dövrü və ya Fridrix (Friedrich) əsri adlandıra bilərik.

Bir hökmdar insanlara dini məsələlərdə heç nəyi qanun kimi tətbiq etməyi, əksinə onlara bunda tam azadlıq verməyi dilə gətirməyi özünə alçaldıcı bir hərəkət saymırsa və əksinə, bunu özünün borcu sayırsa, yəni o artıq təkəbbürlü “tolerant” sözünü özündən uzaqlaşdırıbsa: onda o özü artıq aydınlanıb və bu günkü, həmçinin də sonrakı dünyada ən azından insan övladının aydınlığını azad edən və bununla da onlara vicdan məsələlərində öz düşüncəsindən sərbəst istifadə etmək azadlığı verən bir hökmdar kimi təriflənməyi artıq haqq etmişdir. Onun rəhbərliyi altında yüksək hörmətə layiq din xadimləri öz vəzifə borclarına zərər gətirmədən qəbul etdikləri simvoldan (dini qaydalardan t.) fərqli olan qərarlarını və düşüncələrini bir ziyalı kimi azad və açıq şəkildə dünyaya təqdim edə bilər. Bu cür vəziyyətdən heç bir vəzifə öhdəliyi olmayan birisi daha çox yararlana biləcək. Bu azadlıq ruhu ətrafa yayılmağa başlayır, hətta o yerlərə də ki, orada o, öz vəzifəsindən sui-istifadə edən və ya onu doğru dərk etməyən hökumətlərin maneələri ilə mübarizə aparmalı olur. Lakin onlar (belə hökumətlər t.) azadlığın ictimai sabitlik və birliyə nail olmaq üçün heç bir təhlükə törətmədiyini görəcəklər.

Burada aydınlanmanın əsas ideyasını, insanın özündən qaynaqlanan səbəblərdən yetkin olmamaqdan xilas olmasını, əsasən dini kontekstdə izah etdim. Çünki, əvvəla incəsənət və elm məsələlərində xalqın üzərində qəyyumluq rolunu oynamaq bizim hökmdarların marağında deyil. ikincisi, dini məsələlərdə yetkin olmamaq yetkin olmamağın ən zərərli və qürura xələl gətirən formasıdır. Sənət və elm məsələlərində xalqa azadlıq verən bir dövlət başçısının düşüncə tərzi bir az da irəliyə gedərək bir şeyi anlayır ki, əgər o xalqa öz düşüncəsindən açıq şəkildə istifadə etməklə onlara daha yaxşı qanunların yazılması təklifinə icazə verərsə, bu onun qanunvericiliyinə heç də təhlükə yaratmır, hətta xalq hazırki qanunvericiliyi ciddi tənqid etsə belə; buna (belə bir addımı atan monarxa t.) bizim artıq gözəl bir nümunəmiz vardır; ondan əvvəl heç bir monarx belə bir addım atmayıb.

Hətta özü aydınlanmış və kölgədən qorxmayan və eyni zamanda ictimai sabitliyi təmin edən nizam-intizamlı və izdihamlı orduya malik bir rəhbər heç bir azad dövlətin deməyə cürət etmədiyi bir şeyi öz təbəələrinə deyə bilər: istədiyiniz qədər və istədiyiniz şeylərlə mübahisə edin (tənqidi düşünün anlamında t.), amma itaət edin! Bu, bizə insani hərəkətlərin qəribə və gözlənilməz bir nümunəsini göstərir (onu (insani hərəkətləri t.) bütünlükdə nəzərdən keçirsək onun içərisində demək olar ki, hər şeyin paradoksal olduğunu görərik). Belə ki, geniş vətəndaş azadlığı xalqın intellektual (və ya fikir t.) azadlığı üçün dəyərlidir və ona eyni zamanda aşa bilməyəcəyi maneələr qoyur; bunun əksinə olaraq vətəndaş azadlığının daha dar çərçivədə olması fikir azadlığına, onun tam gücü ilə genişlənməsinə şərait yaradır. Ona görə də təbiətin qayğısına çox diqqətlə qaldığı bu toxum -insanın azad düşünmək meyli və peşəsi- o sərt qabığın içərisində cücərərsə, zaman keçdikcə o, əks təsirlə xalqın düşüncə tərzinə təsir göstərər ( ki, insanlar bununla yavaş-yavaş azad fəaliyyət bacarığına yiyələnirlər). Sonda bu hətta hökumətlərin əsas xarakterinə təsir edir və onlar mahiyyəti bir qurğudan (əşyadan) daha çox şey kəsb edən insana onun ləyaqətinə uyğun yanaşmağın hətta hökumətlərin özləri üçün faydalı olduğunu öyrənir.

qeyd.
esse azərbaycan dilinə bir çox şəxs tərəfindən tərcümə olunmuşdur.

mənbə:
https://en.m.wikipedia.org/wiki/Answering_the_Question:_What_Is_Enlightenment?
https://bakuresearchinstitute.org/az/immanuel-kant-aydinlanma-nədir/

nisbilik nəzəriyyəsi

əlaqəli başlıqlar:
(bax: nisbilik)

cəhənnəm başqalarıdır

jean paul Sartre-ın səhv başa düşülən ifadələrindən biri.

həmçinin, özü də bunu etiraf edib. O, burada insanların xarakter etibarı ilə qəddar, paxıl, vəhşi və s. olmasını nəzərdə tutmur. Nəzərdə tutduğu şey, bizim özümüzün zaman keçdikcə digər insanların fikirlərinin əsiri olmağımızdır. Sartre Hegelin "ağa və qul" (master and slave) dialektikasından təsirlənərək bu fikirlərini öz şah əsəri " varlıq və yoxluq"-da 3-cü hissədə bildirir. O, varlığın ən son formalaşan 3-cü xüsusiyyətini başqaları-üçün-varlıq (I'être-pour-autrui) adlandırır. Varlıq digərlərinin fikirlərindən təsirlənərək öz şəxsiyyətini formalaşdırır və onların fikirlərinə əsasən özünü subyekt yox, obyekt kimi görməyə başlayır. Ona görə təkbaşına özümüz özümüz haqqında heç bir halda kimlik formalaşdıra bilmərik. Biz digərləri ilə təmasda olduqdan sonra kim olduğumuzu təyin edirik. Biz digər insanların düşüncəsindəki "biz" olmağa çalışırıq. Sartre belə deyir bu haqda:

"Çünki... biz özümüz haqqında düşünməyə başladıqda, kim olduğumuzu bilmək istədikdə... biz digər insanların bizim haqqımızda olan biliyindən istifadə edirik... Biz özümüzü bunlara əsasən mühakimə edirik."

Nəticə etibarilə biz özümüzdən asılı olmadan digərlərinin fikirlərinin əsiriyik, azad olmaq istəsək sosial münasibətlərimiz tamamilə pozulacaq...Sartre bu səbəbdən Nobel mükafatından imtina etmişdi. Düşünürdü ki, o bu mükafatı alsa gərək əvvəlki "Sartre" kimi yox, "Nobel mükafatı laureatı Sartre" kimi yazsın. Çünki bu mükafat ona cəmiyyət qarşısında öhdəlik qoyacaq, buna görə də yazmaq istədikləri sərhədlənmiş olacaq...

rəsul rza

Filosof Heydər hüseynova yazdığı məktubunda nizaminin "xosrov və şirin" poemasının bitmək bilməyən tərcüməsindən təngə gələn şair -*. Məktubdan:

"Bu tərcümələr, Heydər, məni lap təngə gətirib. Beş-altı tərcüməm var, yazmaq üçün ölürəm, ancaq bu zalım oğlu Nizamidə insaf yoxdur ki, yazıb yaza bildikcə. Ə kişi, 14 min misra da poema olar? Cəfər Xəndan Cəfər Xəndanlığı ilə bu uzunluqda yazmır..."



mənbə

kvant mexanikası

Əlaqəli başlıqlar:
(bax: kvant fizikası)

Werner Heisenberg

nəzəri fizikanı eksperimental fizikadan daha çox sevən fizik.

almaniyada o dövrlər (xx əsrin əvvəlləri) doktorantura tezisinin müdafiəsi zamanı fiziklər nə qədər mükəmməl nəzəri fizikanı bilməsindən asılı olmayaraq, nəzəri fizikayla yanaşı olaraq, eksperimental fizikadan da kurs (praktikum) götürməli və tezisin müdafiəsi zamanı da digər fənlərlə yanaşı, onların hər ikisindən də olan şifahi imtahandan keçməli idilər. Heisenbergin doktorantura üçün tezis mövzusu elmi rəhbəri Arnold Sommerfeld tərəfindən verilmişdi və mövzu isə Sommerfeldə vaxtilə Münhendəki izar çayının axın istiqamətini dəyişmək üçün yeni kanal açmaq istəyən şirkət tərəfindən verilən problemlə bağlı idi. Problem düzgün şəkildə axan mayenin necə turbulent axışa çevrildiyini təyin etmək (daha doğrusu təxmin etmək) idi. (hansı ki, bu problem bu gün də həll olunmamış qalır. Clay Mathematics Institute tərəfindən Minilliyin məsələləri (baxma: Millenium prize problems) problemlərindən biri olan, klassik fizikanın bu gün də həll olunmamış problemlərindən olaraq qalan, özlü (baxma: viscocity) mayenin 3 ölçüdə hərəkətini modelləşdirən differensial navier-stokes tənliklərinin həmişə həllinin mövcudluğunu və ya olmadığını sübut etməkdir. Bu tənliklər praktiki baxımdan çox dərin əhəmiyyətə və geniş tətbiq sahələrinə malikdirlər, xüsusən hava proqnozlarının təyin edilməsində bu modeldən istifdə olunur (baxma: chaos theory), (baxma: navier-stokes equation)) Heisenbergin hazırladığı 59 səhifəlik tezis "Stabilität und Turbulenz von Flüssigkeitsströmen" (maye axınlarını davamlılığı və turbulentliyi) adı ilə fakültə tərəfindən müvəffəqiyyətlə qəbul olundu və imtahanda ən aşağı qiymət aldığı müəllimi - Wilhelm Wienin redaktoru olduğu elmi jurnalda da çap olundu. ancaq tezis qəbul edildikdən sonra, heisenberg doktor adını qazana bilmək üçün müdafiə komissiyasının önündə şifahi imtahandan da keçməli idi. Ümumilikdə yekun qiymətləndirmə tezis və hər bir fəndən verilən qiymət əsasında aparılırdı. Müdafiə komissiyasında nəzəri fizika üzrə Sommerfeld, eksperimental fizika üzrə wien və riyaziyyat, astronomiya fənlərinin də hər biridən 1 alim təyin olunmuşdu. Heisenberg Sommerfeld tərəfindən verilən nəzəri fizika və riyaziyyat üzrə sualları asanlıqla cavablandırsa da, astronomiya və Wien tərəfindən eksperimental fizika üzrə verilən sualları cavablandıra bilmədi. Heisenberg-in Thomas Kuhn-a (baxma: Thomas Kuhn), (baxma: the structure of scientific revolutions) verdiyi müsahibədə bu hadisə ilə bağlı xatirələri:

"Mən hansı ki, düşünməli olduğum halda, eksperimental tapşırıqla bağlı veriləcək olan əsas suallar haqqında düşünməmişdim. imtahan zamanı Wien mənə Fabry-Perot interferometrinin əksetmə gücü ( resolution power - cihazın aird edəbildiyi ən kiçik dalğa uzunluğu fərqi) barədə sual verdi...
Bu mənim heç vaxt oxumadığım bir şey idi. imtahan ərzində, əlbəttə, mən onu tapmağa çalışdım, ancaq qısa zaman ərzində bacara bilmədim. Ardınca o, daha da əsəbiləşdi və mənə mikroskopun əksetmə gücü barədə sual verdi. Mən bunu bilməyəndə, o, mənə teleskopun əksetmə gücü barədə sual verdi və mən onu da bilmədim.
sonra o, məndən qurğuşun akkumulyator batareyasının iş prinsipi barədə sual soruşdu və mən bunu da bilmədim. Mənə onun bu sualları məni imtahandan bilərəkdən keçirməmək üçün verib, vermədiyi aydın deyil. Güman ki, bundan sonra da Sommerfeldlə onun qızğın mübahisəsi baş tutdu."

Eksperimental fizika üzrə götürdüyü kursda Wien tərəfindən ona tapırıq verilməsinə baxmayaraq, o, müəyyən səbəblərdən dolayı bu tapşırığı yerinə yetirməmişdi (həm cihazların istifadəsi barədə təlimatlardan xəbərdar olmadığına görə, həm eksperimental fizika ilə daha əvvəl maraqlanmadığına görə və s.). ilk başlarda buna cəhd etsə də, sonralar bu alınmadığına görə o, eksperiment aparmaqla keçirməli olduğu vaxtının böyük hissəsini ya nəzəri fizika ilə məşğul olmağa sərf etmiş, ya da ki, eksperimental fiziklərlə atom nəzəriyyəsi barədə müzakirələr aparmışdı. Bu səbəbdən də o, heç işlədəcəyi cihazlar üzrə veriləcək olan nəzəri suallara belə hazırlaşmamışdı. Wien onun verdiyi tapşırığı Heisenbergin yerinə yetirmədiyini öyrənəndə bundan çox qıcıqlanmışdı və imtahan zamanı verdiyi suallar da eksperimentə başlamamışdan qabaq bu cihazların quraşdırılması barədə idi və hansı ki, bir çoxu Wien tərəfindən leksiyalarda izah edilmişdi.Hımçinin, Verilən suallar doktorantura tələbəsi üçün əslində olduqca sadə idi, ancaq Heisenbergin heç birini cavablandıra bilmədiyini görən Wien onu kəsmək istədikdə, Sommerfeld məsələyə qarışır və Heisenbergin nəzəri fizika üzrə dahi olduğunu bildirərək, onunla qızğın müzakirəyə girir və müzakirənin sonunda, Wienin ən aşağı qiyməti Heisenbergə verərək onun yekun ortalamada mümkün olan ən aşağı qiymətlə doktor adını qazanmasına nail olur. Sommerfeld yekun hesabatda onu "unikal dahi", Wien isə "hədsiz məsuliyyətsiz" adlandırmışdı.

Heisenberg bu imtahandan aşağı qiymət aldığına görə özünü bağışlamırdı, hətta Sommerfeldin onun doktor adını qazanmağı münasibətilə öz evində təşkil etdiyi xırda yığıncağa belə getməmişdi. imtahandan sonra o, depressiv halda evə gedib, öz əşyalarını yığıb gecə qatarı ilə Göttingenə - Max Bornun yanında laborant kimi çalışmaq üçün yola düşmüşdü. o bornu imtahandakı müvəffəqiyyətsizliyi barədə məlmatlandırdıqdan sonra, ona bu sözləri demişdi: "Mən hələ də, sizin məni işə götürmənizə təəccüb edirəm."

Bu imtahandan sonra o mikroskop və digər oxşar cihazların əksetmə gücü barədə dərindən öyrəndi. Maraqlı olan bir məqam da budur ki, qeyri-müəəyyənlik münasibətlərini təyin edən zaman o, mikroskopun əksetmə gücündən istifadə etmişdi. Daha sonralar Heisenberg imtahandakı bu müvəffəqiyyətsizliyi barədə bunları söyləmişdi: "beləliklə, güman edə bilərik ki, Mən qamma-şüa mikroskopu və qeyri-müəyyənlik prinsipi barədə işlərimdə, bu zəif qiymət aldığım imtahandan qazandığım bilikləri istifadə etdim."

Nəticə etibarilə, buradan çıxan əsas nəticə budur ki, stephen hawkingin də dediyi kimi "biliyin ən böyük düşməni bilməmək deyil, bildiyini zənn etməkdir". Heisenberg "qeyri-müəyyənlik prinsipi"ni zəif bildiyi mövzunu öyrənərkən, bu mövzu üzrə eksperimentlər apararkən kəşf etdi. O, imtahandan asanlıqla keçirilsəydi, bəlkə də bunu o yox, başqa bir fizik kəşf edəcəkdi. Burada Wienə qətiyyətli və prinsiplərinə sadiq olduğuna görə təşəkkür düşür.



mənbə.
The Historical Development of Quantum Theory, Volume 2, səh. 67
Eurekas and Euphorias: The Oxford Book of Scientific Anecdotes, səh. 344
https://www.aps.org/publications/apsnews/199801/heisenberg.cfm
https://en.wikipedia.org/wiki/Werner_Heisenberg)